Bokin'ny Eklesiastika
Toko faha-7
20 Aza ratsy fitondra ny mpanompo miasa, mahatoky, na ny mpikarama mahafoy tena hanompo anao.21 Tiavo ny mpanompo manan-tsaina; aza mandà ny mandefa azy.
22 Manana biby fiompy va hianao, kolokoloy izy, ary raha mahasoa anao, andraso ao aminao.
23 Manan-janaka lahy va hianao, ampianaro izy, ary ampanekeo ny zioga izy, hatramin'ny fahazazany.
24 Manan-janaka vavy va hianao, tandremo ny fahadiovany, ary aza manao tarehy mariadriaka aminy hianao.
25 Ampanambadio ny zanakao vavy dia ho afaka amin'ny raharaha lehibe hianao, ary lehilahy manan-tsaina no omeo azy.
26 Manam-bady araka ny fonao va hianao, aza misaotra azy, fa aza manolo-tena ho an'ny vehivavy mifanohitra aminao.
27 Hajao amin'ny fonao rehetra ny rainao; ary aza manadino ny fijalian-dreninao.
28 Tsarovy fa izy ireo no nahatongavanao teto an-tany, ka inona no hamalianao izay nomeny anao?
29 Matahora ny Tompo amin'ny fonao rehetra, ary omeo voninahitra lehibe ny mpisorony.
30 Tiavo amin'ny herinao rehetra ilay nanao anao, ary aza mahafoy ny mpandraharahany.
31 Matahora ny Tompo, ary manajà ny mpisorona; omeo azy ny anjarany, araka ny voadidy hatramin'ny voalohany, dia ny sorona noho ny ota aman-tsoroka fanomezana, ny fanatitra masina amam-boaloham-bokatra.
32 Atsory amin'ny mahantra koa ny tànanao, mba ho feno ny tsodrano azonao.
33 Omeo amin-tarehy tsimitsimina ny velona na iza na iza, ary aza lavinao tsy hasian-tsoa ny maty.
34 Aza diso ny mankeo amin'izay mitomany, ary miaraha ory amin'izay ory.
35 Aza hadinoinao ny fitsaboana marary, fa izany asam-pitiavana izany no hitsaran'Andriamanitra anao.
36 Amin'ny asanao rehetra, tsarovy ny hiafaranao, dia tsy hanota hianao, na oviana na oviana.
Toko faha-8
1 Aza mifanditra amin'ny olona manam-pahefana, fandrao dia latsaka eo an-tanany hianao.2 Aza mifanjihitra amin'ny olona mpanankarena, fandrao ny lanjam-bolany no hoentiny miady aminao; fa efa nahavery olona maro ny volamena, ary efa navaonany mbamin'ny fon'ny mpanjaka aza.
3 Aza mifanditra amin'ny olona basivava, ary aza tohofana kitay ny afony.
4 Aza manao vazivazy amin'ny olona ratsy taiza, fandrao dia afa-baraka ny razanao.
5 Aza mananihany ny olona mivily hiala amin'ny ota; tsarovy fa mendrika hosazina avokoa isika rehetra.
6 Aza maneso olona amin'ny fahanterany; fa ny sasany amintsika, efa miha-antitra ihany koa.
7 Aza mifaly raha misy olona maty, tsarovy fa ho faty avokoa isika.
8 Aza manao tsirambina amin'ny tenin'ny hendry, ary dinidinihonao ny foto-keviny, fa amin'izy ireny no hianaranao ny fahendrena, sy hahaizanao manompo ny lehibe.
9 Aza avela tsy ho henonao ny tenin'ny anti-panahy, fa izy koa dia mba nahare tamin'ny razany; ka amin'izy ireny no hianaranao ny fahendrena, sy hahaizanao mamaly rahefa hilaina izany.
