Tonon-kira Dia Tonon-kira
Toko faha-2
17 Alohan'ny hangatsiatsiahan'ny andro, sy hahalasanan'ny aloka mba miverena... Ry malalako, aoka hianao hanahaka ny gazela na ny zanaky ny serfavavy eny an-tendrombohitra voatsefatsefaka.
Toko faha-3
1 Teo am-pandriako aho, nony alina, nitady ilay malalan'ny fanahiko; nitady azy aho, fa tsy nahita...2 Ka hoy aho anakampoko: Andeha hifoha aho hitetitety ny tanana, ny lalambe sy ny kianja, hitady ilay malalan'ny foko. Dia nitady azy aho fa tsy nahita.
3 Tojo ahy ny mpiambina izay misafo ny tanana: - Mba hitanareo va ilay malalan'ny foko? -
4 Vao tafahoatra an'ireo kely foana aho, dia nahita an'ilay malalan'ny foko. Nohazoniko izy, fa tsy navelako handeha, mandra-pampiditro azy any an-tranon'i neny, sy any amin'ny efi-tranon'ilay nahitako masoandro.
5 NY MPAMPAKATRA Ry zanakavavin'i Jerosalema, izaho miangavy anareo indrindra, noho ny gazela sy ny serfavavy eny an-tsaha, aza fohazinareo, aza fohazinareo ny malalako, raha tsy efa sitra-pony.
6 NY ANTOKOM-PIHIRA Iza izato miakatra avy any an'efitra, tahaka ny setroka mijoalajoala, manitra mira aman'emboka, mbamin'ny zava-manitra rehetra avy amin'ny mpandranto?
7 Iny eny, ny filanjan'i Salomona; otronin-dehilahy mahery enimpolo, avy eo amin'ireo lehilahy maherin'Israely;
8 samy mitan-tsabatra avokoa, ary zatra ady. Samy eny ambalahany avy, ny sabany, hampisava ny fahatahorana amin'ny alina.
9 Nanao filanjana ho azy Salomona mpanjaka, tamin'ny hazo avy any Libana.
10 Nataony volafotsy ny andriny, volamena ny fiankinana, jaky ny fipetrahana; amborodao ny eo afovoany, asam-pitiavana avy amin'ny zanakavavin'i Jerosalema.
11 Mivoaha, ry zanakavavin'i Siona, jereo Salomona mpanjaka, misatroka ny satro-boninahitra, nasatro-dreniny azy amin'ny andro ampakarany vady, amin'ny andro ifalian'ny fony.
Toko faha-4
1 NY MPAMPAKATRA Eny, tsara tarehy hianao, ry malalako; eny tsara tarehy hianao. Masom-boromailala ny masonao saronan'ny voalinao; ny volonao toy ny andrian'osivavy, miantsampitsampy eny an-kosolasolan'ny tendrombohitr'i Galaada.2 Ny nifinao, toy ny andian'ondrivavy voahety, miakatra avy any amin'ny fampandroana azy, samy manana anaka kambana, ary tsy misy bada izy ireo na dia iray aza.
3 Tahaka ny kofehy jaky ny molotrao, ary mahafinaritra ny vavanao; tahaka ny voan'ampongabendanitra misasaka ny takolakao, alokalofan'ny voalinao.
4 Tahaka ny tilikambon'i Davida ny vozonao, izay nataony trano fitehirizam-piadiana, ka ihantonan'ampinga arivo, dia ny ampingan'ny mahery rehetra.
5 Tahaka ny zanaky ny gazela ny nononao roa, tahaka ny kambana roa zanaky ny gazela iray, izay mihinana eny amin'ny lisy.
6 Alohan'ny hangatsiatsiahan'ny andro, sy hahalasanan'ny aloka dia ho eny an-tendrombohitry ny mira aho, sy ho eny amin'ny havoan'ny emboka.
7 Fa tsara tarehy indrindra hianao, ry malalako, sady tsy misy panda aminao!
8 Avia, hiaraka amiko, avy any Libana, ry fofombadiko, avia hiaraka amiko, avy any Libana! Topazo maso avy eny an-tampon'i Amana, avy eny an-tamon'i Sanira sy Hermona, avy any amin'ny lavaky ny liona, sy ny tendrombohitry ny leoparda.
9 Efa lasanao ny foko, ry havako, ry fofombadiko, efa lasanao ny foko tamin'ny masonao indray mijery monja, tamin'ny singam-boahangy eo amin'ny fehivozonao!
10 Endrey izany hamamin'ny fitiavanao, ry havako voafofo, endrey izany hatsaran'ny fitiavanao mihoatra noho ny divay; ary mihoatra noho ny zava-manitra rehetra, ny fofon'ny hanitrao!
11 Mitete tantely ny molotrao, ry voafofo; ny tantely sy ny ronono dia ao ambany lelanao, ary sahala amin'ny fofon'i Libana, ny fofon'ny fitafianao.
12 Ny anabaviko voafofo dia tanimboly voahidy, loharano voahidy, fantsakana voaisy tombo-kase.
13 Ny tsirinao dia alan'ampongabendanitra, misy sipresy sy narda,
14 narda sy safrana, kanela sy sinamoma, mbamin'ny hazo rehetra misy emboka, mira sy aloesa, mbamin'ny hazo rehetra mahavokatra diloilo manitra tsara indrindra.
