Boky Faharoan'ny Mpanjaka

Toko faha-15

³⁴ Nanao izay mahitsy teo imason'ny Tompo izy, sahala tsara ny nataon'izy sy Oziasa rainy. ³⁵ Ny fitoerana avo anefa mbola tsy foana, notohizin'ny vahoaka ny fanaterana sorona aman-java-manitra teny amin'ny fitoerana avo. Joatama no nanao ny vavahady ambony amin'ny tranon'ny Tompo. ³⁶ Ny sisa tamin'ny asan'i Joatama mbamin'izay rehetra nataony, moa tsy dia efa voasoratra ao amin'ny bokin'ny Tantaran'ny mpanjakan'i Jodà va izany?

³⁷ Nanomboka tamin'izany andro izany ny nampandehanan'ny Tompo an'i Rasina mpanjakan'i Siria sy Fasea zana-dRomeliasa hanafika an'i Jodà.

³⁸ Ary nodimandry any amin'ny razany Joatama ka nalevina tao an-tanànan'i Davida rainy, ao amin'ny razany. Akaza zanany no nanjaka nandimby azy.

Toko faha-16

¹ Tamin'ny taona fahafito ambin'ny folo nanjakan'i Fasea zana-dRomeliasa no vao nanjaka kosa Akaza, zanak'i Joatama mpanjakan'i Jodà.

² Roapolo taona Akaza fony vao nanjaka, ary enina ambin'ny folo taona no nanjakany tao Jerosalema. Tsy mba nanao izay mahitsy eo imason'ny Tompo Andriamaniny tahaka an'i Davida rainy izy; ³ fa nandeha tamin'ny lalan'ny mpanjakan'Israely; ny zanany lahy aza, nampamakiny ny afo, araka ny fahavetavetan'ireo firenena noroahin'ny Tompo teo anoloan'ny zanak'Israely. ⁴ Nanaterany sorona aman-java-manitra avokoa teny amin'ny fitoerana avo sy teny amin'ny havoana ary teny ambanin'ny hazo maitso rehetra teny. ⁵ Tamin'izany no niakaran-dRasina mpanjakan'i Siria, sy Fasea zana-dRomeliasa, hanafika an'i Jerosalema. Nanao fahirano an'i Akaza izy ireo, nefa tsy naharesy azy.

⁶ Tamin'izany fotoana izany ihany koa no nahazoan-dRasina indray an'i Elata ho ambany fahefan'ny Siriana, ka noroahiny hiala tao Elata ny Jody, fa ny Siriana no nankao Elata dia monina ao mandrak'androany. ⁷ Nandefa iraka tany amin'i Teglathfalasara mpanjakan'i Asiria, Akaza nanao hoe: Mpanomponao sy zanakao aho, ka miakara hanafaka ahy amin'ny tanan'ny mpanjakan'Israely, fa nitsangan-kamely ahy izy ireo. ⁸ Ary nalain'i Akaza ny volafotsy sy volamena hita tao an-tranon'ny Tompo, sy tao amin'ny rakitry ny tranon'ny mpanjaka, nampitondrainy ho fanomezana ny mpanjakan'i Asiria. ⁹ Nohenoin'ny mpanjakan'i Asiria izy, ka niakatra namely an'i Damasa ny mpanjakan'i Asiria; ary nony azony, nentiny ho babo ho any Kira ny mponina, ary novonoiny ho faty Rasina. ¹⁰ Nankany Damasa Akaza mpanjaka hitsena an'i Teglathfalasara mpanjakan'i Asiria. Nony nahita ity otely tao Damasa Akaza mpanjaka, dia nampitondra ny modelin'ny otely sy ny toetr'endriny araka izay nahavitana azy manontolo ho an'i Oriasa mpisorona.

