Bokin'i Esdrasa

Toko faha-10

¹⁰ Dia nitsangana Esdrasa mpisorona, ka nanao tamin'izy ireo hoe: Efa nanota hianareo, fa namponina vehivavy hafa firenena eto aminareo ka nampitombo ny helok'Israely amin'izany hianareo. ¹¹ Koa samia mihaiky heloka eo anatrehan'ny Tompo Andriamanitry ny razanareo hianareo ankehitriny sy manatanteraka ny sitra-pony ny amin'ny vehivavy hafa firenena. ¹² Namaly ny fiangonana rehetra tamin'ny feo avo ka nanao hoe: Adidinay ny manatanteraka ny voalazanao!

¹³ Fa izao: ny vahoaka ity maro, ny andro manorana; ny mitoetra eto alatrano, tsy azo atao; ny raharaha tsy ho vita indray andro na indroa andro, fa fahotana lehibe no nataonay tamin'izany zavatra izany, ¹⁴ ka aoka ny lehibenay no hijanona eto ho solon'ny fiangonana rehetra, dia izay rehetra namponina vehivavy hafa firenena ao aminy, any an-tanànany, no hankaty amin'izay fotoana homena azy, miaraka amin'ny loholona sy ny mpitsara isan-tanàna avy, mandra-pamily hiala amintsika ny firehetan'ny fahatezeran'Andriamanitsika, ny amin'io raharaha io. ¹⁵ Tsy nisy afa-tsy Jonatàna, zanak'i Azahela, sy Jaasiasa zanak'i Tekoa no hany nanohitra izany hevitra izany; ary Mosolama sy Sebetaì levita koa no niandany taminy. ¹⁶ Fa ny zanaky ny fahababoana dia samy nanaraka izany avokoa. Esdrasa mpisorona mbamin'ny lehilahy sasany loham-pianakaviana, araka ny firazanany avy, samy voatonona anarana avokoa, dia nitokana ary nipetraka handinika ny raharaha; andro voalohan'ny volana fahafolo tamin'izay. ¹⁷ Ka tamin'ny andro voalohan'ny volana voalohany vao nahavita ny raharaha tamin'ireo lehilahy rehetra namponina tao aminy vehivavy hafa firenena. ¹⁸ Tamin'ny taranaky ny mpisorona dia nisy namponina tao aminy vehivavy hafa firenena. Tamin'ny taranak'i Josoe zanak'i Josedeka mbamin'ireo rahalahiny: Maasiasa, Eliezera, Jariba, ary Godoliasa:

¹⁹ nametra-teny fa hisaotra ny vadiny izy ireo, dia nihaiky ny hadisoany, ary nanatitra ondralahy iray ho fanonerana ny otany. ²⁰ Tamin'ny taranak'i Emera: Hananì sy Zebediasa. ²¹ Tamin'ny taranak'i Harima: Maasiasa, Elia, Semeisa, Jehiela ary Oziasa. ²² Tamin'ny taranak'i Fasora: Elioenaì, Maasiasa, Ismaela, Nataneale, Jozabeda ary Elasà. ²³ Tamin'ny levita: Jozabeda, Semei, Kelaiasa, Kelità ihany io, Fataiasa, Jodà ary Eliezara. Tamin'ny mpihira: Eliasiba. ²⁴ Tamin'ny mpiandry varavarana: Seloma, Telema ary Orì. ²⁵ Ny tamin'Israely dia izao: Tamin'ny taranak'i Farosa: Remeiasa, Jeziasa, Melkiasa, Miamima, Eliezera, Malkiasa, ary Banaiasa;

²⁶ tamin'ny taranak'i Elama: Metaniasa, Zakaria, Jehiela, Abdì, Jerimota ary Elia; ²⁷ tamin'ny taranak'i Zetoà: Elioenai, Eliasiba, Mataniasa, Jerimota, Zabada, ary Azizà; ²⁸ tamin'ny taranak'i Bebaì: Johanàna, Anania, Zabaì, Atalaì; ²⁹ tamin'ny taranak'i Banì: Mosolama, Melòka, Adaiasa, Jasoba, Saala, ary Ramota; ³⁰ tamin'ny taranak'i Falata-Moaba: Ednà, Kalala, Banaiasa, Maasiasa, Mataniasa, Beseleela, Benoì, ary Manase; ³¹ tamin'ny taranak'i Harima: Eliezera, Jesiasa, Melkiasa, Semeiasa, Simeona, ³² Benjamina, Meloka, Samariasa; ³³ tamin'ny taranak'i Hasoma; Matanaì, Matatà, Zabeda, Elifeleta, Jermaì, Manase, Semeì; ³⁴ tamin'ny taranak'i Banì: Maadì, Amrama, Oela, ³⁵ Banaiasa, Badiasa, Keliao, ³⁶ Vaniasa, Merimota, Eliasiba, ³⁷ Mataniasa, Matanaì, Jasi, ³⁸ Banì, Benoì, Semeì, ³⁹ Salmiasa, Natana, Adaiasa, ⁴⁰ Meknedebaì, Sisaì, Saraì, ⁴¹ Ezrela, Selemiao, Semeriasa, ⁴² Seloma, Amariasa, Josefa; ⁴³ tamin'ny taranak'i Nebao: Jehiela, Matatiasa, Zabada, Zabinà, Jedao, Joela, ary Banaiasa. ⁴⁴ Naka vehivavy hafa firenena ho vadiny avokoa ireo lehilahy ireo, sady efa niteraka taminy ny maromaro amin'ireo.