15 Loharanon'ny zaridaina, fantsakan-drano velona, sakeli-drano mandeha avy any Libana.
16 NY AMPAKARINA Mifohaza, ry rivotra avy any avaratra, avia ry rivotra avy any atsimo! Mitsofa eo an-tanimboliko, hitetevan'ny hazo mahavokatra dity manitra. Aoka hiditra ao an-tanimboliny ny malalako, ka hihinana amin'ireo voankazony tsara tarehy!
Toko faha-5
1 NY MPAMPAKATRA Efa tafiditra ny tanimboliko aho, ry anabaviko voafofo, efa nioty ny mirako aman-java-manitro aho; efa nihinana ny toho-tantely aman-tanteliko aho...! efa nisotro ny divay aman-drononoko aho...! Mihinana, ry sakaiza, misotroa, mimamoa, hianareo olon-tiako!2 NY AMPAKARINA Matory aho, nefa mahatsiaro ny foko... Injay ny feon'ny malalako! Mandondona izy: - Vohay aho, ranabavy, ry sakaizako, ry voromailalako, ry ahy tsy misy pentina; fa vonton'ny ando ny lohako, kotsan'ny andon'ny alina ny voloko voalantolanto. -
3 Efa niala akanjo aho, ka hataoko ahoana no fiakanjo indray? Efa nioza tongotra aho, ka hataoko ahoana no fandoto azy indray.
4 Ny malalako mampidi-tanana amin'ny loaky ny hidim-baravarana, ka nangoraka azy ny foko.
5 Dia nitsangana aho namoha ny malalako, ary nitete mira ny tanako, ny mira tsara indrindra avy amin'ny rantsan-tanako, nihanaka teo amin'ny famohan-karetsaka.
6 Namoha trano ny malalako aho; kanjo nanjavona ny malalako; nandositra izy. Tsy nahatsiaro tena aho raha niteny tamiko izy. Nitady azy aho, nefa tsy nahita; niantso azy, nefa tsy novaliany.
7 Nifanehatra tamiko ny mpiambina, dia ireo izay misafo ny tanana alina; ka nokapohiny nataony mangana aho; nendahin'ireo mpiambina ny manda ny lambako.
8 Miangavy anareo aho, ry zanakavavin'i Jerosalema, raha mahita ny malalako hianareo, ahoana no holazainareo aminy...? - Mararim-pitia aho. -
9 NY ANTOKOM-PIHIRA Inona no ihoaran'ny malalanao nohon'ny malala hafa, ry tsara tarehy indrindra amin'ny vehivavy? Inona no ihoaran'ny malalanao, nohon'ny malala hafa, no dia miangavy anay toy izao hianao?
10 NY AMPAKARINA Ny malalako dia mandina sy menamena, notsongaina tamin'ny iray alina.
11 Volamena madio ny lohany; malefaka hoatra ny sampam-palafa ny volony milantolanto, sady mangilohilo toy ny goaika.
12 Ny masony tahaka ny voromailala amoron-tsakeli-drano, mandro amin'ny ronono, mipetraka amin'ny morona.
13 Ny takolany tahaka ny kisahasahan-kazo mitete dity manitra, sy toritory fambolena hazo manitra: lisy ny molony, izay mitete mira faran'izay madio.
14 Ny tanany dia anjam-bolamena, voaisy vatosoa avy any Tarisisa: ny tratrany taozavatra ivoara kanto indrindra, voaisy safira betsaka.
15 Ny ranjony andry vatosanga, miorina amin'ny faladia volamena madio. Ny tarehiny tahaka an'i Libana, bikana toy ny hazo sedera.
16 Mamy dia mamy ny vavany, ary mahatehotia avokoa ny tenany. Toy izany ny malalako, toy izany ny olon-tiako, ry zanakavavin'i Jerosalema.
Toko faha-6
1 NY ANTOKOM-PIHIRA Lasa nankaiza ny malalanao, ry tsara tarehy indrindra amin'ny vehivavy? Nitodika nankaiza ny malalanao, hiarahanay aminao hitady azy?2 NY AMPAKARINA Lasa nidina any an-tanimboliny ny malalako, dia any an-kisahasahan-kazo mitete dity manitra, hiandry ondry any an-tanimboliny, sy hioty lisy any.
3 An'ny malalako aho, ary ahy ny malalako; miandry ny ondriny any amin'ny lisy izy.
4 NY MPAMPAKATRA Ry malala, tsara tarehy tahaka an'i Tirsa hianao; ary mahafinaritra tahaka an'i Jerosalema, fa mahatahotra tahaka ny antoko miaramila.
5 Avilio tsy hijery ahy ny masonao fa mampitebiteby ny foko. Ny volonao tahaka ny andian'osy miantsampitsampy eny an-kisolasolan-tendrombohitr'i Galaada.
6 Ny nifinao tahaka ny andian'ondry, miakatra avy any amin'ny fampandroana; samy manana anaka kambana; ary tsy misy bada izy ireo na dia iray aza.