Bokin'Izaia

Toko voalohany

¹⁶ Misasà hianareo, midiova hianareo, esory ny haratsian'ny asanareo, hiala eo imasoko; mitsahara tsy hanao ratsy,

¹⁷ mianara hanao soa; katsaho ny rariny, anaro ny mpampahory, omeo rariny ny kamboty, arovy ny mpitondratena.

¹⁸ Avia, hiara-mifandahatra isika; Na mangatrakatraka aza ny fahotanareo, hanjary fotsy hoatra ny oram-panala; na mena hoatra ny jaky aza izy, ho tonga toy ny volon'ondry.

¹⁹ Raha manaiky amin'ny fo mazoto hianareo, dia hihinana ny zava-tsoan'ny taninareo.

²⁰ Fa raha manohitra sy miodina kosa hianareo, dia ho levonin'ny sabatra; fa efa niteny ny vavan'ny Tompo.

²¹ Ahoana no nahatongavany ho janga, izy ilay tanàna mahatoky sy feno fahamarinana, izay nonenan'ny fitsarana marina; fa ankehitriny kosa ... mpamono olona no eo!

²² Ny volafotsinao zary tain-drendrika, ny divainao notapohin-drano.

²³ Ny lehibenao mpikomy, sy naman'ny mpangalatra; sady tia fanatitra no fatra-pitady tambitamby avokoa; ny kamboty tsy omeny rariny; ary ny adin'ny mpitondratena, tsy tonga eo anatrehany.

²⁴ Ka noho izany - Teny ton'ny Tompo, Iaveh'ny tafika, ilay Maherin'Israely: - Edrey! hiala fo amin'ny mpandrafy ahy aho, sy hamaly an'ireo fahavaloko.

²⁵ Haninjitra ny tànako aminao aho, ka ny tain-drendrikao hoempoiko toy ny amin'ny sirahazo, ary ny potipoti-pirakao rehetra ho esoriko.

²⁶ Hametrahako mpitsara toy ny tany aloha hianao, mbamin'ny mpanolo-tsaina toy ny tamin'ny andro voalohany. Rahefa izany dia hantsoina hoe tanànan'ny fahamarinana, tanàna mahatoky hianao.

²⁷ Havotana amin'ny hitsiny Siona, ary amin'ny rariny, izay hibebaka ao.

²⁸ Fa ny mpikomy amam-panota kosa, indray torotoroina avokoa; ary izay mahafoy an'ny Tompo, dia ho faty.

²⁹ Fa ho menatra ny terebinta nankamaminareo ary ho menatra ny zaridaina izay nahafinaritra anareo hianareo.

³⁰ Satria ho tahaka ny terebinta nalazo ravina hianareo, ary tahaka ny zaridaina tsy misy rano.

³¹ Ary ny olo-mahery ho tahaka ny rano, ary ny asany ho kilalaon'afo. Ka hiara-mirehitra izy roa tonta, sady tsy hisy olona hamono ny afo.

Toko faha-2

¹ Ny teny hitan'Izaia, zanak'i Amosa momba an'i Jodà sy Jerosalema.

² Izao no ho tonga any amin'ny andro farany; ny tendrombohitry ny tranon'ny Tompo, hatao eo an-tampon'ny tendrombohitra; sy hasandratra ho eo ambonin'ny havoana. Ary ny firenena rehetra hirohotra ho any aminy,

³ ary firenena maro no ho avy sy hilaza hoe: Andeha isika hiakatra any an-tendrombohitry ny Tompo, any an-tranon'ny Andriamanitr'i Jakoba; hampianatra antsika ny làlany izy, ary hizotra amin'ny làlany isika. Fa avy any Siona no hivoahan'ny lalàna, ary avy any Jerosalema no hivoahan'ny tenin'ny Tompo.

⁴ Ho mpanelanelana amin'ny vahoaka izy, ary ho mpitsara ny firenena maro. Ny sabany hotefeny ho lela fangadin'omby, ary ny lefony ho antsy fijinjana. Ny firenena tsy hisy hanangan-tsabatra hamely ny firenena hafa, ary tsy hianatra ady intsony ny olona

⁵ Avia, ry taranak'i Jakoba, ka aoka handeha amin'ny fahazavan'ny Tompo isika.

⁶ Fa efa nandao ny vahoakanao hianao, ry taranak'i Jakoba, satria efa feno tafahoatra hatry ny ela ny helony; manaraka ny fankatoavana toy ny Filistina izy, ary mifandray tànana amin'ny zanaky ny hafa firenena.

⁷ Feno volafotsy sy volamena ny taniny, ary ny rakitra ao aminy tsy misy fetra;

⁸ feno soavaly ny taniny, ka tsy hita isa ny kalesiny. Feno sampy ny taniny, ary miankohoka eo anatrehan'ny asa-tànany izy ireo, dia eo anatrehan'ny zavatra narafitry ny rantsan-tànany.

