Bokin'ny Ohabolana
Toko faha-27
1 Aza mirehareha ny amin'ny ho ampitso; fa tsy fantatrao izay havoaky ny andro manaraka.2 Aoka ny hafa no hidera anao, fa tsy ny vavanao; ary ny vahiny, fa tsy ny molotrao.
3 Madonda ihany ny vato, mavesatra koa ny fasika, fa mavesatra noho ireo indray ny hasosoran'ny adala.
4 masiaka ny havinirana, miafonafona ny hatezerana, fa zovy no hahatoetra raha asian'ny fialonana?
5 Aleo anatra imaso, toy izay fitia miafina.
6 Ny ratra avy amin-tsakaiza dia vokatry ny fitiavany tsy mivadika, fa ny oroky ny fahavalo kosa, fitaka foana.
7 Amin'ny voky, na ny toho-tantely aza hoseny tongotra fotsiny, fa amin'ny noana, na ny zava-mangidy aza, maminy avokoa.
8 Toy ny vorona mirenireny lavitra ny akaniny: toy izany koa ny olona mirenireny lavitra ny fonenany.
9 Mampiravoravo ny fo ny diloilo aman-java-manitra; torak'izany ny hamamian-tsakaiza manoro hevitra avy amin'ny fony.
10 Aza mahafoy ny sakaizanao aman-tsakaizan-drainao; ary aza miditra ny tranon'ny rahalahinao amin'ny andron'ny fahorianao: fa aleo namana akaiky toy izay havan-davitra.
11 Anaka, hendre, ary ampifalio ny foko, mba hahaizako mamaly an'izay miteny ratsy ahy.
12 Ny mahira-tsaina mahatsinjo ny ratsy ka miery; ny kely saina mandroso ihany ka voan'izany.
13 Endaho ny lambany fa efa niantoka ny hafa izy, mangala antoka aminy noho ny amin'ny vahiny.
14 Ny misaotra ny namany, maraina koa amin'ny feo avo, dia isaina ho toy ny manozona ihany.
15 Ny fijononoky ny rano mitete ao an-trano amin'ny andro manorana, sy ny vehivavy tia ady dia sahala tsy misy hafa.
16 Ka izay mitana azy, mitana rivotra, ary ny tanany mahafihina diloilo.
17 Vy ihany no maharanitra ny vy; olona ihany koa no maharanitra olon-kafa.
18 Izay mitahiry ny aviaviny hihinana ny voany; ary izay miaro ny tompony homem-boninahitra.
19 Toy ny ifanahafan'ny tarehy sy ny tandindony ao anaty rano, no ifanahafan'ny fon'ny olona sy ny an'ny olon-kafa koa.
20 Tsy mety voky ny fasana aman-tseoly, tsy mety afa-po toy izany koa ny mason'ny olombelona.
21 Ny memy atao hanadio ny volafotsy; ny fandrendrehana hanadio ny volamena, ary ny fiderana raisin'ny olona, aoka hozahany toetra toy izany koa.
22 Na hototoinao ao an-daona aza ny adala, tahaka ny fitoto vary amin'ny fanoto, tsy hisaraka aminy ny hadalany tsy akory.
23 Fantaro tsara ny toetry ny ondrinao, ny sainao ento mandinika ny biby fiompinao;
24 fa ny harena tsy maharitra mandrakizay, na ny satro-boninahitra amin'ny taona mifandimby.
25 Nefa rahefa nitranga ny ahitra ka niseho ny zava-maitso, ary voaangona ny vilona avy eny an-tendrombohitra,
26 dia indreo ny zanak'ondry hahazoanao fitafiana; ny osilahy hividiananao saha anankiray:
27 be ny rononon'osy ho sakafonao sy ny ankohonanao, ary ho famelomana ny ankizivavinao koa.
Toko faha-28
1 Mandositra tsy enjehina ny ratsy; fa matoky toy ny liona kosa ny marina.2 Amin'ny tany tsy mandry, mihamaro ny mpanapaka, fa amin'ny olona manan-tsaina sy hendry kosa maharitra ny filaminana.
3 Ny olo-mahantra mampahory ny malahelo, dia orana mivatravatra mahatonga mosary.
4 Ny mahafoy ny lalana dia mandoka ny ratsy fanahy; fa ny manara-dalana kosa mitezitra aminy.
5 Ny olon-dratsy tsy mahalala ny mety, fa ny mitady an'ny Tompo kosa, mahalala ny zavatra rehetra.
6 Aleo olo-mahantra ombam-pahamarinana; toy izay olona miolikoli-dalana sy manan-karena.
7 Izay mitandri-dalana dia zanaka hendry, fa izay mamelona ny mpijangajanga manome henatra an-dreniny.
8 Izay manangon-karena amin'ny zana-bola amam-pilan-tombony be loatra, dia manangona izany ho an'izay miantra ny mahantra.
9 Raha misy mamily ny sofiny tsy hihaino ny lalana, na ny fivavahany aza dia fahavetavetana.
10 Izay mamily ny mahitsy fo, ho amin'ny lalan-dratsy, dia mandatsaka ny tenany amin'ny lavaka nohadiny, fa ny tsy misy tsiny dia handova ny fahasambarana.
11 Ny manankarena manao ny tenany ho hendry; fa ny mahantra manan-tsaina kosa, mahalala azy ihany.
12 Raha mandresy ny marina dia misy fety lehibe fa raha misandratra kosa ny ratsy fanahy, samy miery ny olona.
13 Izay manafina ny fahotany tsy mba hambinina; fa izay mitsotra sy mahafoy izany dia hahazo famindram-po.
14 Sambatra ny olona izay manam-pahatahorana mandrakariva; fa izay manadonto ny fony kosa ho latsaka anatin'ny fahoriana.
15 Liona mierona sy orsa noana; toy izany ny ratsy fanahy manapaka amin'ny olo-mahantra.
16 Ny mpanapaka tsy manan-tsaina mampitombo ny famoretana, fa izay mankahala ny fierenana kosa, ho lava andro iainana.
17 Izay mivesatra ny ran'olona nalatsany, dia mandositra hatrany an-davaka: Aza misakana azy.
18 Hahita famonjena ny mandeha amin'ny fahamarinana tanteraka, fa ho lavo tsy afa-miarina intsony, ny manaraka lala-miolikolika.
19 Ny miasa ny taniny, ho voky hanina; fa ny manenjika zava-poana, ho voky fahantrana.
20 Ny olona mahatoky, ho feno fanambinana, fa ny maimay hanankarena, tsy hialam-pahadisoana.
21 Tsy mety ny mizaha tavan'olona, fa sombi-mofo monja, dia mahatonga ho olo-meloka.
22 Maimay ny hanankarena, ny mpialona, tsy fantany fa ho tonga aminy ny tsy fahampiana.
23 Ny mananatra olona dia hahita fitia kokoa rahatrizay, noho ny mahatonga ny lelany ho mpidoka.