Bokin'i Jeremia

Toko faha-37

¹ Sedesiasa zanak'i Josiasa no nanjaka nandimby an'i Jekoniasa zanak'i Joakima; Nabokodonozora mpanjakan'i Babilona no nanangana azy ho mpanjaka amin'ny tanin'i Jodà.

² Kanefa na izy, na ny mpanompony, na ny ankapobem-bahoaka tao amin'ny tany, dia samy tsy nihaino ny tenin'ny Tompo izay notononiny tamin'ny alàlan'i Jeremia mpaminany. ³ Nirahin'i Sedesiasa, mpanjaka, Jokaly zanak'i Selmiasa, sy Sofoniasa zanak'i Maasiasa mpisorona, ho any amin'i Jeremia, mpaminany, hilaza aminy hoe: Mba mifonà ho anay amin'ny Tompo Andriamanitsika.

⁴ Jeremia nifanerasera teo afovoan'ny vahoaka ihany, ary mbola tsy natao an-tranomaizina. ⁵ Ny tafik'i Faraona kosa efa nivoaka niala teny Ejipta; ary ny Kaldeana nanao fahirano an'i Jerosalema. ⁶ Dia tonga tamin'i Jeremia mpaminany ny tenin'ny Tompo Andriamanitr'Israely: ⁷ Izao no lazain'ny Tompo Andriamanitr'Israely: Izao no teny hataonareo amin'ny mpanjakan'i Jodà, naniraka anareo hanontany amiko: Ny tafik'i Faraona izay efa nivoaka hamonjy anareo, dia hiverina ho any amin'ny taniny any Ejipta indray; ⁸ ary ny Kaldeana kosa hiverina atý ary hiady amin'ity tanàna ity, sady hahafaka azy sy handoro azy. ⁹ Izao no lazain'ny Tompo: Aza mamita-tena foana hianareo, ka manao hoe: Handeha tokoa ho any lavitra antsika any ny Kaldeana; ¹⁰ fa tsy handeha akory izy ireo. Ary na dia ho resenareo ny tafiky ny Kaldeana rehetra izay miady aminareo aza, ka tsy hisy afa-tsy ny maratra no sisa aminy, dia samy mbola hitsangana ao an-dainy avy ihany ireo, ka handoro ity tanàna ity amin'ny afo. ¹¹ Tamin'ny nialan'ny tafiky ny Kaldeana tao Jerosalema noho ny amin'ny tafik'i Faraona, ¹² dia nivoaka avy ao Jerosalema koa Jeremia, hankany amin'ny tanin'i Benjamina, mba handray ao izay anjarany eo amin'ny vahoaka. ¹³ Kanjo nony mby teo am-bavahadin'i Benjamina izy, indro ny kapitenin'ny mpiambina, atao hoe Jeriasa, zanak'i Selemiasa, zanak'i Hananiasa, nisambotra an'i Jeremia mpaminany, nanao hoe: Miandany amin'ny Kaldeana hianao. ¹⁴ Fa hoy Jeremia: Tsy marina izany; tsy miandany amin'ny Kaldeana aho. Tsy nihaino izany akory anefa Jeriasa, fa nosamboriny ihany Jeremia, dia nentiny nankany amin'ny lehibe. ¹⁵ Ary nisafoaka tamin'i Jeremia ny lehibe; nikapoka azy iry ireo ary nandatsaka azy an-tranomaizina, tao amin'ny tranon'i Jonatana mpanoratra, fa nataony tranomaizina izany. ¹⁶ Nony efa tafiditra tao an-davaka ambanin'ny andoholambo Jeremia, sady efa nitoetra tao andro maro Jeremia,

