Bokin'i Ezekiela

Toko faha-8

⁸ Ary hoy izy tamiko: Ry zanak'olona, gorobahy ny rindrina. Dia nogorobahako ny rindrina, ka indro nisy varavarana teo. ⁹ Ary hoy izy tamiko: Avia, jereo ireto fahavetavetana mahatsiravina ataony eto. ¹⁰ Dia niditra aho, ka nahita, ary indro, voasoratra teo amin'ny rindrina manodidina avokoa, ny sarin'ny biby mandady amam-biby maloto isan-karazany, mbamin'ny fahavetavetan'ny taranak'Israely rehetra. ¹¹ Ary nisy fitopolo lahy, amin'ny loholon'ny taranak'Israely, ka anisan'ireo Jezoniasa, zanak'i Safana, ary nitsangana teo anoloan'izany sary izany ireo; samy nanana ny fanembohany teny an-tànany avy, ka nisondrotra avy eo ny hanitry ny emboka nijofo. ¹² Dia hoy izy tamiko: Hitanao va, ry zanak'olona, ity ataon'ny loholon'ny taranak'Israely ao amin'ny maizina, samy anatin'ny efitranony feno sary avy? Fa hoy izy ireo: Tsy mahita antsika Iaveh; efa nandao ny tany Iaveh. ¹³ Ary hoy koa izy tamiko: Mbola ho hitanao ny fahavetavetana lehibe hafa, ataon'izy ireo. ¹⁴ Dia nentiny aho, ho eo anoloan'ny vavahady, mitodika mianavaratra, amin'ny tranon'ny Tompo, ka indreo, ny vehivavy nipetraka teo, mitomany an'i Tammoza.

¹⁵ Ary hoy izy tamiko: Efa hitanao va, ry zanak'olona? Mbola hahita fahavetavetana hafa lehibe noho izany hianao. ¹⁶ Tamin'izay, nentiny aho, ho ao amin'ny kianja anatiny amin'ny tranon'ny Tompo, ary indro fa teo amin'ny fidirana ho ao amin'ny tranon'ny Tompo ao anelanelan'ny alo-baravarana sy ny otely, nisy lehilahy sahabo ho dimy amby roapolo, niamboho ny tempolin'ny Tompo, nitodika niantsinanana teo anoloan'ny masoandro.

¹⁷ Ka hoy izy tamiko: Efa hitanao va, ry zanak'olona? Mbola tsy ampy ihany va ho an'ny taranak'i Jodà ny manao izao fahavetavetana ataony eto izao, no mbola fenoiny fampahoriana koa ny tany; ka hiverenany hatao lalandava izay hampahatezitra ahy? Indro izy ireo manainga ny rantsan-kazo ho eo amin'ny orony. ¹⁸ Ary izaho koa hamely an-katezerana; tsy hiantra ny masoko; tsy hamindra foa aho; hitaraina mafy eo an-tsofiko izy ireo, kanefa tsy hohenoiko akory.

Toko faha-9

¹ Dia niantso mafy teo an-tsofiko izy nanao hoe: Manatòna hianareo, mpiambina ny tanàna; samia mitondra ny enti-mandrava eny an-tànany avy.

² Ka indreo, avy tamin'ny làlan'ny vavahady ambony mitodika mianavaratra, nisy lehilahy enina, samy nitondra teo an-tànany ny zavatra enti-mamely; ary nisy lehilahy anankiray teo afovoan'izy ireo, nitafy rongony fotsy madinika, sy nitondra fombam-panoratan'ny mpanoratra, teo amin'ny fehinkibony. Niditra izy ireo, dia nitsangana teo anilan'ny otely varahana. ³ Ary ny voninahitry ny Andriamanitr'Israely, niakatra avy teo ambonin'ny Kerobima izay nitoerany, nankeo an-tokonam-baravaran'ny trano. Ary Iaveh niantso an'ilay lehilahy nitafy rongony fotsy madinika sy nitondra fombam-panoratana teo amin'ny fehinkibony,

