Bokin'i Esdrasa

Toko faha-8

¹¹ tamin'ny taranak'i Bebaì, Zakaria zanak'i Bebaì mbamin'ireo valo amby roapolo lahy izay niaraka taminy; ¹² tamin'ny taranak'i Azgada, Johanàna zanak'i Eksetana mbamin'ireo folo amby zato lahy niaraka taminy; ¹³ tamin'ny taranak'i Adonikama, dia farany ireo, ka izao no anarany: Elifeleta, Jehiela, ary Semaiasa, mbamin'ireo enimpolo lahy niaraka taminy; ¹⁴ tamin'ny taranak'i Begoaì, Otaì sy Zakora, mbamin'ireo fitopolo lahy niaraka taminy. ¹⁵ Novoriko teo amoron'ny ony mankany Ahavà izy ireo, dia nilasy teo hateloana izahay. Nony nandinika ity vahoaka mbamin'ireo mpisorona aho, dia tsy nahita ny taranak'i Levì teo na dia iray aza.

¹⁶ Dia nasaiko nantsoina ny loholona, Eliezera, Ariela, Semeiasa, Elnatàna, Jariba; Elnatàna anankiray, Natàna, Zakaria ary Mosolama, mbamin'ireo mpampianatra: Joiariba sy Elnatàna. ¹⁷ Nirahiko ho any amin'i Edao loholona, ao amin'ny fitoerana atao hoe Kasfià izy ireo; dia nofahanako teny hambara amin'i Edao, mbamin'ireo Natineana rahalahiny any amin'ny fitoerana atao hoe Kasfià izy, mba hitondrany mankaty aminay izay ho mpandraharaha ao amin'ny tranon'Andriamanitray ¹⁸ Ary satria nomba anay ny tanàna manambin'Andriamanitray, dia nentin'izy ireo nankaty aminay, ity lehilahy manan-tsaina anankiray avy amin'ny taranak'i Moholì, zanak'i Levì, zanak'Israely, dia Sarabiasa mbamin'ireo zanany aman-drahalahiny valo ambin'ny folo lahy; ¹⁹ Hasabiasa ary Izaia koa miaraka aminy, avy amin'ny taranak'i Merarì, mbamin'ireo rahalahiny sy zanany roapolo lahy; ²⁰ ary ny avy amin'ny Natineana izay nomen'i Davida sy ny loholona hanompo ny levita, Natineana roapolo sy roan-jato samy voatendry amin'ny anarany. ²¹ Niantso andro fifadian-kanina aho, teo amoron'ny ony Ahavà teo, hampijalianay tena eo anatrehan'Andriamanitray, hangatahanay aminy mba ho tsara mandroso avokoa, na ny tenanay, na ny zanakay, na ny anananay rehetra.

²² Fa nahamenatra ahy ny hangataka miaramila manatitra amam-pitaingin-tsoavaly, tamin'ny mpanjaka, hiaro anay amin'ny fahavalo eny an-dàlana, noho izahay efa niteny tamin'ny mpanjaka nanao hoe: Momba an'izay rehetra mitady azy ny tànan'Andriamanitra, hahasoa azy ireo, fa mahatratra an'izay rehetra mahafoy azy kosa ny heriny sy ny fahatezerany. ²³ Noho izany nifady hanina izahay sy nangataka tamin'Andriamanitray, ary nihaino anay izy. ²⁴ Dia nifidy lohan'ny mpisorona roa ambin'ny folo lahy aho; dia Sarabiasa sy Hasabiasa, mbamin'ny folo lahy tamin'ireo rahalahiny;

²⁵ ka nolanjaiko teo anatrehan'izy ireo, ny volafotsy, ny volamena sy ny fanaka, zavatra naterin'ny mpanjaka sy ny mpanolo-tsainy aman-dehibe ary ny olon-drehetra amin'Israely vory teo, natokany ho an'ny tranon'Andriamanitra, ²⁶ dia nolanjaiko sady nataoko eo an-tànany, talenta volafotsy dimampolo sy enin-jato, fanaka volafotsy lanjan-talenta zato, talenta volamena zato; ²⁷ kopy volamena roapolo, lanjan-darìka arivo; ary kapoaka varahina manganohano roa, sarobidy toy ny volamena. ²⁸ Ary izao no nolazaiko tamin'izy ireo: Masina eo anatrehan'ny Tompo hianareo, ary ireo fanaka ireo dia zavatra masina; izany volafotsy amana volamena izany, dia fanatitra an-tsitra-po ho an'ny Tompo, Andriamanitry ny razanareo. ²⁹ Koa ambeno amim-pitandremana ireo, mandra-pandanjanareo azy eo anatrehan'ny lohan'ny mpisorona sy ny levita, sy eo anatrehan'ny loham-pianakavian'Israely, any Jerosalema, amin'ny efi-trano eo an-tranon'ny Tompo. ³⁰ Dia noraisin'ireo mpisorona sy levita ny volafotsy amana volamena sy fanaka araka ny lanjany, hoentina ho any Jerosalema, ao an-tranon'Andriamanitsika. ³¹ Niala teo amin'ny ony Ahavà, tamin'ny andro faharoa ambin'ny folon'ny volana voalohany izahay, ho any Jerosalema. Nomba anay ny tànan'Andriamanitray, ka namonjy anay tamin'ny tànan'ny fahavalo sy ny mpanotrika teny an-dàlana.