¹⁷ vao nanirahan'i Sedesiasa nesorina tao. Dia nanontaniany mangingina tao an-tranony izy nataony hoe: Moa misy teny avy amin'ny Tompo? Ka hoy ny navalin'i Jeremia: Eny! sady nampiany hoe: Hatolotra eo an-tànan'ny mpanjakan'i Babilona hianao. ¹⁸ Hoy koa Jeremia tamin'i Sedesiasa mpanjaka: Inona no ratsy nataoko taminao na tamin'ity vahoaka ity, no dia nalatsakareo an-tranomaizina aho? ¹⁹ Ary aiza moa ireo mpaminaninareo naminany taminareo, nanao hoe: Tsy ho tonga hamely anareo na hamely ity tany ity ny mpanjakan'i Babilona, ²⁰ koa ankehitriny, masìna hianao, ry mpanjaka tompoko, mba henoy! Ho tonga anie ny fitarainako eo anatrehanao: aza dia averina any an-tranon'i Jonatana mpanoratra aho, ho faty any. ²¹ Dia nanome teny Sedesiasa mpanjaka, hitana an'i Jeremia ao an-kianjan'ny tranomaizina sy hanome azy mofo iray lehibe isan'andro avy any amin'ny araben'ny Mpanao mofo, mandra-pahalanin'ny mofo rehetra ao an-tanàna. Izany no nitoeran'i Jeremia tao amin'ny kianjan'ny tranomaizina.

Toko faha-38

¹ Tamin'izay Safatiasa zanak'i Matana, Gedeliasa zanak'i Fasora, ary Jokaly zanak'i Selemiasa, ary Fasora zanak'i Melkiasa, dia nandre ny teny nolazain'i Jeremia tamin'ny vahoaka rehetra hoe:

² Izao no lazain'ny Tompo: Izay hitoetra amin'ity tanàna ity, ho fatin'ny sabatra sy ny mosary ary ny pesta; fa izay hivoaka hanatona ny Kaldeana kosa, ho velon'aina sy hahazo ny aina ho babony, ka ho velona. ³ Izao no lazain'ny Tompo: Hatolotra ny tafiky ny mpanjakan'i Babilona ity tanàna ity, ka ho afany. ⁴ Dia hoy ny lehibe tamin'ny mpanjaka: Aoka hovonoina io lehilahy io! Fa mampiraviravy tànana ny lehilahy mpiady sisa eto an-tanàna mbamin'ny vahoaka rehetra izy, amin'ny fanaovana teny toy izany aminy. Fa tsy mba mitady izay hahasoa ity vahoaka ity io lehilahy io, fa izay hampidi-doza aminy ihany.

⁵ Ka hoy Sedesiasa mpanjaka: Anananareo fahefana izy, fa ny mpanjaka tsy mahefa na inona na inona hisakana anareo. ⁶ Dia noraisin'izy ireo Jeremia, ka nampidininy tao an-davak'i Melkiasa, zanak'andriana, ao an-kianjan'ny fiambenana; mahazaka no nampidinana an'i Jeremia tao an-davaka izay tsy nisy rano, fa fotaka ihany, ka nilentika tanaty fotaka Jeremia. ⁷ Ren'i Abdemeleka etiopiana eonoka tao an-tranon'ny mpanjaka fa hoe tao an-davaka Jeremia, nipetraka teo am-bavahadin'i Benjamina ny mpanjaka tamin'izay;