10 Aza mampirehitra ny arin'ny mpanota, fandrao dia levon'ny firedaredan'ny lelafony hianao.
11 Aza mifanandrina amin'ny miavom-bava maneso anao, fandrao amitsahany hianao, iandrasany vava latsaka.
12 Aza mampisambotra an'izay mahery noho hianao, ary raha misy nampisamborinao azy ataovy anisan'ny very.
13 Aza miantoka mihoatra noho izay zakanao; ary raha niantoka hianao manahia ho toy ny handoa.
14 Aza manana ady amin'ny mpitsara, fa noho ny hajany no hanapahan'ny olona ny momba azy.
15 Aza miara-dalana amin'ny olona sahisahy foana, fandrao tonga enta-mavesatra ho anao izy; fa ataony araka ny haitraitrany ny zavatra rehetra. Ka hiara-bery aminy hianao, noho ny hadalany.
16 Aza mifanditra amin'ny olona foizina, ary aza mamaky ny efitra miaraka aminy; fa tsinontsinona eo imasony ny ra latsaka, ka hakapony, lavitry ny vonjy any, hianao.
17 Aza miara-midinika amin'ny adala, fa tsy mahatam-bava izy, na amin'inona na amin'inona.
18 Aza manao zavatra ilaina afenina eo imason'ny vahiny; fa tsy mahalala izay mety hataony hianao.
19 Aza mamboraka ny fonao amin'ny olona rehetra, raha tsy ta-hahazo valy ratsy hianao.
Toko faha-9
1 Aza saro-piaro ny vady mandry eo ampofoanao; ary aza mamoha sain-dratsy hahavoa anao ao am-pony.2 Aza dia mandolotra ny fanahinao amin'ny vadinao, fa hitsanganany hanohitra ny fahefanao izany.
3 Aza mandeha hifanena amin'ny vehivavy janga, fandrao tafalatsaka amin'ny famandrihany hianao.
4 Aza mijanona ela miaraka amin'ny mpirahavavy; fandrao dia voafandriny amin'ny fahaizany hianao.
5 Aza mahari-pijery zazavavy, fandrao hiharan-tsazy noho ny aminy hianao.
6 Aza manolo-tena amin'ny vehivavy janga, fandrao dia very lova hianao.
7 Aza mijerijery atsy amin'ary eny an-dalamben'ny tanana, ary aza misodisody eny amin'ny fitoerany mangingina.
8 Avilio ny masonao tsy ho amin'ny vehivavy bikana, ary aza liam-pijery ny hatsaran-tarehim-behivavy hafa; fa maro no efa sodokan'ny hatsaran-tarehin'ny vehivavy, ka mirehitra ohatra ny afo ny fanirian-dratsiny.
9 Aza miara-mipetraka amim-behivavy manambady, na oviana na oviana; aza mandry ilika hiara-mihinana aminy; aza miara-misotro divay aminy, eo amin'ny fihinanam-be fandrao tafahodina mankaminy ny fonao, ka voatariky ny filan-dratsinao ho amin'ny fahaverezana hianao.
10 Aza mahafoy ny sakaizanao ela, fa tsy mahaleo azy ny vaovao. Na divay vaovao, na sakaiza vaovao, aoka hihantitra vao hosotroinao an-kafaliana.
11 Aza mitsiriritra ny voninahitry ny mpanota, fa tsy fantatrao izay ho faharavany.
12 Aza mankasitraka ny fahafinaretan'ny mpankahala fivavahana, tsarovy fa tsy ho afa-maina izy, hatrany amin'ny seoly.
13 Mitoera lavitry ny olona manam-pahefana hampamono, dia tsy hanan-tahotra ny fahafatesana hianao. Ary raha manatona azy hianao, mitandrema tena amin'ny heloka rehetra, fandrao dia alany ny ainao. Fantaro fa mandeha mamaky ny fandrika hianao, ary mitety eny ambonin'ny nongonongon'ny mandan'ny tanana.
14 Tandremo araka izay azo atao ny namanao, ka maka saina amin'izay hendry.