³² Nony tonga tany Jerosalema izahay, dia niala sasatra hateloana. ³³ Tamin'ny andro fahaefatra dia nolanjaina tao an-tranon'Andriamanitray ny volafotsy sy volamena mbamin'ny fanaka, ho eo an-tànan'i Merimota, zanak'i Oria, mpisorona; teo aminy koa Eleazara, zanak'i Finea; ary teo amin'izy ireo koa, Jozabada zanak'i Josoe, sy Noadiasa zanak'i Benoì.

³⁴ Dia araka ny isany aman-danjany avokoa izy, ka nalatsaka an-tsoratra tamin'izany andro izany ny tontalin'ny lanjany. ³⁵ Ary nanatitra sorona dorana ho an'Andriamanitr'Israely ny olona avy any amin'ny tany nahavoasesi-tany azy, dia ny zanaky ny fahababoana, ombalahy roa ambin'ny folo ho an'Israely rehetra, ondralahy enina amby sivifolo, zanak'ondry fito amby fitopolo, osilahy roa ambin'ny folo, noho ny ota: natao sorona dorana ho an'ny Tompo izany rehetra izany.

³⁶ Dia natolotr'izy ireo ny governora lehiben'ny mpanjaka mbamin'ny governora any an-dafin'ny ony, ny didin'ny mpanjaka, ka dia niaro ny vahoaka sy ny tranon'Andriamanitra ireo.

Toko faha-9

¹ Nony vita izany rehetra izany, nanatona ahy ny lehibe, ka nanao hoe: Tsy tafasaraka tamin'ny vahoakan'ireto tany ireto ny vahoaka Israely mbamin'ny mpisorona sy ny levita fa manaraka ny fahavetavetany, ny an'ny Kananeana, ny Heteana, ny Ferezeana, ny Jeboseana, ny Amonita, ny Moabita, ny Ejipsiana, ary ny Amoreana;

² satria naka ny zanakavavin'ireo izy ho vadiny, sy ho an'ny zanany lahy, ka tafaharo amin'ny vahoakan'ireto tany ireto ny taranaka masina; sady ny lohany sy andriambaventy indrindra no loha làlana amin'izany ota izany. ³ Vao nandre izany aho dia norovitiko ny akanjoko sy ny kapaotiko, norombotako ny volondohako amam-tsomotro, dia tafatombina nivarahontsana teo aho.

⁴ Nivory teo amiko avokoa izay nangovitra noho ny tenin'Andriamanitr'Israely, noho ny otan'ny zanaky ny fahababoana; izaho izany mbola tafatombina nivarahontsana teo ihany mandra-pahatongan'ny fanatitra hariva. ⁵ Efa mby amin'ny fotoanan'ny fanatitra hariva aho, vao tafarina tamin'ity fahoriako, amin'ireto akanjoko sy kapaotiko rovitra, dia rafitra nandohalika sy nanandratra ny tanako nankany amin'ny Tompo Andriamanitro, nanao hoe:

