Boky Faharoan'ny Mpanjaka

Toko faha-14

¹³ Ary Joasa mpanjakan'Israely nisambotra an'i Amasiasa mpanjakan'i Jodà, zanak'i Joasa zanak'i Okoziasa, tao Behtsamesa; nankany Jerosalema izy ka nahabanga ny mandan'i Jerosalema efa-jato hakiho, hatramin'ny vavahadin'i Efraima ka hatreo am-bavahady an-jorony. ¹⁴ Naka ny volamena amam-bolafotsy rehetra hita tao an-tranon'ny Tompo sy tao amin'ny rakitry ny tranon'ny mpanjaka izy, ary olona natao antoka koa, vao niverina ho any Samaria. ¹⁵ Ny sisa amin'ny asan'i Joasa mbamin'izay rehetra nataony sy ny niadiany tamin'i Amasiasa mpanjakan'i Jodà, moa tsy dia efa voasoratra ao amin'ny bokin'ny Tantaran'ny mpanjakan'Israely va izany?

¹⁶ Ary nodimandry any amin'ny razany Joasa ka nalevina tao Samaria ao amin'ny mpanjakan'Israely. Jeroboama zanany no nanjaka nandimby azy. ¹⁷ Amasiasa zanak'i Joasa mpanjakan'i Jodà kosa, dia mbola velona dimy ambin'ny folo taona, taorian'ny nahafatesan'i Joasa zanak'i Joakaza mpanjakan'Israely.

¹⁸ Ny sisa tamin'ny asan'i Amasiasa moa tsy dia efa voasoratra ao amin'ny bokin'ny Tantaran'ny mpanjakan'i Jodà? ¹⁹ Nisy firaisan-tetika hikomy taminy, tany Jerosalema, ka nandositra nankany Lakisa izy, nefa nisy olona nirahina hanaraka azy any Lakisa ka novonoina tany izy; ²⁰ dia nentina tamin'ny soavaly izy, nalevina tao Jerosalema ao amin'ny razany, amin'ny tanànan'i Davida. ²¹ Ka Azariasa izay enina ambin'ny folo taona, no nalain'ny vahoaka rehetra amin'i Jodà ka natsangany ho mpanjaka handimby an'i Amasiasa rainy. ²² Nanorina indray an'i Elata izy sy nampody azy mba ho an'i Jodà indray, rahefa nodimandry any amin'ny razany ny mpanjaka. ²³ Tamin'ny taona fahefatra ambin'ny folo nanjakan'i Amasiasa mpanjakan'i Jodà no nanjakan'i Jeroboama zanak'i Joasa mpanjakan'Israely tany Samaria. Nanjaka iraika amby efapolo taona izy.

²⁴ Nanao izay ratsy teo imason'ny Tompo izy, fa tsy nisy nialany ny fahotan'i Jeroboama zanak'i Nabata, izay nampanota an'Israely. ²⁵ Izy no nampody ny sisin-tanin'Israely, ho araka ny faritany taloha, hatramin'ny hadilalan'i Emata ka hatramin'ny ranomasin'i Arabah, araka ny tenin'ny Tompo Andriamanitr'Israely nolazainy tamin'ny alalan'ny mpanompony Jonasa mpaminany zanak'i Amati, avy any Geta-Kefera. ²⁶ Fa hitan'ny Tompo ny fahoriana mangidy indrindra nanjo an'Israely, izay tsy nisy afa-namonjy an'Israely, na olona manambady, na olona afaka, na olona iza na iza. ²⁷ Tsy mbola naraikitry ny Tompo anefa ny hamono ny anaran'Israely eo ambanin'ny lanitra, ka ny tànan'i Jeroboama zanak'i Joasa no namonjen'ny Tompo azy ireo. ²⁸ Ny sisa tamin'ny asan'i Jeroboama izay rehetra nataony, ny herim-po nasehony, ny niadiany sy nampodiany an'i Damasa sy Emata izay an'i Jodà taloha, mba ho an'Israely, moa tsy dia efa voasoratra ao amin'ny bokin'ny Tantaran'ny mpanjakan'Israely va izany?

