Bokin'Izaia
Toko faha-22
19 Horoahiko hiala eo amin'ny fitoeranao hianao, haongan'ny Tompo amin'ny raharahanao hianao.20 Ary iza no hitranga amin'izany andro izany: Hiantso ny mpanompoko aho, dia Eliasima zanak'i Helkiasa,
21 ka hampiakanjoiko azy ny akanjo vitinao, hampanaoviko azy ny samboadinao; hapetrako eo am-pelatanany ny fahefanao; dia ho tonga ray izy amin'ny mponina ao Jerosalema, sy amin'ny taranak'i Joda.
22 Hapetrako eo an-tsorony ny fanalahidin'ny tranon'i Davida, ka hamoha izy, tsy hisy handrindrina; handrindrina izy, tsy hisy hamoha.
23 Hatsatoko toy ny fantsika amin'ny fitoerana mafy izy, ka hanjary sezam-boninahitra ho an'ny ankohonan-drainy.
24 Hahantona aminy avokoa ny voninahitra rehetra amin'ny fianakavian-drainy, dia ny zanaka aman-jafy, ny fanaka madinika rehetra, hatramin'ny kopy ka hatramin'ny sinibe.
25 Amin'izany andro izany - teny ton'ny Tompon'ny tafika, - hotsoahana ilay fantsika natsatoka amin'ny fitoerana mafy; hombotana izy ka hianjera, dia ho levona ny entana nahantona taminy; fa efa niteny Iaveh.
Toko faha-23
1 Faminaniana ny amin'i Tira. Migogogogo, ry sambon'i Tarsisa, fa rava izy! Tsy misy trano intsony, tsy misy hidirana intsony! Avy any amin'ny tany Setima, no nandrenesany an'izany.2 Aoka hitanaka, hianareo mponina amoron-tsiraka, rakotry ny mpandranto avy any Sidona, izay mitety ranomasina.
3 Mamakivaky ny ranobe ny vary avy any Nila, ny vokatry ny ony, niditra ho hareny, tsenan'ny firenena izy.
4 Aoka ho safotry ny henatra hianao, ry Sidona, fa efa niteny ny ranomasina, ny trano mimanda eo amin'ny ranomasina, nanao hoe: Tsy mba nihetsi-jaza aho na niteraka, tsy mba namelona zatovo aho, na nitaiza virjiny.
5 Rahefa handre izany vaovao izany Ejipta dia ho raiki-tahotra mandre ny naharavan'i Tira.
6 Mita ho any Tarsisa hianareo, ka migogogogoa, ry mponina amoron-tsiraka!
7 Ity va no renivohitrareo falifaly, izay efa hatramin'ny andro fahagola ny fiandohany, sy izay nentin'ny tongony lasa lavitra hitoetra any.
8 Iza no nandidy izany, hamelezana an'i Tira izay nanome satro-boninahitra; ary ny mpandrantony dia andriandahy, ary ny mpivarotra avy aminy olo-malaza amin'ny tany?
9 Iavehn'ny tafika no nandidy izany mba hanamatroka ny voninahitr'izay rehetra mamirapiratra, mba hanetry ny olo-malaza rehetra amin'ny tany.
10 Mieleza amin'ny taninao, tahaka an'i Nila, ry zazakavavin'i Tarsisa, fa tsy manam-pehin-kibo intsony hianao.
11 Iaveh efa naninjitra ny tànany amin'ny ranomasina, nampihorohoro ny fanjakana; nanao didy hamelezany an'i Kanaana, dia ny handravana ny tanànany mimanda.
12 Ary hoy izy: Tsy hanao fifaliana intsony hianao, ry virjiny afa-baraka, zanakavavin'i Sidona! Mitsangàna, mità ho any Setima; na any aza anefa, tsy hisy fitsaharana ho anao.
13 Jereo ny tanin'ny Kaldeana, firenena mbola tsy nisy, izay nanolotra an'i Asora ho an'ny bibidia any an'efitra; nanangana ny tilikambony izy, nandrava ny lapany, nataony korontan-javatra miavovona sisa teo!
14 Migogogogoa, ry Tarsisa, fa rava ny tanàna mimanda.
15 Amin'izany Tira dia hohadinoina fitopolo taona, araka ny halavan'ny andron'ny mpanjaka iray. Ary rahefa afaka fitopolo taona ny hanjo an'i Tira dia arak'ilay tononkiran'ny vehivavy janga hoe:
16 Raiso ny lokanganao, mandehana manodidina ny tanàna, ry kala janga hadino; mitendre amim-pahaizana, hamaroy ny hiranao, mba hahatsiarovan'ny olona anao.
17 Ary rahefa afaka fitopolo taona, dia izao no zavatra hitranga: Hamangy an'i Tira Iaveh, ka handray ny tambiny indray izy, dia hitolo-tena amin'ny fanjakana rehetra eto an-tany, manerana an'izao tontolo izao.
