Apokalipsa, Na Fanambaràna nosoratan'i Md. Joany

Toko faha-18

³ Satria ny firenena rehetra nisotro ny divaim-pahatezerana noho ny fijangajangany; ny mpanjakan'ny tany nijangajanga taminy, ary ny mpivarotra ety an-tany nahazo harena tamin'ny filibàny amin'ny zava-mahafinaritra azy nihoa-pampana. ⁴ Dia nandre feo iray hafa koa avy any an-danitra aho, nanao hoe: Mihataha aminy hianareo, ry vahoakako, mba tsy hiray heloka aminy, sy tsy hiombon-doza aminy,

⁵ fa efa mitehika amin'ny lanitra ny fahotany, ary efa tsarovan'Andriamanitra ny haratsiany. ⁶ Valio araka ny asany izy, ary ataovy avo sasaka noho izay nataony; ampisotroy amin'ny kapoaka nanomezany izy, ka omeo indroa hoatra izay nampisotroiny anareo; ⁷ ataovy toraka ny niavonavonany sy nilibàny tamin'ny zava-mahafinaritra azy no hamafin'ny fampijaliana sy fampahoriana azy. Fa izao no hambom-pony: Mpanjakavavy aho fa tsy mpitondratena, ka lavitra ahy raha izay fisaonana! ⁸ Noho izany kosa, indray hiantonta aminy indray andro monja ny lozany, dia fahafatesana, fisaonana, mosary, ary fandevonan'ny afo ny tenany, satria mahery Andriamanitra izay hitsara azy. ⁹ Hitomany azy sy higogogogo ny mpanjakan'ny tany, izay nijanganjanga taminy, sy niara-niliba taminy tamin'ny fahafinaretan'ny nofo, rahefa mahita ny setroky ny fandoroana azy.

¹⁰ Hijanona eny lavitra eny izy ireo, fa tsiravina noho ny fijaliany, ka hanao hoe: Loza ity! loza ity! ry Babilona lehibe, ry tanàna mafy, fa ora iray monja, dia tonga ny fanamelohana anao! ¹¹ Ny mpivarotra ety an-tany koa hitomany azy sy higogogogo, fa tsy hisy mpividy intsony ny entam-barony,

¹² dia ny volamena, volafotsy, vato soa, voahangy, rongonim-bazaha, lamba volom-parasy, parasily, jaky; sy ny hazo manitra isan-karazany rehetra, ny fanaka ivoara isan-karazany rehetra, ny fanaka isan-karazany rehetra natao tamin'ny hazo saro-bidy sy ny varahina ary ny vy mbamin'ny vato sanga; ¹³ dia ny havozomamy, zava-manitra, menaka manitra, emboka manitra, divay, diloilo, lafarina tsara indrindra, varim-bazaha, biby manompo, ondry, soavaly, kalesy, ary ny tena aman'ain'olona. - ¹⁴ Ny voankazo nifalian'ny fonao, nanalavitra anao; ny hanim-py aman-java-tsoa rehetra, very tsy ho hitanao intsony. ¹⁵ Ny mpivarotra ireny zavatra rehetra ireny, izay nahazo harena taminy, dia hijanona eny lavitra eny, fa tsiravina noho ny fijaliany, ka hitomany sy hiferin'aina hoe:

¹⁶ Loza ity! loza ity! ry ilay tanàna lehibe, izay nitafy rongony fotsy madinika, sy lamba volom-parasy ary jaky, sady niravaka volamena sy vatosoa mbamin'ny voahangy; kanjo ora iray monja lahy, dia levona izany harem-bevava izany! ¹⁷ Ary ny mpitondra sambo rehetra, sy izay rehetra mandeha eny ambony ranomasina, mbamin'ny matilò sy izay rehetra manan-draharaha amin'ny ranomasina, dia nijanona eny lavitra eny koa,

¹⁸ ka niantsoantso nahita ny setroky ny fandoroana azay, nanao hoe: Aiza intsony no hahita tahaka izany tanàna lehibe izany? ¹⁹ Sady nanisy vovoka ny lohany izy ireo no nitomany sy nigogogogo, nanao hoe: Loza ity! loza ity! fa ilay tanàna lehibe, nampanan-karena ny nanan-tsambo rehetra teny amin'ny ranomasina noho ny zava-tsaro-bidy tao aminy lahy, ka levona ora iray monja! ²⁰ Mifalia noho ny nanjò azy hianao, ry lanitra, sy hianareo olo-masina, mbaminareo apostoly sy mpaminany koa, fa fanomezan-drariny anareo no nanamelohan'Andriamanitra azy.

