Bokin'i Jeremia

Toko faha-35

² Mandehana hianao mankany amin'ny fianakavian'ny Rekabita, ka mitenena aminy. Ento ho ao an-tranon'ny Tompo amin'ny efitrano anankiray izy ireo, ka tolory divay hosotroiny.

³ Koa dia nalaiko Jezoniasa, zanak'i Jeremia, zanak'i Habsaniasa, mbamin'ireo rahalahiny sy ireo zanany rehetra ary ny fianakavian'ny Rekabita rehetra;

⁴ ka nampidiriko tao an-tranon'ny Tompo, tamin'ny efi-tranon'i Hanana, zanak'i Jegdeliasa, olon'Andriamantra, anilan'ny efitranon'ireo loholona sy ao ambonin'ny efitranon'i Maasiasa, zanak'i Seloma mpiandry varavarana. ⁵ Narosoko teo anoloan'ny zanaky ny fianakavian'ny Rekabita siny feno divay mbamin'ny kapoaka, dia hoy aho taminy: Misotroa divay hianareo. ⁶ Fa hoy kosa izy ireo: Tsy mba misotro divay izahay; satria izao no didy napetrak'i Jonadaba, zana-dRekaba, razanay, taminay: Aza misy misotro divay, na hianareo na ny zanakareo mandrakizay. ⁷ ary aza manorina trano, na mamafy voan-javatra, na mamboly voaloboka, na manana izany akory; fa aoka hitoetra an-day amin'ny andro rehetra iainanareo, mba ho velona mandritra ny andro maro amin'ny tany izay ipetrahanareo toy ny vahiny hianareo. ⁸ Koa notandremanay ny tenin'i Jonadaba, zana-dRekaba, razanay, tamin'ny zavatra rehetra nandidiany anay, ka dia tsy misotro divay na oviana na oviana, na ny tenanay, na ny vadinay, na ny zanakay lahy, na ny zanakay vavy; ⁹ tsy manao trano hitoerany izahay; tsy manam-tanim-boaloboka, na saha, na tany voafafy, izahay; ¹⁰ ary mitoetra an-day izahay; manaiky izahay, ary ny ataonay rehetra dia araka izay nandidian'i Jonadaba, razanay, anay. ¹¹ Nony avy izay nanafihan'i Nabokodonozora, mpanjakan'i Babilona an'izao tany izao, dia hoy izahay: Andeha isika hialoka any Jerosalema, eo anatrehan'ny tafiky ny Kaldeana sy ny tafik'i Siria, ka dia nitoetra teto Jerosalema izahay. ¹² Dia tonga tamin'i Jeremia ny teny avy amin'ny Tompo, nanao hoe: ¹³ Izao no lazain'ny Tompon'ny tafika, Andriamanitr'Israely: Mandehana hianao milaza amin'ny olona any Jodà, sy amin'ny mponina ao Jerosalema hoe: Tsy mba hety handray fampianarana amin'ny fihainoana ny teniko va hianareo? - teny marin'ny Tompo. ¹⁴ Voatandrina ny tenin'i Jonadaba zana-dRekaba; norarany tsy hisotro divay ny zanany, dia tsy nisotro izy ireo, noho ny fanekeny ny didin-drainy, mandrak'androany; ary izaho niteny taminareo koa, nefa tsy nihaino ahy hianareo! ¹⁵ Nirahako tany aminareo ny mpaminany rehetra, mpanompoko, sady nirahako hatramin'ny vao maraina, hilaza aminareo hoe: Samia miala amin'ny làlan-dratsinareo avy hianareo; hatsarao ny fitondran-tenanareo; aza mandeha manaraka andriamani-kafa mba hanompo azy; dia honina amin'ny tany nomeko anareo, dia ny tenanareo sy ny razanareo; aza mandeha manaraka andriamani-kafa mba hanompo azy; dia honina amin'ny tany nomeko anareo, dia ny tenanareo sy ny razanareo, hianareo; kanefa tsy nanongilan-tsofina hianareo, na nihaino ahy akory. ¹⁶ Eny, ny taranak'i Jonadaba, zana-dRekaba, nitandrina ny didy napetraky ny razany taminy; fa ity vahoaka ity kosa, tsy mba mihaino ahy! ¹⁷ Noho izany, izao no lazain'ny Tompo, Andriamanitry ny tafika, Andriamanitr'Israely: Indro hataoko mihatra amin'i Jodà sy amin'ny mponina rehetra ao Jerosalema, ny loza rehetra voalazako ny amin'izy ireo; satria niteny tamin'izy ireo aho, fa tsy nohenoiny; ary niantso azy aho, fa tsy novaliany. ¹⁸ Ary hoy Jeremia tamin'ny fianakavian'ny Rekabita: Izao no lazain'ny Tompon'ny tafika, Andriamanitr'Israely: Noho hianareo nanaiky ny didin'i Jonadaba razanareo, sy nitandrina ny didiny rehetra, ary nanatanteraka izay rehetra nasainy nataonareo,

¹⁹ noho izany dia izao no lazain'ny Tompon'ny tafika Andriamanitr'Israely: Na oviana na oviana tsy ho lany zanakalahy hitsangana eo anatrehako i Jonadaba, zana-dRekaba.

