Bokin'i Ezekiela

Toko faha-30

⁸ Dia ho fantatry ny olona fa Iaveh aho, raha avy izay handoroako an'i Ejipta sy hahatorotoro an'izay rehetra manampy azy.

⁹ Amin'izany andro izany, hisy iraka avy amin'ny anarako handeha an-dakana hampitebiteby an'i Etiopia izay mitoetra tsy amin'ny ahiahy, ka hisy fanahiana lehibe any aminy, toy ny tamin'ny andron'i Ejipta, fa indro tonga izy io.

¹⁰ Izao no lazain'ny Tompo Iaveh: Hampitsahatra ny tabataba ben'i Ejipta aho, amin'ny tànan'i Nabokodonozora, mpanjakan'i Babilona.

¹¹ Izy mbamin'ny vahoakany miaraka aminy, firenena masiaka noho ny hafa rehetra, no ho enti-mandrava an'i Ejipta; hanatsoaka sabatra hamelezana an'i Ejipta izy, ka hameno faty ny tany.

¹² Ny ony hovako ho tany maina; ny tany hatolotro eo an-tànan'ny olona masiaka; ary ny tany mbamin'izay rehetra ao aminy, horavako, amin'ny tànan'ny hafa firenena. Izaho Iaveh no niteny.

¹³ Izao no lazain'ny Tompo Iaveh: Hofoanako ny sampim-betaveta, holevoniko ny andriamanitra tsy izy ao Nofa, tsy hisy mpanapaka intsony, avy amin'ny tany Ejipta, ary hanidinako tahotra ny tany Ejipta.

¹⁴ Patrosa ho ravako; Tsoana hodorako; No, hanatanterahako fitsarana;

¹⁵ hampidina ny hatezerako amin'i Sina, trano mimandan'i Ejipta; ary hofongorako ny vahoaka be any No.

¹⁶ Ejipta hodorako, Sina, hiolanolana mijaly; No, halana an-keriny; ary Nofa, hanihim-pahavalo antoandrobe.

¹⁷ Ny zatovon'i Avena sy Bobasta, ho lavon-tsabatra; ary ny tenan'izy ireo ho lasan-ko babo.

¹⁸ Ao Tafnesa ho maizina ny andro, raha avy izay hanapahako ao ny jiogan'i Ejipta, sy hitsaharan'ny fiavonavonan'ny heriny; ho voasaron-drahona izy, ary ho lasan-ko babo ny zanany vavy.

¹⁹ Hanao fitsarana an'i Ejipta aho, ka ho fantatry ny olona fa Iaveh aho.

²⁰ Tamin'ny taona faharaika ambin'ny folo, volana voalohany, andro fahafiton'ny volana, tonga tamiko ny tenin'ny Tompo nanao hoe:

²¹ Ry zanak'olona, ny sandrin'i Faraona mpanjakan'i Ejipta, dia notapahako, ka indro tsy notsaboina, tsy nasiam-panafody na nopetahana bandy, hitsaboana azy mba hahatanjaka azy, hahatan-tsabatra.

²² Ka izao no lazain'ny Tompo Iaveh: Indro aho ho avy amin'ny Faraona mpanjakan'i Ejipta; hotapahako ny sandriny roa, na ny mbola matanjaka na ilay efa tapaka, ary hataoko latsaka ny sabatra eny an-tànany.

²³ Haeliko any amin'ny firenena ny Ejipsiana, ary hahahako any amin'ny tany.

²⁴ Fa ny sandrin'ny mpanjakan'i Babilona, hohatanjahako, ary ny sabatro, hataoko eo an-tànany; hotapahako kosa ny sandrin'i Faraona ka hitoloko eo anoloany izy, toy ny fitolokon'ny maratra ho faty.

²⁵ Ny sandrin'ny mpanjakan'i Babilona, hohatanjahako; ny sandrin'i Faraona kosa hianjera; ary ho fantatry ny olona fa Iaveh aho, rahefa ataoko eo an-tanan'ny mpanjakan'i Babilona ny sabatro; ka hoentiny mamely ny tany Ejipta.

