Boky Voalohan'i Samoela

Toko faha-7

⁶ Dia nivory tany Masfà izy ireo. Nanovo rano izy, nararany teo anatrehan'ny Tompo ary nifady hanina tamin'izany andro izany, fa hoy izy: Efa nanota tamin'ny Tompo isika! Ary Samoela nitsara an'Israely tany Masfà. ⁷ Ren'ny Filistina fa nivory tany Masfà ny zanak'Israely ka niakatra ny andrianan'ny Filistina hamely an'Israely. Nandre izany ny zanak'Israely ka raiki-tahotra ny Filistina izy ireo,

⁸ ka hoy ny zanak'Israely tamin'i Samoela hoe: Aza atsahatra ny fitarainana ho antsika amin'ny Tompo Andriamanitsika, mba hamonjeny antsika amin'ny tànan'ny Filistina. ⁹ Naka zanak'ondry mbola minono Samoela, natolony manontolo ho sorona dorana ho an'ny Tompo, dia nitaraina tamin'ny Tompo ho an'Israely Samoela, ka nohenoin'ny Tompo. ¹⁰ Mbola manatitra ny sorona dorana eo Samoela, no tamy hamely an'Israely ny Filistina; fa nampikotroka mafy ny varatra tamin'ny Filistina kosa Iaveh tamin'izay andro izay, ka nampifanaritaka azy; dia resy teo anoloan'Israely. ¹¹ Ary nivoaka avy tao Masfà ny lehilahy amin'Israely, ka nanenjika ny Filistina, sy namely azy hatrany ambanin'i Beti-Kara. ¹² Naka vato Samoela napetrany teo anelanelan'i Masfà sy Sena, ary nomeny anarana hoe Eben-Ezera, fa hoy izy: Efa novonjen'ny Tompo isika hatramin'izao. ¹³ Nony voaetry toy izany ny Filistina, dia tsy niverina teo amin'ny faritanin'Israely intsony; fa namely ny Filistina ny tànan'ny Tompo, tamin'ny andro rehetra niainan'i Samoela.

¹⁴ Ka ny tanàna nalain'ny Filistina tamin'Israely, tafaverina amin'Israely indray, hatrany Akarona ka hatrany Geta; ny faritanin'izy ireo dia nalain'Israely teo an-tànan'ny Filistina. Ary ny Amoreana, nihavana tamin'Israely. ¹⁵ Nitsara an'Israely tamin'ny andro rehetra niainany Samoela.

¹⁶ Isan-taona, dia nandeha izy nitety an'i Betela sy Galgalà ary Masfà ka nitsara an'Israely tamin'ireo fitoerana rehetra ireo. ¹⁷ Rahefa izany dia niverina any Ramà izay nisy ny tranony izy, dia nitsara an'Israely tao, ary nanorina otely tao ho an'ny Tompo.

Toko faha-8

¹ Nony efa antitra Samoela, dia ireo zanany no natsangany hitsara an'Israely.

² Joela no anaran'ny zanany lahimatoa, ary Abià no anaran'ny faharoa. Tany Bersabe izy ireo no nitsara. ³ Tsy mba nanara-dia azy ny zanany, fa nivily nanao izay hahazoana, mandray kolikoly sy nandika ny fahamarinana. ⁴ Nivory ny loholon'Israely rehetra nankany amin'i Samoela, tany Ramà, ⁵ nanao taminy hoe: Hianao ity efa antitra ary ny zanakao tsy manara-dia anao, koa mpanjaka toy ny an'ny firenena rehetra no atsangano aminay hitsara anay. ⁶ Tsy sitrak'i Samoela izany teny izany noho izy ireo nanao hoe: Omeo mpanjaka izahay hitsara anay. Dia nivavaka tamin'ny Tompo Samoela; ary hoy Iaveh tamin'i Samoela:

⁷ Henoy ny feon'ny vahoaka araka izay rehetra holazainy aminao, satria tsy mba hianao no ariany fa izaho no ariany, dia ny tsy hanjakako aminy intsony; ⁸ toy ny efa nataony mandrakariva hatramin'ny andro nitondrako azy niakatra avy tany Ejipta ka mandrak'izao, fa nilaozany nanompo andriamani-kafa aho, toy izany koa no anaovany anao. ⁹ Ary ankehitriny, henoy ny feony; nefa manaova teny vavolombelona aminy, ary ampahafantaro azy ny fahefan'ny mpanjaka izay hanjaka aminy. ¹⁰ Dia nambaran'i Samoela tamin'ny vahoaka nangataka mpanjaka taminy ny tenin'ny Tompo rehetra,

¹¹ ka hoy izy: Izao no fahefana ampiasain'ny mpanjaka, izay hanjaka aminareo: Ny zanakalahinareo halainy ary hampitaingenany ny kalesiny sy hataony mpitaingin-tsoavaliny, ary hihazakazaka eo alohan'ny kalesiny izy ireo. ¹² Hataony mpifehy arivo, mpifehy dimampolo izy; hampiasainy ny taniny, hampijinjainy ny variny, hampanaoviny ny fiadiany, mbamin'ny forongon-kalesiny. ¹³ Ny zanakavavinareo halainy ho mpamboatra zava-manitra, ho mpahandro, ho mpanao mofo. ¹⁴ Ny tanimbarinareo, ny tanim-boalobokareo, ny fototr'olivanareo tsara indrindra dia halainy ka homeny ny mpanompony. ¹⁵ Ny ampahafolon'ny vokatra aman-tanim-boalobokareo halainy ka homeny ny tandapa amam-panompony. ¹⁶ Ny mpanomponareo, na lahy na vavy, mbamin'ny ombinareo aman'ampondra tsara indrindra halainy hampanaovina ny asany. ¹⁷ Ny ampahafolon'ny biby fiompinareo halainy, ary ny tenanareo aza ho andevony. ¹⁸ Hitaraina hianareo amin'izany andro izany, noho ny amin'ny mpanjaka nofidinareo, nefa tsy hihaino anareo Iaveh. ¹⁹ Tsy nety nihaino ny feon'i Samoela akory ny vahoaka, fa hoy izy: Tsia, fa aoka ihany izahay mba hanam-panjaka!

