Bokin'ny Eklesiastika

Toko faha-42

¹⁸ Tsapainy ny halalin'ny ranomasina sy ny fon'ny olombelona; ary fantany ny heviny saro-pantarina indrindra. Fa manana ny fahalalana rehetra ny Tompo; ary hitany ny famantaram-potoana.

¹⁹ Manambara ny lasa sy ny ho avy izy, ary mampiharihary ny dian'ny zava-miafina.

²⁰ Tsy misy hevitra miafina aminy, tsy misy teny takona azy.

²¹ Noravahany ny asa lehiben'ny fahendreny: talohan'ny taona rehetra izy, ary haharitra mandrakizay; tsy nampiana na inona na inona ny tenany, tsy nanesorana na inona na inona, ary tsy nila mpanolo-tsaina na iza na iza izy.

²² Endrey, ny hatsaran-tarehin'ny asany rehetra! ary izay banjinin'ny olona amin'ireny anefa dia kilalaon'afo fotsiny.

²³ Velona daholo ny zavatra rehetra ary maharitra mandrakizay, ho amin'izay rehetra ilàna azy; ary manaiky ny Mpahary ny zavatra rehetra.

²⁴ Mikambana tsiroaroa avy izy, ny iray tandrifin'ny iray, ary tsy nisy nataony mankamin'ny faharavana.

²⁵ Fa ny anankiray dia antoky ny fahasambaran'ny anankiray: iza no mety ho afa-po amin'ny fijerena ny voninahitry ny Tompo?

Toko faha-43

¹ Ny reharehan'ny havoana, dia ny habakabaka amin'ny famirapirany madio; ary ny endriky ny lanitra dia fahitam-boninahitra.

² Ny masoandro, raha mipoaka izy, mankalaza ny Tompo amin'ny fiposahany; zava-boahary mahagaga izy, asan'ny Tompo Avo Indrindra.

³ Mitatao vovonana izy, manamaina ny tany; iza no mahatanty ny firehitry ny hafanany?

⁴ Mamelona ny afon'ny memy ny mpiasa amin'ny asa ataony; fa manafana ny tendrombohitra intelo mihoatra noho izany ny masoandro. Mampirehitra ny entona amin'ny rivotra izy; ary mampanjambena ny maso, rahefa mamirapiratra ny tsirim-pahazavany!

⁵ Lehibe ny Tompo nanao azy, ary didiny no ihazakazahany amin'ny fandehany.

⁶ Ny volana koa, manaraka mandrakariva ny ora voatendry ho azy, ka manondro ny fotoana amin'ny taona, sy manambara ny ho avy.

⁷ Ny volana no famantarana ny fotoanan'ny fety; mihena ny fahazavany, rahefa fenomanana izy.

⁸ Avy aminy no ahazoan'ny volana ny anarany, mahagaga ny fitombony, amin'ny fiovaovany samihafa. Izy no lain'ny toby eny amin'ny havoan'ny lanitra, mamirapiratra eny amin'ny habakabaky ny lanitra izy.

⁹ Ny hatsaran-tarehin'ny lanitra dia ny famirapiratan'ny kintana, haingo mamirapiratra eny amin'ny havoan'ny Tompo.

¹⁰ Maharitra amin'ny filaharany ireny, araka ny didin'ny Masina, ary tsy sasatry ny fiaretany tory izy.

¹¹ Jereo ny avana, ka isaory Ilay nanao azy, fatratra ny hatsaran-tarehiny, amin'ny famirapiratany.

¹² Mandrefy ny lanitra, amin'ny fari-bolany mamirapiratra izy; ny tanan'ny Avo Indrindra no nanenjana azy.

¹³ Noho ny didiny no irotsahan'ny oram-panala, sy mihamateti-pihavy ny hela-baratra, mpanatanteraka ny fitsarany.

¹⁴ Noho izany misokatra ny firaketany, ary manidina toy ny vorona ny rahona.

¹⁵ Noho ny fahefany, dia homeny hery ny rahona, ary milatsaka toy ny sila-bato ny havandra.

¹⁶ Mampihorohoro ny tany ny feon'ny kotrokorana, ary raha miseho izy, dia mihozongozona ny tendrombohitra.