²⁹ Ary nodimandry any amin'ny razany Jeroboama dia eny amin'ny mpanjakan'Israely, ka Zakariasa zanany no nanjaka nandimby azy.

Toko faha-15

¹ Tamin'ny taona fahafito amby roapolo nanjakan'i Jeroboama mpanjakan'Israely, no vao nanjaka kosa Azariasa zanak'i Amasiasa mpanjakan'i Jodà.

² Vao enina ambin'ny folo taona izy, dia tonga mpanjaka, ary roa amby dimampolo taona no nanjakany tao Jerosalema. Ny anaran-dreniny dia Jekelia, avy ao Jerosalema. ³ Nanao izay mahitsy eo imason'ny Tompo izy, araka izay rehetra nataon'i Amasiasa rainy. ⁴ Ny fitoerana avo anefa mbola tsy foana; notohizan'ny vahoaka ny fanaterana sorona aman-java-manitra teny amin'ny fitoerana avo. ⁵ Ary Iaveh namely ny mpanjaka, ka boka hatramin'ny andro nahafatesany izy, ka nitoetra tamin'ny trano manirery. Fa Joatama zanaky ny mpanjaka no nanapaka tao an-trano sy nitsara ny vahoaka tamin'ny tany. ⁶ Ny sisa tamin'ny asan' i Azariasa mbamin'izay rehetra nataony moa tsy dia efa voasoratra ao amin'ny bokin'ny Tantaran'ny mpanjakan'i Jodà?

⁷ Ary nodimandry any amin'ny razany Azariasa, ka nalevina tao amin'ny razany, ao an-tanànan'i Davida. Joatama zanany no nanjaka nandimby azy. ⁸ Tamin'ny taona fahavalo amby telopolo nanjakan'i Azariasa mpanjakan'i Jodà no vao nanjaka tamin'Israely tao Samaria kosa Zakariasa zanak'i Jeroboama. Enim-bolana no nanjakany.

⁹ Nanao izay ratsy teo imason'ny Tompo toy ny nataon'ny razany izy, fa tsy niala tamin'ny fahotan'i Jeroboama zanak'i Nabata izay nampanota an'Israely. ¹⁰ Nikomy taminy Seloma zanak'i Jabesa ary namely nahafaty azy teo anatrehan'ny vahoaka, dia nanjaka nandimby azy izy. ¹¹ Ny sisa tamin'ny asan'i Zakariasa, dia indro fa efa voasoratra ao amin'ny bokin'ny Tantaran'ny mpanjakan'Israely.

¹² Izany no tenin'ny Tompo nolazainy tamin'i Jeho hoe: Hipetraka eo amin'ny seza fiandrianan'Israely ny zanakao hatramin'ny taranaka fahefatra. Ka tanteraka izany. ¹³ Tamin'ny taona fahasivy amby telopolo nanjakan'i Oziasa mpanjakan'i Jodà no vao tonga mpanjaka kosa Seloma zanak'i Jabesa, ary iray volana no nanjakany tao Samaria. ¹⁴ Fa niakatra avy any Tersà, i Manahema zanak'i Gadì, ary nony tonga tao Samaria dia namely nahafaty an'i Seloma zanak'i Jabesa tao Samaria ihany izy, ka nanjaka nandimby azy. ¹⁵ Ny sisa tamin'ny asan'i Seloma mbamin'ny fikomiana nataony, dia indro fa voasoratra ao amin'ny bokin'ny Tantaran'ny mpanjakan'Israely.

¹⁶ Tamin'izany, Manahema dia niala tao Tersà ary namely an'i Tapsà sy ny mponina ao aminy mbamin'ny faritaniny; noho izy tsy namoha vavahady azy, no namelezany azy, ary notatahany ny kibon'ny vehivavy bevohoka rehetra. ¹⁷ Tamin'ny taona fahasivy amby telopolo nanjakan'i Azariasa tamin'i Jodà no vao tonga mpanjaka tamin'Israely kosa Manahema zanak'i Gadì. Folo taona no nanjakany tao Samaria.