Toko faha-36

¹ Tamin'ny taona fahefatra, nanjakan'i Joakima, zanak'i Josiasa, mpanjakan'i Jodà, dia izao no teny avy any amin'ny Tompo, tonga tamin'i Jeremia:

² Mangalà horonan-taratasy hianao, ka soraty ao avokoa ny teny nolazaiko taminao, mamely an'Isaely sy Jodà ary ny firenena rehetra, hatramin'ny andro nitenenako taminao, hatramin'ny andron'i Josiasa ka mandrak'androany. ³ Fa angamba dia hohenoin'ny taranak'i Jodà ny loza rehetra kasaiko hatao aminy, mba hiovany, hialany amin'ny làlan-dratsiny avy, ka hamelako ny helony amam-pahotany. ⁴ Dia niantso an'i Baròka, zanak'i Nerià, Jeremia, ka ny teny rehetra nolazain'ny Tompo tamin'i Jeremia, dia nosoratan'i Baròka tamin'ny horonan-taratasy araka ny nanononany azy. ⁵ Rahefa izany, nanome didy an'i Baròka Jeremia, nanao hoe; Izaho ity, voasakana, ka tsy afa-mankany an-tranon'ny Tompo. ⁶ Ka mandehana ary hianao, ary vakio ao amin'ny horonan-taratasy nosoratanao, araka izay nanononako azy, ny tenin'ny Tompo mba ho ren'ny vahoaka ao an-tranon'ny Tompo amin'ny andro fifadian-kanina; vakio izany ho ren'izay rehetra an'i Jodà izay tonga avy any an-tanànany. ⁷ Angamba ho tonga eo anatrehan'ny Tompo ny fifonany, ary hiova hiala amin'ny làlan-dratsiny avy izy; fa lehibe ny hatezerana amam-pahavinirana nolazain'ny Tompo hahatra amin'ity vahoaka ity. ⁸ Dia nataon'i Baròka, zanak'i Nerià, avokoa, izay nandidian'i Jeremia mpaminany azy; novakiny tao an-tranon'ny Tompo, tao amin'ny horonan-taratasy ny tenin'ny Tompo. ⁹ Tamin'ny taona fahadimy nanjakan'i Joakima, zanak'i Josiasa mpanjakan'i Jodà, tamin'ny volana fahasivy, dia nisy fifadian-kanina nantsoina teo anatrehan'ny Tompo hataon'ny olona rehetra ao Jerosalema, sy ny olona rehetra tonga tao Jerosalema, avy any amin'ny tanànan'i Jodà.

¹⁰ Ary novakin'i Baròka tamin'izay, tao amin'ny boky ny tenin'ny Tompo, tao an-tranon'ny Tompo, amin'ny efitranon'i Gamariasa, zanak'i Safana, mpanoratra, teo amin'ny kianja ambony, anoloan'ny vavahady Vaovao amin'ny tranon'ny Tompo, mba ho ren'ny vahoaka rehetra. ¹¹ Nandre ny tenin'ny Tompo rehetra, tao amin'ny boky, Mikea, zanak'i Gamariasa, zanak'i Safana; ¹² ka dia nidina nankany an-tranon'ny mpanjaka, tao amin'ny efitranon'ny mpanoratra; ka indro fa nipetraka tao avokoa ny lehibe, dia Elisama, mpanoratra, Dalaiasa, zanak'i Semeiasa, Elinatana, zanak'i Akobora, Gamariasa, zanak'i Safana, Sedekiasa, sanak'i Hananiasa, mbamin'ny lehibe rehetra. ¹³ Ary nambaran'i Mikea tamin'izy ireo avokoa, ny teny reny tamin'ny namakian'i Baròka azy tao amin'ny boky ho ren'ny sofin'ny vahoaka. ¹⁴ Tamin'izay ireo lehibe rehetra, naniraka an'i Jodì, zanak'i Nataniasa, zanak'i Selemiasa, zanak'i Kosi, ho any amin'i Baròka, hilaza aminy hoe: Raiso ny horonan-taratasy, izay namakianao teny teo an-tsofin'ny vahoaka, ary mankanesa atý hianao. dia norasin'i Baròka zanak'i Nerià ilay horonan-taratasy ka nankany amin'izy ireo izy.

