Bokin'Izaia
Toko faha-19
16 Amin'izany andro izany Ejipta, hanahaka ny vehivavy; ho tora-kovitra sy ho raiki-tahotra, mahita an'ny Tompon'ny tafika manainga tànana, izay aingainy hamelezana azy.17 Ary ny tanin'i Jodà , hahatahotra mafy an'i Ejipta; hangovitra izy, isaky ny misy olona hampahatsiaro azy izany anarana izany noho ny didin'ny Tompon'ny tafika, izay navoakany hamelezany azy.
18 Amin'izany andro izany hisy tanàna dimy, any amin'ny tany Ejipta, izay hiteny amin'ny fiteny Kanaana sy hianiana hanompo an'ny Tompon'ny tafika; ny iray amin'ireo atao hoe Tanàna-Masoandro.
19 Amin'izany andro izany hisy otely ho an'ny Tompo, eo afovoan'ny tany Ejipta. Ary eo amin'ny sisin-taniny, hisy tsangam-bato ho an'ny Tompo.
20 Ary ho famantarana ho an'ny Tompon'ny tafika izany, sy ho vavolombelona eo amin'ny tany Ejipta; ka rehefa hitaraina amin'ny Tompo izy ireo, noho ny mpampahory azy, dia haniraka mpamonjy izy, sy mpiaro mahery hanafaka azy.
21 Hanao izay hahafantaran'i Ejipta azy Iaveh, ka hahalala an'ny Tompo i Ejipta amin'izany andro izany, hanao sorona amam-panatitra izy ireo, hivoady amin'ny Tompo sy hanefa izany.
22 Hikapoka an'i Ejipta Iaveh, sady hikapoka no hanasitrana! Hibebaka amin'ny Tompo izy ireo, ka hety hionona amin'ny fifonany izy, dia hanasitrana azy.
23 Amin'izany andro izany hisy làlana avy any Ejipta mankany Asiria; ka ny Asiriana ho tonga ao Ejipta, ny Ejipsiana ho any Asiria, dia hanompo an'ny Tompo i Ejipta miaraka amin'i Asora. -
24 Amin'izany andro izany Israely hikambana amin'i Ejipta sy Asiria, izy no ho fahatelony, mba ho fitahiana eo amin'ny tany.
25 Hitahy azy ireo Iavehn'ny tafika hanao hoe: Hotahina anie i Ejipta, vahoakako, sy Asora, asan'ny tànako, ary Israely lovako.
Toko faha-20
1 Tamin'ny taona nahatongavan'i Tartana nirahin'i Sargona mpanjakan'i Asiria tany Azota, sy nanaovany fahirano azy, sy nahafahany azy,2 tamin'izany andro izany niteny Iaveh tamin'ny alalan'Izaia, zanak'i Amosa nanao hoe: Mandehana, borahy ny lasaka manarona ny valahanao, ary esory ny kapa hiala amin'ny tongotrao. Dia nataony izany, ka nandeha tsy nitafy sy tsy nikiraro izy. 3 Ary hoy Iaveh: Toy ny nandehanan'Izaia, mpanompoko, tsy nitafy, tsy nikiraro, fa famantarana amam-pambara mandritra ny telo taona, ho an'i Ejipta sy Etiopia izy, 4 no hitondran'ny mpanjakan'i Asiria ny babo avy any Ejipta; sy ny voasesi-tany avy any Etiopia, na tovolahy, na lahiantitra, tsy mitafy, tsy mikiraro, miseho valahana, ho henatr'i Ejipta.
5 Ka ho rera-po sy hangaihay izy ireo amin'izay, noho ny amin'i Etiopia, nataony hiankinana, sy noho ny amin'i Ejipta, nataony rehareha.
6 Amin'izany andro izany ny mponina eo amoron'ity ranomasina ity hanao hoe: Izao lahy no nanjo an'ilay niankinantsika, ilay noheverintsika mandositra hatonina hitady famonjena ary mba ho afaka, eo an-tanan'ny mpanjakan'i Asiria? Ary isika indray kosa hataontsika ahoana no hahafa-mandositra?
Toko faha-21
1 Faminaniana ny amin'ny efitry ny ranomasina. Tahaka ny firimorimon'ny tadio mihazo any amin'ny atsimo, avy any an'efitra izany, amin'ny tany mahatahotra.2 Misy fahitana mahatsiravina naseho tamiko: ny mpandroba, mandroba; ny mpandrava, mandrava. Iakaro, ry Elama! Hodidino, ry Meda! Hatsahatro ny fisentoana rehetra.
3 Izany no nahafeno tebiteby ny valahako; voan'ny fanaintainana aho, toy ny vehivavy miteraka. Miolanolana aho, mahare izany; tsiravina aho mahita izany;
4 mivadika ny foko, raiki-tahotra aho; ny alina niriko, natao fotoan'ny horohoro ho ahy.
5 Ny latabatra antsangana, ny tily miambina, ny olona mihinana sy misotro. - Mitsangana, hianareo kapiteny! Hosory ny ampinga!
6 Fa izao no nolazain'ny Tompo tamiko: Mandehana mametraka tily, ka aoka holazainy izay hitany.
7 Ary ny ho hitany dia mpitaingin-tsoavaly mpitaingin-tsoavaly mitaingina ampondra, mpitaingin-tsoavaly mitaingin-drameva. Dia hijery amim-pitandremana izy, amim-pitandremana fatratra.
