Bokin'i Jodita

Toko faha-16

³ Tonga Asora avy amin'ireo tendrombohitra, avy any amin'ny lafin-tany Avaratra nomban'ny miaramilany alinalina: nahatohana ny riana ny hamaroany, ary naharakotra ny lohasaha ny soavaliny.

⁴ Nanampo handevona ny faritaniko tamin'ny afo izy, sy hamono ireo zatovolahiko amin'ny sabatra, hifaoka ny zanako ho babo, ary ny virjiny zanako ho sambo-belona.

⁵ Kanjo ny fahafaham-baraka no natolotry ny Tompo tsy toha azy, natolony ho eo an-tanam-behivavy izy, ka resiny.

⁶ Tsy mba tovolahy mamely no nandavo ny maheriny, tsy mba ny zanaky ny mahery no namely azy, tsy ny lehilahy rangavina no niady taminy, fa Jodita ihany, zanakavavin'i Merari, no nampitsingidina azy, tamin'ny hatsaran-tarehiny.

⁷ Napetrany ny akanjom-pitondran-tena aminy, niramatra ny fitafiany fanao amin'ny fety izy, mba ho fandresan'ny zanak'Israely.

⁸ Notsotsorihany diloilo manitra ny tavany, naolanolany tsara teo ambany lamba fehiloha ny volon-dohany. Akanjo vaovao no nentiny hamandrihany azy.

⁹ Ny famirapiratry ny kapany nahajamba ny mason'itsy, ny hatsaran-tarehiny nahababo ny fony, notapahiny tamin'ny sabatra ny lohany.

¹⁰ Ny Persa nangovitra tamin'ny faheream-panahiny; ary ny Meda, tamin'izato hasahiany.

¹¹ Finaonaonana indray no nanakoako tao an-tobin'ny Asiriana; nony nitranga ny nomba ahy, efa trotraka sy main'ny hetaheta.

¹² Zanakalahin'ny vantotr'olona no nitomboka azy sy namono azy efa toy ny ankizy mandositra; ka maty an'ady teo anatrehan'ny tavan'ny Tompo Andriamanitro izy ireo.

¹³ Miventesa hira ho an'ny Tompo. Ry Tompo ambony indrindra, lehibe hianao, ry Tompo, ary fatratra amin'ny fahefanao hianao, ary tsy misy mahahoatra anao!

¹⁴ Aoka anie hanompo anao avokoa ny harin-tananao, fa niteny hianao, dia vita ny zavatra rehetra, naniraka ny fanahinao hianao, dia hary ny zavatra rehetra ary tsy misy mahatohitra ny feonao.

¹⁵ Ny tendrombohitra mbamin'ny rano mihovitrovitra hatrany am-potony, ny vato miempo toy ny savoka eo anoloan'ny tavanao;

¹⁶ fa izay matahotra anao kosa anefa, dia lehibe eo anatrehanao, amin'ny zavatra rehetra.

¹⁷ Loza ho an'ny firenena mitsangan-kamely ny vahoakako! Fa ny Tompo, ny tsy toha no hamaly izay ataony, hanadina azy izy amin'ny andro fitsarana. Hatolony amin'ny afo aman-kankana ny nofon'ireny, mba ho may sy hahatsiaro mangirifiry mandrakizay.

¹⁸ Taorian'izany fandresena izany, nankany Jerosalema avokoa ny vahoaka, mba hitsaoka ny Tompo, ka vantany vao nidio izy ireo, dia nanatitra ny sorona dorana rehetra sy nanefa ny voadiny amam-bava nataony avy.

¹⁹ Jodita kosa nanatitra ny fiadian'i Holoferina rehetra, nomen'ny vahoaka azy, mbamin'ny elom-pandriana nalainy teo amin'ny farafara, ho anatema fanadinoana. ²⁰ Nanao fifalian-dehibe teo anoloan'ny fitoerana masina ny vahoaka rehetra, ary naharitra telo volana no nifaliana tamin'izany fandresena izany, niaraka tamin'i Jodita. ²¹ Nony tapitra izany andro fety izany, samy nody ho any an-tranony avy ny olona; nomem-boninahitra tao Betolia, Jodita, ary nahazo laza lehibe eran'ny tanin'Israely izy. Ny herim-po nampombainy fahadiovana, ka tsy nahalala lahy intsony izy, tamin'ny andro sisa niainany, taorian'ny nahafatesan'i Manasesa vadiny.

²² Ny herim-po nampombainy fahadiovana, ka tsy nahalala lahy intsony izy, tamin'ny andro sisa niainany, taorian'ny nahafatesan'i Manasesa vadiny.

²³ Nony efa dimy amby zato taona no andro nitoerany tao an-tranon'ny vadiny, ary efa novotsorany ilay ankizivaviny, dia maty izy, ka nalevina tao Betolia, tao amin'ny vadiny, ²⁴ ary nitomany azy hafitoana ny vahoaka rehetra. ²⁵ Tsy nisy olona nanabataba an'Israely, tamin'ny andro rehetra niainany, sy taona maro taorian'ny nahafatesany. Nataon'ny Hebrio ho anisan'ny andro masina, ny andro fety naorina ho fahatsiarovana io fandresena io, ka ankalazain'ny Jody hatramin'izany andro izany, ka mandrak'androany.

Ny Bokin'i Estera

Toko voalohany

¹ Tamin'ny andron'i Asoerosa, ilay Asoerosa nanjaka hatrany India ka hatrany Etiopia, tamin'ny faritany fito amby roapolo amby zato,

² raha ilay nipetraka teo amin'ny seza fiandrianan'ny fanjakany iny Asoerosa mpanjaka, tao Sosa, renivohiny, ³ dia nanao fanasana ho an'ny andriandahy amam-pandraharahany rehetra, tamin'ny taona fahatelo nanjakany. Tafavory teo anatrehany avokoa ny lehiben'ny foloalindahin'ny Persa sy ny Meda, ny lehibe sy governora isam-paritany: ⁴ ary tamin'izay no nanamparany teo anatrehany ny voninahitry ny fanjakany tapitra hoatra sy ny famirapiratry ny fahalehibeazany kanto loatra, nandritra ny andro marobe, dia valopolo amby zato andro. ⁵ Nony tapitra ireo andro ireo, nanao fanasana naharitra hafitoana ny mpanjaka, tao an-kianjan'ny zaridainan'ny tranon'ny mpanjaka, ho an'ny vahoaka rehetra, izay tao Sosa renivohiny, hatramin'ny kely indrindra ka hatramin'ny lehibe indrindra.

⁶ Nisy lamba temitra fotsy sy maitso ary manga teo, nifehy teo amin'ny masom-bolafotsy amin'ny kofehy rongony fotsy sy jaky tamin'ny andry marbra; nisy farafara volamena sy volafotsy nalahatra teo amin'ny lampivato porfira, marbra fotsy, hara, ary marbra mainty. ⁷ Kapoaka volamena samihafa endrika, no nampisotroana ny olona, ary be ny divaim-panjakana naroso, fa malala-tànana ny mpanjaka. ⁸ Araka ny didy dia samy nisotro tsy nisy nanery ny olona, satria araka ny nandidian'ny mpanjaka ny mpitandrina ny tranony, dia izay sitra-pon'ny olona nasaina tsirairay avy no harahina. ⁹ Vastì, mpanjakavavy koa, nanao fanasana ho an'ny vehivavy, tao amin'ny tranom-panjakan'i Asoerosa mpanjaka.

¹⁰ Tamin'ny andro fahafito, raha ilay faly azon'ny divay iny ny fon'ny mpanjaka, dia nomeny teny izy fito lahy eonoka, Maomàna, Bazatà, Harbonà, Bagatà, Abgatà, Zetara ary Karkasa, izay nanompo teo anatrehan'i Asoerosa, ¹¹ hitondra an'i Vastì, mpanjakavavy voasatroka diadema, ho eo anatrehany mba haneho ny hatsarany amin'ny vahoaka sy ny lehibe, fa tsara tarehy izy. ¹² Nolavin'i Vastì mpanjakavavy anefa ny manaiky ny tenin'ny mpanjaka nentin'ny eonoka, ka tezitra mafy sy nirehi-pahatezerana ny mpanjaka. ¹³ Dia niteny tamin'ireo olon-kendry izay manam-pahaizana ny andro ny mpanjaka, fa toy izany no vanaovana ny raharahan'ny mpanjaka teo anatrehan'izay rehetra mahalala ny lalàna sy ny rariny.

