Ny Jenezy

Toko faha-32

²³ Nalainy ireo nampitainy ny rano, ary nampitainy koa ny fananany. ²⁴ Dia Jakoba irery sisa nijanona teo, ary nisy lehilahy anankiray nitolona taminy, mandra-pahazava-ratsin'ny andro.

²⁵ Nony hitan-dralehilahy fa tsy naharesy azy izy, dia ny famavàn'ny feny no notendreny ka nivika tery ny fotopen'i Jakoba nandritra ny nitolomany taminy. ²⁶ Dia hoy izy tamin'i Jakoba: Avelao aho handeha, fa efa hazava ratsy ity ny andro. Fa hoy Jakoba: Tsy avelako handeha hianao raha tsy efa nitso-drano ahy. ²⁷ Dia hoy izy taminy: Iza no anaranao? Ary novaliany hoe: Jakoba. ²⁸ Ka hoy izy : Tsy hatao hoe Jakoba intsony ny anaranao; fa hatao hoe Israely; satria efa niady tamin'Andriamanitra sy tamin'olombelona hianao ka nahery. ²⁹ Dia mba nanontany azy kosa Jakoba nanao hoe: Masìna hianao, mba ampahalalao ahy kely ny anaranao. Fa hoy izy: Ahoana no anontanianao ny anarako? Dia nitso-drano azy teo izy. ³⁰ Ary nataon'i Jakoba hoe Fanoely ny anaran'io tany io, fa hoy izy: Efa nahita an'Andriamanitra nifanatrika aho, nefa velona ihany ny aiko. ³¹ Nony niala teo Fanoely izy, dia indro hitany niposaka ny masoandro; nitolitsika anefa izy tamin'ny foto-peny. ³² Izany no tsy ihinanan'ny Zanak'Israely ny hozatra lehibe ao amin'ny famavàn'ny fe mandrak'androany, dia noho ny nanendren'Andriamanitra ny famavàn'ny fen'i Jakoba teo amin'ny hozatra lehibe.

Toko faha-33

¹ Ary natopin'i Jakoba ny masony, ka indro tamy Esao omban'olona efa-jato lahy. Dia nozarazarainy ny zaza ho amin'i Lià sy ho amin'i Rasela ary ho amin'ny ankizivavy roa.

² Ny ankizivavy sy ny zanany no nanarakaraka; Rasela sy Josefa no vody làlana; ³ ary ny tenany kosa nandeha teo alohan'ireo, ka niankohoka tamin'ny tany impito izy mandra-pahatongany teo anilan'i Esao, rahalahiny. ⁴ Dia nihazakazaka nitsena azy Esao ka namihina azy nisakambina ny vozony, nanoroka azy; ary samy nitomany izy ireo. ⁵ Nony nanopy ny masony Esao, ka nahita ireto zaza amam-behivavy dia nanao hoe: Iza avy ireto miaraka aminao? Ary hoy Jakoba: Ireo no zaza nomen'Andriamanitra ny mpanomponao.

⁶ Nanatona ny ankizivavy, dia izy sy ny zanany, ka niankohoka; ⁷ nanatona koa Lià sy ny zanany, ka niankohoka; farany, nanantona Josefa sy Rasela ka niankohoka. ⁸ Ary hoy Esao: Kasainao hatao inona avy ireny antokony rehetra nifanena tamiko ireny? Dia hoy Jakoba: Ny mba hahitako fitia eo imason'ny tompoko. ⁹ Fa hoy Esao: Efa manam-be aho, ry rahalahiko, ka tano ho anao ihany ny anao. ¹⁰ Ary hoy Jakoba: Tsia, fa miangavy aminao, raha mba nahita fitia teo imasonao ihany aho, raiso avy amin'ny tànako ny fanomezako; fa izany nahitako ny tavanao hoatra ny mahita ny tavan'Andriamanitra, ary efa mba tsara koa ny nandraisanao ahy. ¹¹ Koa raiso ny fanatitro izay nentina teny aminao; fa efa nanisy soa ahy Andriamanitra, ka tsy orin'inon'inona aho. Dia notereny mafy teo Esao, ka nandray. ¹² Ary hoy Esao: Ndao àry arosoy ny diantsika fa izaho no hiroso eo alohanao.