¹¹ Ka naorin'i Oriasa mpisorona ny otely, ary nataon'i Oriasa mpisorona mitovy indrindra amin'ny modely nampitondrain'i Akaza mpanjaka, avy any Damasa, nataony vita mandra-pahatongan'ny mpanjaka avy any Damasa. ¹² Nony tonga avy any Damasa ny mpanjaka, dia nahita ny otely. Nanatona ny otely ny mpanjaka dia niakatra teo; ¹³ nodorany teo ny sorona dorany sy ny fanatiny, nararany ny fanatiny araraka, ary naidiny teo ambonin'ny otely ny ran'ny sorom-pihavanany. ¹⁴ Ilay otely varahina teo anatrehan'ny Tompo, nafindrany hiala eo anoloan'ny trano, mba tsy ho eo anelanelan'ny tranon'ny Tompo sy ny otely vaovao, dia nataony eo anilan'ity otely vaovao, eo avarany. ¹⁵ Ary izao koa no didy nomen'i Akaza mpanjaka an'i Oriasa mpisorona: Doroy eo ambonin'ny otely lehibe ny sorona dorana ny maraina, ny fanatitra hariva, ny sorona dorana amam-panatitry ny mpanjaka, ny sorona dorana amam-panatitry ny vahoaka rehetra; araraho eo ny fanatiny araraka ary aidino eo ny ra rehetra avy amin'ny sorona dorana sy ny ra rehetra avy amin'ny sorona. Fa ny amin'ny otely varahina, dia raharahako ny manapaka ny aminy. ¹⁶ Notanterahin'i Oriasa mpisorona avokoa izay rehetra nodidian'i Akaza mpanjaka. ¹⁷ Fanampin'izany, dia novakin'i Akaza mpanjaka koa ny panoa sy ny tongony ary nesoriny ny tavindrano teo amboniny; nampidininy ny ranomasina avy teo ambonin'ireo omby varahina nibaby azy, ka nataony teo ambony lampivato, ¹⁸ ary nafindrany toerana tao an-tranon'ny Tompo ny trano hevan-tsabata naorina tao amin'ny trano, mbamin'ny fidiran'ny mpanjaka teo ivelany, noho ny henany ny mpanjakan'i Asiria. ¹⁹ Ny sisa tamin'ny asan'i Akaza mbamin'izay rehetra nataony, moa tsy dia efa voasoratra ao amin'ny bokin'ny Tantaran'ny mpanjakan'i Jodà va izany?

²⁰ Ary nodimandry any amin'ny razany Akaza, ka nalevina ao an-tanànan'i Davida ao amin'ny razany. Ezekiasa zanany no nanjaka nandimby azy.

Toko faha-17

¹ Tamin'ny taona faharoa ambin'ny folo nanjakan'i Akaza mpanjakan'i Jodà, no vao nanjaka tamin'Israely tao Samaria Osea zanak'i Ela. Sivy taona no nanjakany.

² Nanao izay ratsy eo imason'ny Tompo izy, saingy tsy dia tahaka ireo mpanjakan'Israely talohany. ³ Niakaran'i Salmanasara mpanjakan'i Asiria notafihina Osea, ka tonga mpanompon'io nandoa hetra ho azy izy. ⁴ Vaky tamin'ny mpanjakan'i Asiria ho nanao teti-dratsy anefa Osea fa naniraka olona tany amin'i Soa, mpanjakan'i Ejipta, sady tsy nandoa hetra intsony ho an'ny mpanjakan'i Asiria, isan-taona, ka nasain'ny mpanjakan'i Asiria nosamborina sy nogadraina, dia nalatsaka an-tranomaizina. ⁵ Notetezin'ny mpanjakan'i Asiria avokoa ny tany, dia niakatra hamely an'i Samaria izy, ka nanao fahirano azy telo taona. ⁶ Nony tamin'ny taona fahasivy nanjakan'i Osea dia azon'ny mpanjakan'i Asiria Samaria, ka nentiny ho babo tany Asiria Israely namponeniny tany Hala, teo amoron'i Habora, ony any Gosana, ary teny amin'ny tanànan'ny Meda. ⁷ Izany no tonga, dia noho ny zanak'Israely nanota tamin'ny Tompo Andriamaniny, izay nitondra azy niakatra avy tany amin'ny tany Ejipta, avy teo ambanin'ny fahefan'i Faraona, mpanjakan'i Ejipta, sy noho izy ireo natahotra andriamani-kafa.

