Evanjely Masin'i Jesoa-kristy Nosoratan'i Md. Joany

Toko voalohany

⁴⁷ Nony nahita an'i Natanaely tamy nanatona azy Jesoa, dia nilaza azy hoe: Io no tena Israelita tokoa, izay tsy misy fitaka. ⁴⁸ Ka hoy Natanaely taminy: Ahoana no nahalalanao ahy? Ary hoy ny navalin'i Jesoa azy: Talohan'ny niantsoan'i Filipo anao, dia hitako tao ambanin'ny aviavy hianao. ⁴⁹ Dia namaly azy Natanaely, ka nanao hoe: Raby ô, Hianao no Zanak'Andriamanitra, hianao no Mpanjakan'Israely. ⁵⁰ Ary hoy Jesoa taminy: Mino hianao satria nilazako fa hitako tao ambanin'ny aviavy hianao; mbola hahita zava-dehibe noho izany aza hianao. ⁵¹ Dia hoy koa izy: Lazaiko marina dia marina aminareo fa hahita ny lanitra misokatra sy ny anjelin'Andriamanitra miakatra sy midina ao ambonin'ny Zanak'olona hianareo.

Toko faha-2

¹ Nony afaka hateloana dia nisy fampakaram-bady tany Kanà any Galilea, ary tao ny renin'i Jesoa.

² Jesoa sy ny mpianany koa dia nasaina tao amin'ny fampakaram-bady. ³ Nony inona, lany ny divay ka hoy renin'i Jesoa taminy: Tsy manan-divay izy ireo. ⁴ Ary hoy Jesoa taminy: Izaho sy hianao moa no ahoana amin'izany, ravehivavy? Tsy mbola tonga ny fotoako. ⁵ Dia hoy reniny tamin'ny mpanompo: Ataovy izay rehetra holazainy aminareo. ⁶ Ary nisy siny vato enina teo, fidiovana araka ny fanaon'ny Jody, nahalany rano indroa na intelon'ny famarana avy, ⁷ ka hoy Jesoa tamin'izy ireo: Fenoy rano ireo siny ireo. Dia nofenoiny hatramin'ny molony. ⁸ Ary hoy Jesoa taminy: Tovozy amin'izao, ka ento amin'ny mpandahatra ny fanasana. Dia nentiny. ⁹ Vao nanandrana ny rano voaova ho divay ny mpandahatra ny fanasana (izay tsy nahalala ny nihaviany, fa ny mpanompo nanovo ny rano no nahalala), dia niantso ny mpampakatra ¹⁰ ka nanao taminy hoe: Ny an'ny olona rehetra, dia ny divay tsara no arosony aloha, ary rahefa nisotro be ny olona vao arosony izay tsy tsara loatra; fa ny anao kosa, dia ny divay tsara indray no notahirizinao mandraka ankehitriny. ¹¹ Izany nataon'i Jesoa tany Kanà any Galilea izany no voaloham-pahagagana nataony; naneho ny voninahiny izy ka nino azy ny mpianany.

¹² Ary rahefa afaka izany, dia nidina nankany Kafarnaoma izy sy ny reniny mbamin'ny rahalahiny sy ny mpianany; nefa tsy nitoetra ela tao izy ireo. ¹³ Ary akaiky ny Pakan'ny Jody, ka niakatra tany Jerosalema Jesoa.

¹⁴ Hitany tao anatin'ny tempoly ny mpivarotra omby aman'ondry sy voromailala ary ny mpanakalo vola nipetraka tao, ¹⁵ ka nanao kotopia tamin'ny tady madinika izy, dia nandroaka azy rehetra mbamin'ny omby aman'ondry hiala amin'ny tempoly; nararany ny volan'ny mpanakalo vola, nazerany ny latabatra, ¹⁶ ary hoy izy tamin'izay nivaro-boromailala: Esory eto ireo, fa aza ataonareo trano fivarotana ny tranon'ny Raiko. ¹⁷ Dia tsaroan'ny mpianany fa efa voasoratra hoe: Ny fitiavako ny tranonao no maharitra ny aiko. ¹⁸ Fa niteny kosa ny Jody ka nanao hoe: Inona no famantarana asehonao aminay no manao toy izao hianao? ¹⁹ Dia namaly azy Jesoa nanao hoe: Ravao ity tempoly ity, fa hatsangako indray amin'ny hateloana. ²⁰ Ka hoy ny Jody: Enina amby efa-polo taona no nanaovana ity tempoly ity, ka hianao ve dia hanangana azy indray amin'ny hateloana e? ²¹ Ny vatany anefa no tempoly nolazainy. ²² Ary nony tafatsangana tamin'ny maty izy, dia tsaroan'ny mpianany fa voalazany izany, ka nino ny Soratra Masina sy ny teny voalazan'i Jesoa izy ireo. ²³ Raha mbola tany Jerosalema izy tamin'ny fetin'ny Paka, dia maro no nino ny anarany, fa nahita ny fahagagana nataony;

