Bokin'Izaia

Toko faha-45

¹² Izaho no nanao ny tany, sy nahary ny olona eo amboniny; izaho no namelatra ny lanitra tamin'ny tànako, izaho no mandidy ny tafika rehetra eo aminy.

¹³ Izaho no nanangana azy io, tamin'ny fahamarinako, ka mandravona ny làlany rehetra; Izy no hanangana ny tanànako indray, sy hampody ny oloko voababo, tsy amin'avotra na fanatitra, hoy Iavehn'ny tafika.

¹⁴ Izao no lazain'ny Tompo: Ny vokatra azon'i Ejipta, ny tombony azon'i Etiopia, sy ny Sabeana olona lava tsanganana, dia samy ho tonga ao aminao sy ho anao, fa izy ireo dia hanaraka anao; ho tonga am-patorana sy hiankohoka eo anatrehanao, ary hifompòna aminao, hanao hoe: Tsy misy Andriamanitra afa-tsy ato aminao, ka tsy misy hafa. Tsy misy Andriamanitra hafa iray akory!

¹⁵ Marina tokoa fa Andriamanitra miafina hianao, ry Andriamanitr'Israely mpamonjy ô!

¹⁶ Menatra sy mangaihay avokoa izy rehetra, lasa mandeha amin-kenatra ny mpanao sampy.

¹⁷ Fa Israely kosa novonjen'ny Tompo amin'ny famonjena mandrakizay; tsy ho menatra na hangaihay intsony hianareo, amin'ny taona ho avy.

¹⁸ Fa izao no lazain'ny Tompo, izay nahary ny lanitra, izy dia ilay Andriamanitra namorona ny tany, sy nahavita ary nampiorina azy, ka tsy nataony ho zava-mifanjevo foana, fa nataony ho fonenana: Izaho no Iaveh, ary tsy misy hafa!

¹⁹ Tsy niteny tao amin'ny mangingina aho, tao amin'ny toerana maizimaizina amin'ny tany. Tsy nilaza tamin'ny taranak'i Jakoba aho nanao hoe: Aoka hitady ahy foana anie hianareo! Fa izaho Iaveh dia milaza ny marina, manambara ny fahamarinana.

²⁰ Mivoria hianareo, ka avia, miaraha manatona, ry sisan'ny firenena izay afaka. Tsy mahalala na inona na inona izay mitondra ny sampi-hazony, sy miantso izay andriamanitra tsy mba mamonjy.

²¹ Antsoy izy ireo; asaovy manatona izy; ary aoka hiara-misaina avokoa izy! Iza no efa nilaza izany zavatra izany hatramin'ny voalohany, sy nanambara izany hatramin'ny ela? Tsy izaho Iaveh va? Ary tsy misy Andriamanitra afa-tsy izaho; Izaho no Andriamanitra marina, ary tsy misy mpamonjy afa-tsy izaho.

²² Mitodiha atý amiko, dia hovonjena hianareo, hianareo rehetra mponina amin'ny tany, fa izaho no Andriamanitra, ary tsy misy hafa.

²³ Efa nianiana tamin'ny tenako aho; ny marina no aloaky ny vavako, dia ny teny iray, izay tsy hofoanana: Ny lohalika rehetra handohalika amiko, ary ny lela rehetra hianiana amiko.

²⁴ Izao no hilazan'ny olona ahy: Amin'ny Tompo irery no mitoetra ny fahamarinana sy ny hery! Hanatona azy ny olona; fa ho menatra kosa izay rehetra tezitra taminy.

²⁵ Hohamarinina sy homem-boninahitra ao amin'ny Tompo avokoa, ny taranak'Israely rehetra.

Toko faha-46

¹ Mirodana Bela, miletsy Nebao; ataingina eo ambony biby, eo ambony biby mpitondra entana ny sariny. Ireo sampy izay nentinareo dia ataingina toy ny entana mavesatra, eo ambony biby sasatra.

² Miletsy izy ireo, miara-mirodana izy; tsy nahavonjy ny entana izy; lasan-ko babo mbamin'ny tenany aza.

