Bokin'i Joba
Toko faha-29
4 Araka ny toetrako tamin'ny fahalehibeazako, tamin'izay namangian'Andriamanitra ahy tamim-pifankazarana tao an-daiko,5 sy mbola nomban'ny Tsitoha ahy, ary nitangoronan'ny zanako manodidina ahy;
6 tamin'izay nanasako tongotra tamin'ny ronono; sy namoahan'ny valolampy diloilo mandriaka ho ahy.
7 Raha nivoaka ho eo am-bavahadin'ny tanana aho, ka nianina nipetraka teo amin'ny kianja;
8 vao mahita ahy ny zatovolahy miampirimpirina, ny anti-panahy mitsangana ka maharitra mijoro.
9 Ny andriandahy nangina tsy niteny, sy nitampim-bava amin'ny tanany.
10 Ny feon'ny mpanapaka tankina teo, ny lelany tafaraikitra amin'ny lanilaniny.
11 Ny sofina nandre ahy, nanao ahy hoe: sambatra; ny maso nahita ahy, nanao filazana tsara momba ahy.
12 Fa novonjeko ny ory nangata-piantrana, mbamin'ny kamboty tsy nanan-kiankinana.
13 Ny fisaoran'ny olona am-bava loza nitororoka tamiko; ny fon'ny mananotena nofenoiko hafaliana.
14 Notafiko toy ny lamba ny fahamarinana, kapaoty amam-pehilohako ny fanaovako ny rariny.
15 Izaho no mason'ny jamba, sy tongotry ny mandringa.
16 Izaho no rain'ny kamboty; ary nandinika tamim-pitandremana ny adin'ny olon-tsy fantatra.
17 Notapahako ny valanoranon'ny nanao ny tsy marina, notsoahako ny babo efa mby am-bavany.
18 Dia hoy izaho: Eto amin'ny akaniko no hialako aina; ho maro toy ny fasika ny androko;
19 mitatra hatrany amin'ny rano ny fakako, itoeran'ny andro mandritra ny alina ny raviko.
20 Ny voninahitro hihavao mandrakariva, ary ny tsipikako hihahenjana indray eny an-tanako.
21 Ny olona nihaino ahy, dia niandry, nandray tamim-pahanginana ny torohevitro.
22 Rahefa niteny aho, dia tsy nisy nanampy intsony, fa toy ny ando no nirotsaka taminy ny teniko.
23 Niandry ahy toy ny fiandry ranonorana izy ireo, nitanatana vava, toy ny niandry tandrifin-drahona amin'ny lohataona.
24 Raha nitsiky taminy aho, tsy azony ninoana izany, fa liana loatra izy nandray izany mari-pitiavana izany.
25 Nony nankeo aminy aho, ahy ny fitoerana voalohany; dia mipetraka aminy eo aho, toy ny mpanjaka hodidinin'ny miaramilany, sy tahaka ny mpanafak'alahelo, eo afovoan'ny tra-pahoriana.
Toko faha-30
1 Fa ankehitriny kosa aho, fihomehezan'ny olona tanora noho izaho, izay tsy ho noraisiko akory ny rain'izy ireo fahizany, hatao eo amin'ireo amboa miandry ny ondriko.2 Ho nataoko inona moa izay herin-tsandrin'ireny? tsy manan-pahavitrihina akory ireny.
3 Kaozatry ny fahoriana amam-kanoanana izy, dia miraotra ny efitra, izay tany karankaina, tsy misy zava-maniry hatrizay ela izay.
4 Mitsongo tsimokazo mangidy any amin'ny hazo kely milobolobo izy, ary tsy manan-kanina afa-tsy ny fakan-kofafam-bohitra.
5 Roahina tsy ho eo amin'ny fikambanan'olombelona izy; sady iantsoantsoana toy ny amin'ny mpangalatra.
6 Ka dia monina any an-dohasaha mahatsiravina, any amin'ny zohin-tany sy any amin'ny haram-bato.
7 Antsoantson'olon-dia no re ataony any an-kirihitrala, ary mitangorona mandry any anaty roimainty izy.
8 Olona adala sy taranaky ny tsy misy hajany ireny, ka roahina amim-panesoana amin'ny tany onenana.
9 Kanjo izaho indray izao no ataony an-kira, ataony ambetinteny,
10 ataony zava-betaveta aho, andosirany: tsy aviliny tsy hankamin'ny tavako ny tsipi-drorany.
11 Manaram-po foana izy manevateva ahy, tsy mahalala fetra eo anatrehako.
12 Olona tsinontsinona no mitsangana eo an-kavanako, ka mitady hanosika ny tongotro, misava ny lalana hamonoana hatraty amiko.
13 Dia noravany ny lalako: ny handringana ahy no imasoany, izy ireo izay tsy ho nanana olo-mamonjy.
14 Toy ny amin'ny fefy banga be no irotsahany amiko, dia miantoraka ao amin'ny korontan-javatra.
15 Ka voasaron'ny fampahatahorana aho; ny fahafinaretako voafaoka toy ny rivotra, ny fiadanako nandalo toy ny rahona.
16 Ary ankehitriny ny fanahiko mihanaka toy ny rano ao anatiko, ny andron'ny fahoriana mangeja ahy.
17 Ny alina misokitra ny taolako, mihinana azy: ny loza mikiky ahy tsy mitsahatra.
18 Noho ny hamafiny efa tsy mitana ny endriny intsony ny akanjoko, fa mangeja ahy toy ny akanjovity;
19 nazeran'Andriamanitra ao anaty fotaka aho, ka tahaka ny vovoka aman-davenona aho izao.
20 Mitaraina aminao aho, nefa tsy valianao akory; mitsangana aho, nefa jerenao fotsiny.
21 Tonga loza be amiko hianao; asianao amin'ny herin'ny sandrinao rehetra aho.
22 Alainao aho, ampanidininao araka izay itondran'ny rivotra ahy aho, ary foananao amin'ny fifofofofon'ny tafio-drivotra.
23 Satria, fantatro izany, fa entinao ho amin'ny fahafatesana aho; any amin'ny ifamatoran'ny manan'aina rehetra.
24 Kanefa tsy hanandra-tanana va izay efa ho faty, ary tsy handefa feo miantso va izay mby an-tanan-doza?
25 Tsy efa nandatsa-dranomaso tamin'ny ory va aho? Tsy efa nangoraka ny mahantra va ny foko?
26 Nanandrandra fiadanana aho, ka fahoriana no tonga, nanantena fahazavana aho, ka aizina no mitranga.
27 Mandevilevy tsy mety miato ny tsinaiko; nifantoka amiko ny androm-pahoriana.
28 Mitsaitsaika amim-pisaonana, tsy misy masoandro aho; matoa mitsangana aho eo am-pivoriana, dia handefa fitarainana foana.