Bokin'ny Mpitsara

Toko faha-13

²⁴ Ary tera-dahy ravehivavy, ka nataony hoe Samsona no anarany. Dia nitombo ny zaza, sady notahin'ny Tompo.

²⁵ Dia nanomboka nitaona azy ho any Makaneha-Dana anelanelan'i Saraà sy Estaola ny fanahin'ny Tompo.

Toko faha-14

¹ Ary nidina nankany Tamnà Samsona, ka nahita vehivavy anankiray tamin'ireo zanakavavin'ny Filistina tany Tamnà.

² Nony tafakatra indray izy, dia nilaza tamin-drainy aman-dreniny nanao hoe: Nahita vehivavy anankiray tamin'ireo zanakavavin'ny Filistina aho, tany Tamnà, ka ankehitriny mba alaovy ho vadiko izy. ³ Hoy ny ray aman-dreniny taminy: Nahoana kosa no dia any amin'izay Filistina tsy mifora hianao no haka vady; fa angaha dia tsy misy vehivavy amin'ny zana-kavanao, sy eto amin'izay rehetra iray firenena amintsika? Dia hoy Samsona tamin-drainy: Izay ihany alaina ho ahy, fa izay no sitrako. ⁴ Tsy nahalala rainy aman-dreniny fa avy amin'Andriamanitra izany, satria izy nitady antony hananganan'ny Filistina ady. Nanapaka an'Israely tamin'izany andro izany ny Filistina. ⁵ Dia nidina nankany Tamnà Samsona, niaraka tamin'ny ray aman-dreniny. Nony tonga teo amin'ny tanim-boalobok'i Tamnà izy, dia indry nisy vanton-diona nierona nandroso hifanehatra aminy.

⁶ Fa notsindrin'ny Fanahin'ny Tompo Samsona, ka nosamatsamahiny hoatra ny fanasamaka zanak'osy ilay liona, nefa tsy nisy na inona na inona teny an-tànany, ary tsy nambarany tamin-drainy aman-dreniny akory izany nataony izany. ⁷ Dia nidina izy, ka nireska tamin'ilay vehivavy ary tia azy. ⁸ Nony afaka kelikely niverina mba handray azy izy, ka nivily hizaha ny fatin'ilay liona, ary indro nisy antokon-drenitantely sy tantely teo amin'ny vatan'ilay liona.

⁹ Naka tamin'io izy teo an-tànany, nohaniny teny an-dàlana, ka nony nahatratra an-drainy aman-dreniny izy, nomeny koa ireo dia nihinanana; nefa tsy nolazainy tamin'ireo fa nalainy tamin'ny vatan'ilay liona ny tantely. ¹⁰ Nidina nankany amin'ilay vehivavy ny rain'i Samsona, ary nanao fanasana teo Samsona, fa izany no fanaon'ny zatovo.

¹¹ Vao nahita azy ny olona dia nanasa olona telopolo lahy ho namany hiara-mitoetra aminy. ¹² Ary hoy Samsona tamin'ireo: Hanao ankamantatra aminareo aho; ka raha lazainareo amiko, ao anatin'ny hafitoana fanasana, ny heviny, ka fantatrareo, dia homeko lobaka telopolo sy akanjo telopolo atao fanovana hianareo. ¹³ Fa raha tsy mahalaza ny heviny amiko kosa hianareo, dia hianareo no hanome ahy ny akanjo lobaka telopolo sy akanjo telopolo atao fanovana. ¹⁴ Dia hoy ireo taminy: Ataovy ary izay ankamantatra, ho henonay, ka hoy izy: Izay mihinana no ivoahan'ny fihinana; Ary ny mahery no ivoahan'ny mamy. Hateloana izy ireo tsy nahalaza ny hevitry ny ankamantatra. ¹⁵ Ka nony tamin'ny andro fahafito dia hoy izy tamin'ny vadin'i Samsona: Taomy ny vadinao hilaza aminay ny hevitry ny ankamantatra, fa raha tsy izany, hodoranay avokoa hianao sy ny ankohonan-drainao. Sa ny hataonareo mafafa no nanasanareo anay?

