Boky Voalohan'ny Mpanjaka

Toko faha-22

²⁹ Dia niakatra nankany Ramota any Galaada ny mpanjakan'Israely sy Josafata mpanjakan'i Jodà.

³⁰ Ary hoy ny mpanjakan'Israely tamin'i Josafata: Hanao fitafiana hafa aho no handroso any amin'ny ady, fa hianao kosa ny akanjonao ihany entina. Dia nanao fitafiana hafa ny mpanjakan'Israely, ka nandroso tany amin'ny ady. ³¹ Ary nisy didy nomen'ny mpanjakan'i Siria an'ireo roa amby telopolo lahy, lehiben'ny an-kalesiny nataony hoe: Aza mamely na ny kely na ny lehibe fa ny mpanjakan'Israely ihany. ³² Nony nahatazana an'i Josafata ny lehiben'ny kalesy, dia nanao hoe: Iny tokoa ny mpanjakan'Israely; sady nitodika nanatrika azy izy hamely azy. Niantso mafy Josafata. ³³ Ka nony hitan'ny lehiben'ny kalesy fa tsy ny mpanjakan'Israely io, dia nivily niala taminy. ³⁴ Tamin'izay nisy kosa lehilahy anankiray, nandefa kitoatoa ny zana-tsipìkany, ka nahavoa ny mpanjakan'Israely, teo anelanelan'ny fikatonan'ny akajom-piadiana sy ny fiarovan-tratrany. Dia hoy ny mpanjaka tamin'ny mpampandeha kalesiny: Ahodino ka ento miala eto amin'ny ady aho, fa voa. ³⁵ Ary nihamafy ny ady tamin'izany andro izany; notohanana ihany ny mpanjaka, hitsangana teo ambony kalesiny, tandrifin'ny Siriana, ary maty izy nony hariva; ny ra tamin'ny ratrany, niraraka tao anaty kalesy. ³⁶ Nony efa ho faty ny masoandro, niely eran'ny toby izao antsoantso izao: Samia mody any an-tanànany avy, samia mody any amin'ny taniny avy! ³⁷ Toy izany no nahafatesan'ny mpanjaka. Nentina ho any Samaria izy, dia nalevina tany Samaria ny mpanjaka.

³⁸ Nony nosasana tao am-parihin'i Samaria ny kalesy dia nolelafin'ny alika ny ran'i Akaba, ary nandro teo ny vehivavy janga araka ny teny voalazan'ny Tompo. ³⁹ Ny sisa tamin'ny asan'i Akaba, mbamin'izay rehetra nataony, ny trano ivoara naoriny, ny tanàna rehetra naoriny, moa tsy dia efa voasoratra ao amin'ny bokin'ny Tantaran'ny mpanjakan'Israely va izany?

⁴⁰ Nodimandry any amin'ny razany Akaba, ary Okoziasa zanany no nanjaka nandimby azy. ⁴¹ Tamin'ny taona fahefatr'i Akaba mpanjakan'Israely no nahatongavan'i Josafata zanak'i Asà ho mpanjakan'i Jodà.

⁴² Dimy amby telopolo taona Josafata, fony tonga mpanjaka, ary dimy amby roapolo taona no nanjakany tao Jerosalema. Ny anaran-dreniny dia Azoba, zanak'i Salaia. ⁴³ Nandeha tamin'ny làlana rehetra nalehan'i Asà rainy izy, sady tsy nivily tamin'izany, fa nanao izay mahitsy eo imason'ny Tompo. ⁴⁴ Saingy ny fitoerana avo tsy rava, ny vahoaka mbola nanohy ny fanateran-tsorona aman-java-manitra eny amin'ny fitoerana avo. ⁴⁵ Ary Josafata nihavana amin'ny mpanjakan'Israely. ⁴⁶ Ny sisa tamin'ny asan'i Josafata, ny herim-po nasehony, ny ady nataony, moa tsy dia efa voasoratra ao amin'ny bokin'ny Tantaran'ny mpanjakan'i Jodà va izany?

⁴⁷ Nofongorany hiala amin'ny tany ny mpijangajanga sisa izay nijanona teo, tamin'ny andron'i Asà rainy.

