Bokin'Izaia

Toko faha-13

¹⁴ Amin'izany ny olona tahaka ny gazela henjehina, tahaka ny biby fiompy tsy misy mpamory, dia samy hitodika ny fireneny avy, sy handositra ho any amin'ny taniny.

¹⁵ Izay hita rehetra ho voagorobaka, izay voasambotra rehetra ho lavon'ny sabatra.

¹⁶ Ny zanany madinika ho montsanina eo imasony, ny tranony hobaboina ary ny vadiny hosavihina.

¹⁷ Indro hatsangako hamely azy ireo ny Meda, izay tsy mandala volafotsy, tsy maniry volamena.

¹⁸ Ny tsipikany handripaka ny zatovo; ny naloaky ny kibo, tsy hananany antra; ny zaza tsy hiantran'ny masony.

¹⁹ Ary Babilona, ilay ravaky ny fanjakana maro, haingon'ny Kaldeana be rehareha, dia hanahaka an'i Sodoma sy Gomora izay noravan'Andriamanitra. Tsy hisy mponina intsony ao aminy,

²⁰ ary tsy honenana intsony amin'ny taona mifandimby izy; ny Arabo tsy hanangan-day eo; ary ny mpiandry biby tsy hametraka biby fiompy am-bala eo.

²¹ Fa ny bibidia eny an'efitra no hanao ny lavany eo, ny vorondolo no hameno ny tranony; ny ostritsa no honina any, ary ny satira no hifalihavanja eo.

²² Ny amboadia no hierona ao an-dapany lao; ary ny alikadia ao an-trano firavoravoany. Efa antomotra ny fotoanany, ary tsy hohalavaina ny androny.

Toko faha-14

¹ Fa Jakoba kosa hiantran'ny Tompo, ary Israely mbola hofidiny; hamponeniny amin'ny taniny indray izy; ny hafa firenena hikambana aminy, sy hiraikitra amin'ny taranak'i Jakoba.

² Ny firenena no haka azy, ka hanatitra azy hody, ary ny taranak'Israely handray azy ireo ho an'ny tenany, ao amin'ny tanin'ny Tompo, ho mpanompolahy amam-panompovavy; dia ho tonga mpamabo izay namabo azy izy, sy hanapaka an'ireo nampahory azy.

³ Ary amin'ny andro hampitsaharan'ny Tompo anao amin'ny fisasarana aman-tebitebinao, sy amin'ny fanompoana mafy nampanaovina anao,

⁴ dia hoventesinao izao hira faniniana izao, ny amin'ny mpanjakan'i Babilona, ka hataonao hoe: Akory ity niafaran'ilay mpanjaka manao jadona, ary nitsaharan'ny fampahoriana?

⁵ Notapatapahan'ny Tompo ny tehin'ny ratsy fanahy, ny tehim-panjakan'ny mpanapaka!

⁶ Nikapoka ny vahoaka tamin-katezerana mafy izy, tamin'ny kapoka tsy an-kijanona; nentin'ny fisafoahany dia nataony ambany jioga ny firenena, tamin'ny fanenjehana tsy misy hiainana.

⁷ Indro miadana ny tany rehetra, mandry fehizay izy, velona ny hobin-kafaliana.

⁸ Ny sipresa aza mifaly amin'ny fahalavoanao mbamin'ny sedera any Libana: Hatrizay nahalavoanao teo izay, tsy misy olona miakatra hikapa anay intsony.

⁹ Taitra ny aminao ny seoly any ambany lalina any, handeha hitsena anao. Fohaziny noho ny aminao ny avelo ny mpanjakan'ny tany rehetra; asainy hitsangana avy eo amin'ny seza fiandrianany avokoa ny mpanjakan'ny firenena rehetra.

¹⁰ Samy miteny izy rehetra, hilaza aminao hoe: Hianao koa miongana toa anay, ka indro hianao tsy misy hafa aminay!

¹¹ Nivarina amin'ny seoly ny reharehanao, mbamin'ny feom-balihanao. Voalafika kankana hianao, ary olitra no irakofanao!

¹² Akory ity hianao no potraka avy any an-danitra, ry kintana mamirapiratra, zanaky ny maraina? Akory ity hianao no mitsingidina amin'ny tany, hianao ilay mpandrava firenena?

¹³ Hianao ilay nanao anakampo hoe: Hiakatra any an-danitra aho; ary ambony mihoatra ny kintan'Andriamanitra no hanandratako ny seza fiandrianako; hipetraka eo ambonin'ny tendrombohitry ny fivoriana, eny amin'ny avaratra avo tsy hita noanoa;

¹⁴ hisondrotra any an-tampon'ny rahona, ary hitovy amin'ny Avo Indrindra!

¹⁵ Kanjo indro hianao latsaka aty amin'ny seoly aty amin'ny hantsana lalina tsy hita noanoa!

¹⁶ Izay mahita anao, mibanjina anao, sady manao tsara jery anao, manao hoe: Io va re izany olona nampitabataba ny tany, nampihozongozona ny fanjakana,

¹⁷ nampanjary efitra an'izao tontolo izao, nandrava ny tanàna, tsy nandefa ny babo hody any aminy?

