Evanjely Masin'i Jesoa-kristy Nosoratan'i Md. Lioka

Toko voalohany

⁴⁸ fa notsinjoviny ny fiambanian'ny ankizivaviny. Fa indro, hatramin'izao, dia hataon'ny taranaka rehetra hoe, sambatra aho, ⁴⁹ satria efa nanao zavatra lehibe tamiko ilay Mahefa. Ary masina ny anarany, ⁵⁰ sady amin'izay matahotra azy hatramin'ny taranaka fara mandimby ny famindram-pony. ⁵¹ Nahefa asa mahery tamin'ny sandriny izy: dia nampihahafiny izay niavonavona tamin'ny fisainan'ny fony;

⁵² naongany hiala tamin'ny fiketrahany ny mpanapaka, fa ny ambany kosa nasandrany; ⁵³ ary ny noana novokisany soa, fa ny mpanan-karena kosa, dia nampodiny mitondra tànam-polo. ⁵⁴ Niahy an'Israely mpanompony izy, fa tsy hadinony ny famindram-pony

⁵⁵ tamin'i Abrahama sy ny taranany mandrakizay, araka ny efa voalazany tamin'ny razantsika. ⁵⁶ Nitoetra tokony ho telo volana tao amin'i Elizabeta Maria vao nody tany an-tranony.

⁵⁷ Ary nony tonga ny andro hiterahan'i Elizabeta dia tera-dahy izy.

⁵⁸ Ary nahare ny miara-monina aminy sy ny havany fa efa nankalazain'ny Tompo ny famindram-pony taminy, ka dia niara-nifaly taminy. ⁵⁹ Nony afaka havaloana, dia tonga izy hamora ny zaza, ary Zakaria, araka ny anaran-drainy no ndeha hataony anarany. ⁶⁰ Fa niteny reniny nanao hoe: Tsia, tsy izany, fa hatao hoe Joany izy. ⁶¹ Fa hoy izy ireo taminy: Tsy misy na dia iray aza amin'ny havanao manana izany anarana izany. ⁶² Ary nanao baikon'ny moana tamin'ny rainy izy ireo nanontany izay tiany hatao anarany. ⁶³ Dia nangataka fàfana izy, ary nanoratra hoe: Joany no anarany; ka gaga daholo izy rehetra. ⁶⁴ Niaraka tamin'izay dia nisokatra ny vavany, ary nivaha ny lelany, dia niteny izy ka nisaotra an'Andriamanitra. ⁶⁵ Azon'ny tahotra avokoa ny mponina rehetra teny manodidina, ary niely hatraiza hatraiza tany amin'ny tendrombohitr'i Jodea izany zava-mahatalanjona rehetra izany. ⁶⁶ Ary izay rehetra nahare dia nandatsaka izany tao am-pony ka nanao hoe: Ho inona re ity zaza ity? Fa nomba azy ny tànan'ny Tompo. ⁶⁷ Ary dia feno ny Fanahy Masina Zakaria rainy, ka naminany hoe:

⁶⁸ Isaorana anie ny Tompo Andriamanitr'Israely, noho izy namangy sy nanavotra ny olony,

⁶⁹ ary nanangana tandro-pamonjena ho antsika tao amin'ny fokon'i Davida mpanompony, ⁷⁰ araka ny nolazainy tamin'ny vavan'ireo mpaminaniny masina hatramin'ny andro tany aloha, ⁷¹ mba hamonjy antsika amin'ny fahavalontsika sy amin'ny tànan'izay rehetra mankahala antsika. ⁷² He izany nanaovany famindra-po tamin'ny razantsika sy nahatsiarovany ny fanekeny masina,

⁷³ dia ilay fianianana nataony tamin'i Abrahama razantsika hanome antsika ⁷⁴ fahafahana amin'ny tànan'ny fahavalontsika, mba hanompoantsika azy tsy aman-tahotra, ⁷⁵ amim-pahamasinana sy fahamarinana, eo anatrehany amin'ny andro rehetra hiainantsika. ⁷⁶ Ary hianao kosa, ry zaza, dia hatao hoe mpaminanin'ny Avo indrindra, fa hialoha ny Tompo hianao hamboatra ny halehany,

⁷⁷ mba hanome ny olony ny fahalalam-pamonjena amin'ny famelana ny helony: ⁷⁸ Noho ny halehiben'ny famindra-pon'ny Andriamanitsika nampiposaka ny Masoandro hamangy antsika avy any ambony,

⁷⁹ mba hanilo izay rehetra mipetraka ao amin'ny maizina sy amin'ny aloky ny fahafatesana, ka hitarika ny diantsika ho amin'ny làlam-piadanana. ⁸⁰ Dia nitombo sy nihahery fanahy ny zaza, ary nitoetra tany an'efitra, ambara-pahatongan'ny andro hisehoany amin'Israely.

Toko faha-2

¹ Tamin'izany andro izany dia namoaka didy Sezara Aogosta hampanoratra ny anaran'ny vahoakany amin'ny tany rehetra:

² dia fony Sirinosy no governoran'i Siria no natao izany fanoratana voalohany izany. ³ Dia samy nankany amin'ny tanàna nihaviany avy izy rehetra mba hosoratana. ⁴ Ary Josefa koa niakatra avy tany Galilea avy tao an-tanàna Nazareta hankany Jodea ho ao an-tanànan'i Davida atao hoe Betlehema, fa taranaka sy fianakavian'i Davida izy, ⁵ mba hosoratana izy sy Maria vadiny izay bevohoka. ⁶ Fa raha tao izy, dia tonga ny fotoana hiterahan'i Maria, ⁷ ary niteraka ny zanany lahimatoa izy, dia nohodidininy lamban-jaza ka nampandriny teo amin'ny fihinanam-bilona, fa tsy nisy hitoerany tao an-tranom-bahiny. ⁸ Ary tamin'izany tany izany nisy mpiandry ondry nitoetra tany an-tsaha niambina ny ondriny nandritra ny alina.

⁹ Ary nisy anjelin'ny Tompo nitsangana teo anilany, ary ny voninahitr'Andriamanitra nanelatrelatra manodidina azy ireo ka natahotra dia natahotra izy. ¹⁰ Fa hoy ny anjely taminy: Aza matahotra hianareo, fa indro fifaliana lehibe ho an'ny vahoaka rehetra no lazaiko aminareo; ¹¹ fa Mpamonjy no teraka ho anareo anio ao an-tanànan'i Davida, dia Kristy Tompo. ¹² Ary izao no ho famantarana ho anareo: dia hahita zaza kely voahodidina lamba-jaza, sady mandry ao amin'ny fihinanam-bilona hianareo. ¹³ Ary niaraka tamin'izay nisy antokon'ny tafika any an-danitra tonga teo amin'ilay anjely, ka nidera an'Andriamanitra, nanao hoe: ¹⁴ Voninahitra ho an'Andriamanitra any amin'ny avo indrindra, ary fiadanana etý an-tany ho amin'ny olona tsara sitra-po! ¹⁵ Ary rahefa nandao azy ireo ny anjely ka nankany an-danitra, dia niresaka ny mpiandry ondry nanao hoe: Andeha isika ho any Betlehema hizaha izany zavatra vao tonga nampahafantarin'ny Tompo antsika izany.

¹⁶ Dia nankany haingana izy, ka nahita an'i Maria sy Josefa ary ny Zaza kely mandry amin'ny fihinanam-bilona; ¹⁷ ary rahefa nahita izy ireo, dia nampiely ny teny nolazaina taminy ny amin'izany Zaza izany.