Bokin'ny Ohabolana
Toko faha-5
3 Fa mitete tantely ny molotry ny vehivavy an'olon-kafa, ary mamy noho ny diloilo ny vavany.4 Nefa ny farany mangidy toy ny absinta, maranitra toy ny sabatra roa lela.
5 midina ho any amin'ny fahafatesana ny tongony; mamantana ho any amin'ny seoly ny diany.
6 Tsy mandinika ny lalan'ny fiainana, fa manjenjena tsy mahalala izay halehan'ny diany akory izy.
7 Koa ankehitriny mihainoa ahy hianareo, anaka, ary aza mihataka amin'ny teny aloaky ny vavako.
8 Hampanalaviro azy ny lalanao, aza akekezinao ny varavaran'ny tranony,
9 fandrao dia atolotrao ny hafa ny tsara indrindra amin'ny andron'ny fahatanoranao, ary atolotrao ny tompo masiaka ny taonanao;
10 fandrao dia olon-kafa no hivoky amin'ny fanananao; ary hifindra any an-tranon'ny sasany ny vokatry ny asanao;
11 fandrao dia mitoloko hianao any am-parany, rahefa avy izay hahalevonan'ny nofonao amam-batanao;
12 ka hanao hoe: Naninona re aho no nankahala famaizana, ary naninona re ny foko no nanamavo fananarana?
13 Naninona re ah no dia tsy nihano ny feon'ny mpampianatra ahy, ka tsy nampandry sofina tamin'ireo nampianatra ahy?
14 Efa saiky tonga tamin'ny fara-fahoriana aho, teo afovoan'ny vahoaka sy ny fiangonana.
15 Ny rano avy amin'ny lavaka famorian-dranonao no sotroy, ny rano mandeha avy amin'ny fantsakanao.
16 Hiparitaka any ivelany anie ny loharanonao; ary handeha any amin'ny kianja anie ny sakeli-dranonao!
17 Aoka ho anao irery izy, fa aza iombonana amin'ny hafa.
18 Hosoavina anie ny loharanonao, ary ny vadin'ny fahatanoranao no ataovy fifalianao.
19 Fa serfavavy mahateho-tia izy ary gazela mahafinaritra, ka aoka ny hasoany hiravoravoanao lalandava, ary ho raiki-pitia aminy mandrakariva hianao!
20 Ahoana no ho raiki-pitia veivavy an'olon-kafa hianao, anaka, ka hanohona izay tratran'olon-tsy fantatra?
21 Fa eo imason'ny Tompo ny lalan'ny olombelona, dinihiny avokoa ny lalany rehetra.
22 Ny ratsy fanahy mihitsoka amin'ny ratsy nataony, ny famatoran'ny fahotany ihany no maningotra azy;
23 Ho faty noho ny tsy fahazoany famaizana izy, ary ho voafitaky ny hadalany tafahoatra.
Toko faha-6
1 Anaka, raha niantoka ny sakaizanao hianao, raha nametra-teny hiantoka ny hafa,2 raha voasingotry ny teny naloaky ny vavanao, sy azon'ny teny naloaky ny vavanao,
3 dia izao no mba ataovy, ry havako: mitsoaha amin'izany! Matoa latsaka eo an-tanan'ny namanao hianao, dia mandehana mihohoka aminy ary mandodona azy mafy!
4 Aza avela hatory ny masonao, na ho rendremana akory ny hodimasonao;
5 mitsoaha, toy ny serfavavy eo an-tanan'ny mpihaza; toy ny vorona eo an-tanan'ny mpamandrika.
6 Mandehana mankany amin'ny vitsika, ry ilay kamo; diniho ny lalany ka mba hendry.
7 Tsy manam-pifehy izy, na mpitandrina ny ataony, na mpanjaka,
8 nefa, fahavaratra izy, mamory hanina, manangona ny fivelomany izy amin'ny finjinjana.
9 Mandra-pahoviana no mbola handrianao, ry ilay kamo, rahoviana hianao no vao hifoha amin'ny torimasonao?
10 Torimaso kely, faharendremana kely, fanohonan-tanana kely eo am-pandriana.
11 Dia ho tonga toy ny mpivahiny ny fahantranao, ary toy ny lehilahy mitam-piadina ny tsy fahampian-kanina!
12 Ny olona ratsy fanahy, ny olona tsy marina, dia mandroso, ka ao am-bavany ny faharatsiana;
13 Mipipy maso, mihehy amin'ny tongony, manao famantarana amin'ny rantsan-tànany.
14 Ao am-pony ny faharatsiana, misaintsaina ny ratsy lalandava izy, ary manangana ady.
15 Koa ho avy tampoka ny faharavany; ho torotoro tampoka tsy azo sitranina izy.
16 Misy zavatra enina halan'ny Tompo, misy fito no ataony ho fahavetavetana:
17 ny maso miavonavona, ny lela mandainga, ny tanana mandatsa-dra tsy manan-tsiny,
18 ny fo mamoron-tsain-dratsy, ny tongotra faingam-piriotra hanao ratsy,
19 ny vavolombelona tsy marina mamoaka lainga, ary ny mamafy ady amin'ny mpirahalahy.
20 Anaka, tandremo ny didin-drainao, ary aza ariana ny fampianaran-dreninao.
21 Fehezo eo ambonin'ny fonao mandrakariva ireo, ary afatory eo amin'ny vozonao.
22 Hitarika anao amin'izay halehanao, hiambina anao amin'ny torimasonao, ary hiresaka aminao amin'ny fifohazanao.
23 Fa jiro ny didy, fahazavana ny lalana, ary lalan'aina ny fananarana mahahendry.
24 Hiaro anao amin'ny vehivavy ratsy fanahy izy, dia amin'ny lela mandrobon'ny vehivavy an'olon-kafa.
25 Aza maniry ny hatsaran-tarehiny, ao am-ponao, ary aza mety hambosin'ny hodimasony hianao.
26 Fa vehivavy janga no mila tsy hananan'ny olona sombi-mofo; ary vehivavy manambady no tonga fandriky ny aina sarobidy.
27 Mety hisy ve ny olona handeha ambony vain'afo amin'ny tratrany, ka tsy ho may ny akanjony?
28 Na hoe ka hisy olona handeha ambony vain'afo mivaivay, ka tsy ho may ny tongony?
29 Toy izany izay mankamin'ny vadin'ny namany: rahefa mikasika azy izy tsy maintsy hitondra faisana.