¹³ Hoy ny navalin'i Jakoba: Fantatry ny tompoko, fa ny ankizy mbola malemilemy; sady betsaka ny ondry aman'omby vavy mbola mitaiza entiko koa; raha korodonina indray andro monja ireo, dia ho levona ny biby fiompy rehetra. ¹⁴ Ka aoka ny tompoko hialoha ny mpanompony; fa izaho kosa hanaraka miadana, araka ny dian'ny biby fiompy izay mandeha eo alohako, sy ny dian'ny ankizy, mandra-pahatongako any amin'ny tompoko any Seira. ¹⁵ Dia hoy Esao: Avelao àry hamelako hiaraka aminao ahay ny sasany amin'ny olona miaraka amiko. ¹⁶ Dia niverina anankany Seira androtr'iny ihany Esao. ¹⁷ Jakoba kosa nankao Sokota, dia nanao trano ho azy sy nanao trano tomboka ho an'ny biby fiompiny koa. Izany no nanaovana ny anaran'io tany io hoe Sokota.

¹⁸ Dia tafaverina avy any Padan-Arama Jakoba ka tonga soa aman-tsara tao Sikema, amin'ny tany Kanaana, ary nitoby teo anoloan'ny tanàna.

¹⁹ Novidiny vola zato kesità tamin'ny zanak'i Hemora, rain'i Sikema, ny lanin-tany nanorenany lay. ²⁰ Ary nanangana otely teo izy, ka nomeny anarana hoe: El-Elohe-Israely.

Toko faha-34

¹ Ary Dinà zanakavavin'i Lià, naterany tamin'i Jakoba, nivoaka hizaha ny zazavavy tompon-tany.

² Ka hitan'i Sikema zanak'i Hemora, Heveana, andriana tamin'izany tany izany, dia notsoahany, ka niray fandriana ary nanao an-kery taminy izy. ³ Raiki-pitia tamin'i Dinà, zanakavavin'i Jakoba, ny fon'i Sikema, ka tia an-drazazavavy ary nanao teny malefaka taminy izy. ⁴ Ary Sikema nilaza tamin'i Hemora rainy hoe: Alaovy ho vadiko io zazavavy io. ⁵ Efa ren'i Jakoba ihany ny nandotoany an'i Dinà zanany vavy, nefa mbola tany an-tsaha tamin'ny biby fiompiny ny zanany lahy, ka dia nangina izy aloha mandra-pahatongan'ireo. ⁶ Dia nivoaka hiresaka amin'i Jakoba Hemora rain'i Sikema;

⁷ ary efa tonga avy any an-tsaha koa ny zanak'i Jakoba vao nandre izany zavatra izany; tafintohina mafy ireo lehilahy ireo ka nisafoaka mihitsy izy ireo, fa nanao izay fady indrindra Sikema nanala baraka an'Israely tamin'ny nandriany tamin'ny zanakavavin'i Jakoba, ka zavatra tsy tokony hatao akory izany. ⁸ Izao no nolazain'i Hemora tamin'izy ireo: Raiki-pitia amin'ny zanakavavinareo ny fon'i Sikema zanako; koa masìna hianareo, omeo azy ho vadiny. ⁹ Aoka hifanambady anaka isika: ny zanakavavinareo homenareo ho anay; ny anay kosa halainareo ho anareo. ¹⁰ dia honina aty aminay hianareo, ka ho azonareo hanaranam-po ny tany; na hipetrahanareo na hanaovanareo varotra na hahatongavanareo ho tompon-tany. ¹¹ Hoy kosa Sikema tamin'ny rain'i Dinà, sy ireo anadahiny: Aoka mba hahita fitia eo imasonareo aho, fa homeko anareo izay tononinareo amiko, ¹² na harem-be asainareo haloako, na fanomezana be vava, izay tononinareo homeko avokoa, fa omeo ho vadiko ny zazavavy. ¹³ Saroro no navalin'ny zanak'i Jakoba an'i Sikema sy Hemora, rainy, noho ny nandotoan'i Sikema an'i Dinà, anabavin'izy ireo,

¹⁴ ka hoy izy taminy: Tsy azonay atao ny manome ny anabavinay ho an'izay lehilahy tsy voafora, fa fahavetavetana izany aminay. ¹⁵ Izao ihany no azonay hanekena ny hatakareo; raha tonga tahaka anay hianareo, ka hoforàna avokoa ny lehilahy eo aminareo. ¹⁶ Amin'izay hianareo homenay ny zanakay vavy; izahay haka ny anareo ho anay. Dia honina ao aminareo izahay, ka ho firenena iray ihany isika. ¹⁷ Fa raha tsy mety hihaino anay hianareo sy hifora dia halainay ny zanakay vavy ka handeha izahay. ¹⁸ Sitrak'i Hemora sy Sikema, zanak'i Hemora, ny teniny;

¹⁹ ka tsy nitaredretra ny hanao izany zavatra izany razazalahy, fa fatra-pitia ny zakavavin'i Jakoba izy, ary izy no tò teny indrindra tao an-tranon-drainy. ²⁰ Dia nankeo am-bavahadin'ny tanàna Hemora sy Sikema zanany, ka niteny tamin'ny mponina tao an-tanànany nanao hoe: