Bokin'i Joba
Toko faha-4
6 Tsy ny fahatahoranao an'Andriamanitra va no fanantenanao? Tsy ny hadiovan'ny toetranao va no mba tokinao?7 Mba tadidio ange: zovy moa no tsy manan-tsiny mba very? Taiza ho aizan'izao tontolo izao, no mba naringana ny olo-marina?
8 Raha izaho, ny hitako, dia izay miasa heloka, sy ireo mamafy tsy fahamarinana, no mijinja ny vokatr'izany.
9 Fa ny fofon'ain'Andriamanitra no aharinganan'ireny, ny fifofofofon'ny hatezerany no mahalevona ireny.
10 Ny fieron'ny liona mbamin'ny feony mikotrokotroka, dia tankina, ary ny nifin'ny liona tanora dia voatorotoro.
11 Noho ny tsy fisian-dremby dia maty ny lion-dahy, ary ny zanaky ny liom-bavy miely patrana.
12 Nisy teny nisokosoko tonga tamiko ary ngoningonina malemy no hany ren'ny sofiko tamin'izany.
13 Tao amin'ny fahitana manjavozavo alina, tao anatin'ny fotoana mahasondrian-tory mafy ny olombelona,
14 nisy tahotra aman-kovitra nahazo ahy, ary nanozongozona ny taolako rehetra izany,
15 Dia indro nisy fanahy nandalo teo anatrehako, ka nampitsangam-bolo ny tenako rehetra.
16 Nitraka izy, tsy fantatro endrika velively dia toa matoatoa teo imasoko. Dia nisy fahanginana aloha, vao nandre feo aho:
17 Ho marina va ny olombelona eo antrehan'Andriamanitra? Ho madio va ny olona, eo anoloan'ny Mpahary azy?
18 Indro fa ny mpanompony aza, tsy itokiany, ary ny anjeliny aza, ahitany tsiny:
19 ka mainka izay olona monina an-trano fotaka ary vovoka ny fototra iorenany, ka hatao manjary vovoka toy ny voan'ny kalalao!
20 Hatramin'ny maraina ka hatramin'ny hariva, dia voaringana izy; ary levona mandrakizay izy, nefa tsy ahoan'ny olona akory.
21 Tapaka ny kofehy amin'ny lain'izy ireo; Maty alohan'ny fahazoana ny fahendrena izy.
Toko faha-5
1 Miantsoa hoe, raha misy olona hamaly anao! Iza amin'ireo masina no hitodihanao?2 Ny adala levona amin'ny hatezerany ary ny foka maty amin'ny fisafoahany.
3 Efa nahita ny adala namaka nisandrahaka aho, kanjo vetivety foana dia nanozona ny fonenany.
4 Tsy misy famonjena ho an'ny zanany; montsanina eo am-bavahady ireny, nefa tsy manan-kamonjy;
5 Ny variny vokatra, dia lanin'ny lehilahy noana, mihoatra ny fefy tsilohery izy, dia mandroba azy; ny hareny koa, areboky ny lehilahy mangetaheta.
6 Fa tsy mivoaka avy amin'ny vovoka ny fahoriana, ary tsy mitsimoka avy amin'ny tany ny fijaliana,
7 no ho teraka mba hozoim-pahoriana ny olona, toy ny zanaky ny varatra mba hiakatra fanidina.
8 Raha izaho hianao, Andriamanitra no hotodihiko, any aminy no handefasako ny fivavahako.
9 Manao zava-dehibe tsy takatry ny saina izy, zava-mahagaga tsy tambo isaina.
10 Izy no mandatsaka ranonorana amin'ny tany, mandefa ny rano ho eny amin'ny saha,
11 manandratra izay voaetry, ary ny tra-pahoriana mahita hasambarana indray.
12 Manafoana ny tetik'adin'ny mpamadika izy, ka tsy mahatanteraka ny teti-dratsiny ny tànan'ireny.
13 Maningotra ny fetsy amin'ny hafetseny izy, ary mandrava ny tetik'adin'ny fetsy ratsy,
14 ka tojo ny aizina amin'ny antoandro izy ireny ary miraparapa toy ny amin'ny alina, amin'ny mitatao vovonana indrindra.
15 Hataon'Andriamanitra afaka amin'ny sabatry ny lelan'ireny ny malahelo, sy amin'ny tanan'ny mahery.
16 Ka mody amin'ny mahantra ny fanantenana, ary ny faharatsiana kosa mikombom-bava.
17 Sambatra ny olona faizin'Andriamanitra! ka aza atao tsy ho zavatra ny fanitsian'ny Tsitoha.
18 Fa mandratra izy, ary mamehy ny ratra; mikapoka izy, ary manasitrana amin'ny tànany.
19 Inenina izy hanafaka anao amin'ny fahoriana; ary amin'ny fanimpitony, dia tsy hahazo anao ny loza.
20 Amin'ny mosary, harovany amin'ny fahafatesana hianao; amin'ny ady, harovany tsy ho voan'ny sabatra hianao.
21 Ho voaaro amin'ny kotopian'ny lela hianao, ary tsy hatahotra rahefa avy ny fandringanana.
22 Hihomehezanao ny mosary amam-pandringanana; tsy hatahotra ny biby dia amin'ny tany.
23 Fa ho vita fanekena aminao ny vato eny an-tsaha; ary hihavana aminao ny biby dia amin'ny tany.
24 Fa hahita ny fiadanana manjaka eo an-dainao hianao; ary hitsidika ny tanim-bilonao hianao, ka tsy hisy diso tsy ao.
25 Ho hitanao ny taranakao mitombo, ary ny solofonao mihamaro, hoatra ny ahitra any an-tsaha.
26 Efa tratra antitra tsara hianao vao hiditra any am-pasana, toy ny amboaram-bary akarina amin'ny fotoany.
27 Izany no voadinikay, izany no marina. Henoy izy, ary ataovy soa ho anao.
Toko faha-6
1 Tamin'izay, dia niteny Joba ka nanao hoe:2 Eh, raha mba azo lanjaina mantsy ny fahoriako, ka azo atambatra atao eo ambony mizana avokoa ny loza manjo ahy,
3 dia havesatra noho ny fasiky ny ranomasina izy: ka noho izany, dia tafahoatra ho rediredy ny teniko.
4 Fa ny zana-tsipìkan'ny Tsitoha no manindrona ahy, ary ny poizina amin'ireo, fohin'ny fanahiko; ny fampitahoran'Andriamanitra tafalahatra hiady amiko.
5 Minananana eo akaikin'ny vilo-maitso va ny ampondra dia? Mimama eo anoloan'ny haniny va ny ombalahy?
6 Atao ahoana no fihinan-kanina matsatso sy tsy misy sira? Atao ahoana no fakafy ron'anana tsy misy tsirony?
7 Izay lavin'ny foko tsy hokasihina akory, no indro tonga haniko, sady feno loto maharikoriko.