¹⁸ Nanao izay ratsy eo imason'ny Tompo izy, fa nandritra ny andro niainany, tsy niala tamin'ny fahotan'i Jeroboama zanak'i Nabata izay nampanota an'Israely. ¹⁹ Tongan'i Fola mpanjakan'i Asiria, ny tany, ary nomen'i Manahema talenta volafotsy arivo Fola mba hamonjy azy sy hanamafy ny fanjakana eo an-tanany. ²⁰ Israely, dia ny mpanan-karem-be rehetra, no nampandoavin'i Manahema izany vola izany, dimampolo sikla avy, homeny ny mpanjakan'i Asiria. Ka dia niverina ny mpanjakan'i Asiria, fa tsy niato teo amin'ny tany. ²¹ Ny sisa tamin'ny asan'i Manahema, mbamin'izay rehetra nataony, moa tsy dia efa voasoratra ao amin'ny bokin'ny Tantaran'ny mpanjakan'Israely va izany?

²² Ary nodimandry any amin'ny razany Manahema, ka Faseia zanany, no nanjaka nadimby azy. ²³ Tamin'ny taona faha-dimampolo nanjakan'i Azariasa mpanjakan'i Jodà, no vao nanjakan'i Faseià zanak'i Manahema tamin'Israely tao Samaria kosa. Roa taona no nanjakany.

²⁴ Nanao izay ratsy eo imason'ny Tompo izy, fa tsy niala tamin'ny fahotan'i Jeroboama zanak'i Nabata izay nampanota an'Israely. ²⁵ Nioko taminy Fasea, zanak'i Romeliasa, manamboninahitra lefiny, ary namono azy mbamin'i Argoba sy Arie tao Samaria, tao amin'ny trano avon'ny tranon'ny mpanjaka, ary nisy dimampolo lahy tamin'ny taranaky ny Gabaadita nomba azy. Namono an'i Faseià izy, dia nanjaka nandimby azy. ²⁶ Ny sisa tamin'ny asan'i Faseià mbamin'izay rehetra nataony, dia indro fa efa voasoratra ao amin'ny bokin'ny Tantaran'ny mpanjakan'Israely.

²⁷ Tamin'ny taona faharoa amby dimampolo nanjakan'i Azariasa mpanjakan'i Jodà, no vao nanjaka i Fasea, zana-dRomeliasa, tao Samaria. Roapolo taona no nanjakany.

²⁸ Nanao izay ratsy eo imason'ny Tompo izy, fa tsy niala tamin'ny fahotan'i Jeroboama zanak'i Nabata izay nampanota an'Israely. ²⁹ Tamin'ny andron'i Fasea mpanjakan'Israely no nahatongavan'i Teglathfalasara mpanjakan'i Asiria sy nahazoan'io an'i Ajona, Abela-Beta-Makaa, Janoe, Kedesa, Asora, Galaada ary Galileas, dia ny tanin'i Neftalì rehetra, sady nentiny ho babo tany Asiria koa ny mponina. ³⁰ Nikomy tamin'i Fasea zana-dRomeliasa, Osea zanak'i Ela, ka namono nahafaty azy, ary nanjaka nandimby azy, tamin'ny faha-roapolon'ny taona nanjakan'i Joatama zanak'i Oziasa. ³¹ Ny sisa tamin'ny asan'i Fasea, mbamin'izay rehetra nataony, dia indro fa efa voasoratra ao amin'ny bokin'ny Tantaran'ny mpanjakan'Israely.

³² Tamin'ny faharoan'ny taona nanjakan'i Fasea zanak'i Romeliasa mpanjakan'Israely, no vao nanjaka kosa Joatama zanak'i Oziasa mpanjakan'i Jodà.

³³ Dimy amby roapolo taona izy fony vao nanjaka, ary enina ambin'ny folo taona no nanjakany, tao Jerosalema. Ny anaran-dreniny dia Jerosa, zanak'i Sadaoka.