Bokin'i Nehemia

Toko voalohany

¹ Tenin'i Nehemia zanak'i Helkiasa. Tamin'ny volana Kasleo, taona faha-roapolo, raha tao an-dapa, tany Sosa aho,

² dia ity tonga Hananì, anankiray amin'ny rahalahiko, mbamin'ny lehilahy sasany aty tany Jodà. Nanontaniako azy ireo, ny amin'ny Jody efa afaka, dia izay nitsoaka tamin'ny fahabahoana, sy ny amin'i Jerosalema. ³ Ka izao no navaliny ahy: Lalina ny fahoriana sy latsa mahazo ny sisa afaka, dia izay nitsoaka tamin'ny fahababoana, any amin'ny ambanivohitra any; ny mandan'i Jerosalema voarodana, ny vavahadiny levon'ny afo. ⁴ Vao nandre izany zavatra izany aho dia tafatombina nitomany sy nisaona andro maro. Nifady hanina sy nivavaka teo anatrehan'Andriamanitry ny lanitra aho,

⁵ nanao hoe: Ry Iaveh Andriamanitry ny lanitra ô, Andriamanitra lehibe sy mahatahotra ô, hianao izay mitana ny fanekena sy ny famindram-po amin'izay tia anao sy mitandrina ny didinao anie, ⁶ hanongilana ny sofinao sy hampahiratra ny masonao, hihaino ny vavaky ny mpanomponao izay ataoko aminao ankehitriny, andro aman'alina ho an'ny zanak'Israely mpanomponao, amim-piekena ny fahotan'ny zanak'Israely, dia izay nataony taminao; fa nanota izahay dia izaho sy ny fianakavian-draiko. ⁷ Efa nanao izay ratsy indrindra taminao izahay, fa tsy nitandrina ny didy, ny lalàna amam-pitsipìka nandidianao an'i Moizy mpanomponao. ⁸ Tsarovy ilay teny nasainao nolazain'i Moizy mpanomponao nataonao hoe: Raha mandika ny didiko hianareo, dia haeliko any amin'ny firenena; ⁹ nefa raha miverina amiko hianareo, ka mitandrina ny didiko sy manaraka azy, na dia efa any am-paravodilanitra aza ny vaosesi-tany aminareo, dia hangoniko avy any sy hoentiko ho eo amin'ny fitoeram-boafidiko hamponenako ny anarako. ¹⁰ Mpanomponao sy vahoakanao, izay navotanao tamin'ny herinao lehibe sy ny tànanao mahery izy ireo. ¹¹ Endrey, ry Tompo, aoka hanongilan-tsofina amin'ny vavak'ity mpanomponao hianao, sy amin'ny vavak'ireo mpanomponao izay mankasitraka tokoa ny matahotra ny anaranao! Ho sitrakao anie ny hanambina ny mpanomponao anio, sy hampahita fitia azy eo imason'io lehilahy io. Mpandroso divain'ny mpanjaka aho fahizay.

Toko faha-2

¹ Tamin'ny volana Nisana, taona faha-roapolo nanjakan'i Artakserksesa mpanjaka, raha ilay efa mby teo anoloany iny ny divay, dia noraisiko ny divay ka natolotro ny mpanjaka, ary nitandrina aho mba tsy halahelo teo anatrehany.

² Ka hoy ny mpanjaka tamiko: Nahoana ity hianao no malahelo tarehy, kanefa tsy marary tsinona? Tsy inona izao, fa alahelon'ny fo mihitsy! ³ Nivadi-po tery aho, ka namaly ny mpanjaka hoe: Ho velona mandrakizay anie ny mpanjaka! Hataoko ahoana no tsy falahelo tarehy, kanefa ny tanàna nisy ny fasan-drazako rava ary ny vavahadiny levon'ny afo? ⁴ Dia hoy ny mpanjaka tamiko: Inona no tianao hangatahina amiko?