²¹ Tamin'izay dia nisy anjely anankiray, naka vato hoatra ny vato lehibe fikosohan-dafarina, ka nanipy azy tany anaty ranomasina, nanao hoe: Hazera tampoka hoatra izany i Babilona tanàna lehibe, ka tsy ho hita intsony!

²² Dia tsy ho re ao aminao intsony ny feon'ny mpitendry harpa, sy ny mpitsoka mozika, mbamin'ny mpitsoka sodina sy trompetra. Ny mpanao taozavatra rehetra tsy ho hita eo aminao intsony, ary ny feon'ny vato fikosohan-dafarina tsy ho re ao intsony koa. ²³ Ny fahazavan'ny jiro tsy hamirapiratra ao aminao intsony, ary ny feon'ny mpampakatra sy ampakarina tsy ho re ao aminao intsony; satria ny mpandrantonao dia lehiben'ny tany, ary ny ody fandrebirebenao no nampivily ny firenena rehetra. ²⁴ Tao anatin'io tanàna io koa no nahitana ny ràn'ny mpaminany sy ny olo-masina, mbamin'izay rehetra novonoina tety ambonin'ny tany.

Toko faha-19

¹ Rahefa izany, dia nisy hoatra ny feom-bahoaka betsaka tany an-danitra, reko nanao hoe: Aleloia! An'Andriamanitra ny famonjena sy ny voninahitra ary ny hery,

² fa marina sy mahitsy ny fitsarany, satria izy nanameloka ilay Vehivavy janga malaza izay nandoto ny tany tamin'ny fijangajangany, sy namely an'io noho ny ran'ny mpanompony izay nalatsaky ny tànany. ³ Dia naverin'izy ireo fanindroany indray ny hoe: Aleloia! Ary niakatra mandrakizay mandrakizay ny setroky ny tanàna. ⁴ Tamin'izany ny Anti-dahy efatra amby roapolo sy ny Zava-manana aina efatra dia niankohoka nitsaoka an'Andriamanitra, nanao hoe: Amena! Aleloia!

⁵ Dia nisy koa feo nivoaka avy ao amin'ny seza fiandrianana nanao hoe: Miderà an'Andriamanitra hianareo mpanompony rehetra, sy hianareo matahotra azy rehetra, na kely na lehibe.

⁶ Ary nisy hoatra ny feon'olona maro be, sy tahaka ny firohondrohon'ny ranobe, ary sahala amin'ny fikotrokotroky ny kotro-baratra mafy, reko nanao hoe: Aleloia! fa ny Tompo Andriamanitsika tsitoha no manjaka.

⁷ Mifalia sy miravoravoa isika, ary manomeza voninahitra azy, fa tonga ny fampakaram-badin'ny Zanak'ondry, ary efa voahaingo ny Vadiny; ⁸ rongonim-bazaha madinika fotsy mamirapiratra no nomena hitafiany, dia ny asa soan'ny olo-masina izany. ⁹ Dia hoy ilay anjely tamiko: Soraty: Sambatra izay nasaina ho amin'ny fampakaram-badin'ny Zanak'ondry. Sady nampiany hoe: Tena tenin'Andriamanitra marina tokoa ireo teny ireo.

¹⁰ Dia nidaboka tamin'ny tongony aho, mba hiankohoka aminy, nefa hoy izy tamiko: Tandremo, aza manao izany, fa mpanompo namanao ihany koa aho sy naman'ny rahalahinao izay manana ny fanambaran'i Jesoa. Andriamanitra no iankohofy. Fa mifanaraka ny fanambaran'i Jesoa sy ny fanahin'ny faminaniana. ¹¹ Nanaraka izany, dia indro hitako nisokatra ny lanitra, ary nisy soavaly fotsy niseho teo; i Mahatoky sy Marina no anaran'ilay nitaingina azy, ary ara-drariny no itsaran'ny iadiany;

