Bokin'Izaia

Toko faha-30

⁵ Mangaihay avokoa izy noho izany firenena izany tsy hahefa na inona na inona aminy, tsy hahazoany vonjy na fanampiana fa henatra sy fahafaham-baraka foana ihany.

⁶ Faminaniana ny amin'ireo bibin'ny negeba: Izy ireo mamakivaky ny tany mampahory sy mampitebiteby, izay ivoahan'ny liona aman-dionavavy, ny menarana sy ny dragona manidina, mitondra ny hareny eny an-damosin'ny ampondra, sy ny rakiny eo amin'ny trafon'ny rameva, ho an'ny firenena tsy mahefa na inona na inona.

⁷ Ho zava-poana sy tsinontsinona ny vonjin'i Ejipta; izany no iantsoako azy hoe: Ilay be rehaka mipetra-poana.

⁸ Koa ankehitriny mandehana soraty eo anatrehany amin'ny fafana izany, ary ataovy an-tsoratra ao anatin'ny boky, hany ka amin'ny andro ho avy dia ho vavolombelona mandrakizay izany.

⁹ Satria izy dia firenam-pikomiana zanaka miodina, zanaka mandà, tsy mihaino ny làlan'ny Tompo.

¹⁰ Izy ireo manao amin'ny mpahita hoe: Aza mahita; sy amin'ny mpaminany hoe: Aza maminany ny zava-marina aminay, fa zava-mahafinaritra no lazao aminay; hevi-dravina no vinanio.

¹¹ Mialà amin'ny làlana, ivilio ny làlana, esory eo imasonay, ilay Masin'Israely!

¹² Noho izany, izao no lazain'ilay Masin'Israely: Noho hianareo manamavo izany teny izany, sy mitoky amin'ny fanaovana an-keriny amam-pitaka, sady manao izany ho fiankinanareo,

¹³ noho izany, io heloka io ho anareo, dia ho toy ny mivava efa mila hampianjera sy efa mandomba eo amin'ny rindrina avo, izay mirodana tampoka, indray mihelina monja.

¹⁴ Ka dia ho montsamontsana hoatra ny fahamontsanan'ny vilany tany izy, izay vakivakin'ny olona tsy itondrany roa, ary ny vakiny tsy hahitana silany akory mba hakana afo ao am-patana na hanovozan-drano ao an-dobo.

¹⁵ Fa izao no nolazain'ny Tompo Tompo, ilay Masin'Israely: ny fibebahana sy ny fiandrasana amim-piadanana no hahavoavonjy anareo; ao amin'ny fitsaharana amam-pahatokiana no herinareo.

¹⁶ Nefa tsy nety hianareo, fa hoy hianareo: Tsia, fa handositra mitaingin-tsoavaly izahay. - Eny hoe, handositra hianareo. - Himaona mitaingina ny soavaly faingan-tongotra izahay. Eny iky, fa ho faingana kokoa izay hanenjika anareo.

¹⁷ Raha iray no handrahona, dia arivo no handositra; ary raha dimy no handrahona, handositra avokoa hianareo. Mandra-pahatonganareo ho kely sisa, tahaka ny tsato-kazo eny an-tampon'ny tendrombohitra, na ny faneva famantarana eny an-kavoana.

¹⁸ Izany no iandrasan'ny Tompo vao hamindra fo aminareo izy, dia hitsangana, ka hiantra anareo; satria Andriamanitra marina Iaveh. Sambatra izay rehetra manantena azy!

¹⁹ Fa hianao, ry vahoaka monina ao Siona, ao Jerosalema, tsy hitomany intsony hianao, fa raha vao mitaraina hianao dia hamindrany fo; raha vao mandre anao izy dia hamaly anao.

²⁰ Homen'ny Tompo anareo, ny hanim-piahiahiana mafy sy ny ranom-pahoriana; ary tsy hiery intsony izay mampianatra anao, ary hahita maso an'izay mampianatra anao hianao.

