Bokin'ny Fahendrena

Toko faha-19

² fa rahefa halefany handeha ny marina, sady hododonany sy hangatahany mafy hiala faingana aza, dia hanenenany indray izany, ka ny hanenjika an'ireo no hataony.

³ Ary tokoa fa mbola tsy tapitra akory ny fisaonana, mbola nigogogogo teo amin'ny fasan'ireo maty izy, dia rafitra nanao hevi-pahadalana hafa indray, ka nenjehiny toy ny mpandositra, ireo efa nitalahoany handeha hiala lavitra.

⁴ Nisy hery tsy azo tohanana nitarika azy ho amin'izany fiafarana izany, ka rariny izany, sady nampanadino azy izay vao nanjo azy mba ho feno lanja ny sazy hefainy, izay mbola tsy ampy tamin'ny fijaliany taloha.

⁵ Ka ny vahoakanao moa, nita soa aman-tsara tamim-boninahitra, izy ireo kosa nahazo fahafatesana hafahafa.

⁶ Satria, niova toetra avokoa ny zava-boahary manontolo, nanaraka ny didy manokana nomena azy, mba ho voatahiry tsy ho azon'ny loza na inona na inona ny zanakao.

⁷ Koa nisy rahona hita nanaloka ny toby tamin'ny alony; niseho teo amin'izay nisy rano taloha, ny tany; nisy làlana malalaka tao amin'ny ranomasina Mena, ary niova ho tanimbolin-java-maitso, ny rano be nisamboaravoara.

⁸ Nandalo teo izy ireo, firenena iray manontolo, voaaron'ny tànanao, nanatri-maso zava-mahagaga, mahatalanjona, toy ny soavaly eny an-tanim-bilona,

⁹ toy ny zanak'ondry mifalihavanja, nankalaza anao izy ireo, ry Tompo, hianao Mpanafaka azy ireo.

¹⁰ Satria mbola tsaroan'izy ireo ny zavatra nitranga, tamin'izy nitoetra tany an-tany hafa: fa ho solon'ny biby hafa, dia moka no foy navoaky ny tany; ary sahona no foy navoaky ny ony, solon'ny hazandrano.

¹¹ Taty aoriana kosa, fampisiam-borona mahatalanjona indray no hitany, raha ilay nentin-kalianana dia nangata-kanina matsiro iny izy ireo;

¹² fa nisy papelika niakatra avy any anilan'ny ranomasina any mba hanafa-diana azy.

¹³ Ary ny sazy nihatra tamin'ny mpanota, nefa tsy diso fambara mialoha dia ny helatra mafy ery. Niaritra fijaliana tandrifin'ny helony, izy ireny.

¹⁴ Fa fankahalana maharikoriko loatra, no nasehony tamin'ny vahiny. Nisy olon-kafa tsy nety nandray olona izay tsy nifankahalala taminy akory; fa izy ireo kosa nampanjary mpanompo ny vahiny izay efa nanisy soa azy.

¹⁵ Mainka indray aza, dia azo heverina ho metimety kokoa ny an'irery voalohany satria nataony ho fahavalo no fihevitra an'ireo vahiny noraisiny;

¹⁶ fa ireto kosa nandray ny vahoakanao, nanaovany andro fifaliana, ka nasandrany hiray fileovana aminy, fa taty aoriana kosa nataony tototry ny fijaliana mangidy izy ireo.

¹⁷ Ka dia namely azy ireo kosa ny fahajambana, toa an-dry zareo nitangorona tamin'ny varavaran'ny marina, nony voasaron'aizina mikitroka izy ireny, ka nikaroka ny fidirana amin'ny varavarana.

¹⁸ Fa niova toetra ny zavatra voahary tahaka ny feo amin'ny psalteriona miova ba, nefa maharitra tsy miova faneno. Izany mety ho hita mazava tamin'ny zava-niseho fahizany.

¹⁹ Ny biby an-tanety nanjary anaty rano; ary ireo milomano lasa an-tanety.

²⁰ Ny afo tonga nanan-kery tao anatin'ny rano mihoatra noho ny heriny andavanandro, ary ny rano namalona ny toetrany mahafaty afo.

²¹ Etsy an-daniny kosa, tsy tratry ny lelafo ny nofon' ny biby malemilemy tafaely manodidina azy, ary tsy nampiempoiny ilay hanina avy an-danitra, izay sahala amin'ny fanala mivongana sy mora miempo toa azy.

²² Nankalaza ny vahoakanao, tamin'ny zavatra rehetra, hianao ry Tompo; nomenao voninahitra izy, fa tsy mba notsiratsirainao; ary novonjenao tamin'ny toerana amam-potoana rehetra.