⁴ ka hoy Iaveh taminy hoe: Mandehana mamaky ny tanàna, mamaky an'i Jerosalema, ka asio marika Thau ny handrin'ny olona misento sy mitaraina, noho ny fahavetavetana rehetra atao ao. ⁵ Dia hoy koa izy tamin'iretsy sasany, teo an-tsofiko: Mandehana manaraka azy, mamaky ny tanàna, hianareo, ka mameleza, aza miantra ny masonareo, aza mamindra fo hianareo. ⁶ Na antidahy na zazalahy, na zazavavy, na zaza, na vehivavy: vonoy mandra-paharingany avokoa; fa izay misy ny Thau ao aminy kosa, aza hatoninareo. Ary eo amin'ny fitoerako masina, manomboka. Dia manomboka tamin'ny antidahy teo anoloan'ny trano izy ireo. ⁷ Ary hoy izy taminy: Lotoy ny trano; fenoy faty ny kianja. Mivoaha hianareo! Dia nivoaka namely tao an-tanàna izy ireo. ⁸ Nony namely izy ireo, ka izaho irery no sisa teo, dia niankohoka aho, sady nitaraina hoe: Indrisy! Iaveh Tompo ô! dia haringanao avokoa va ny sisa amin'Israely, amin'izao ampidinanao ny hatezeranao amin'i Jerosalema izao? ⁹ Ary hoy izy tamiko: Lehibe dia lehibe indrindra ny heloky ny taranak'Israely sy Jodà. Feno ran'olona ny tany, feno tsy fahamarinana ny tanàna; fa hoy izy ireo: Afoin'ny Tompo ny tany; tsy mahita na inona na inona Iaveh. ¹⁰ Izaho koa, dia tsy hiantra ny masoko; ary tsy hamindra fo aho; hatsingeriko amin'ny lohany, izay nataony. ¹¹ Dia indro tamy ilay lehilahy mitafy rongony fotsy madinika nitondra fombam-panoratana teo amin'ny fehinkibony, nilaza ny nataony, nanao hoe: Vitako izay nandidinao ahy.

Toko faha-10

¹ Ary nahita aho, ka indro teo ambonin'ilay andohalambo, tambonin'ireo lohan'ny Kerobima, dia nisy hoatra ny vato safira; nisy zavatra mitarehin-tseza fiandrianana no fijery azy, teo ambonin'ireo.

² Dia hoy izy tamin'ilay lehilahy mitafy rongony fotsy madinika: Mandehana ho ao anelanelan'ny kodiarana, ambanin'ny Kerobima; fenoy vain'afo avy eo anelanelan'ny Kerobima ny tànan-droanao, ka afafazo amin'ny tànana izany. Dia nankao izy teo imasoko. ³ Nijanona teo an-kavanan'ny trano ny Kerobima, raha nankao ilay lehilahy, ka nahafeno ny kianja anatiny ny rahona.

⁴ Ary ny voninahitry ny Tompo nisondrotra niala teo amin'ny Kerobima nankeo amin'ny tokonam-baravaran-trano; ka feno ilay rahona ny trano; ary feno ny famirapiratan'ny voninahitry ny Tompo ny kianja. ⁵ Re hatrany amin'ny kianja ivelany, ny fikopakopaky ny elatry ny Kerobima hoatra ny feon'Andriamanitra Tsitoha, raha miteny izy. ⁶ Nony nandidy an-dralehilahy mitafy rongony fotsy madinika izy, nanao hoe: Makà afo ao anelanelan'ny kodiarana, anelanelan'ny Kerobima, dia nandroso ho eo anilan'ny kodiarana izy. ⁷ Ary ny Kerobima naninjitra ny tànany eo anelanelan'ny Kerobima ho ao amin'ny afo izay eo anelanelan'ny Kerobima, dia nalainy ka nataony teo an-tanan-dralehilahy mitafy rogony fotsy madinika, izay nandray izany, dia nivoaka. ⁸ Fa nisy endri-tànan'olona, hita teo ambany elatr'ireo Kerobima.

⁹ Ary nahita aho, ka indreo, nisy kodiarana efatra, teo anilan'ireo Kerobima, kodiarana iray avy no teo anilan'ny isan-Kerobima; ary ny endriky ny kodiarana dia toy ny an'ny vaton'i Tarsisa.