¹⁶ Dia nitomany teo anilan'i Samsona ny vavy, ka nanao taminy hoe: Halanao mihitsy aho fa tsy tianao akory; nanao ankamantatra tamin'ny zanaky ny fireneko hianao, nefa tsy mba nolazainao tamiko ny hevitr'izany. Fa hoy ny navaliny azy: Ikaky sy ineny aza tsy nilazako izany, ka hianao indray ve no hialazako? ¹⁷ Nandritra ny hafitoana nisian'ny fanasana dia nitomany teo anatrehany ihany izy, ka tamin'ny andro fahafito nony nanahirana azy mafy loatra izy dia nolazainy ny hevitry ny ankamantatra, dia nolazain'io tamin'iretsy zanaky ny fireneny kosa. ¹⁸ Tamin'ny andro fahafito raha mbola tsy maty ny masoandro dia hoy ny lehilahy tao an-tanana tamin'i Samsona: Inona no mamy noho ny tantely; Ary inona no mahery noho ny liona? Fa hoy kosa izy tamin'izy ireo: Raha tsy ny ombivavy keliko no nentinareo niasa dia tsy nahalala ny ankamantatro hianareo. ¹⁹ Dia nentin'ny Fanahin'ny Tompo izy ka nidina nankany Askalona. Ary namomo olona telopolo lahy tao izy, dia naka babo avy aminy. Ka ny fitafiana atao fanovany nomeny an'izay nahalala ny ankamantatra. Rahefa izany niakatra nakany an-tranon-drainy izy, fa nirehitra ny fahatezeran'i Samsona.

²⁰ Ary ny vadiny lasan'ny anankiray amin'ireo namany izay nofidiny ho sakaizany.

Toko faha-15

¹ Nony afaka kelikely, tamin'ny fotoam-pijinjam-bary dia nandeha hamangy ny vadiny Samsona, nitondra zanak'osy anankiray ka nanao hoe: Te-hiditra ao amin'ny vadiko ao an'efitranony aho. Fa tsy navelan-drainy hiditra izy. ² Fa hoy rainy taminy hoe: Nataoko fa halanao izy, ka nomeko ny sakaizanao. Ary moa tsy ny zandriny aza no tsara noho izy? Ka io no aoka ho vadinao ho solony. ³ Ka hoy Samsona taminy: Izao vao tsy hanan-tsiny amin'ny Filistina aho raha minisy ratsy azy. ⁴ Dia lasa Samsona nisambotra amboahaolo telon-jato sy naka fanilo. Nampifamatorany ny rambon ny amboahaolo, ka nasiany fanilo iray eo anelanelan'ny rambony roa, eo afovoany. ⁵ Dia nampirehetiny ny fanilo, ary nalefany hankany amin'ny varin'ny Filistina ny amboahaolo, ka nandoro ny vary efa amboarany sy mbola an-tahony ary hatramin'ny voly oliva aza. ⁶ Dia hoy ny Filistina: Iza no nanao izany? Ka nisy namaly hoe: Samsona, vinanton'ilay Tamnaana; fa nalain'io taminy ny vadiny ka nomeny ny sakaizany. Dia niakatra ny Filistina ka nandoro an-dravehivavy mbamin'ny rainy. ⁷ Hoy Samsona tamin'izy ireo: Izany ve no ataonareo? Tsy maninona, fa tsy hijanona kosa aho, raha tsy nahavaly faty anareo. ⁸ Dia nasiany mafy tokoa ireo tsy nitondrany roa; dia nidina izy ary nitoetra tao amin'ilay zohy amin'ny vatolampin'i Etama. ⁹ Tamin'izay dia niakatra ny Filistina, nitoby teo amin'i Jodà, niely tany Lekia. ¹⁰ Ka hoy ny lehilahy amin'i Jodà: Ahoana no iakaranareo hamely anay? Ary hoy ny navaliny: Hamatotra an'i Samsona no niakaranay mba hanaovanay aminy toraky ny nataony taminay. ¹¹ Nidina ny lehilahy telo arivo tamin'i Jodà nankany amin'ilay zohy amin'ny vatolampin'i Etama ka nanao tamin'i Samsona hoe: Tsy fanatrao va fa mpanapaka antsika ny Filistina, ka ahoana no dia nanaovanao toy izao aminay? Ary hoy ny navaliny azy ireo: Toraky ny nataony tamiko ihany no mba nataoko taminy kosa. ¹² Hoy izy ireo taminy: Ny hamatotra anao no nidinanay, mba hanoloranay anao eo an-tànan'ny Filistina. Ka hoy Samsona tamin'izy ireo: Mianiàna àry fa tsy mitady hamono ahy hianareo. ¹³ Dia namaly azy izy nanao hoe: Tsia, fa ny hamatotra anao sy hanolotra anao eo an-tànan'izy ireo ihany no tadiavinay, fa tsy hamono anao izahay. Dia nafatony tamin'ny mahazaka roa vaovao izy, nentiny hiakatra avy teo amin'ialy vatolampy. ¹⁴ Nony tonga tany Lekia izy, dia notsenain'ny Filistina tamim-panakorana. Fa notsindrian'ny Fanahin'ny Tompo kosa Samsona tamin'izay, ka ny mahazaka tamin'ny sandriny tonga toy ny kofehy rongony main'ny afo, ary ny fatorana tamin'ny tànany nivotsotra; ¹⁵ ary nahita valanoranon'ampondra vaovao izy, dia nanatsotra ny tànany nandray an'izay, ka nahafaty arivo lahy taminy. ¹⁶ Ka hoy Samsona hoe: Valanoranon'ampondra iray no namazambazanako an'ireny; Valanoranon'ampondra iray no nahafatesako arivo lahy. ¹⁷ Nony nitsaha-niteny izy, ilay valanorano natsipiny avy teny an-tànany, io toerana io nomeny anarana hoe Ramata-Lekia. ¹⁸ Ary main'ny hetaheta Samsona, ka nitalaho tamin'ny Tompo nanao hoe: Hianao no nanoma izao famonjen-dehibe izao, tamin'ny tànan'ny mpanomponao, ary ankehitriny dia ho fatin'ny hetaheta va aho sy ny ho latsaka eo an-tànan'ny tsy mifora? ¹⁹ Fa nampitresahin'Andriamanitra kosa ilay vatolampy hoboka tao Lekia, dia niboiboika teo ny rano, ary velombelona ny fanahiny, nody ny ainy. Izany no niantsoana io loharana io hoe En-Hakore, izay mbola any Lekia mandrak'androany. ²⁰ Roapolo taona no nitsaran'i Samsona an'Israely tamin'ny andron'ny Filistina.