18 Ary hatokana ho an'ny Tompo ny tombom-barony sy ny tanginy, fa tsy hangonina hiavosa na hotehirizina; satria ny azony dia ho an'ireo monina eo anatrehan'ny Tompo, hohaniny sy hivokisany ary hihaingoany fatratra.
Toko faha-24
1 Indro Iaveh handrava ny tany manontolo sy hanavitsy ny mponina aminy, ny vohon'ny tany hakorokorony; ary ny mponina haeliny.2 Ary ho sahala ihany no hanjo ny mpisorona sy ny vahoaka, ny tompo sy ny mpanompo, ny tompovavy sy ny andevovavy, ny mpivarotra sy ny mpividy, ny mpisambotra sy ny mpampisambotra.
3 Hosimbana sy hatolotra horobaina, ny tany, fa izany no teny notononin'ny Tompo.
4 Ny tany misaona sy majifa; izao tontolo izao, milofika sy majifa; ny nalaza indrindra amin'ny mponina eto an-tany milofika.
5 Voaloton'ny mponina aminy, ny tany, satria izy ireo nandika ny lalàna, nivadika tamin'ny didy, nandrava ny fanekena mandrakizay.
6 Noho izany ny tany levon'ny ozona; ny mponina aminy, mivesatra ny valin'ny helony: ka dia levona ny mponina amin'ny tany, fa vitsy ny isan'ny olona tavela.
7 Ny ranom-boaloboka misaona; ny fotony milofika; ireo nifaly am-po rehetra misento.
8 Nitsahatra ny feon'ampongatapaka falifaly, tapaka ny fety be horakoraka, nitsahatra ny feon-dokanga falifaly.
9 Tsy misy misotro divay intsony, ny olona eo am-pihainoan-kira; ary mangidy amin'ny mpisotro azy, ny fisotro mahamamo.
10 Rava ny tanàna fikorontanana; mirindrina tsy azo idirana, ny trano rehetra.
11 Mihorakoraka eny an-dàlambe ny olona, fa tsy misy ny divay; lasa tsy eo intsony ny hafaliana rehetra; foana niala tamin'ny tany ny firavoravoana.
12 Korontan-javatra foana sisa, eo an-tanàna; ary ny vavahady montsamontsana dia efa ravarava.
13 Fa ny hanjo ny eo afovoan'ny tany eo amin'ny firenena, dia tahaka ny amin'ny fikapohana oliva, tahaka ny amin'ny fitsimponam-boaloboka, aorian'ny fiotazana azy.
14 Izy ireo manandratra ny feony, dia mihira; mihoby, eny amin'ny ranomasina, ny voninahitry ny Tompo hoe:
15 Miderà an'ny Tompo, hianareo, any amin'ny tany atsinanana, dia ny anaran'ny Tompo, Andriamanitr'Israely, any amin'ny nosy any andrefana. -
16 Renay avy hatrany am-paran'ny tany, ny hira hoe: Voninahitra ho an'ny marina! - Fa hoy aho: Maty aho! Maty aho, loza ho ahy! Ny mpandroba mandroba, ny mpandroba mandroba tsy anerany!
17 Fampitahorana sy longoa amam-pandrika no mahazo anao, ry mponina amin'ny tany.
18 Izay mandositra noho ny antso mampatahotra ho latsaka an-davaka, ary izay miakatra avy ao afovoan'ny longoa ho voan'ny fandrika. Fa ny vavahadin-drano ambony, mivoha; ary ny fanorenan'ny tany, mihozongozona.
19 Mitresaka mafy dia mafy ny tany; mipoaka mikotrokotroka ny tany; mihozongozona mafy ny tany;
20 mivembena, hoatra ny olona mamo ny tany; mitsingevaeva, toy ny fandriana mihantona izy; mitambesatra aminy ny tsy fahamarinany; mirodana tsy ho tafarina intsony izy.
21 Amin'izany andro izany Iaveh hisava any ambony ny tafika any ambony, ary ety an-tany ny mpanjakan'ny tany.
22 Dia hatambatra efa voababo eny amin'ny hantsana sy hohidiana ao an-tranomaizina izy ireo, ka afaka andro maro be, vao hovangiana indray izy.
23 Ary ny volana hihamena, ny masoandro hivaloarika, fa Iavehn'ny tafika hanjaka ao an-tendrombohitra Siona sy ao Jerosalema, ary ny voninahitra hamirapiratra eo anatrehan'ny loholony.
Toko faha-25
1 Tompo o, Andriamanitro hianao; hankalaza anao aho, hidera ny anaranao aho, fa efa nanao zava-mahagaga hianao; mahatoky sy maharitra ny fikasanao vita ela.2 Fa ny tanàna nataonao zary korontam-bato, ary ny tanàna mimanda, nataonao zava-drava, ny trano mimandan'ny baribariana, tsy mba tanàna intsony, sady tsy hatsangana mandrakizay.