¹⁰ Ary araka ny fijery azy ireo, dia sahala izy efatra; dia hoatra ny kodiarana itsofohan'ny kodiarana eo afovoany. ¹¹ Raha mandeha izy, dia mizotra tandrifin'ny lafiny efatra, tsy miherika eny am-pandehanany, fa izay fitoerana itodihan'ny lohany no alehany, tsy miherika eny am-pandehanany. ¹² Ary feno maso avokoa ny manodidina ny tenan'ny Kerobima, ny lamosiny, ny tànany, ny elany, mbamin'ny kodiarana; samy nanana ny kodiarany avy izy efatra. ¹³ Ny kodiarana dia mailaka no anarana fiantsoana azy. ¹⁴ Isan-Kerobima samy nanan-tarehy efatra avy: ny tarehin'ny voalohany, tarehin-Kerobima, ny tarehin'ny faharoa, tarehin'olona; ny an'ny fahatelo, tarehin'ombalahy; ary ny an'ny fahefatra, tarehim-boromahery. ¹⁵ Dia niakatra ny Kerobima, dia izany no ilay zava-manan'aina hitako tany amin'ny ony Kobara. ¹⁶ Raha nandeha ny Kerobima, nandeha teo anilany koa ny kodiarana, ary raha nanainga elatra hisondrotra avy amin'ny tany ny Kerobima, dia tsy nivily koa ireo kodiarana; tsy niala teo anilan'ireo. ¹⁷ Raha nijanona izy, nijanona koa ireo; raha nisondrotra izy, niara-nisondrotra taminy koa ireo; satria tao amin'izy ireo ny Fanahin'ny zava-manan'aina. ¹⁸ Niala teo ambonin'ny tokonam-baravaran'ny trano, ny voninahitry ny Tompo, dia nijanona teo ambonin'ny Kerobima.

¹⁹ Nanainga elatra ny Kerobima sy nisondrotra avy amin'ny tany teo imasoko, ary nony niainga izy, niaraka taminy ny kodiarana. Nijanona teo anoloan'ny vavahady atsinanana amin'ny tranon'ny Tompo izy ireo; ary ny voninahitry ny Andriamanitr'Israely dia teo aminy, teo amboniny. ²⁰ Izany no ilay zava-manan'aina hitako teo ambanin'Andriamanitr'Israely, teo amin'ny ony Kobara; ary nahalala aho fa Kerobima izany.

²¹ Samy nanan-tarehy efatra, ary samy nanana elatra efatra avy izy; ary nisy endri-tanan'olona, teo ambany elany. ²² Ary ny amin'ny fijery ny tavany dia ireo tava hitako teo amoron'ny ony Kobara ihany; sahala ny fijery azy; tena ilay tany ihany izany. Samy nandeha tamin'izay hitsiny avy izy.

Toko faha-11

¹ Naingain'ny Fanahy aho dia nentiny nankeo ambavahady atsinanana, ilay mitodika miantsinana amin'ny tranon'ny Tompo; ka indro, teo anoloan'ny vavahady nisy olona dimy amby roapolo lahy; ary hitako teo amin'izy ireo, Jezoniasa, zanak'i Azora sy Feltiasa, zanak'i Banaiasa, lehiben'ny vahoaka.

² Dia hoy Iaveh tamiko: Ry zanak'olona, ireo no olona mamoron-tsain-dratsy, sy manome hevi-dratsy, eto amin'ity tanàna ity, manao hoe: ³ Tsy antomotra loatra ny loza! Andeha isika hanao trano! Ity tanàna ity no vilany, ary isika no hena. ⁴ Koa maminania hamely azy; maminania, ry zanak'olona. ⁵ Dia nilatsaka tato amiko ny Fanahin'ny Tompo; ka hoy izy tamiko: Mitenena hoe: Izao no lazain'ny Tompo: Izany no teneninareo, ry taranak'Israely! Fantatro ny mby ao an-tsainareo.

⁶ Nohamaroinareo ny vonoan'olona tamin'ity tanàna ity, sy nofenoinareo faty ny làlambeny.