¹⁸ Ny mpanjaka rehetran'ny firenena, samy mandry amim-boninahitra avokoa, eo an-tranony avy;

¹⁹ fa hianao kosa nariana lavitry ny fasanao, toy ny sampana atao ho tsinontsinona, tototry ny maty novonoina tamin'ny sabatra, sy voavarina any amin'ny sola-baton'ny hantsana manjombona, tahaka ny faty voahosihosy.

²⁰ Tsy mba hiaraka amin'izy ireo eny am-pasana hianao, satria nandevona ny taninao, ary nandringana ny vahoakanao! Tsy hotononina mandrakizay ny taranaky ny ratsy fanahy.

²¹ Manomàna famonoana hamelezana ny taranany, noho ny helok'ireo razany. Aza tafarina intsony hampanaiky ny tany izy ireo, aoka anie ka tsy handrakotra tanàna ny vohon'ny tany izy ireo.

²² Hitsangan-kamaly ireny aho, - teny ton'ny Tompon'ny tafika - ary ho foanako amin'i Babilona avokoa ny anarana sy izay sisa eo, ny taranaka aman-tsolofo, - teny ton'ny Tompo'ny tafika. -

²³ Hataoko fonenan-tsokina, amam-piandronan-drano izy, ary hofafako amin'ny kofafa fandringanana, - teny ton'ny Tompo'ny tafika. -

²⁴ Iaveh'ny tafika nianiana hoe: Eny, ho to izay hevitra efa nokasaina; ary ho tanteraka izay efa notapahako.

²⁵ Hanorotoro an'i Asora amin'ny taniko aho, ary hanosihosy azy eo an-tendrombohitro. Dia ho esorina amin'izy ireo ny jiogany, ary halana eo an-tsorok'izy ireo ny entany.

²⁶ Izany no hevitra raikitra hamelezana ny tany rehetra, ary tànana ahinjitra hamelezana ny firenena rehetra!

²⁷ Fa Iaveh'ny tafika no efa nanapaka izany, ka zovy no hahasakana izany, ary ny tànany efa nahinjiny, ka iza no hamily izany?

²⁸ Tamin'ny taona nahafatesan'i Akaza mpanjaka no nivoahan'izao faminaniana izao.

²⁹ Aza manaram-po amin'ny fifaliana, ry Filistina manontolo, noho ny nahatapahan'ny tsorakazo namely anao; fa hisy menarana hateraky ny tarana-bibilava ary dragona manidina no haterany.

³⁰ Ka amin'izay ny farahidiny hahita hanina; ary ny mahantra handry fahizay. Fa ny tanarakao kosa, hataoko maty mosary; ary izay sisa avy aminao, haringana. -

³¹ Midradradradrà, ry vavahady; miantsoantsoa, ry tanàna; Matahora mafy, ry Filistina manontolo! Fa indro misy setroka tamy avy any avaratra, ary tsy misy miala amin'ny laharany, ny antoko miaramilany.

³² Inona no havaly ireo iraky ny firenena? Izao: Iaveh no nanorina an'i Siona, ka mahita fialofana ao izay ory amin'ny vahoakany.

Toko faha-15

¹ Faminaniana ny amin'i Moaba. Marina tokoa fa ny alina nandrobana azy, dia fongotra Ara-Moaba. Ny alina nandrobana azy, Kira-Moaba dia fongotra.

² Miakatra ho any an-tempolin'i Kamaosy sy any Dibona ny olona, eny amin'ny fitoerana avo mba higogogogo; migogogogo ny amin'i Nebao sy Medeba, i Moaba. Ny loha mibory avokoa; ny somotra voaharatra daholo.

³ Eny an-dàlambe izy ireo mitafy lasaka; eny ambony tafon-trano sy eny an-kianja izy, minaonaona avokoa, mijoy ranomaso daholo.

⁴ Mibabababa Hesebona sy Eleale; re hatrany Jahasy ny feony. Noho izany midradradradra ny mpiadin'i Moaba, mangovitra ny fanahin'izy io.

⁵ Ory an'i Moaba ny foko; efa mby ao Segora sahady ny mpiaro azy, efa ao Eglata-Selisiah. Eny, mitomany izy no miakatra ny fiakarana Lohita; eny amin'ny làlan'i Horonaima, manao antsom-pahoriana ny olona.

⁶ Satria ritra ny ranon'i Nimrima, maina ny ahitra, fongana ny ahi-maitso, tsy misy intsony izay zava-maitso.

⁷ Izay zavatra mba azony noraisina sy izay fitaovany, dia nentiny any an-dafin'ny lohasahan-driaky ny Hazomalahelo.

⁸ Fa efa re eran'ny faritanin'i Moaba ny fitarainana, manako hatrany Eglaima ny finanananany, tonga hatrany Beera-Elima ny finanananany.

⁹ Satria feno ra ny ranon'i Dimona. Fa hampihavy tombon-doza amin'i Dimona aho, hampihavy liona ho amin'izay sisan'i Moaba, dia amin'izay tavela eo amin'ny tany.