Bokin'i Daniely

Toko faha-14

³⁶ Ary Habakoka niantso hoe: Ry Daniely mpanompon'Andriamanitra ô, raiso ny sakafo alefan'Andriamanitra ho anao. ³⁷ Ka hoy ny navalin'i Daniely: Andriamanitra ô, tsarovanao tokoa aho, fa tsy mandao an'izay tia anao hianao. ³⁸ Dia nitsangana hihinana Daniely. Ary nataon'ny anjely tao amin'ny fitoerany indray, niaraka tamin'izay, Habakoka. ³⁹ Nony tamin'ny andro fahafito, tonga ny mpanjaka hitomany an'i Daniely; nanatona ny lavaka izy, dia nijery ary indro Daniely nipetraka teo afovoan'ny liona.

⁴⁰ Niantso izy tamim-peo avo hoe: Lehibe hianao, ry Tompo, Andriamanitr'i Daniely, ary tsy misy hafa, hafa-tsy hianao ihany! ⁴¹ Dia nesoriny avy tao an-davaky ny liona izy. Ary ireo nitady hahafaty azy kosa no nasainy natsipy tao, ka voarapaka vetivety foana, teo imasony. ⁴² Tamin'izay ny mpanjaka nanao hoe: Aoka ny mponina rehetra eran'ny tany rehetra hatahotra ny Andriamanitr'i Daniely; fa izy no Mpamonjy, izy no manao famantarana amam-pahagagana eto ambonin'ny tany; izy no nanafaka an'i Daniely tao an-davaky ny liona.

Bokin'i Osea

Toko voalohany

¹ Tenin'ny Tompo, tonga tamin'i Osea, zanak'i Beerì, tamin'ny andron'i Oziasa sy Joatama sy Akaza ary Ezekiasa, mpanjakan'i Jodà, sy tamin'ny andron'i Jeroboama, zanak'i Joasa, mpanjakan'Israely.

² Tamin'ny niandohan'ny nitenenan'ny Tompo tamin'i Osea, izao no nolazain'ny Tompo tamin'i Osea: Mandehàna hianao, makà vady tena janga, aman-janaky ny fijangajangana, satria tsy misy ataon'ny tany hafa-tsy ny misaraka amam-bady amin'ny fandaozana an'ny Tompo.

³ Dia nandeha izy, naka an'i Gomera, zanakavavin'i Debelaïma, ary nanana anaka ravehivavy, ka nitera-dahy taminy. ⁴ Ary hoy Iaveh taminy: Ataovy hoe Jezrahely ny anarany, fa andro vitsy sisa, dia hovaliako ny taranak'i Jeho noho ny ra nalatsaka tao Jezrahely, ary hotaperiko ny fanjakan'ny taranak'Israely. ⁵ Amin'izany andro izany, hotapahiko, eo amin'ny tanilemaka Jezrahely, ny tsipìkan'Israely. ⁶ Ary nanana anaka indray ravehivavy ka nitera-bavy, dia hoy Iaveh tamin'i Osea: Ataovy hoe Lo-Rokhama no anarany, fa tsy hiantra intsony ny taranak'Israely aho ka hamela heloka azy. ⁷ Fa ny taranak'i Jodà no hiantrako; ary Iaveh Andriamaniny no hamonjeko azy ireo; fa tsy amin'ny tsipìka, na amin'ny sabatra, na amin'ny ady, na amin'ny soavaly, na amin'ny mpitaingin-tsoavaly no hamonjeko azy. ⁸ Nony notazany Lo-Rokhama, dia nanana anaka indray ravehivay, ka nitera-dahy. ⁹ Dia hoy Iaveh tamin'i Osea: Ataovy hoe Lô-Ammì no anarany, fa hianareo tsy vahoakako, ary izaho tsy ho Andriamanitrareo.

Toko faha-2

¹ Ny isan'ny zanak'Israely dia ho tahaka ny fasika amin'ny ranomasina izay tsy afatra na isaina, ary any amin'ny tany nilazana taminy hoe: Tsy vahoakako hianareo, no hanaovana ny hoe: Zanak'Andriamanitra velona.

² Ary hiara-mivory ny taranak'i Jodà sy ny taranak'Israely, ka hanangana filoha iray hiombonany, dia hiakatra hiala amin'ny tany, fa ho lehibe ny andron'i Jezrahely. ³ Lazao amin'ny rahalahinareo hoe: Ammì! sy amin'ny anabavinareo hoe: Rokhama. ⁴ Mifandahara amin-dreninareo, mifandahara! Fa izy tsy vadiko intsony, ary izaho tsy vadiny intsony. Aoka hesoriny hiala amin'ny tavany, ny fijangajangany, ary tsy ho eo afovoan'ny nonony ny fanabodoany,

⁵ fandrao izy hampihanjahanjaiko hataoko toy ny tamin'ny andro nahaterahany, hampanjariko toy ny efitra, hataoko toy ny tany karankaina, ary hataoko matin'ny hetaheta.

⁶ Tsy hamindra fo amin'izay zanany aho, fa zanaky ny fijangajangana ireny;

⁷ satria nijangajanga reniny, nanao zava-mahamenatra ilay torontoroina azy; fa hoy izy: Izaho handeha any amin'ireo lehilahiko, izay manome ahy ny mofoko aman-dranoko, ny volon'ondry aman-drongoniko, ny diloilo aman-divaiko.

⁸ Noho izany, indro aho hanampina ny làlanao amin'ny tsilo; hanangana tamboho aho, ka tsy hahita ny làlany intsony izy.