²¹ Ary handre sofina ny feo hilaza ao ivohonao hoe: - Ity no làlana, ka ombao io! - dia raha hianareo hivily na ho an-kavanana na ho an-kavia.

²² Hataonareo ho zava-maloto, ny volafotsy mipetaka amin'ny sampinareo; mbamin'ny volamena mipetaka amin'ny sariolonareo: ka harianareo hoatra ny zava-maloto: Mialà eto hoy hianareo aminy.

²³ Ny Tompo handefa ny ranonorany amin'ny voa nafafinao amin'ny tany, ary ny tany hahavokatra mofo, tsara tokoa sady betsaka; amin'izany andro izany ny biby fiompinareo hihinana eny amin'ny tany fiandrasana malalaka:

²⁴ ary ny omby aman'ampondra miasa ny tany, hihinam-bilom-bary matsiro, voakororoka tamin'ny lapela aman-tsahafa.

²⁵ Eny an-tendrombohitra avo rehetra, eny an-kavoana avo rehetra hisy sakeli-drano aman-dranovelona, amin'ny andro famonoam-be, sy hianjeran'ny tilikambo.

²⁶ Ny hazavan'ny volana ho tahaka ny hazavan'ny masoandro; ary ny hazavan'ny masoandro ho avo fitoheny, ho tahaka ny hazavan'ny hafitoana, amin'ny andro hamehezan'ny Tompo ny ratran'ny vahoakany, sy hanasitranany ny fery namelezany azy.

²⁷ Indro avy any lavitra any ny anaran'ny Tompo, mahamay ny hatezerany, ka tsy tanty ny fahamainy; midoaka fisafoahana ny molony; ary tahaka ny afo mandevona ny lelany.

²⁸ Tahaka ny riaka manafotra ny fofon'ainy; manafotra havozona, hanasivanany ny firenena amin'ny sivana fandravana, sy hanisiany lamboridy mampivily làlana eo amin'ny valanoranon'ny olona.

²⁹ Amin'izany hianareo hiventy hira, tahaka ny amin'ny alina ankalazana ny fety, ary ny fonareo hiravoravo tahaka an'izay miakatra amin'ny feon-tsodina, ho ao an-tendrombohitry ny Tompo hanatona ny vatolampin'Israely.

³⁰ Iaveh hampiriadritra ny feony miezinezina, ary hampiseho ny fiantefan'ny sandriny, amin'ny firehitry ny hatezerany aman-delafo mandevona; amin'ny tafio-drivotra aman-dranonoram-baratra sy vato havandra.

³¹ Dia hangovitra Asora amin'ny feon'ny Tompo; hikapoka amin'ny tsorakazony izy,

³² ka isaky ny miantefa ny tsorakazo tsy diso hampidinin'ny Tompo aminy, dia hatao mitatatata ny ampongatapaka aman-dokanga, ary hiady aminy, sady hamely mafy azy izy.

³³ Fa efa voaomana hatramin'ny ela Tofeta; io koa dia efa voaomana ho an'ny mpanjaka. Nataon'ny Tompo malalaka sady lalina izy; misy afo aman-kitay betsaka eo ambonin'ny antontan'kitainy; ny fofon'ain'ny Tompo tahaka ny riaka solifara, no mampirehitra azy.

Toko faha-31

¹ Loza ho an'ireo izay midina hitady vonjy any Ejipta; miantehitra amin'ny soavaly, ary mitoky amin'ny kalesy, noho ny hamaroan'ireny, sy amin'ny mpitaingin-tsoavaly, noho izy matanjaka; nefa ilay Masin'Israely tsy mba andrandrainy; ary Iaveh tsy tadiaviny.

² Izy anefa dia hendry; mahatonga loza, tsy mitsoa-teny, hitsangan-kamely ny ankohonan'ny ratsy fanahy, ary handà ny fanampiana avy amin'izay manao ny tsy marina.

