Bokin'i Joba
Toko faha-6
8 Aiza no hahitako izay hahato ny faniriako, sy izay hahatanterahan'Andriamanitra ny antenaiko!9 Ho sitrak'Andriamanitra anie ny hanorotoro ahy, handefa ny tanany sy hanapitra ny androko!
10 Aoka tsy ho afaka amiko izao fiononam-po izao, ka iravoravoako ao anatin'ny loza anindriany ahy: dia ny tsy nandikako na oviana na oviana ny didin'ny Masina.
11 Inona moa ny heriko, mba hanantenako? Ohatrinona no halavan'ny androko, mba haharetako?
12 Herim-bato va ny heriko? Ary varahina va ny nofoko?
13 Tsy efa foana amiko va ny vonjy rehetra? Tsy efa alana amiko va ny toky rehetra hahitana famonjena?
14 Mendrika hiantran'ny sakaizany izay tra-pahoriana, na dia nandao ny fahatahorana ny Tsitoha aza izy.
15 Ireo rahalahiko kosa, namadika toy ny ranotrambo, toy ny rano an-dahasahan-driaka, izay mikoriana;
16 Sakantsakanan'ny vongan-dranomandry ny fandehany, levona anatin'ny onjany, ny oram-panala.
17 Rahefa maina ny andro dia levona izy; raha vao mafana ny andro, ritra an-toerana izy.
18 Eny amin'izao sakeli-dalana rehetra izao ny ranony dia lany; eny amin'ny habakabaka izy, manjary etona, dia tankina.
19 Nanandrandra azy ny andiam-pivahiny avy any Tema; nanantena azy ny mpandeha avy any Saba.
20 Kanjo foana ny fanantenan'ireny, fa nony tonga teo amorony indreo nangaihay.
21 Toy izany koa hianareo manary ahy amin'izao; fa vao nahita ny fahoriana hianareo, dia nihodina raiki-tahotra.
22 Kanefa moa ve aho nanao hoe: Mba omeo zavatra kely aho? mba omeo anjara amin'izay anananareo aho?
23 Vonjeo amin'ny tanan'ny fahavalo aho, afaho amin'ny tanan'ny mpitoha aho?
24 Ampianaro aho, fa hangina hihaino anareo, ampahafantaro ahy izay nahadiso ahy.
25 Endrey izany herin'ny teny marina! Fa mba inona kosa no iharan'ny faninianareo?
26 Sao dia ny hisambo-teny fotsiny no tadiavinareo? Raha izay tenin'ny mamoy fo anefa, dia entin-drivotra foana.
27 Indrisy, latsahanareo harato ity kamboty, ary ihadianareo lavaka ny sakaizanareo hamandrihana azy!
28 Fa ankehitriny mba mitodiha kely aty amiko, dia ho hitanareo, raha hilazako lainga manatrika hianareo.
29 Miverena, ka aza mety ho tsy marina, miverena, dia hiharihary ny tsy fananako tsiny.
30 Nisy faharatsiana va eo am-bavako? Sa tsy mahay manavaka ny ratsy va ny vavako?
Toko faha-7
1 Andro fanompoana, ny fiainan'ny olombelona eto an-tany, ary toy ny an'ny mpikarama ny androny.2 Toy ny mpanompo maniry alokaloka, toy ny mpikarama miandry ny karamany,
3 mova tsy izany aho nanana izay anjara volana mampahory, sy nanana izay anjara alina mampijaly.
4 Fa nony handry aho manao hoe: Rahoviana aho no hifoha? Rahoviana ny alina no ho tapitra? dia mandry an-driran'antsy foana eo aho, mandra-pahazavan'ny andro.
5 Ny nofoko rakotra olitra aman-takopery vasoka, ny hoditro mitsefatsefaka, sady ivoahanana.
6 Mihelina faingana toy ny famahanan-tenona ny androko, dia lany: tsy misy fanantenana intsony!
7 Andriamanitra o, tsarovy fa fofona kely foana ny aiko? ka tsy hahita fiadanana intsony ny masoko.
8 Ny maso mijery ahy, tsy hahita ahy intsony; ny masonao hizaha ahy, fa tsy ho eo intsony aho.
9 Mihahaka dia levona ny rahona: toy izany koa izay midina ho any amin'ny seoly dia tsy hiakatra intsony;
10 tsy hody ao an-tranony intsony izy, ary tsy hahalala azy intsony ny fonenany teo aloha.
11 Noho izany dia tsy hamehy ny vavako aho; fa hiteny noho ny fahorian'ny fanahiko, handefa ny fitarainako noho ny ngidiny ato am-poko.
12 Ranomasina va aho, sa biby dia an-dranomasina, no dia asianao fefy avokoa ny manodidina ahy?
13 Nony injay aho mba milaza hoe: Hampionona ahy ny farafarako, hampitony ny fitarainako ny fandriako,
14 injay kosa hianao mampitahotra ahy amin'ny nofy; mampivadi-po ahy amin'ny tsindrimandry.
15 Endrey! Aleon'ny fanahiko alana aina an-keriny; ny taolako miantso ny fahafatesana!
16 Ny tenako voan'ny fahalevonana; ny aiko mitsoaka amiko ho amin'ny mandrakizay: avelao re aho; fa fofona foana ny androko.
17 Inona moa ny olombelona, no dia tombananao fatratra ery, fa mba mety hikarakara azy hianao,
18 mamangy azy isa-maraina ary zahanao toetra isan-tapak'andro?
19 Rahoviana re no hitsahatra ny fijerinao ahy? Rahoviana re no havelanao aho, mba hisy hitelemako ivy?
20 Raha nanota aho, inona no azoko atao aminao, ry Mpiandry ny olombelona o! Nahoana no dia apetrakao hiantefan'ny zana-tsipikanao aho, ka hampanjarianao enta-mavesatra ho ahy ny tenako?
21 Nahoana no dia tsy avelanao ny heloko? Nahoana no dia tsy hadinoinao ny hadisoako? Fa vetivety foana dia handry any amin'ny vovoka aho, ary hitady ahy hianao; fa tsy hisy intsony aho.
Toko faha-8
1 Dia niteny Baldada avy any Sohe tamin'izay ka nanao hoe:2 Mandra-pahoviana no hanaovanao teny toy izany, sy vava miloaka toy ny tafio-drivotra mifofofofo?
3 Andriamanitra va hampandefitra ny rariny, ny Tsitoha va hamadika ny fahamarinana?
4 Ny zanakao aloha raha nanota taminy, dia natolony ho eo am-pelatanan'ny haratsiany.
5 Hianao kosa, raha mangata-bonjy amin'Andriamanitra hianao, raha mitalaho amin'ny Tsitoha hianao,
6 raha madio sy mahitsy fo hianao, dia hiambina anao izy, haveriny amin'ny fiadanany indray ny fonenan'ny fahamarinanao,