²⁶ Haeliko any amin'ny firenena ny Ejipsiana, ary hahahako any amin'ny tany izy; dia ho fantatry ny olona fa Iaveh aho.

Toko faha-31

¹ Tamin'ny taona faharaika ambin'ny folo, volana fahatelo, andro voalohan'ny volana, tonga tamiko ny tenin'ny Tompo nanao hoe:

² Ry zanak'olona, lazao amin'i Faraona mpanjakan'i Ejipta sy amin'ny vahoakany maro hoe: Tahaka an'iza moa hianao, amin'ny fahalehibeazanao? ³ Indro fa Asora dia hazo sedera any Libàna, tsara rantsana, be alokaloka, avo vatana, ary mitehika amin'ny rahona ny tendrony.

⁴ Ny ranobe nampitombo azy; ny rano lalina, nahalehibe azy, tamin'ny nampandehanany ny oniny, tamin'ny manodidina ny fitoerana nambolena azy, sy tamin'ny nandefasany ny sakeli-dranony, ho ao amin'ny hazo rehetra any an-tsaha.

⁵ Noho izany ny vatany nijoroaka, lasa avo noho ny hazo rehetra any an-tsaha; ny sampany nihalehibe; ny rantsany, nihalava, noho ny habetsahan'ny rano, tamin'ny fotoana nitomboany.

⁶ Ny voromanidina rehetra, nanao akany teo amin'ny sampany; ny biby rehetra any an-tsaha, niteraka teo ambanin'ny rantsany; ny firenena maro no nipetraka teo ambany alokalony.

⁷ Nahatsara tarehy azy ny fahalehibeazany, sy ny halavan'ny sampany, fa latsaka lalina tao amin'ny rano betsaka ny fakany.

⁸ Ny sedra ao amin'ny sahan'Andriamanitra, tsy nahamatroka azy; ny sipresa, tsy nahatoraka ny sampany; ary ny pilatana tsy tahaka ny rantsany; ary ny hazo tao amin'ny sahan'Andriamanitra, tsy nisy tsara tarehy toa azy.

⁹ Nataoko tsara tarehy izy amin'ny hamaroan'ny rantsany, ka hialona azy avokoa ny hazo rehetra ao Edena, dia izay rehetra ao amin'ny sahan'Andriamanitra.

¹⁰ Koa izao no lazain'ny Tompo Iaveh: satria izy nisandratra ho avo, sy nanandratra ny tendrony hatrany amin'ny rahona, ary niavonavona noho ny fisandratry ny fony,

¹¹ dia natolotro izy ho eo an-tànan'ny andriamanitry ny firenena hataony amin'izay sitrapony; noroahako izy, noho ny haratsiany.

¹² Notapahan'ny hafa firenena - firenena masiaka indrindra amin'ny firenena, - navelany teo izy; teny an-tendrombohitra aman-dohasaha rehetra teny no niampatramparan'ny sampany; ny rantsany tapaka nitsingidina teny amin'ny mason-driaka rehetra amin'ny tany; nihataka niala tamin'ny alokalony ny firenen'ny tany rehetra, ka dia nandao azy avokoa.

¹³ Ny tapatapany ahatongavan'ny voromanidina rehetra hipetraka, ary ny rantsany itsofohan'ny biby rehetra any an-tsaha:

¹⁴ mba tsy hisy hazo voavoly amin'ny rano, hisondrotra ho avo, sy hanandratra ny tendrony hatrany amin'ny rahona, ary mba tsy hisy amin'izay mifo-drano, hatoky tena noho ny fiavonavonany; fa izy rehetra, samy voatendry ho faty, ho any ambanin'ny tany, hiharo amin'ny zanak'olombelona, dia amin'izay midina any an-davaka.

¹⁵ Izao no lazain'ny Tompo Iaveh: Tamin'ny andro nidinany ho any amin'ny seoly, nampanao fisaonana aho; ny rano lalina nosaronako, noho ny aminy; ny ony mandeha najanoko; ny ranobe, niato; Libàna, nampanjomboniko, noho ny aminy; ary ny hazo any an-tsaha, nilofika avokoa noho ny aminy.