⁹ Noho izany, haetry ny olona, ary haiva ny olombelona: Eny, tsy hamela ny helony hianao!

¹⁰ Midira ao anaty vatolampy, miere ao anaty vovoka, eo anatrehan'ny tahotra avy amin'ny Tompo sy ny famirapiratan'ny fiandrianany.

¹¹ Ny fiandranandran'ny mason'ny olona, hatanondrika, ary ny avonavon'ny olombelona, haetry, fa Iaveh no hasandratra, dia izy irery ihany, amin'izany andro izany.

¹² Satria hisy andro anankiray ho an'ny Tompo, hamelezany ny fiavonavonana rehetra sy ny fianjonanjonana rehetra, hamelezana izay misandratra rehetra, hanonganany azy:

¹³ hamelezana ny sedera avo sy manerinerina rehetra any Libàna, mbamin'ny oaka rehetra any Basàna;

¹⁴ hamelezana ny tendrombohitra avo rehetra, mbamin'ny havoana manerinerina rehetra;

¹⁵ hamelezana ny tilikambo mijoalajoala rehetra, mbamin'ny manda mafy rehetra;

¹⁶ hamelezana ny sambon'i Tarsisa rehetra, mbamin'izay mahafinaritra ny maso rehetra.

¹⁷ Ny reharehan'ny olona haongana, ary ny avonavon'ny olombelona haetry, fa Iaveh no hasandratra, dia izy irery ihany, amin'izany andro izany.

¹⁸ Ny sampy ho foana avokoa.

¹⁹ Dia hiditra anatin'ny zòma amin'ny vatolampy ny olona, sy anatin'ny zohy amin'ny tany, eo anatrehan'ny tahotra avy amin'ny Tompo, sy ny famirapiratan'ny fiandrianany, rahefa hitsangana hampangovitra ny tany izy.

²⁰ Amin'izany andro izany, dia harian'ny olona ny sampiny volafotsy sy volamena, izay nataony hivavahany, ho an'ny voalavo sy ny ramanavy;

²¹ izy kosa handositra ho any an-dava-bato, sy any an-tsefatsefaky ny haram-bato, eo anatrehan'ny tahotra avy amin'ny Tompo, sy ny famirapiratry ny fiandrianany, rahefa hitsangana hampangovitra ny tany izy.

²² Koa atsaharo ny fitoky amin'olombelona, izay tsy misy afa-tsy fofon'aina kely foana eo am-bavorony; ka hatao ho inona izy?

Toko faha-3

¹ Fa indro ny Tompo, Iavehn'ny tafika, hanesotra amin'i Jerosalema sy Jodà, ny vonjy aman-tohana rehetra,

² ny vonjy rehetra momba ny mofo, ny vonjy rehetra momba ny rano, ny mahery fo mbamin'ny lehilahy mpiady, ny mpitsara, ny mpaminany amam-pimasy, ny loholona,

³ ny kapiteny aman'olom-boalohandohany, mbamin'ny mpanolo-tsaina, ny mpanao taozavatra kinga amin'ny raharahany amam-panao fankatoavana famantsy lahy;

⁴ dia zatovolahy no apetraka ho lehiben'izy ireo, ary ankizy no hanapaka azy.

⁵ Ka hiantoraka hifamely ny lehilahy amin'ny lehilahy ary ny olona samy amin'ny mifanakaiky aminy; hiantoraka hifamely izy ireo, ny tovolahy amin'ny anti-panahy, ary ny olom-poana amin'ny olo-manan-daza indrindra.

⁶ Nony halain'ny rahalahiny ny olona anankiray, ao an-tranon-drainy ilazany hoe: Manan-damba hianao, ka aoka ho lehibenay, ary aoka ho ambany fiambenanao izao faharavana izao!

⁷ Dia hikafankafana izy, amin'izany andro izany, hanao hoe: Tsy te-ho mpanasitrana aho, fa tsy mana-mofo na lamba ao an-tranoko akory, ka aza ataonareo lehiben'ny vahoaka.

⁸ Satria mangozohozo Jerosalema ary mirodana Jodà, noho ny teny aman'asan'izy ireo manohitra an'ny Tompo, mba hihaika ny fijerin'ny fiandrianany.

⁹ Ny toetry ny tarehiny no miampanga azy ireo; mampiharihary ny fahotany, tahaka an'i Sodoma izy, fa tsy miery amin'izany akory. Loza ho an'ireo fa ny tenany no fototry ny fahaverezany.

¹⁰ Lazao amin'ny marina fa sambatra izy, satria hihinana ny vokatry ny asany.

¹¹ Loza ho an'ny ratsy fanahy! fa hidiran-doza izy, fa haverina aminy ny nataon'ny tànany.

¹² Zaza no mampahory ny vahoakako, ary vehivavy no manapaka azy. Ry vahoakako, mampania anao izay mitondra anao, ary mandrava ny làlana tsy maintsy halehanao izy ireo.