¹⁴ Ary ny nanakaiky azy indrindra, dia izy fito lahy, andriandahin'i Persa sy Media, Karsena, Setara, Admatà, Tarsisa, Maresa, Marsanà ary Mamokàna, izay nahita ny tavan'ny mpanjaka, sy nitana ny laharana voalohany teo amin'ny fanjakana. ¹⁵ Lalàna inona, hoy izy, no hahàtra amin'i Vastì mpajakavavy, noho ny tsy nanekeny ny didin'i Asoerosa mpanjaka izay nomeny azy tamin'ny alalan'ny eonoka? ¹⁶ Dia izao no navalin'i Mamokàna teo anatrehan'ny mpanjaka sy ny andriandahy: Tsy tamin'ny mpanjaka ihany no nanao ratsy Vastì mpanjakavavy, fa tamin'ny andriandahy rehetra, mbamin'ny vahoaka rehetra, izay eny amin'ny faritanin'Asoerosa mpanjaka rehetra koa. ¹⁷ Fa ho fantatry ny vehivavy rehetra izao nataon'ny mpanjakavavy izao, ka hahatonga azy haniratsira ny vadiny isany, hanao hoe: Asoerosa mpanjaka nandidy ny hitondrana an'i Vastì mpanjakavavy ho eo anatrehanay, nefa tsy nankeo izy. ¹⁸ Ka hatramin'izao anio izao ihany, ny andriambavin'i Persa sy Media handre izao nataon'ny mpanjakavavy izao, dia hilaza azy amin'ny andriandahin'ny mpanjaka rehetra, ka ho faniratsirana aman-katezerana be no hitranga. ¹⁹ Koa raha sitraky ny mpanjaka, aoka hisy didim-panjaka, haely hatraiza hatraiza amin'ny anarany, sady hosoratana ao amin'ny lalàn' ny Persa sy ny Meda, tsy ho azo dikaina, milaza fa tsy hiseho eo anatrehan'i Asoerosa mpanjaka intsony Vastì mpanjakavavy, ary ny voninahitra hoe mpanjakavavy dia homen'ny mpanjaka ny vehivavy hafa tsaratsara kokoa noho izy. ²⁰ Fa rahefa tafaely eran'ny fanjakany ny didin'ny mpanjaka, dia samy hanaja ny vadiny avy ny vehivavy rehetra, hatramin'ny lehibe indrindra ka hatramin'ny kely indrindra.

²¹ Sitraky ny mpanjaka sy ny andriandahy izany hevitra izany, ka dia nanao araka ny tenin'i Mamokàna ny mpanjaka.

²² Nandefa taratasy ho any amin'ny faritaniny rehetra amin'ny fanjakany, nataony araka ny soratry ny isam-paritany avy, sy araka ny fitenin'ny isam-poko avy, nilaza fa ny lehilahy rehetra no tsy maintsy lohany ao an-tranony avy, ary izay fitenin'ny fireneny avy no hitenenany.

Toko faha-2

¹ Taorian'izany, nony nionona ny hatezeran'i Asoerosa mpanjaka, nahatsiaro an'i Vastì izy, dia ny nataony sy ny notapahina ny aminy.

² Ary hoy ireo mpanompon'ny mpanjaka izay nanao raharaha teo aminy: Aoka hitadiavana zazavavy virjiny sy tsara tarehy ny mpanjaka; ³ ka isam-paritany rehetra eo amin'ny fanjakany dia hametrahan'ny mpanjaka manam-boninahitra hiadidy ny famoriana ny zazavavy virjiny sy tsara tarehy rehetra, ho eto Sosa, renivohitra, ao amin'ny tranom-behivavy, tandreman'i Egea, eonokan'ny mpanjaka, sy mpitandrina ny vehivavy, izay hamonona ny momba ny fiakanjoan'ireo; ⁴ dia izay zazavavy sitraky ny mpanjaka no ho mpanjakavavy, hisolo an'i Vastì. Sitraky ny mpanjaka izany hevitra izany ka dia nataony izany. ⁵ Tao Sosa renivohitra nisy Jody anankiray atao hoe Mardokea, zanak'i Jaira, zanak'i Semei, zanak'i Sisa, taranak'i Benjamina;