¹⁷ Amin'ny sitrapony no itsofan'ny rivotra avy atsimo, ifofofofoan'ny rivotra avy avaratra sy isafoahan'ny tadio. Mandatsaka oram-panala, toy ny vorona mirotsaka amin'ny tany izy; dia midina toy ny andiam-balala mipetraka izany.

¹⁸ Ka ny maso migaga ny hatsaran'ny hafotsiany, ary ny fo talanjona amin'ny fivarimbariny.

¹⁹ Mandatsaka ny fanala toy ny sira amin'ny tany izy, dia hamafisin'ny hatsiaka, ho toy ny tsilo maranitra izy.

²⁰ Rahefa mifofofofo ny rivotra mangatsiaka avy avaratra, mihamafy ho ranomandry ny rano; ka mivelatra tsy mihetsika manarona ny rano miangona izany ranomandry izany ary manamafy ny rano toy ny akanjo fiarovan-tratra.

²¹ Mandevona ny tendrombohitra sy mandoro ny efitra ny Tompo, ary mandrehitra ny zava-maitso, toy ny afo.

²² Izany loza rehetra izany dia ny rahona tamy faingana no fanafodiny aminy, ny ando tonga no mampionona ny olona amin'ny hafanana mahamay.

²³ Nofolahiny ny hantsana araka ny hevitra nokasainy, ary namboleny eny ny nosy.

²⁴ Tantarain'ireo mandeha ambony ranomasina ny zava-mahatahotra eny, ka talanjona foana isika mandre ny fitantarany azy.

²⁵ Fa ao no misy ny zava-boahary hafahafa sy mahagaga, dia biby isan-karazany, sy karazam-bibiben-dranomasina.

²⁶ Noho ny Tompo no izoran'ny zavatra rehetra tsara ho amin'izay hiafarany, ary ny teniny no aharetan'ny zavatra rehetra.

²⁷ Mahazo milaza be izahay, kanefa tsy hahatakatra azy, fa izao ihany no ventin-teninay: Izy no zavatra rehetra.

²⁸ Raha te-hidera azy izahay dia aiza no hahitanay hery hanaovana izany? Mahefa ny zavatra rehetra izy, ary ambony noho ny asany rehetra.

²⁹ Ny Tompo dia mahatahotra, lehibe indrindra, ary mahagaga ny fahefany.

³⁰ Amin'ny fiderana ny Tompo, ankalazao araka izay azonareo atao izy, fa mbola ambonimbony kokoa mandrakariva. Mba hankalaza azy angony avokoa ny herinareo, ary aza miketraka, fa tsy hahatakatra azy hianareo.

³¹ Iza no nahita azy, ka hahalaza azy? Zovy no afa-midera azy, araka ny tena izy?

³² Mbola betsaka no lehibebe kokoa aza ny zava-mahagaga miafina, satria zava-bitsy foana no hitantsika amin'ny asany.

³³ Ny Tompo no nanao ny zavatra rehetra; ary manome ny fahendrena ho an'ny olona tia vavaka izy.

Toko faha-44

¹ Ataovintsika izao ny fiderana ny olo-malaza, sy ny razan'ny karazantsika.

² Nanao zava-mahagaga be voninahitra amin'izy ireo ny Tompo; naneho ny fahalehibeazany hatramin'ny voalohany izy.

³ Izy ireo dia mpanjaka teo amin'ny fanjakany; lehilahy malaza noho ny fahefany, mpanolo-tsaina feno fahendrena, manambara ny sitrapon'Andriamanitra tamin'ny faminaniany;

⁴ mpitarika ny vahoaka tamin'ny toroheviny amam-pahamalinany, mpampianatra ny vahoaka, nanoro azy tamin'ny teny maneho fahendrena;

⁵ olona nianatra ny fahaiza-mamoron-kira masina, sady nandatsaka an-tsoratra tantara mirindra;

⁶ mpanan-karena, nanam-pananana be, nonina tao an-tranony tamim-piadanana:

⁷ Izany olona rehetra izany dia nohajain'ny niara-belona taminy, samy voninahitry ny fotoana niainany avokoa.

⁸ Ny sasany tamin'izy ireo, namela anarana, ka azo atao ny mitantara ny fiderana azy.

⁹ Ny sasany kosa tsy misy ahatsiarovana azy intsony; fa levona toy ny tsy nisy akory; nanjary toy ny tsy teraka akory, ary toy izany koa ny zanany nanaraka azy.