Toko faha-16

¹ Ary nankany Gazà Samsona ka nahita vehivavy janga tao, dia niditra tao aminy.

² Nilazana ny mponina tao Gazà fa hoe: Tonga ao Samsona, ka nanemitra an'i Samsona izy ireo; ary nanotrika tao am-bavahadin'ny tanàna nandritra ny alina. Nipetraka tsy nihetsiketsika izy ireo iny alina tontolo iny fa hoy izy: Aoka aloha mandrapangiran'ny andro maraina, dia hovonointsika izy. ³ Nandry Samsona mandra-pisasaky ny alina. Nony nisasaka ny alina dia nifoha izy, ka nalainy ny lela varavaran'ny tanàna mbamin'ny tolanany roa, nongotany mbamin'ny hidiny, dia nantsorohiny, nentiny nakany an-tampon'ny tendrombohitra mitodika an'i Hebrona. ⁴ Taorian'izany dia vehivavy anankiray, tany an-dohasahan'i Soreka no tiany. Dalilà no anarany.

⁵ Ka niakatra nankany aminy ireo filohan'ny Filistina, nanao taminy hoe: Tambatambazo izy, hahalalanao izay itoeran'ny heriny lehibe, sy izay hahazoanay mandresy azy, mba hamatoranay azy, sy hamolahanay azy, fa samy hanome anao vola azo amby arivo sikla avy izahay rehetra. ⁶ Dia hoy Dalilà tamin'i Samsona: Mihanta aminao aho, lazao amiko kely izay itoeran'ny herinao lehibe, sy izay tokony hamatorana anao, mba hahafolaka anao. ⁷ Ary hoy Samsona taminy: Raha mahazaka fito vaovao tsy mbola maina, no amatorana ahy, dia osa sy sahala amin'ny olon-kafa aho. ⁸ Dia nitondran'ireo filohan'ny Filistina mahazaka fito vaovao, tsy mbola maina, Dalilà, ka nofatorany tamin'ireo izy.