8 Dia niantso toy ny liona izy hoe: Eto amin'ny tilikambo fitiliana no ipetrahako, ry Tompo, tsy an-kijanona tontolo andro mitsangana eto amin'ny fiambenana aho, isan'alina.
9 Indreo tamy ny olona mitaingin-tsoavaly, ny mpitaingin-tsoavaly, milahatra tsiroaroa. Dia niteny indray izy ka nanao hoe: Potraka re! Potraka re Babilona! Ary ny sarin'ireo andriamaniny rehetra nazerany novakiny tamin'ny tany.
10 Ry variko velezina o, voam-barin'ny famoloako, izay reko tamin'ny Tompon'ny tafika, Andriamanitr'Israely, no ambarako aminareo.
11 Faminaniana ny amin'i Domà . Misy miantso ahy avy any Seira manao hoe: Ry tily o, toy inon'alina moa izao? Ry tily o, toy inon'alina moa izao?
12 Dia mamaly ny tily manao hoe: Tonga ny maraina, ary ny alina koa. Raha te-hanontany ahy hianareo, manontania; tongava indray amin'ny fotoana hafa.
13 Faminaniana any Arabia. Any an-tanilemaka foana any Arabia, hianareo no handry, ry andian'i Dedana.
14 Mitondrà rano hitsenana an'izay mangetaheta! Ny mponina amin'ny tanin'i Temà , manatitra mofo ho an'ny mpandositra.
15 Fa izy ireo nandositra teo anatrehan'ny sabatra, teo anatrehan'ny sabatra voatsoaka, teo anatrehan'ny tsipika voahenjana, teo anatrehan'ny ady mahatsiravina.
16 Satria izao no nolazain'ny Tompo tamiko: Herintaona, araka ny fanisana ny taonan'ny mpikarama, sisa dia ho levona avokoa ny voninahitr'i Sedara; ary amin'ireo tsipika maro an'ny lehilahy mahery, zanak'i Sedara, dia kely foana no sisa tavela, fa Iaveh Andriamanitr'Israely no efa niteny.
Toko faha-22
1 Faminaniana ny amin'i Lohasahan'ny fahitana. Maninona ity hianao, no miakatra ambony tafon-trano avokoa,2 Ry tanàna be horakoraka sy feno tabataba, ry vohitra miravoravo? Ny maty eo aminao tsy mba matin-tsabatra, na lavo an'ady.
3 Ny lehibenao indray nandositra avokoa, voasambotra tsy amin-tsipika; ny vahoakanao indray azo avokoa, teny am-pandosirana any lavitra any.
4 Koa niteny aho nanao hoe: Mihodina tsy hijery ahy, aoka hitomany mafy aho! Aza maimay hampionona ahy, noho ny fandringanana ny zanakavavin'ny vahoakako.
5 Fa andron'ny tabataba, fanosihosena, fahaverezan-kevitra ity, ka nalefan'ny Tompo, Iavehn'ny tafika, ho any amin'ny Lohasahan'ny fahitana; ravàna ny manda, misy dradradradra re eny an-tendrombohitra eny.
6 Elama mandray ny tranon-jana-tsipìka, tamy izy mitondra kalesy amam-pitaingin-tsoavaly; ary Kira nanala fono ny ampingany.
7 Feno kalesy ny lohasahanao tsara indrindra; ary mitana fitoerana eo am-bavahadinao, ny mpitaingin-tsoavaly.
8 Nalana tamin'i Jodà ny fisalobonany. Amin'izany andro izany dia manopy maso hianao, mankany amin'ny fitahirizam-piadiana ao an-dapan'ny ala,
9 ary ny banga amin'ny tanànan'i Davida, hitanareo fa betsaka. Novorinareo ny rano amin'ny kamory ambany,
10 nisainareo ny trano ao Jerosalema ary noravanareo ny trano hanamboarana ny manda.
11 Nanao fitahirizan-drano eo anelanelan'ny manda roa hianareo, halehan'ny rano avy amin'ny kamory tranainy. Kanefa Ilay nanao izany tsy nojerenao akory, Ilay nanomana izany hatry ny ela tsy hitanareo akory.
12 Ny Tompo Iavehn'ny tafika, niantso anareo, tamin'izany andro izany, hitomany sy higogogogo, hibory loha sy hisikina lasaka.
13 Kanjo fety amam-piravoravoana no hita; manominda omby ny olona, mamono ondry, mivoky hena sy misotro divay, manao hoe: Aoka hihinana sy hisotro isika, fa ho faty ihany rahampitso.
14 Izao no nambaran'ny Tompon'ny tafika tamiko: Tsy havela izany helokareo izany, mandra-pahafatinareo, hoy ny Tompo Iavehn'ny tafika.
15 Izao no nolazain'ny Tompo, Iavehn'ny tafika: Mandehana manatona an'io mpitandrina io, dia Sobnà, lehiben'ny ao an-dapa, ka lazao aminy hoe:
16 Ary inon'ny atý sy inonao no atý, no mihady fasana eto hianao; mihady fasana ho anao eny amin'ny toerana avo hianao; mandoaka fonenana ho anao amin'ny vatolampy hianao?
17 Indro Iaveh hanipy anao amin'ny sandry mahery;
18 hanasangodina anao, hanakodiadia anao mafy, hikodiavanao hoatry ny baolina, eny amin'ny tany lemaka midadasika be. Dia ho faty any hianao, ho any koa ny kalesy kantonao, ry ilay henatry ny ankohonan'ny tompony ity.