⁸ dia nivoaka avy tao an-tranon'ny mpanjaka Abdemeleka, ka niteny tamin'ny mpanjaka nanao hoe: ⁹ Ry mpanjaka tompoko ô, ratsy izany nataon'ireo olona ireo tamin'ny nitondrany toy izany an'i Jeremia mpaminany, fa nampidininy ao an-davaka izy; ho faty mosary ao ihany izy, satria tsy misy mofo intsony eto an-tanàna. ¹⁰ Dia nanome teny an'i Abdemeleka etiopiana ny mpanjaka nanao hoe: Mangalà olona telopolo lahy etoana, hiaraka aminao, ka ampakaro i Jeremia mpaminany avy ao an-davaka dieny mbola tsy maty izy. ¹¹ Ary naka ireo olona ireo hiaraka aminy Abdemeleka, dia niditra tao amin'ny tranon'ny mpanjaka ao ambanin'ny trano firaketana. Naka lamba tonta amam-boro-kitsay tao izy, ka nalefany tamin'ny tady izany ho ao amin'i Jeremia ao an-davaka. ¹² Dia hoy Abdemeleka etiopiana tamin'i Jeremia: Ataovy ao ambany helikao ireny lamba tonta amam-borodamba ireny eo ambanin'ny tady. Nataon'i Jeremia izany. ¹³ Ka nosintonin'izy ireo tamin'ny tady izy, dia nampakariny avy ao an-davaka. Ary Jeremia nitoetra teo an-kianjan'ny fiambenana. ¹⁴ Tamin'izay dia naniraka haka an'i Jeremia Sedesiasa mpanjaka mba ho ao aminy, ao amin'ny fidirana fahatelo, amin'ny tranon'ny Tompo. Dia hoy ny mpanjaka tamin'i Jeremia: Misy zavatra hanontaniako anao, ka aza anafenana aho. ¹⁵ Ary hoy Jeremia tamin'i Sedesiasa: MOa tsy hamono ahy tokoa va hianao, raha ilazako izany. Ary raha omeko hevitra hianao, tsy hihaino ahy. ¹⁶ Dia nianiana mangingina amin'i Jeremia Sedesiasa mpanjaka, nanao hoe: Velona Iaveh izay nanome antsika ity fiainana ity. Tsy hamono anao aho, na hanolotra anao amin'ireo olona mitady ny ainao ireo. ¹⁷ Ka hoy Jeremia tamin'i Sedesiasa: Izao no lazain'ny Tompon'ny tafika, Andriamanitr'Israely: Raha mivoaka hanaiky ny lehiben'ny mpanjakan'i Babilona hianao, dia ho velon'aina hianao sy ny mpianakavinao. ¹⁸ Fa raha tsy mivoaka hanatona ny lehiben'ny mpanjakan'i Babilona kosa hianao: ity tanàna ity hatolotra eo an-tànan'ny Kaldeana, ka hodorany; hianao kosa tsy ho afa-mandositra azy ireo. ¹⁹ Dia hoy Sedesiasa mpanjaka tamin'i Jeremia: Matahotra an'ireo Jodeana efa nanatona ny Kaldeana aho; dia hatolotry ny olona an'ireo aho ka hataon'ireo fihomehezana. ²⁰ Fa hoy ny navalin'i Jeremia: Tsy hanolotra anao ny olona; mba henoy re ny feon'ny Tompo amin'izay ambarako aminao, dia hahita soa amin'izay hianao ary ho voavonjy ny ainao. ²¹ Fa raha mandà tsy hivoaka hianao dia izao no nambaran'ny Tompo tamiko: ²² Indro fa ny vehivavy sisa rehetra amin'ny akohonan'ny mpanjakan'i Jodà, hoentina ao amin'ny mpanapaky ny mpanjakan'i Babilona, ka hanao aminao hoe: Sodokan'ny sakaizanao hianao, ka resiny; nihitsoka anaty fotaka ny tongotrao dia nidify kosa izy ireo. ²³ Ny vady aman-janakao rehetra hoentina ao amin'ny Kaldeana, hianao koa tsy ho afa-mandositra azy ireo, fa ho azon'ny mpanjakan'i Babilona, ary hianao no nandoro ity tanàna ity. ²⁴ Dia hoy Sedesiasa tamin'i Jeremia: Aoka tsy hisy olona hahare na inona na inona amin'izao resaka izao, dia tsy ho faty hianao. ²⁵ Raha ren'ny mpanapaka fa niresaka taminao aho, ka tonga aminao izy manao hoe: Ambarao anay izay nolazainao tamin'ny mpanjaka sy nolazain'ny mpanjaka taminao; aza misy afenina aminay, dia tsy hamono anao izahay; dia izao no avalio azy: ²⁶ Nanatitra ny fitarainako tamin'ny mpanjaka aho, mba tsy haveriny any an-tranon'i Jonatana izay hahafatesako, aho. ²⁷ Dia tonga tao amin'i Jeremia tokoa ny mpanapaka rehetra, ka nanontany azy, ka novaliany araka ireo teny rehetra nandidian'ny mpanjaka azy indrindra, ka dia navelany tsy nosahiraniny izy; satria tsy nisy re ny resaka.

²⁸ Dia nipetraka tao an-kianja fiambenana Jeremia mandra-pahafaka an'i Jerosalema; ka dia tao ihany izy, nony azo Jerosalema.

Toko faha-39

¹ Tamin'ny volana fahafolo, amin'ny taona fahasivy nanjakan'i Sedesiasa, mpanjakan'i Jodà, dia tonga teo anoloan'i Jerosalema Nabokodonozora, mpanjakan'i Babilona, mbamin'ny tafiny rehetra, ka nanao fahirano azy.