¹⁵ Ary hoy ireo taminy: Mipetraha hianao ka vakio izany ho ren'ny sofinay. Dia namaky izany teo an-tsofin'izy ireo Baròka. ¹⁶ Nony efa nandre izany teny rehetra izany izy ireo dia nifampijery tamin-tahotra, ka nanao tamin'i Baròka hoe: Tsy maintsy ambaranay amin'ny mpanjaka avokoa izany teny rehetra izany. ¹⁷ Ary nanontany an'i Baròka izy ireo, nanao hoe: Lazao aminay izay nanoratanao izany teny rehetra izany avy tamin'ny vavany. ¹⁸ Ka hoy Baròka taminy: Nanonona am-bava izany teny rehetra izany izy; ka nosoratako tao amin'ny boky, tamin'ny ranomainty. ¹⁹ Dia hoy ireto lehibe tamin'i Baròka: Mandehana miery, hianao sy Jeremia, ka aoka tsy hisy olona hahalala izay misy anareo. ²⁰ Rehefa izany izy ireo, namela ilay horonan-taratasy tao amin'ny efitranon'i Elisama mpanoratra, dia niditra tao amin'ny mpanjaka, tao amin'ny kianja, sy nilaza teo an-tsofin'ny mpanjaka io raharaha rehetra io. ²¹ Nirahin'ny mpanjaka Jodì haka ilay horonan-taratasy, dia noraisiny tao amin'ny efitranon'i Elisama, mpanoratra, dia novakiny teo an-tsofin'ny mpanjaka sy teo an-tsofin'ny lehibe rehetra nitsangana teo anatrehan'ny mpanjaka. ²² Ny mpanjaka izany nipetraka tao an'efitrano ririnina tamin'ny volana fahasivy; ary voarehitra afo teo anoloany ny fatana. ²³ Vao toko telo na efatra no voavakin'i Jodì, dia notapahan'ny mpanjaka tamin'ny antsipikan'ny mpanoratra, ilay taratasy, ka natsipiny tao anatin'ny afo tao am-patana, mandra-pahalevon'ny afo tao am-patana ny horonan-taratasy manontolo. ²⁴ Tsy mba natahotra na nandriatra ny fitafiana akory ny mpanjaka sy ireto mpanompony rehetra izay nandre izany teny rehetra izany. ²⁵ Efa nihanta mafy tamin'ny mpanjaka anefa Elnatana sy Dalaiasa, ary Gamariasa, mba tsy handoro ilay horonan-taratay; fa tsy nohenoiny izy ireo. ²⁶ Rahefa izany dia nodidian'ny mpanjaka Jermiely zanak'andriana, sy Saraiasa zanak'i Ezriely, ary Selemiasa zanak'i Abdeely, hisambotra an'i Baròka mpanoratra, sy Jeremia mpaminany, nefa nafenin'ny Tompo izy ireo. ²⁷ Ary natao tamin'i Jeremia ny tenin'ny Tompo, taorian'ny nandoran'ny mpanjaka ny horonan-taratasy, mbamin'ny teny nosoratan'i Baròka araka ny nanononan'i Jeremia avy, dia toy izao:

²⁸ Mandehana maka horonan-taratasy hafa indray hianao; ka soraty ao avokoa ireo teny voalohany, tao amin'ilay horonan-taratasy voalohany, nodoran'i Joakima, mpanjakan'i Jodà.

²⁹ Ary lazao amin'i Joakima mpanjakan'i Jodà, hoe: Izao no lazain'ny Tompo: Hianao nandoro iny horonan-taratasy iny, sady nanao hoe: Ahoana no nanoratanao tamin'iny fa hoe ho avy tokoa ny mpanjakan'i Babilona, ka handrava ity tany ity, ary ataony tsy hisy olona na biby intsony eto. ³⁰ Noho izany, izao no lazain'ny Tompo, ny amin'i Joakima, mpanjakan'i Jodà: Tsy hisy amin'ny fianakaviany na iray aza hipetraka eo amin'ny seza fiandrianan'i Davida, sady hatsipy any ivelany ny fatiny hasian'ny hainandro, amin'ny antoandro, sy ny hatsiaka amin'ny alina. ³¹ Hafototro hamely azy mbamin'ny taranany sy ny mpanompony rehetra, ny helony; ary hataoko mihatra aminy, sy amin'ny mponina ao Jerosalema, ary amin'ny olona amin'i Jodà, ny loza rehetra nolazaiko taminy, fa tsy nohainoiny aho. ³² Dia naka horonan-taratasy hafa indray Jeremia, natolony an'i Baròka mpanoratra, zanak'i Neriàsa, ka nosoratan'i Baròka araka ny nanononan'i Jeremia azy ny teny rehetra tamin'ilay boky nodoran'i Joakima mpanjakan'i Jodà tamin'ny afo; ary teny hafa maro tahaka ireny no niampy.