¹² tahaka ny lelafo ny masony, ary satro-boninahitra maro no teny an-dohany; nisy anarana voasoratra teny aminy, izay tsy nisy nahalala afa-tsy izy irery; ¹³ akanjo nipentina rà no niakanjoany, ary NY TENIN'ANDRIAMANITRA no anarany; ¹⁴ nanaraka azy ny tafiky ny lanitra, soavaly fotsy no nitaingenan'ireo ary rongonim-bazaha fotsy madio no nitafiny; ¹⁵ nisy sabatra marani-dany roa nivoaka avy ao am-bavany, mba hamelezany ny firenena, ary hifehy azy amin'ny tsora-by izy, sady ny tenany ihany no hanitsaka ny famiazana ny divain'ny fahatezeran'Andriamanitra tsitoha; ¹⁶ izao no anarany voasoratra tamin'ny lambany sy ny feny: MPANJAKAN'NY MPANJAKA SY TOMPON'NY TOMPO. ¹⁷ Ary indro hitako nisy anjely anankiray nitsangana teo amin'ny masoandro, niantso ny voro-manidina rehetra teo amin'ny habakabaky ny lanitra, ka nanao tamin'ny feo mahery hoe: Avia, mivoria hianareo ho amin'ny fihinanam-ben'Andriamanitra,

¹⁸ mba hihinana ny nofon'ny mpanjaka, ny nofon'ny tompon'arivo, ny nofon'ny olo-mahery, ny nofon'ny soavaly mbamin'ny mpitaingina azy, sy ny nofon'ny olona rehetra, na andevo na olom-potsy, na kely na lehibe. ¹⁹ Dia hitako fa nivory ny Biby sy ny mpanjakan'ny tany mbamin'ny tafiny, mba hiady amin'ilay nitaingina ny soavaly sy amin'ny tafiny.

²⁰ Voasambotra ilay Biby sy ny mpaminany sandoka, izay nanao fahagagana teo anatrehany mba hoentiny mamitaka ireo nandray ny mariky ny Biby sy nivavaka tamin'ny sariny, ka indray natsipy velona tany amin'ny farihy mirehitra afon-tsolifara; ²¹ ary ny olona sisa dia matin'ny sabatra nivoaka avy ao am-bavan'ilay nitaingina ny soavaly, ka vokin'ny nofony ny vorona rehetra.

Toko faha-20

¹ Ary nahita anjely anankiray nidina avy any an-danitra aho, izay nitàna ny fanalahidin'ny lavaka tsy hita noanoa sy rojo vy lehibe anankiray teny an-tànany.

² Nosamborin'izy io ny Dragona, ilay menarana antitra, dia ny demony sy i Satana, ka nafatony arivo taona, ³ dia nazerany tao amin'ny lavaka tsy hita noanoa, ary nohidiany tao sy nasiany tombo-kase teo amboniny, mba tsy hamitahany ny firenena maro intsony, mandra-pahatapitry ny arivo taona; fa rahefa afaka izany dia tsy maintsy hovahana kelikely indray izy aloha. ⁴ Dia nahita seza fiandrianana maro aho, izay nipetrahan'olona nahazo fahefana hitsara, sy nahita ny fanahin'ireo notapahin-doha noho ny fanambaran'i Jesoa sy noho ny tenin'Andriamanitra, mbamin'ny an'ireo tsy nivavaka tamin'ny Biby na tamin'ny sariny, sy tsy nandray ny mariny na tamin'ny handriny, na tamin'ny tànany, fa efa velona ireo ka niara-nanjaka arivo taona tamin'ny Kristy.

⁵ Ny maty sisa kosa dia mbola tsy velona, raha tsy efa tapitra ny arivo taona. Izany no fitsanganana voalohany amin'ny maty. ⁶ Sambatra sy masina izay manana anjara amin'ny fitsanganana voalohany! Tsy mba hanam-pahefana amin'izy ireo ny fahafatesana faharoa, fa ho mpisoron'Andriamanitra sy ny Kristy izy, ka hiara-manjaka aminy arivo taona. ⁷ Rahefa tapitra ny arivo taona, dia hovahana hiala amin'ny tranomaizina i Satana, ka hivoaka hamitaka ny firenena amin'ny vazan-tany efatra, dia i Goga sy Magoga, izay hoatra ny fasiky ny ranomasina ny isany, mba hamory azy ho amin'ny ady.