³ Mihainoa ahy, ry taranak'i Jakoba, mbaminareo sisa rehetra amin'ny taranak'Israely; hianareo izay nataoko an-tsangory hatry ny fony vao teraka, nentiko hatreny an-kibon-dreninareo.

⁴ Tsy hiova aho hatramin'ny fahanteranareo, fa hanohana anareo mandra-pahafotsivolo anareo. Efa nanao izany aho, ka mbola hitondra anareo; hanohana anareo sy hanafaka anareo.

⁵ Hampitahainareo amin'iza aho, ary hataonareo sahala amin'iza? Hampitahafinareo amin'iza aho ka hitovy izahay?

⁶ Izy ireo dia maka volamena ao an-kitapony, mandanja volafotsy amin'ny mizana, ary manakarama mpanao anidina, hanao andriamanitra amin'izany, dia miankohoka sy mivavaka.

⁷ Lanjainy io, tohanany, dia lasa izy ireo mametraka azy eo amin'ny fitoerany; ka mitsatoka eo, tsy mihetsika amin'ny fitoerany izy. Na dia misy miantso azy aza tsy mamaly izy, na mahavonjy olona ho afaka amin'ny fahoriany.

⁸ Mihevera izany, ary misehoa ho lehilahy; ampoizo izany, ry mpiodina;

⁹ tsarovinareo ny zavatra lasa, tamin'ny andro taloha. Eny, izaho dia Andriamanitra, ary tsy misy hafa.

¹⁰ Andriamanitra aho, ary tsy misy mitovy amiko, izaho no manambara ny farany, hatramin'ny voalohany, sy ny mbola tsy eo akory, hatrarý aloha ela; izaho izay manao hoe: Ho tò ny fikasako, ary hefaiko ny sitra-poko rehetra;

¹¹ izay miantso ilay voromahery avy any Atsinanana, dia ilay lehilahy araka ny hevitro avy any an-tany lavitra. Efa niteny aho, ka hanatanteraka! Efa nikasa aho, ka hanefa izany!

¹² Mihainoa ahy, hianareo olona madi-po, izay lavitry ny fahamarinana.

¹³ Ampanakekeziko ny fahamarinako, ka tsy lavitra izy; ary ny famonjeko tsy ho ela; hanome famonjena an'i Siona aho, sy ny voninahitro ho an'Israely.

Toko faha-47

¹ Midìna, mipetraha amin'ny vovoka, ry virjiny, zanakavavin'i Babilona; mipetraha amin'ny tany, fa tsy amin'ny seza fiandrianana, ry zanakavavin'ny Kaldeana; fa hianao tsy hantsoina intsony hoe: ikala kiankianina, ikala miangentsana.

² Alao ny vato fikosoham-bary, ka totoy ny lafarina. Esory ny voalinao; akaro ny morotongotr'akanjonao, asehoy ny ranjonao, fa hita ny ony.

³ Aoka hiharihary ny fitanjahanao, aoka ho hita ny fahamenaranao! Fa hamaly faty aho, ka tsy misy olona hananako antra. -

⁴ Ny anaran'ny Mpanavotra antsika dia Iavehn'ny tafika, ilay Masin'Israely! -

⁵ Mipetraha tsy miteny, midira ao amin'ny maizina, ry zanakavavin'ny Kaldeana; fa hianao tsy hantsoina intsony hoe: ilay tompovavin'ny fanjakana.

⁶ Efa tezitra tamin'ny vahoakako aho, ka navelako hozimbaina ny lovako, dia natolotro ho eo an-tànanao izy. Tsy nanananao antra izy; nasianao jioga mavesatra mbamin'ny antitra.

⁷ Ary hoy hianao: Tompovavy ho amin'ny mandrakizay aho! ka dia tsy mba nandinika izany akory hianao, na mba nitsapa izay hiafaran'izany rehetra izany.

⁸ Fa ankehitriny, mihainoa, ry ilay nihantahanta, izay nipetraka tsy nanana ahiahy akory, sy nilaza tao am-ponao hoe: Izaho ity, dia izaho irery ihany! tsy ho mpitondratena na oviana na oviana aho, na hofoanana anaka!

