Bokin'i Tobia

Toko faha-13

⁵ Nofaiziny isika noho ny tsy fahamarinantsika, ary hovonjeny kosa, noho ny famindram-pony.

⁶ Diniho ange ny nitondrany antsika, ka misaora azy amin-tahotra sy hovitra, ary manomeza voninahitra ny Mpanjakan'ny taona rehetra amin'ny asanareo.

⁷ Raha izaho, dia tiako ny misaotra azy amin'ity tany mahababo ahy ity, satria naharihariny amin'ny firenena meloka, ny voninahiny.

⁸ Koa mibebaha hianareo, ry mpanota, ary manaraha ny marina eo anatrehan'Andriamanitra, amim-pitokiana fa hamindra fo aminareo izy.

⁹ Raha izaho, dia hifaly ao aminy amin'ny foko rehetra aho.

¹⁰ Misaora ny Tompo, hianareo rehetra izay vahoaka voafidy. Manaova andro fifaliana, ary mihira fiderana azy.

¹¹ Ry Jerosalema tanànan'Andriamanitra, nofaizin'ny Tompo hianao noho ny asan'ny tananao.

¹² Omeo voninahitra ny Tompo amin'ny asa soanao, ary misaora ny Andriamanitry ny taona rehetra, mba haoriny eo aminao indray ny fitoerany masina; mba haveriny eo aminao indray ny babo rehetra, dia hifaly amin'ny taona mandrakizay hianao.

¹³ Hamirapiratra amin'ny hazavana manjopiaka hianao, ka hiankohoka eo anatrehanao ny firenena rehetra eto an-tany.

¹⁴ Ho tonga eo aminao ny firenena avy any an-tany lavitra, hitondra fanatitra ka hitsaoka ny Tompo ao anaty mandanao, sy hihevitra ny taninao ho fitoerana masina;

¹⁵ fa hiantso ilay Anarana lehibe eo afovoanao izy.

¹⁶ Ho voaozona izay manamavo anao, ho voaheloka izay miteny ratsy anao, ary hotahina izay hanangana anao.

¹⁷ Fa hianao kosa hifaly amin'ny zanakao, satria hohasoavina avokoa izy, sady hiangona eo amin'ny Tompo.

¹⁸ Sambatra izay rehetra tia anao, sy mifaly amin'ny fiadananao.

¹⁹ Ry fanahiko, misaora ny Tompo, satria nanafaka an'i Jerosalema tananany tamin'ny fahoriany rehetra izy, ilay Tompo Andriamanitsika.

²⁰ Ho sambatra tokoa aho, raha mba misy tamingako tavela, hahita ny famirapiratan'i Jerosalema.

²¹ Fa harafitra amin'ny vato safira sy emeraoda ny vavahadin'i Jerosalema, ary amin'ny vato sarobidy avokoa ny mandany rehetra manodidina azy.

²² Vato fotsy madio indrindra no hatao ngorodon'ny tokotaniny, ary hohiraina eny an-dalambeny ny hoe : Aleloia!

²³ Isaorana anie ny Tompo, nanome izany voninahitra izany ho an'i Jerosalema, Ary hanjaka eo aminy amin'ny taona mandrakizay anie Izy. Amena!

Toko faha-14

¹ Toy izany no niafaran'ny tenin'i Tobia. Taty aorian'ny nahiratany dia velona roa amby efapolo taona Tobia, ka nahita ny zanaky ny zafiny.

² Roa amby zato taona no tontalin'ny andro niainany, ary nalevina tamin-panajana tany Niniva izy. ³ Fa enina amby dimampolo taona izy, no tonga jamba, ary efa enimpolo taona izy vao nahiratra indray. ⁴ Lany tamin'ny hafaliana avokoa ny andro sisa rehetra niainany, ary araka ny nandrosoany tamin'ny fahatahorana an'Andriamanitra no nitomboan'ny fiadanana nankafiziny. ⁵ Nony efa ho faty izy, nantsoiny ho eo akaikiny avokoa Tobia zanany sy ny zafiny, zanak'io, fito mirahalahy, ka hoy izy taminy:

⁶ Efa akaiky ny faharavan'i Niniva, fa tsy maintsy tanteraka ny tenin'Andriamanitra ary ny rahalahintsika tafaely aty, lavitra ny tanin'Israely dia hiverina any indray. ⁷ Ka hisy mponina indray ny tanin'Israely rehetra efa zary efitra teo iny; haorina indray ny tranon'Andriamanitra efa nodorana teo iny, ary hiverina any avokoa izay rehetra matahotra an'Andriamanitra. ⁸ Handao ny sampiny ny firenena ka ho avy ao Jerosalema sy honina ao. ⁹ Hifaly ao avokoa ny mpanjakan'ny tany rehetra mitsaoka an'ilay Mpanjakan'Israely. ¹⁰ Koa mihainoa ny rainareo, anaka, manompoa ny Tompo amin-pahamarinana, ary mikeleza aina hanao izay sitrany.