²⁴ nefa tsy natoky azy ireo Jesoa, satria nahalala azy rehetra izy, ²⁵ sady tsy mba nila olona hilaza aminy ny amin'ny olona izy, fa ny tenany ihany dia nahalala izay ao am-pon'ny olona.

Toko faha-3

¹ Nisy Farisiana anankiray atao hoe Nikodema, isan'ny lehibe tamin'ny Jody.

² Nankao amin'i Jesoa izy nony alina ka nanao taminy hoe : Raby, fantatray fa Mpampianatra avy amin' Andriamanitra hianao, fa tsy misy olona hahefa izao fahagagana ataonao izao raha tsy Andriamanitra no momba azy. ³ Dia namaly Jesoa ka nanao taminy hoe: Lazaiko marina dia marina aminao fa raha tsy ateraka indray ny olona, dia tsy mahazo mahita ny fanjakan'Andriamanitra. ⁴ Ary hoy Nikodema taminy : Ataon'ny olona ahoana no hateraka indray rahefa antitra izy ? Moa mahazo miditra any an-kibon-dreniny indray va izy ka hateraka indray ? ⁵ Fa hoy Jesoa: Lazaiko marina dia marina aminao fa raha tsy ateraky ny rano sy ny Fanahy indray ny olona, dia tsy mahazo miditra amin'ny fanjakan'Andriamanitra. ⁶ Izay ateraky ny nofo, dia nofo, ary izay ateraky ny Fanahy, dia fanahy. ⁷ Aza gaga hianao noho ny nilazako taminao hoe: Tsy maintsy hateraka indray hianareo. ⁸ Ny rivotra mitsoka amin'izay tiany ary renao ny feony, nefa tsy fantatrao izay ihaviany na izay alehany; tahaka izany izay rehetra ateraky ny Fanahy. ⁹ Dia namaly Nikodema ka nanao taminy hoe: Atao ahoana no hahatonga izany?

¹⁰ Ary hoy Jesoa taminy: Mpampianatra amin'Israely hianao ka tsy mahalala izany va? ¹¹ Lazaiko marina dia marina aminao fa izay fantatray no lazainay, ary izay hitanay no ambaranay, nefa tsy raisinareo ny filazanay. ¹² Raha tsy mino ahy hianareo amin'ny filazako ny zavatra ety an-tany, hataonareo ahoana no fino ny filazako ny any an-danitra? ¹³ Ary tsy nisy niakatra tany an-danitra afa-tsy izay nidina avy tany an-danitra ihany, dia ny Zanak'olona izay any an-danitra. ¹⁴ Tahaka ny nanandratan'i Moizy ny bibilava tany an'efitra no tsy maintsy hanandratana ny Zanak'olona koa, ¹⁵ mba tsy ho very izay rehetra mino azy, fa hanana ny fiainana mandrakizay. ¹⁶ Fa toy izao no nitiavan'Andriamanitra izao tontolo izao: nomeny ny Zanany tokana, mba tsy ho very izay rehetra mino azy, fa hanana ny fiainana mandrakizay. ¹⁷ Fa Andriamanitra tsy naniraka ny Zanaka tamin'izao tontolo izao, mba hitsara izao tontolo izao, fa mba hamonjy izao tontolo izao.

¹⁸ Izay mino azy dia tsy tsaraina: fa izay tsy mino kosa dia efa voatsara rahateo, satria tsy mino ny anaran'ny Zanak'Andriamanitra tokana. ¹⁹ Ary izao no fitsarana: tonga amin'izao tontolo izao ny fahazavana, nefa naleon'ny olona ny aizina toy izay ny fahazavana, satria ratsy ny asany. ²⁰ Fa izay rehetra manao ratsy dia tsy tia ny fahazavana, ka tsy manatona ny fahazavana sao hita miharihary ny asany;