¹⁶ Nataoko nihorohoro ny firenena, tamin'ny fiezinezin'ny fianjerany, tamin'ny namarinako azy ho any amin'ny seoly, miaraka amin'ireo midina any an-davaka. Nianina tany ambanin'ny tany ny hazon'i Edena rehetra, ny tsara tarehy sy kanto indrindra tany Libàna, dia izay rehetra bobo-drano.

¹⁷ Niara-nidina taminy koa ireo, ho any amin'ny seoly, nankany amin'ireo matin'ny sabatra, izay sandriny, sy nipetraka teo amin'ny alokalony, teo afovoan'ny firenena.

¹⁸ Koa iza no itovizanao voninahitra amam-pahalehibeazana, ireo hazon'i Edena? Havarina hianao miaraka amin'ny hazon'i Edena any ambanin'ny tany; hamparina eo amin'ireo tsy voafora, miaraka amin'ireo voatrobaky ny sabatra. Izany no hanjo an'i Faraona, mbamin'ny vahoakany maro, - teny marin'ny Tompo Iaveh.

Toko faha-32

¹ Tamin'ny taona faharoa ambin'ny folo, volana faharoa amain'ny folo, tamin'ny andro voalohan'ny volana dia tonga tamiko ny tenin'ny Tompo, nanao hoe:

² Ry zanak'olona, manaova hira fitomaniana an'i Faraona, mpanjakan'i Ejipta, ka lazao aminy hoe: Ry lionan'ny firenena ocirc;, levona hianao! Tahaka ny mamba teo anatin'ny ranomasina hianao, niezaka tany amin'ny oninao hianao, ary nanakobana ny ranony tamin'ny tongotrao, ary nandoto ny lakan-dranony. ³ Ka izao no lazain'ny Tompo Iaveh: Hamelatra ny fandriko hamely anao aho; ka fitambaran'ny firenena maro no hoentiko manao izany, ka hotarihany hivoaka, amin'ny haratoko, hianao,

⁴ dia havelako eo amin'ny tany hianao, hatsipiko eny an-tampon-tanety hianao, ka ny voromanidina rehetra hoentiko hipetraka aminao; ary ny biby amin'ny tany rehetra, hataoko voky amin'ny tenanao.

⁵ Hataoko eny an-tendrombohitra ny nofonao, ary hofenoiko ny tapatapakao sisa ny lohasaha.

⁶ Hotondrahako ny ranao mandriaka ny tany, hatramin'ny tendrombohitra, ary ho feno anao ny mason-driaka.

⁷ Amin'ny hamonoako anao, hotakonako ny lanitra, ary hohamaiziniko ny kintana, ny masoandro hosaronako rahona; ny volana, tsy handefa intsony ny fahazavany.

⁸ Hotafiako fisaonana noho ny aminao ny kintana mamirapiratra rehetra eny an-danitra; ary ny taninao hosaronako aizim-be - teny marin'ny Tompo Iaveh.

⁹ Hataoko mitebiteby ny fon'ny firenena maro, rahefa ampandrenesiko ny faharavanao ireo firenena, any amin'ny tany tsy fantatrao.

¹⁰ Hataoko talanjona noho ny aminao ny firenena maro; hihena velona, noho ny aminao, ny mpanjakany, rahefa ampandihiziko eo imasony ny sabatro; ary hanjonitra lava izao izy amin'ny andro haharavanao, samy manahy ny ainy avy.

¹¹ Fa izao no lazain'ny Tompo Iaveh: Ny sabatry ny mpanjakan'i Babilona, ho tonga aminao!

¹² Ny ankabeazam-bahoaka, hataoko lavo, amin'ny sabatry ny mahery, izay masiaka eo amin'ny firenena rehetra; haongany ny reharehan'i Ejipta, ary ny vahoaka rehetra ao aminy ho voafongotra.

¹³ Tsy hasiako miangana ny biby fiompiny rehetra, eny amoron'ny rano betsaka; tsy hokobanin-tongotr'olona intsony ireny na hokobanin-kitrom-biby intsony.