²⁰ Dia mba ho toy ny firenena koa izahay: ny mpanjakanay no hitsara anay, hitari-dàlana anay, ary hitari-tafika anay. ²¹ Nony ren'i Samoela ny teny rehetra nataon'ny vahoaka dia nolazainy indray ho ren'ny Tompo; ²² ka hoy Iaveh tamin'i Samoela: Henoy ny feony ka manangàna mpanjaka ho azy. Dia hoy Samoela tamin'ny lehilahy amin'Israely: Samia mody any an-tanànanareo avy hianareo.

Toko faha-9

¹ Nisy lehilahy anankiray avy amin'i Benjamina atao hoe Kisy, zanak'i Abiela, zanak'i Serora, zanak'i Bekorata, zanak'i Afià, zanaky ny Benjamita anankiray; lehilahy mahery fo izy io.

² Nanan-janaka lahy anankiray atao hoe Saola izy, izay sady mbola tanora no tsara tarehy; tsy nisy tsara tarehy noho izy teo amin'ny zanak'Israely rehetra, ary nanatombo ny lohany izy amin'ny halavany noho ny olona rehetra. ³ Ary nania ny ampondravavin'i Kisy, rain'i Saola, ka hoy Kisy tamin'i Saola zanany: Mangalà mpanompo anankiray hiaraka aminao dia mandehana mitady ny ampondra.

⁴ Dia namaky ny tendrombohitr'i Efraima, ary namaky ny tany Salisa izy, nefa tsy nahita; novakiny koa ny tany Salima, fa tsy tany izy; namaky ny tanin'i Benjamina izy, fa tsy nahita. ⁵ Nony tonga teo amin'ny tanin'i Sofa izy ireo, dia hoy Saola tamin'ity mpanompo nanaraka azy: Andeha isika hiverina, fandrao dia isika indray no hoahin'i dada, fa ny ampondra tsy hoheveriny intsony. ⁶ Ka hoy ilay mpanompo taminy: Indro misy olon'Andriamanitra amin'itsy tanàna itsy, lehilahy hajaina tokoa izy; izay lazainy tanteraka avokoa. Ka andeha isika ho ao, fa angamba holazainy amintsika ny làlana tsy maintsy hombantsika. ⁷ Ary hoy Saola tamin'ny mpanompony: Raha hankao isika, dia inona no hatolotsika ho an-dralehilahy? Lany ity ny vatsy tamin'ny lasakantsika, ka tsy manan-javatra hatolotra ho an'ny olon'Andriamanitra isika. Fa manan'inona isika? ⁸ Dia namaly indray ilay mpanompo ka hoy izy tamin'i Saola: Inty eto nahita vola ampahefatry ny sikla aho taty amiko, ka homeko ilay olon'Andriamanitra ity, dia hatorony antsika izay làlan-kalehantsika. ⁹ Teo amin'Israely fahiny ny olona mandeha hanontany amin'Andriamanitra dia nifampilaza hoe: Andeha isika ho any amin'ny mpahita. Fa mpahita no fiantson'ny taloha ny atao ankehitriny hoe mpaminany. ¹⁰ Dia hoy Saola tamin'ny mpanompony: Tsara ny hevitrao ka andao àry. Ka dia lasa izy ireo nankany amin'ny tanàna nisy ilay olon'Andriamanitra. ¹¹ Niakatra ny fiakarana mankao an-tanàna izy ireo, no nifanena tamin'ireto zazavavy nivoaka hantsaka rano, ka nanao tamin'ireo hoe: Ao ihany va ny mpahita?

¹² Dia hoy iretsy zazavavy namaly azy: Ao ihany izy, indro izy ao alohanao ao, fa mandehana faingana satria izy no tonga aty an-tanàna anio, dia misy sorona haterin'ny vahoaka anio eo amin'ny fitoerana avo. ¹³ Raha vao miditra ao an-tanàna hianareo, dia hahita azy, alohan'ny hiakarany eo amin'ny fitoerana avo hisakafoany, fa tsy hihinana ny vahoaka raha tsy efa tonga izy, satria tsy maintsy mitso-drano ny sorona izy aloha, vao izay vao mihinana izay nasaina. Ka miakara izao fa mahita azy hianareo anio. ¹⁴ Dia niakatra tao an-tanana izy. Efa tafiditra teo afovoan'ny tanana izy, dia inty Samoela nivoaka nitsena azy, dia ndeha ho eo amin'ny fitoerana avo.

¹⁵ Ary omalin'ny nahatongavan'i Saola, dia efa nanambara tamin'i Samoela Iaveh nanao hoe: ¹⁶ Rahampitso toy izao dia hirahiko ho aty aminao ny lehilahy iray avy any amin'ny tanin'i Benjamina, ary hosoranao izy ho mpanjakan'Israely oloko, ary hanafaka ny oloko amin'ny tànan'ny Filistina izy, satria efa nijery ny oloko aho, fa efa mby aty amiko ny fitarainany.