⁶ Andriamanitra ô, safo-kenatra sy mangaihay loatra aho, tsy sahy miandrandra mankany aminao Andriamanitro, fa nitombo nihoatra ny lohanay ny helokay, ary niakatra nanakatra ny lanitra ny fahotanay. ⁷ Hatramin'ny andron'ny razanay ka mandrak'androany, dia efa meloka loza ery izahay; ary noho ny helokay ihany no nanolorana anay mbamin'ny mpanjakanay sy ny mpisoronay, ho eo an-tànan'ny mpanjakan'ny tany hafa, ho matin-tsabatra, ho babo, horobaina, ary hangaihay tahaka ny amin'izao anio izao. ⁸ Nisy andro anefa nanehoan'ny Tompo Andriamanitray ny famindram-pony taminay, dia navelany hisy sisa afaka izahay, ka nomeny fialofana eo amin'ny fitoerany masina, mba hanazavan'Andriamanitray ny masonay, sy hamelombelomany kely ny ainay ao anatin'ny fahandevozanay. ⁹ Fa andevo izahay, nefa tsy nahafoy anay tao anatin'ny fahandevozanay ny Andriamanitray. Nitarika ireo mpanjakan'i Persa hanisy soa anay izy hamelombelona ny ainay, mba hanaovanay ny tranon'Andriamanitray sy hamboaranay ny rava eo, dia hanomezany anay fonenana voafefy amin'i Jodà sy Jerosalema. ¹⁰ Koa ankehitriny, ry Andriamanitray ô, ahoana no holazainay manaraka izany: Fa efa nahafoy ny didinao izahay; ¹¹ dia ilay efa nolazainao taminay, tamin'ny vavan'ireo mpaminany mpanomponao, hoe: Ny tany hidiranareo hangalanareo azy ho fanananareo dia tanim-pahalotoana efa voaloton'ny fahalotan'ny vahoakan'ireo tany ireo sy azon'ny fahavetavetana nasafony azy hatraiza hatraiza noho ny fahalotoan'izy ireo. ¹² Koa ankehitriny aza manome ny zanakareo vavy ho an'ny zanany lahy, na maka ny zanany vavy ho an'ny zanakareo lahy, ary aza miahy ny fanambinany amam-piadanany na oviana na oviana, mba handroso ho mahery hianareo, ka hihinana ny voka-tsoan'ity tany ity, sy hamela azy ho lovan'ny taranakareo mandrakizay. ¹³ Aty aorian'izay rehetra nanjo anay, noho ny ratsy nataonay sy ny helokay - nefa mbola nitsitsianao anay, ry Andriamanitray ô, tsy namely anay araka ny helokay hianao, sy namela anay hisy afaka ihany toy izao - ¹⁴ moa dia mbola mety handika ny didinao indray izahay, ka hiharo amin'ireo vahoaka vetaveta loatra ireo? Moa tsy ho tezitra mafy aminay va hianao ka handringana anay sy tsy hamela anay hisy sisa na ho afaka akory? ¹⁵ Ry Iaveh Andriamanitr'Israely ô, marina hianao, izahay ankehitriny dia ireto sisan'izay afaka fotsiny ihany; indreto izahay mbamin'ny otanay eto anatrehanao fa tsy mety ho velona eo anoloan'ny tavanao izahay noho izany ota izany.

Toko faha-10

¹ Raha mbola nitomany sy niankohoka teo anoloan'ny tranon'Andriamanitra Esdrasa nanao izany fivavahana amam-pieken-keloka izany, dia nisy vahoaka Israelita maro be, lehilahy sy zaza amam-behivavy nivory teo aminy; fa samy nirotsaka be ihany ny ranomason'ny vahoaka.

² Tamin'izay dia niteny Sekeniasa zanak'i Jehiela, amin'ny taranak'i Elama, ka nanao tamin'i Esdrasa hoe: Nanota tamin'Andriamanitra tokoa izahay, fa namponina eto aminay vehivavy hafa firenena avy amin'ny olona monina amin'ny tany. Ary ankehitriny dia mbola misy fanantenana ho an'Israely ny amin'izany. ³ Aoka hanao fanekena amin'ny Andriamanitsika izahay izao, fa horoahinay omban-janany ireo vehivavy rehetra ireo, araka ny torohevitry ny tompoko sy ireo matahotra eo anoloan'ny didin'ny Andriamanitsika; dia aoka hatao araka ny lalàna izany. ⁴ Koa mitsangàna hianao, fa adidinao izao raharaha izao. Ary indreto koa izahay momba anao. Matokia, ary ataovy izany. ⁵ Dia nitsangana Esdrasa, nampianiana ny lohan'ny mpisorona sy ny levita mbamin'Israely rehetra hanatanteraka izany voalaza teo izany, ka dia nianiana izy ireo.

⁶ Rahefa izany, niala teo anoloan'ny tranon'Andriamanitra Esdrasa dia nankao amin'ny efi-tranon'i Johanana, zanak'i Eliasiba; nony tafiditra tao izy, dia tsy nihinan-kanina na nisotro fa nisaona noho ny fahotan'ny zanaky ny fahababoana. ⁷ Koa natao an-kabary eran'i Jodà sy Jerosalema ny fiantsoana ny zanaky ny fahababoana hivory ao Jerosalema,

⁸ sady nanapa-kevitra ny lehibe sy ny loholona, fa na zovy na zovy tsy tonga ao anatin'ny hateloana, dia horobaina ny fananany ary hesorina amin'ny fiangonan'ny zanaky ny fahababoana ny tenany. ⁹ Tao anatin'ny hateloan'andro dia vory tao Jerosalema ny lehilahy rehetra amin'i Jodà sy Benjamina; andro faharoapolon'ny volana fahasivy tamin'izay. Nipetraka teo amin'ny kianjan'ny tranon'Andriamanitra avokoa ny vahoaka rehetra, samy nangovitra noho ity toe-draharaha, sady avy koa ny orana.