⁴⁸ Tsy nisy mpanjaka tany Edoma fahizany, fa governora no solo-mpanjaka. ⁴⁹ Nanao sambon'i Tarsisa folo Josafata mba hankany Ofira haka volamena, nefa tsy nankany izy, fa fefika tao Asiongabera ny sambo. ⁵⁰ Dia hoy Okoziasa zanak'i Akaba tamin'i Josafata: Avelao ny mpanompoko hiaraka amin'ny mpanomponao eny an-tsambo. Nefa tsy nety Josafata. ⁵¹ Ary nodimandry any amin'ny razany Josafata, ka nalevina ao amin'ny razany, ao an-tanànan'i Davida rainy, dia Jorama zanany lahy no nanjaka nandimby azy.

⁵² Tamin'ny taona fahafito ambin'ny folon'i Josafata mpanjakan'i Jodà no vao tonga mpanjakan'Israely tany Samaria Okoziasa zanak'i Akaba, ary roa taona no nanjakany tamin'Israely.

⁵³ Nanao izay ratsy eo imason'ny Tompo izy, dia nandeha tamin'ny làlan-dreniny ary tamin'ny làlan'i Jeroboama zanak'i Nabata, izay nampanota an'Israely. ⁵⁴ Nanompo an'i Baala izy, ary niankohoka teo anatrehany ka nampahatezitra an'ny Tompo Andriamanitr'Israely tahaka izay rehetra nataon-drainy ihany.

Boky Faharoan'ny Mpanjaka

Toko voalohany

¹ Nony maty Akaba dia niodina tamin'Israely Moaba.

² Ary Okoziasa potraka avy eny am-baravaran-kely makarakara, teo amin'ny efitranony ambony, any Samaria, ka narary. Nandefa iraka izy, ary nanao taminy hoe: Mandehana hianareo manontany amin'i Beela-Zeboba andriamanitr'i Akarona raha ho sitrana amin'ity aretiko ity aho.

³ Fa hoy kosa ny anjelin'ny Tompo tamin'i Elia Tesbita: Mitsangàna hianao, ka miakara hitsena ny iraky ny mpanjakan'i Samaria, dia izao no lazao amin'izy ireo: Moa ny tsy fisian'Andriamanitra any amin'Israely va no andehananareo hanontany amin'i Beela-Zeboba andriamanitr'i Akarona? ⁴ Noho izany, izao no lazain'ny Tompo: Tsy hidina hiala eo am-parafara niakaranao hianao fa ho faty tokoa. Dia lasa Elia. ⁵ Niverina ho any amin'ny mpanjaka ireto irany, ka hoy izy tamin'izy ireo: Fa nahoana no miverina hianareo? ⁶ Ary hoy ny navalin'ireo taminy: Nisy lehilahy niakatra nitsena anay, nanao taminay hoe: Mandehana miverina any amin'ny mpanjaka naniraka anareo, ka lazao aminy hoe: Izao no lazain'ny Tompo: Moa ny tsy fisian'Andriamanitra ao amin'Israely va no anirahanao hanontany amin'i Beela-Zeboba andriamanitr'i Akarona? Noho izany, tsy hidina hiala eo am-parafara niakaranao hianao, fa ho faty mihitsy. ⁷ Dia hoy Okoziasa tamin'izy ireo: Manao ahoana no endriky ny lehilahy izay niakatra nitsena anareo izay, sy nilaza izany teny izany taminareo? ⁸ Ka hoy izy ireo: Lehilahy voloina izay izy, ary nisy fehin-kibo hoditra tamin'ny valahany. Dia hoy Okoziasa: Elia Tesbita izay. ⁹ Niaraka tamin'izay, nirahiny ho any aminy ny mpifehy dimampolo anankiray mbamin'ny dimampolo fehiny. Dia niakatra io mpifehy io, nankeo amin'i Elia ka indro izy nipetraka teo an-tampon-tendrombohitra, ary hoy izy taminy hoe: Ry olon'Andriamanitra ô! midina hianao, hoy ny mpanjaka.

