Ny Salamo

Toko faha-119

⁷⁴ Hifaly amin'ny fahitana ahy, izay matahotra anao, fa mitoky amin'ny teninao aho.

⁷⁵ Fantatro, ry Iaveh, fa marina ny fitsaranao; tamin'ny fahamarinanao no nanetrenao ahy.

⁷⁶ Ny hatsaram-ponao anie no ho fiononako, araka ny teny nomena ny mpanomponao.

⁷⁷ Ho tonga amiko anie ny fiantranao ary ho velona anie aho, fa ny lalànao no fahafinaretako.

⁷⁸ Aoka ny mpiavonavona nampahory ahy tsy an-drariny ho menatra; izaho kosa misaintsaina ny didinao.

⁷⁹ Aoka hitodika ho atý amiko izay matahotra anao, mbamin'izay mahalala ny fampianaranao.

⁸⁰ Ny foko manontolo anie ho amin'ny lalànao, mba tsy ho menatra aho.

⁸¹ KAPH Haninin'ny fanahiko ny famonjenao; ny teninao no antenaiko.

⁸² Valalanina ny masoko miandry ny fampanantenanao, hoy aho: Rahoviana no hampionona ahy hianao?

⁸³ Fa efa tahaka ny siny hoditra mitanina amin'ny setroka aho, nefa tsy manadino ny lalànao.

⁸⁴ Manana andro firy moa ny mpanomponao? Mba rahoviana no hamaizanao izay manenjika ahy?

⁸⁵ Mihady lavaka hahaverezany ahy ireo mpiavonavona, izay mpanohitra ny lalànao.

⁸⁶ Ny didinao rehetra dia fahamarinana; mpanenjika ahy tsy ahoan-tsy ahoana izy ireo: vonjeo aho.

⁸⁷ Efa saiky nolevoniny eto amin'ny tany aho, fa izaho kosa tsy mba nahafoy ny didinao.

⁸⁸ Velomy amin'ny hatsaram-ponao aho, dia hankato ny fampianaran'ny vavanao.

⁸⁹ LAMED Iaveh ô, ny teninao, miorina mandrakizay any an-danitra.

⁹⁰ Maharitra amin'ny taona rehetra mifandimby ny fahamarinany; nanorina ny tany hianao, dia maharitra izy.

⁹¹ Araka ny lalànao no mbola aharetan'ny zavatra rehetra mandraka androany; fa manaiky ny fandaharanao ny zavatra rehetra.

⁹² Raha tsy ny lalànao no nataoko fahafinaretako, dia efa maty tamin'ny fahoriako aho toy izay.

⁹³ Tsy hohadinoiko mandrakizay ny didinao, fa izy no namelomanao ahy indray.

⁹⁴ Anao aho: dia vonjeo, fa mitady ny didinao.

⁹⁵ Miandry ahy ny ratsy fanahy mba hamono ahy: mihaino tsara ny fampianaranao aho.

⁹⁶ Efa hitako fa misy fetra avokoa ny lavorary, ny didinao no tsy manam-petra.

⁹⁷ MEM Endrey izany fitiavako ny lalànao! izy no fisaintsainako tontolo andro.

⁹⁸ Ataonao hendry noho ny fahavaloko aho, amin'ny didinao, satria ato amiko mandrakariva aho.

⁹⁹ Hendry noho ny mpampianatra ahy rehetra aho satria ny fampianaranao no fisaintsainako.

¹⁰⁰ Manan-tsaina noho ny anti-panahy aho, satria mitandrina ny didinao.

¹⁰¹ Hazoniko lavitra ny làlan-dratsy rehetra ny tongotro, mba hitandremako ny teninao.

¹⁰² Tsy mba miala amin'ny didinao aho, fa hianao no nampianatra ahy.

¹⁰³ Endrey, mamy loatra amin'ny lanilaniko ny teninao, manoatra noho ny tantely amin'ny vavako.

¹⁰⁴ Ny didinao dia ahatongavako ho manan-tsaina; noho izany dia mankahala ny làlan'ny fitaka rehetra aho.

¹⁰⁵ NUN Ny teninao dia fanilo mialoha ny diako, fahazavana eny an-dàlako.

¹⁰⁶ Efa nianiana aho, ary tsy hivadika amin'izany, fa hitandrina ny didim-pahamarinanao.

¹⁰⁷ Tonga amin'ny fara-fahoriana aho, Iaveh ô, velomy indray aho araka ny teninao.

¹⁰⁸ Ankasitraho, ry Iaveh, ny fanatitra aloaky ny molotro, ary ampianaro ahy ny didinao.

¹⁰⁹ An-tenda lava izao ny aiko, nefa tsy manadino ny lalànao aho.

¹¹⁰ Mamela-pandrika hamelezana ahy ny ratsy fanahy, nefa tsy mania lavitra ny didinao aho.

¹¹¹ Ny fampianaranao no ananako mandrakizay mba ho lova, fa fifalian'ny foko izy.

¹¹² Nandraika ny foko hitandrina ny didinao aho, mandrakizay, hatramin'ny farany.

¹¹³ SAMECH Halako ny olona miroa fo, ary tia ny lalànao aho.

¹¹⁴ Fialofako sy ampingako hianao mitoky amin'ny teninao aho

¹¹⁵ Miala amiko hianareo, ratsy fanahy, dia hitandrina ny didin'Andriamanitra aho.

¹¹⁶ Tohany araka ny fampanantenanao aho, mba ho velona, ary aza avela hahazoako henatra ny fanantenako.

¹¹⁷ Aoka ho tohako hianao, dia ho voavonjy aho, ka eo imasoko mandrakariva ny lalànao.

¹¹⁸ Ataonao tsinontsinona izay rehetra mania amin'ny lalànao; satria lainga foana ny hafetseny.

¹¹⁹ Arianao toy ny tain-drendrika ny ratsy fanahy rehetra amin'ny tany; noho izany dia tiako ny fampianaranao.

¹²⁰ Mangovitra noho ny tahotra ny nofoko eo anatrehanao, ary matahotra ny fitsaranao aho.

¹²¹ AIN Manaraka ny rariny sy ny fahamarinana aho; aza dia foinao ho an'ny mpampahory ahy aho.

¹²² Aoka hianao hiantoka ny fananan'ny mpanomponao, ary aoka tsy hampahorian'ny mpiavonavona aho.

¹²³ Valalanina ny masoko miandry ny famonjenao, sy ny fampanantenanao ny fitsarana marina.