Bokin'ny Eklesiastika

Toko voalohany

¹ Ny fahendrena rehetra dia avy amin'ny Tompo; ao aminy mandrakizay izy.

² Iza no mahisa ny fasika amin'ny ranomasina, ny fiteten'ny ranonorana, ary ny andro efa lasa?

³ Zovy no mahatakatra ny hahavon'ny lanitra sy ny haben'ny tany, sy ny halalin'ny hantsan'ny fahendrena?

⁴ Voahary talohan'ny zavatra rehetra, ny fahendrena, ary ny fahazavan'ny saina hatramin'ny mandrakizay.

⁵ Ny loharanon'ny fahendrena, dia ny tenin'Andriamanitra any an-tampon'ny lanitra, ary ny làlany, dia ny lalàna mandrakizay.

⁶ Iza no nanambarana ny foto-pahendrena? Zovy no nahalala ny heviny lalina?

⁷ Iza no nilazana sy nanehoana ny fahalalana ny fahendrena, ary zovy no mahazo an-tsaina ny hasarobidin'ny làlany?

⁸ Iray ihany no hendry, hany atahorana indrindra, mipetraka eo amin'ny seza fiandrianany, dia ny Tompo.

⁹ Izy no nahary azy; nahita azy izy ka nampahalala azy;

¹⁰ nandrotsaka azy tamin'ny asany rehetra izy, sy amin'ny nofo rehetra, araka ny ambaratongam-panomezany. Notolorany be izay tia azy.

¹¹ Ny fahatahorana ny Tompo, dia haja amam-boninahitra, ary fifaliana amam-pehiloha firavoravoana.

¹² Ny fahatahorana ny Tompo mampiravoravo ny fo, mampahazo fisariadriaka aman-kafaliana sy andro lava.

¹³ Izay matahotra ny Tompo, hahita soa amin'izany amin'ny farany, ary hahazo sitraka izy, amin'ny andro hahafatesany. Ny fitiavana an'Andriamanitra no fahendrena be voninahitra; omen'Andriamanitra fahendrena izay olona isehoany, mba hahabanjinany azy.

¹⁴ Ny fahatahorana an'Andriamanitra, no fiandohan'ny fahendrena; miara-miforona amin'ny olo-marina, hatrany an-kibon-dreniny izy.

¹⁵ Mamboatra fonenana mandrakizay ho azy, ao amin'ny olombelona izy, ary honina tsy hiala ao amin'ny taranany.

¹⁶ Ny fahendrena feno tanteraka, dia ny matahotra ny Tompo; vokisany ny vokany izay manana azy.

¹⁷ Fenoiny zava-paniry ny tranony rehetra, ary fenoiny ny vokany ny fitoeram-bokany.

¹⁸ Ny fehilohan'ny fahendrena, dia ny fahatahorana ny Tompo; mampandroso fiadanana sy mahavokatra famonjena izy.

¹⁹ Nahita azy ny Tompo, dia namosaka azy, ary samy fanomezan'Andriamanitra izy roa ireo. Mampiboiboika be ny fahalalana sy ny fahazavan'ny saina izy, sy mankalaza ny voninahitr'izay manana azy.

²⁰ Ny foto-pahendrena dia ny fahatahorana ny Tompo, ary ny sampany dia ny andro lava iainana.

²¹ Mandroaka ny fahotana ny fahatahorana ny Tompo, ary mampidify ny hatezerana izay mifikitra aminy.

²² Tsy azo hamarinina ny olona tsy marina sy foìzina, fa mitarika ny famongorana azy ny afonafon'ny hatezerany.

²³ Miandry hatramin'ny fotoana ny olona mandefitra, ka miverina aminy indray ny firavoravoany.

²⁴ Afeniny hatramin'ny fotoana mety ny teniny, ka tantarain'ny olo-mahatoky ny fahamalinany.

²⁵ Ny raki-pahendrena, misy foto-kevi-pahamalinana, fa ny fitiavana an'Andriamanitra kosa, dia fahavetavetana amin'ny mpanota.

²⁶ Maniry fahendrena va hianao? tandremo ary ny didy, dia homen'ny Tompo anao izany.

²⁷ Fa ny fahendrena amam-pahalalana, dia ny fahatahorana ny Tompo; ary ny ankasitrahany, dia ny fahamarinana amam-kalemem-panahy.

²⁸ Aza mandà tsy hanana ny fahatahorana ny Tompo; ary aza fo miefitrefitra no anatonanao azy.

²⁹ Aza mihatsaravelatsihy eo imason'ny olombelona; ary tandremo ny molotrao.