¹⁰ Fa izao no navalin'i Elia an'ity mpifehy dimampolo: Raha olon'Andriamanitra aho, aoka hilatsaka avy any an-danitra ny afo handoro anao sy ny dimampolo fehinao. Dia nilatsaka avy any an-danitra ny afo nandoro azy io sy ny dimampolo fehiny. ¹¹ Naniraka mpifehy dimampolo hafa indray anefa ny mpanjaka, nomban'ny dimampolo fehiny. Ka dia niteny io mpifehy io, nanao tamin'i Elia hoe: Ry olon'Andriamanitra ô, midìna faingana hianao, hoy ny mpanjaka. ¹² Fa hoy ny navalin'i Elia tamin'izy ireo: Raha olon'Andriamanitra aho, aoka hilatsaka avy any an-danitra ny afo handoro anao sy ny dimampolo fehinao. Dia nilatsaka avy any an-danitra ny afon'Andriamanitra, ka nandoro an'io sy ny dimampolo fehiny. ¹³ Mbola naniraka mpifehy dimampolo fanintelony indray Okoziasa nomban'ny dimampolo fehiny. Dia niakatra io mpifehy dimampolo fahatelo io, ka rahefa tonga dia nandohalika teo anatrehan'i Elia, ary niteny taminy tamim-pitarainana hoe: Ry olon'Andriamantira ô, mihanta aminao aho, aoka ho sarobidy eo imasonao ny aiko sy ny ain'ireto dimampolo lahy mpanomponao. ¹⁴ Indro fa efa nilatsaka ny afo avy any an-danitra sy nandoro azy roa lahy mpifehy dimampolo talohako, mbamin'ny dimampolo fehiny, fa ankehitriny kosa, aoka ho sarobidy eo imasonao ny aiko. ¹⁵ Dia hoy ilay anjelin'ny Tompo tamin'i Elia: Miaraha midina amin'io, ary aza matahotra eo anatrehany. Koa niainga izy, ka niara-nidina taminy ho any amin'ny mpanjaka,

¹⁶ ary nilaza taminy hoe: Izao no lazain'ny Tompo: Noho hianao nandefa iraka hanontany amin'i Beela-Zeboba, andriamanitr'i Akarona: Moa tsy misy Andriamanitra any amin'Israely izay azo anontaniana ny teniny? - koa noho izany, dia tsy hidina hiala eo am-parafara niakaranao hianao, fa ho faty mihitsy. ¹⁷ Dia maty Okoziasa araka ny tenin'ny Tompo izay nolazain'i Elia, ka Jorama no tonga mpanjaka nandimby azy, tamin'ny taona faharoan'i Jorama, mpanjakan'i Jodà, zanak'i Josafata, fa tsy nanana zanaka izy.

¹⁸ Ny sisa tamin'ny asan'i Okoziasa mbamin'izay nataony, moa tsy dia efa voasoratra ao amin'ny bokin'ny Tantaran'ny mpanjakan'Israely va izany?

Toko faha-2

¹ Nony nampakarin'ny Tompo ho any an-danitra amin'ny tafio-drivotra Elia, dia niara-nandeha avy any Galgala Elia sy Elisea.

² Ary hoy Elia tamin'i Elisea: Mijanòna eto raha sitrakao, fa irahin'ny Tompo ho tafahatra any Betela aho. Fa hoy kosa ny navalin'i Elisea: Velona Iaveh ary velona ny ainao! tsy handao anao mihitsy aho! Dia nidina nankany Betela izy ireo. ³ Ary nivoaka nankeo amin'i Elisea ireo zanaky ny mpaminany tao Betela, ka nanao taminy hoe: Fantatrao va fa halain'ny Tompo anio ny tomponao, avy eo ambonin'ny lohanao? Dia hoy ny navaliny: Mahalala izany ihany koa aho, fa mangina hianareo. ⁴ Ary hoy Elia taminy: Ry Elisea ô! mijanona eto, raha sitrakao, fa irahin'ny Tompo ho any Jerikao aho. Fa hoy ny navaliny: Velona Iaveh, ary velona ny ainao, tsy handao anao aho! Dia tonga tany Jerikao izy ireo. ⁵ Ary nanatona an'i Elisea ireo zanaky ny mpaminany tao Jerikao, ka nanao taminy hoe: Fantatrao va fa halain'ny Tompo anio ny tomponao, avy eo ambonin'ny lohanao? Dia hoy ny navaliny: Mahalala izany ihany koa aho, fa mangina hianareo. ⁶ Ary hoy Elia taminy: Mijanona eto raha sitrakao, fa irahin'ny Tompo ho any Jordany aho. Fa hoy ny navaliny: Velona Iaveh ary velona ny ainao! tsy handao anao aho! Koa niara-nandeha izy roa lahy.