³ Ny Ejipsiana dia olombelona ihany, fa tsy Andriamanitra; ny soavaliny dia nofo, fa tsy fanahy; dia haninji-tànana Iaveh, ka ho tafintohina izay manampy, ho potraka izay hampiana, ary hiara-devona avokoa izy roa tonta.

⁴ Fa izao no nolazain'ny Tompo tamiko: Toy ny fieronan'ny liona sy ny liona tanora amin'ny rembiny, raha mivory hanohitra azy ny mpiandry ondry maro be, ka tsy resin-tahotra izay horakorak'izy ireo, na manahy izay hamaroany akory; toy izany koa no hidinan'ny Tompon'ny tafika mba hiady, eo an-tendrombohitra Siona sy eo amin'ny havoany.

⁵ Tahaka ny vorona mamelatr'elatra hanomba ny zanany, no hiarovan'ny Tompon'ny tafika an'i Jerosalema; hiaro izy sy hamonjy, ary handalo sy hanafaka.

⁶ Koa miverena re ho amin'ilay efa nihatahanareo fatratra, ry zanak'Israely.

⁷ Fa amin'izany andro izany ny olona, samy hanary ny sampy volafotsy aman-tsampy volamenany avy izay nataon'ny tànanareo hanotana.

⁸ Ary Asora ho lavon-tsabatra, nefa tsy sabatr'olombelona; sabatra izay tsy sabatr'olombelona no handevonana azy; handositra eo anoloan'ny sabatra izy, ary ny zatovony hampandoavina hetra.

⁹ Ny vatolampiny handositra aman-tahotra; ary ny andriandahiny mangovitra handao ny faneva, - teny ton'ny Tompo - izay manana ny afony ao Siona, sy ny fatam-pandoroany ao Jerosalema.

Toko faha-32

¹ Indro misy mpanjaka hanjaka araka ny rariny; ary ny mpanapaka hitondra araka ny hitsiny.

² Ka izy ireo dia samy ho fiarovana amin'ny rivotra; ho fialofana amin'ny ranonoram-baratra; tahaka ny ranovelona eo amin'ny tany karankaina; tahaka ny alo-batolampy eo amin'ny tany foana.

³ Ny mason'ny mahiratra tsy hajambaina intsony, ny sofin'ny malady, hihaino tsara,

⁴ ny fon'ny maivan-doha, halaky mahazo an-tsaina; ny lelan'ny mikodedidedika, hahay miteny mazava.

⁵ Ny adala tsy mba antsoina hoe andriana intsony; ary ny mpihatsaravelatsihy, tsy ho lazaina hoe mahery fo intsony.

⁶ Satria ny adala miteniteny foana, ary ny ratsy no imasoan'ny fony, mba hanaovany zavatra mifanohitra amin'ny fivavahana; sy hanononany teny diso manohitra an'ny Tompo, mba hamelany ny fanahin'ny noana hilendalenda fotsiny eo, sy hanesorany ny fisotro eny amin'izay mangetaheta.

⁷ Ny fiadian'ny mpamitaka dia enti-mamadika, mamoron-tsain-dratsy izy io, hamerezany amin'ny lainga ny olona iva toetra, ary ny mahantra koa, na dia izay milaza zavatra ara-drariny aza.

⁸ Fa ny andriana manan-kevitra mendrik'andriana, sy hitsangan-kanao asa mendrik'andriana.

⁹ Ry vehivavy tsy manahy, mitsangàna, mihainoa ny feoko! Ry zazavavy tsy manahy, mampandria sofina aminy teniko.

¹⁰ Raha afaka herintaona mahery andro vitsy, dia hangovitra hianareo tsy manahy, fa ny fiotazam-boaloboka tsy hisy; ny fanangonam-boa tsy hatao.

¹¹ Manàna vadi-po, ry kala mitsilamodamoka! mangovita, ry kala tsy manahy. Esory ny fitafianareo sarobidy, mialà akanjo, misikina lasaka.

¹² Migogogogo ny olona mandondon-tratra ny amin'ny saha mahafinaritra, ny amin'ny tanim-boaloboka mahavokatra!