⁹ Kanjo ireo zava-droa ireo ho indray mianjera aminao, tampoka, indray andro monja, dia ny fahafoanana anaka, sy ny fananoan-tena, ho tonga aminao tanteraka an-tsakany sy an-davany izany, na dia eo aza ny hamaroan'ny odinao, na dia eo aza ny herin'ny fankatoavanao.

¹⁰ Fa nitoky tamin'ny hafetsenao ratsy hianao, nanao hoe: Tsy misy mahita ahy! Ny fahendrena amam-pahaizanao, dia izany no nanodoka anao raha hianao nanao anakampo hoe: Izaho ity, dia izaho irery ihany!

¹¹ Indro, ho tonga aminao ny loza, tsy azonao sakanana; hianjera aminao ny antambo, tsy azonao hahodivitra, ary hanjo anao ny faharavana tampoka, tsy nampoizinao velively akory.

¹² Aoka ary hianao haharitra amin'ny fankatoavanao, sy amin'ireo odinao marobe, izay nanarananao fo hatramin'ny fahatanoranao. Sao mba mety hahita soa amin'izany hianao; sao mba mety hampahatahotra, hianao!

¹³ Efa nisasatra tamin'ny fanontaniana betsaka hianao; ka aoka handroso hamonjy anao ireo izy ireo, izay mpandrefy ny lanitra, sy mpandinika ny kintana, izay manambara, isaka ny tsinam-bolana, ny zavatra tsy maintsy ho tonga aminao.

¹⁴ Indreo izy, fa tonga tahaka ny vodivary; hodoran'ny afo, nefa tsy hahavonjy ny ainy, amin'ny herin'ny lelafo; fa tsy mba vain'afo hamindroana akory ity na afo hitaninana eo anoloany!

¹⁵ Ho toy izany aminao ireo nanasaranao tena, ireo nifampiraharahanao, hatramin'ny fahatanoranao: samy mipariaka amin'izay alehany avy izy, fa tsy misy hamonjy anao!

Toko faha-48

¹ Mihainoa izao, ry taranak'i Jakoba, hianareo izay antsoina amin'ny anaran'Israely; nateraky ny loharanon'i Jodà, mianiana amin'ny anaran'ny Tompo, ary mankalaza ny Andriamanitr'Israely, nefa tsy amin'ny fo mahitsy na araka ny hitsim-po.

² Fa maka ny anarany amin'ny tanàna masina izy ireo, sy miankina amin'ny Andriamanitr'Israely, izay mitondra anarana hoe: Iavehn'ny tafika.

³ Ny zavatra taloha, dia efa nambarako hatramin'ny ela; naloaky ny vavako izany, sady nantsoiko ampahibemaso; ary tampoka aho dia nanao, ka tanteraka ireo zavatra ireo.

⁴ Noho ny fahalalako fa hianao dia mafy hatoka, ary anja-by ny vozonao, sy varahina ny handrinao,

⁵ dia nambarako taminao hatramin'ny ela izany zavatra izany; nolazaiko taminao talohan'ny hahatongavany izany, fandrao lazainao hoe: Ny sampiko no nanao izany; ny andriamanitro hazo na anidina no nandidy izany.

⁶ Efa nandre izany hianao; jereo fa tanteraka avokoa izy; fa hianareo kosa, tsy hanambara izany va hianareo? Ankehitriny mampandre anao zava-baovao aho, dia zava-miafina mbola tsy fantatrao.

⁷ Vao izao no noharina izany, fa tsy taloha; hatramin'izao anio izao, tsy mbola nandre izany hianao, fandrao lazainao hoe: Indro fa efa fantatro ihany izany.

⁸ Tsy mbola nandre izany hianao, tsy nahalala izany hianao; tsy mbola nandre izany velively ny fonao. Satria fantatro hianao fa mpivadika loatra, ary ny anaranao hatrany an-kibon-dreninao dia hoe mpivadika.