Bokin'i Joba
Toko faha-9
35 amin'izay aho dia hiteny tsy aman-tahotra azy, Fa raha tsy izany aho dia mba verivery saina.
Toko faha-10
1 Sasatry ny miaina ny fanahiko, havelako hijojojojo ny fitarainako, hiteny amim-pahorian'ny foko aho.2 Hoy aho amin'Andriamanitra: Aza manameloka ahy, ampahalalao izay antony ilanao akisa aho.
3 Sa dia mahafaly anao ny mampahory, sy hamay ny asan'ny tananao; ka hampamirapiratra ny fanambinanao eo amin'ny fisainan'ny ratsy fanahy?
4 Manana maso-nofo va hianao, sa mijery toy ny fijerin'olombelona?
5 Toy ny andron'olombelona va ny andronao, sa toy ny taonan'ny mety maty ny taonanao,
6 no dia karohinao ny fahadisoako, no dia henjehinao ny fahotako,
7 na dia fantatrao aza fa tsy meloka aho, sady tsy misy mahafaka ahy amin'ny tananao akory koa?
8 Tananao no namorona ahy sy namolavola ahy, izaho manontolo, ka tadiavinao ho levonina indray aho ity!
9 Tsarovy fa novolavolainao toy ny tanimanga aho; ary haverinao ho amin'ny vovoka indray aho ity!
10 Moa tsy naidinao toy ny ronono aho, ary nampandrinao toy ny ranomandry?
11 Notafianao hoditra ama-nofo aho, ary norarinao taolana aman-kozatra.
12 Nomenao aina amam-panambinana aho, ary noravanao tamin'ny fiahianao ny aiko.
13 Kanjo izao no nafeninao tao am-ponao: hitako tsara izao izay nokendrenao:
14 Raha manota aho, dia mitsikilo ahy hianao, ary tsy mamela ny hadisoako hianao.
15 Meloka moa aho, dia loza ho ahy; Marina indray aho tsy sahy miandrandra akory; fa safo-kenatra aho, mahita ity fahoriako.
16 Raha mba mitraka aho, enjehinao toy ny fanaon'ny liona, dia foteranao ampijaliana lozan-tany indray.
17 Manangam-bavolombelona vaovao hamely ahy indray hianao; dia ataonao avo sasaka ny fisafoakanao amiko, tafika mifandimby no mandroso hamely ahy.
18 Nahoana no dia namoaka ahy tao am-bohoka hianao? dia maty eo aho, tsy ho nisy maso nahita ahy.
19 Ka ho toy ny tsy hary akory aho, fa vao avy any an-kibon-dreny dia ho nentina tany am-pasana.
20 Tsy vitsy foana va ny androko? Aoka havelany aho! aoka hihemotra izy, dia haka aina kely aho,
21 alohan'ny hahalasanako tsy hiverina intsony, ho any amin'ny tanin'ny aizina aman'aloky ny fahafatesana,
22 tany manjombona sy maizimaizin-dava, anjakan'ny fikorontanana aman'aloky ny fahafatesana sy itovian'ny fahazavana amin'ny alim-pito.
Toko faha-11
1 Dia niteny Sofara avy any Naama, ka nanao hoe:2 Tsy hisy valiny va ny teny maro be, ary ny basivava ve no hanana ny marina?
3 Izay bedibedinao va no hampangina ny olona? Haniratsira ve hianao, ka dia tsy hisy handresy lahatra anao e?
4 Hoy hianao tamin'Andriamanitra: Ny fisainako no marina, ary tsy manan-tsiny eo anatrehanao aho.
5 Endrey, raha mety miteny Andriamanitra, ka hiloa-bava hamaly anao,
6 raha ambarany anao ny zava-miafina ao amin'ny fahendreny mbamin'ny safeliky ny hevitra kendreny izay voatakona, dia ho hitanao fa misy hadinony ny helokao.
7 Mihambo hanakatra ny halalinan'Andriamanitra va hianao, sy hahatratra ny fahalavorarian'ny Tsitoha?
8 Avo tahaka ny lanitra izany, ka hataonao ahoana? lalina noho ny fonenan'ny maty izany, ka inona no ho fantatrao?
9 Ny fandrefesana azy lava noho ny tany, malalaka noho ny ranomasina.
10 Raha miantoraka amin'ny meloka izy, sy misambotra azy, raha mamory ny mpitsara: zovy moa no hahatohitra izany?
11 Fa fantany ny olon-dratsy: hitany ny haratsiana, raha mbola tsy miahy ny ho hita izy ity.
12 Amin'ny fandinihana izany, na ny adala aza hahazo hevitra, na ny zanak'ampondra dia aza, ho tonga manan-tsaina.
13 Fa hianao kosa, raha mitondra ny fonao ho amin'Andriamanitra mananty tanan-droa miandrandra azy,
14 raha manary lavitra ny hadisoanao izay eo an-tananao, ary tsy mampitoetra ny tsy fahamarinana eo an-dainao,
15 dia hatrakanao tsy manan-tsiny ny handrinao; tsy hangozohozo na hanan-tahotra intsony hianao.
16 Hohadinoinao amin'izay ny fahorianao, ho toy ny rano nandalo no hahatsiarovanao azy.
17 Ny ho avy hiposaka aminao mamirapiratra toy ny mitataovovonana, ny maizina hiova hanjary mazava atsinanana.
18 Ho feno toky hianao, ary tsy ho foana ny fanantenanao; hijery ny manodidina anao hianao, dia handry tsy amin'ahiahy.
19 Handry fehizay hianao, ka tsy hisy mpanabataba, ary maro no hanafosafo ny tavanao.
20 Fa ny mason'ny ratsy fanahy kosa hihalevona, tsy misy hialofany; toy ny fofon'ain'ny miala aina ny fanantenany.
Toko faha-12
1 Dia niteny Joba ka nanao hoe:2 Marina tokoa fa hianareo ihany dia sahala fahendrena amim-bahoaka be, ka dia hiara-maty aminareo ny fahendrena!
3 Izaho koa anefa mba manan-tsaina toa anareo, tsy latsaka noho hianareo na amin'inona na amin'inona. Ary iza moa no tsy mahalala izay zavatra lazainareo?
4 Fananihanin'ny sakaizako aho, izaho izay miantso an'Andriamanitra, ka nohenoin'Andriamanitra. Fananihaniny aho, ilay marina, ilay tsy manan-tsiny!
5 Ny olona ory, fandatsa! Izany no teny arahin'ny miadana; ary eso no miandry an'izay mangozohozo.
6 Ny lain'ny jiolahy anefa, anjakan'ny fiadanana; ny mihaika an'Andriamanitra, no mandry fahizay; dia ireo tsy manana andriamanitra, afa-tsy ny sandriny ihany.
7 Kanefa, masìna hianao, mba fotory ny biby, fa hampianatra anao izy; hatramin'ny voro-manidina, fa hanoro anao izay izy.