¹¹ Hafatrafaro ny zanakareo hanaraka ny rariny, hanao fiantrana, hahatsiaro an'Andriamanitra, ary hisaotra azy mandrakariva amim-pahamarinana sy amin'ny heriny rehetra. ¹² Ankehitriny, anaka, mihainoa ahy, ka aza mitoetra amin'ity tanàna ity, fa amin'ny andro handevenanareo an-dreninareo eo akaikiko, amin'ny fasana iray ihany, dia miaingà hiala aty,

¹³ satria hitako fa hahatarika ny fandravana azy ny tsy fahamarinan'i Niniva. ¹⁴ Koa nony maty reniny, dia niala tany Niniva Tobia mbamin'ny vady aman-janany sy ny zafiny ary niverina nankany amin'ny rafozany.

¹⁵ Salama tsy marofy sy tratra antitra tsara no nahitany azy, dia izy no nikarakara an'ireo sy nanirina ny masony; nahazo ny lova rehetra tamin'ny tranon-dRagoela, ary nahita ny zanaky ny zanany hatramin'ny taranaka fahadimy izy. ¹⁶ Nony efa velona sivy amby sivifolo taona tamin'ny fahatahorany ny Tompo izy, dia tamin-kafaliana no nandevenan'ny zanany azy. ¹⁷ Naharitra tamin'ny toe-piainana tsara sy fitondran-tena masina, ny fianakaviany aman-taranany rehetra, ka notiavin'Andriamanitra sy ny olombelona ary ny tany ama-monina rehetra.

Bokin'i Jodita

Toko voalohany

¹ Nony efa nampanaiky ny firenena maro ho ambanin'ny fahefany Afraksada, mpanjakan'ny Meda, dia nanorina tanàna fiarovana mafy anankiray, nataony hoe Ekbatana, tamin'ny vato voapaika vita efa-joro.

² Manda, fitopolo hakiho no hahavony, telo hakiho no sakany, no nataony manodidina azy, ary nananganany tilikambo maromaro koa, ka zato hakiho ny hahavony, ³ efa-joro mitovy efatra ny endriny, roapolo dia avy no haben'ny lafiny iray, ary nampifanarahiny amin'ny hahavon'ny tilikambo ny varavarana nataony taminy. ⁴ Nirehareha ho tsy azo resena izy, noho ny herin'ny foloalindahiny sy ny hamaroan'ny kalesiny. ⁵ Kanjo, tamin'ny taona faharoa ambin'ny folo nanjakan'i Nabokodonosora mpanjakan'ny Asiriana, izay nanjaka tao Niniva, ilay tanàna lehibe, dia nanafika an'i Arfaksada izy,

⁶ ka naharesy azy tao amin'ilay tany lemaka lehibe atao hoe Ragao, fa nampian'ireo mponina amin'ny moron'i Eofrata sy Tigra, ary Jadasona amin'ny tany lemak'i Eriaoka, mpanjakan'ny Elisiana. ⁷ Tamin'izay, nihalehibe ny fanjakan'i Nabokodonosora ka nentanin'ny ebo ny fony dia nandefasany iraka avokoa ry zareo rehetra nonina any Silisia, any Damasa, ny any an-tendrombohitra Libàna,

⁸ ny vahoaka any Karmela sy Sedara, ny monina any Galilea, amin'ny tany lemaka lehibe Esdrelona, ⁹ ry zareo rehetra any Samaria an-dafin'ny ony Jordany, hatrany Jerosalema, ary amin'ny tany Gesena rehetra, hatrany amin'ny sisin-tanin'i Etiopia. ¹⁰ Ireo vahoaka rehetra ireo, dia nandefasan'i Nabokodonosora mpanjakan'i Asiria, iraka, avokoa. ¹¹ Nefa niray hevitra samy nandà avokoa izy rehetra. Nalefany hody maina izy ireo, ary fanesoana foana no nafitsony azy. ¹² Ka nisafoaky ny hatezerana tamin'izany vahoaka rehetra izany Nabokodonosora mpanjaka ary nianiana tamin'ny seza fiandrianany sy tamin'ny fanjakany, fa hamaly ratsy izany nataon'ireo tany rehetra ireo izany.

Toko faha-2

¹ Tamin'ny taona fahatelo ambin'ny folo, nanjakan'i Nabokodonosora mpanjaka, tamin'ny andro faharoa amby roapolon'ny volana voalohany, no nanapahana ny hevitra tao an-tranon'i Nabokodonosora mpanjakan'i Asiria, ny hamaliany.

² Dia nantsoiny avokoa ny loholony sy ny lehibe rehetra mbamin'ny mpiadiny, dia niara-nihevitra mangingina tamin'ireo izy.