⁸ Narahin'izy ireo ny fombam-pivavahan'ireo firenena izay noroahin'ny Tompo teo anoloan'ny zanak'Israely, sy ny fomba noforonin'ny mpanjakan'Israely. ⁹ Nosarontsaronan'ny zanak'Israely ny zavatra tsy mety nataony tamin'ny Tompo Andriamaniny. Nanorina fitoerana avo tamin'ny tanànany rehetra izy, hatramin'ny tilikambon'ny mpiambina, ka hatramin'ny tanàna mimanda. ¹⁰ Nasiany tsangam-bato sy aseraha avokoa teny amin'ny havoana rehetra sy teny ambany hazo maitso rehetra teny; ¹¹ dia teny izy no nandoro zava-manitra amin'ny fitoerana avo rehetra, toy ny firenena izay nataon'ny Tompo babo teo anoloan'izy ireo, ary nanao zava-dratsy nampahatezitra an'ny Tompo. ¹² Koa nanompo sampy izy ireo, nefa izany no nilazan'ny Tompo taminy hoe: Aza manao izany hianareo. ¹³ Nitsangan-ko vavolombelona anefa Iaveh tamin'ny alalan'ny mpaminany sy ny mpahitany niampanga an'Israely sy Jodà nanao hoe: Miverena avy amin'ny lalan-dratsinareo, ka tandremo ny didy amam-pitsipiko, amim-panarahana ny lalàna manontolo, nandidiako ny razanareo sy nampitondraiko ny mpaminany mpanompoko, ho any aminareo. ¹⁴ Fa tsy nihaino izany izy ireo, fa nanamafy ny hatony, toy ny razany izay tsy nino an'ny Tompo Andriamaniny. ¹⁵ Nolaviny ny lalàny amam-panekem-pihavanana nataony tamin'ireo razany mbamin'ny teni-vavolombelona niampangany azy ireo. Nandeha nanaraka zavatra tsinontsinona izy, ka niraiki-po tamin'ny zava-poana, tahaka ireo firenena manodidina azy, izay noraran'ny Tompo tsy halainy tahaka. ¹⁶ Nafoiny avokoa ny didin'ny Tompo Andriamaniny; fa zanak'omby anidina roa no nataony ho azy, sy aseraha no nataony ho azy; ny tafiky ny lanitra rehetra no niankohofany, ary Baala no notompoiny. ¹⁷ Nampandehaniny hamaky ny afo ny zanany lahy aman-janany vavy. Nataony daholo na sikidy na fankatoavana. Ary nikezaka hanao izay ratsy eo imason'ny Tompo izy, ka nampahatezitra azy. ¹⁸ Dia tezitra indrindra tamin'Israely, ka nesoriny tsy ho eo imasony izy. Ny fokon'i Jodà irery no sisa, ¹⁹ ary na Jodà indray aza, tsy dia nitandrina ny didin'ny Tompo Andriamaniny, fa nanaraka ny fombam-pivavahana noforonin'Israely ihany koa. ²⁰ Ka dia narian'ny Tompo avokoa ny taranak'Israely; nampahoriny sy natolony teo an-tanan'ny mpamabo izy ireo, mandra-pandroaka azy lavitra ny tavany. ²¹ Satria niendaka niala tamin'ny fianakavian'i Davida Israely, fa nanangana an'i Jeroboama zanak'i Nabata ho mpanjaka, ary Jeroboama nampiala an'Israely tamin'ny Tompo sy nampanao fahotana lehibe azy ireo. ²² Ary nandroso tamin'ny fahotana rehetra nataon'i Jeroboama ny zanak'Israely, fa tsy niala tamin'izany, ²³ mandra-pandroak'Iaveh azy lavitra ny tavany, araka izay voalazany tamin'ny alalan'ny mpaminany mpanompony rehetra, ka dia lasan-ko babo any Asiria lavitry ny taniny Israely mandrak'androany. ²⁴ Olona nasain'ny mpanjakan'i Asiria ho avy any Babilona sy any Kota sy any Avah, sy any Emata, ary any Sefarvaima no namponeniny tany amin'ny tanànan'i Samaria, hisolo ny zanak'Israely, ka dia ireny no nahazo an'i Samaria, sy nonina tamin'ny tanànany.

²⁵ Fony vao nanomboka nonina tany izy ireny, dia tsy natahotra an'ny Tompo, ka nandefasan'ny Tompo liona hamono azy.