Bokin'i Joba
Toko faha-27
5 Lavitra ahy izay hihevitra ny anareo ho marina, fa hiaro ny tsy fananako tsiny aho mandra-pahatapitry ny aiko.6 Efa nanomboka nanamarina ny tenako aho, tsy hitsahatra amin'izany, tsy misy androko anomezan'ny foko tsiny ahy na dia iray aza.
7 Fitondra olon-dratsy anie no ho anjaran'ny fahavaloko, ary anjaran'ny tsy mivavaka anie no ho an'ny mpanohitra ahy!
8 Inona no ho fanantenan'ny tsy mivavaka, raha fognoran'Andriamanitra izy, raha alany ny ainy?
9 Moa Andriamanitra hihaino izay fitarainany akory va, amin'ny andro hamelezan'ny fahoriana azy?
10 Mahita firavoravoana ao amin'ny Tsitoha va izy? Manao fivavahana mandrakariva amin'Andriamanitra va izy?
11 Hotoroako ny fitondra'Andriamanitra hianareo, ary tsy hanafenako ny hevitry ny Tsitoha.
12 Tenanareo rehetra aza no efa nahita maso izany! ka nahoana hianareo no mandahadahatra foana?
13 Izao no anjara natokan'Andriamanitra ho an'ny ratsy fanahy, sy lova azon'ny mpanao an-keriny, avy amin'ny Tsitoha.
14 Raha maro anaka izy, ho anjaran'ny sabatra ireny; ary ny solofony tsy mba ho voky hanina.
15 Ny sisa velona aoriany, hasitrika amin'ny fahafatesana, ny mpitondratenany tsy mba hitomany azy.
16 Na hahangona volafotsy hoatra ny fasika aza izy, ka hampiavosa fitafiana hoatra ny fotaka,
17 fanangonana no azy, fa ny marina no hitondra ireny; ny tsy manan-tsiny no handova ny volanao.
18 Ny tranony toy ny ataon'ny kalalao, manahaka ny trano bongo aorin'ny mpiandry tanim-boaloboka.
19 Mandry ny manan-karena, dia izay no farany; manokatra ny masony izy, dia maty eo.
20 Saforan'ny fampahatahorana toy ny rano be izy; paohin'ny tafio-drivotra mamaton'alina.
21 Ongoahan'ny rivotra avy any atsinanana izy, dia tsy hita, fa tsoahany an-keriny eo amin'ny fonenany.
22 Fafazan'Andriamanitra ny zana-tsipikany, tsy ananany antra izy; Ka taitra mandositra tsy ho tratry ny tanany;
23 itehafan'ny olona izy, avy eo an-trano nitoerany, dia anakorana azy.
Toko faha-28
1 Misy toerana ihadiam-bolafotsy, misy toerana fanadiovam-bolamena.2 Ny vy alaina avy amin'ny tany; ny vato arendrika hahazoana varahina.
3 Mampisava ny aizina ny olona, hatrany anatin'ny hantsana izy no mikaroka ny vato miafina ao amin'ny aizina sy ny aloky ny fahafatesana.
4 Mihady lalana izy lavitry ny tany onenana, tsy fantatry ny tongotry ny velona; tafahantona mitsingevaheva lavitry ny olombelona.
5 Ny tany ihavian'ny hanina, voakorontana aty toa voan'ny afo.
6 Ny vatony no itoeran'ny safira, sy ahitana vovo-bolamena.
7 Ny vorom-pihaza tsy mahita ny lalana any, ny masom-papango tsy mahatazana azy;
8 ny biby dia tsy nandia izany, ny liona koa tsy nandalo tany na oviana na oviana.
9 Ny olombelona maninji-tanana amin'ny vatomainty, manozongozona ny tendrombohitra hatramin'ny fotony;
10 mandavaka lalana anatin'ny valolampy; tsy misy zava-tsarobidy tsy hitan'ny masony.
11 Mahay manampina ny rano mananika izy, ary mitondra ny miafina rehetra ho eo amin'ny mazava.
12 Fa aiza kosa no ahitana ny Fahendrena? Aiza no fitoeran'ny Fahalalana?
13 Ny olombelona tsy mahay manombana azy; ny tanin'ny velona tsy ahitana azy.
14 Fa hoy ny hantsana: Tsy ato anatiko izy; ny ranomasina milaza hoe: Tsy aty amiko izy.
15 Ny volamena madio tsy mahatakalo azy, na lanjam-bolafotsy ohatrinona aza tsy mahavidy azy.
16 Tsy ampifandanjaina amin'ny volamena avy any Ofira izy, na amin'ny berila sarobidy na ny safira.
17 Ny volamena amam-pitaratra tsy azo ampitahaina aminy; na kapoaka volamena madio tsy mahatakalo azy.
18 Ny voahangy amam-batomazava, tsy mendrika hotononina akory, fa mihoatra noho ny voahangy ny fahazoana ny fahendrena.
19 Ny topaza avy any Etiopia tsy mahatoraka azy, ary ny volamena madio tsy mahatratra ny vidiny.
20 Koa avy aiza ary ny fahendrena? Aiza ny fitoeran'ny fahalalana?
21 Miafina amin'ny mason'ny velona rehetra izy, ary takona amin'ny voron'ny lanitra.
22 Hoy ny ambanin'ny tany sy ny fahafatesana: Filazana azy fotsiny no mba renay.
23 Andriamanitra no mahalala ny lalana mankany aminy; izy no mahafantatra izay misy azy.
24 Fa izy mahita ny hatrany amin'ny fara vazan-tany, mahatsinjo ny ambany lanitra rehetra.
25 Fony izy nandamina ny lanjan'ny rivotra, nanao ny rano tao amin'ny mizana,
26 namoaka lalana ho an'ny ranonorana, nanori-dalana ho an'ny tselatry ny varatra,
27 dia nahita sy nilaza azy izy, namorona azy sy nahatakatra ny zava-miafina ao aminy.
28 Izay izy vao nilaza tamin'ny olombelona nanao hoe: Ny fahatahorana ny Tompo, dia izay no fahendrena, ny mandositra ny ratsy, dia izay no fahalalana.
Toko faha-29
1 Dia mbola nanohy ny teniny indray Joba, ka nanao hoe:2 Ah, iza re no hamerina amiko ny volana taloha, dia ny andro nitsimbinan'Andriamanitra ny fiarovana ahy,
3 raha namirapiratra teo ambonin'ny lohako ny jirony, ary nitari-dalana ahy teo amin'ny maizina ny fahazavany!