⁹ Hanaraka ny lehilahiny izy fa tsy hahatratra an'ireny; hitady an'ireny izy fa tsy hahita azy. Izay izy vao hanao hoe: Handeha aho hody any amin'ny vadiko taloha, fa niadana aho tamin'izany noho ny ankehitriny.

¹⁰ Tsy nahalala izy, fa izaho no nanome azy ny vary, ny divay vaovao sy ny diloilo sy nampitombo ho azy ny volafotsy sy ny volamena izay nampiasainy ho an'i Baala.

¹¹ Koa halaiko indray ny variko amin'ny androny, sy ny divaiko vaovao amin'ny taonany, sady hesoriko ny volon'ondry aman-drongoniko, izay enti-manarona ny fitanjahany.

¹² Ary ankehitriny, habaribariko ny fahamenarany eo imason'ireo lehilahiny, ary tsy misy hahafaka azy amin'ny tanako.

¹³ Hatsahatro avokoa ny fifaliany rehetra; ny fetiny, ny voaloham-bolany, ny sabatany, ary ny fetiny lehibe rehetra.

¹⁴ Horavako ny voalobony aman'aviaviny, izay nataony hoe: Izany no tangy nomen'ireo lehilahiko ahy; ka hataoko manjary ala ireny, ary ny biby dia no hihinana azy.

¹⁵ Hovaliako izy noho ny andron'ireo Baala, izay nanolorany emboka; tamin'ny andro niravahany masombola ny fehivozona, sy nanarahany ny lehilahiny; fa izaho kosa nohadinoiny, - teny marin'ny Tompo.

¹⁶ Koa noho izany dia indro aho hitarika azy sy hitondra azy any an'efitra, ary hiteny aminy ao am-pony;

¹⁷ ary avy ao homeko azy ny tanim-boalobony, mbamin'ny lohasaha Akhora ho varavaram-panantenana; ka any izy hamaly toy ny tamin'ny andro fahatanorany, sy toy ny tamin'ny andro niakarany avy any amin'ny tany Ejipta.

¹⁸ Amin'izany andro izany - teny marin'ny Tompo, hianao hiantso ahy hoe: Vadiko: fa tsy hiantso ahy intsony hoe: Baala-ko.

¹⁹ Hesoriko amin'ny vavany, ny anaran'ireo Baala, ka tsy hotononina amin'ny anarany intsony ireny.

²⁰ Amin'izany andro izany aho hanao fanekena ho azy, amin'ny biby dia, amin'ny voromanidina, ary amin'ny biby mandady amin'ny tany; hofoanako tsy hisy amin'ny tany ny tsipìka aman-tsabatra ary ny ady, ka hataoko mandry fehizay izy.

²¹ Hofofoiko mba ho ahy mandrakizay hianao; hofofoiko ho ahy hianao amin'ny rariny sy ny hitsiny, ary amin'ny fahasoavana sy ny fitiavana:

²² hofofoiko ho ahy amin'ny fahamarinana hianao, ka hahalala an'ny Tompo.

²³ Izao no ho tonga amin'izany andro izany: Izaho hamaly, - teny marin'ny Tompo, izaho hamaly ny fangatahan'ny lanitra, ary izy hamaly ny fangatahan'ny tany;

²⁴ ny tany hamaly ny fangatahan'ny vary sy ny divay vaovao ary ny diloilo, ary ireo hamaly ny fangatahan'i Jezrahely.

²⁵ Hafafiko amin'ny tany ho ahy Israely, ary hanao famindram-po amin'i Lo-Rokhama aho sy hilaza amin'i Lo-Ammì hoe: Vahoakako hianao, ary izy hanao hoe: Andriamanitro.

Toko faha-3

¹ Ary hoy Iaveh tamiko: Mandehàna indray, mitiava vehivavy izay tian'ny lehilahiny anankiray ka manitsakitsa-bady: tahaka ny itiavan'ny Tompo ny zanak'Israely, nefa izy ireo kosa mivadika mankany amin'andriamani-kafa, sady tia ampembam-boaloboka.

² Novidiko sikla volafotsy dimy ambin'ny folo sy orja iray homera, ary orja iray letheka, izy;

³ dia hoy aho taminy: Hianao hijanona eo, ho ahy, mandritra ny andro maro; tsy hijangajanga, tsy ho an'ny lehilahy hafa hianao; ary izaho koa hanao torak'izany aminao. ⁴ Fa mandritra ny andro maro ny zanak'Israely no hitoetra tsy manam-panjaka, tsy manam-panapaka, tsy manan-tsorona, tsy manan-tsangam-bato, tsy manan'efoda ary tsy manan-terafima. ⁵ Rahefa afaka izany vao hibebaka ny zanak'Israely, ka hitady an'ny Tompo Andriamaniny sy Davida mpanjakany, indray; hiverina amim-pangovitana amin'ny Tompo sy amin'ny hatsaram-pony izy ireo, amin'ny faran'ny andro.

Toko faha-4

¹ Henoy ny tenin'ny Tompo, ry zanak'Israely, fa manan'ady amin'ny mponin'ny tany Iaveh, satria tsy misy intsony na ny fahamarinana na ny fiantrana na ny fahalalana an'Andriamanitra ao amin'ny tany.

² Fa ny olona dia mivadika fianianana, mandainga, mamono, mangalatra, maka vadin'olona; ary manao an-keriny, ka ny ra nalatsaka mifanolotra ny ra nalatsaka.

³ Noho izany, misaona ny tany, ary tsy manan-kery ny mponina rehetra ao aminy, hatramin'ny biby any an-tsaha sy ny voromanidina; ringana mbamin'ny hazandrano any anaty ranomasina aza.

⁴ Nefa aza misy manohatra, aza misy mitaraina, fa efa toy ny manana ady amin'ny mpisorona ny firenenao.