Bokin'i Osea
Toko faha-4
5 Ho tafintohina hianao, amin'ny antoandro; hiara-tafintohina aminao koa ny mpaminany amin'ny alina; ary hataoko levona ny reninao.6 Very noho ny tsy fahalalana ny vahoakako; noho hianao nanary ny fahalalana, dia hariako tsy ho amin'ny fisoronako koa hianao. Nanadino ny lalàn'Andriamanitrao hianao; ka hanadino ny zanakao koa aho.
7 Izy rehetra, na firy na firy, samy nanota tamiko ka dia hampodiko ho henatra ny voninahiny.
8 Mivoky amin'ny fahotan'ny vahoakako izy ireo; ary tsy maniry afa-tsy ny faharatsiany.
9 Ho sahala ny hanjo ireny mpisorona ireny sy ny vahoaka; ho faiziko izy, noho ny làlany ary hatsingeriko aminy ny asany.
10 Hihinana izy fa tsy ho voky; hijangajanga fa tsy hitombo; satria efa nahafoy an'ny Tompo, tsy hanompoany azy izy.
11 Mahavery saina ny fijangajangana, ny divay, ny ranom-boaloboka.
12 Ny tapa-kazony no ilan'ny vahoakako saina, ary ny tehiny no manoro azy ny ho avy, fa misy saim-pijangajangana nampania ny vahoakako, ary lasa nijangajanga nanalavitra ny Andriamaniny.
13 Manatitra sorona eny an-tampon-tendrombohitra izy, mandoro emboka eny amin'ny havoana, eny ambany oaka amam-peopilié ary terebintha, satria tsara alokaloka ireny. Noho izany raha mijangajanga ny zanakavavinareo, sy maka vadin'olona ny vehivavinareo tanora,
14 samy tsy hofaiziko na ny zanakavavinareo noho ny fijangajangany, na ny vinantovavinareo tanora noho ny fakany vadin'olona; satria, na ireo koa aza, mihataka ho any amin'ny vehivavy janga, sy miara-manatitra sorona amin'ny karam-bavy. Ary mivarin-ko faty ny vahoaka tsy misaina.
15 Raha hianao no mijangajanga, ry Israely, aoka i Jodà tsy hilatsaka amin'ny heloka! Aza mankany Galgala, na miakatra any Betavena ary aza mianiana hoe: Velona Iaveh!
16 Satria Israely efa naditra, toy ny vantotr'ombivavy mitokona; ankehitriny kosa Iaveh hiandry azy toy ny zanak'ondry eny amin'ny tany lemaka malalaka.
17 Tafaraikitra amin'ny sampy Efraima; avelao izy ho eo!
18 Raha vao avy misotro izy ireo, dia rafitra mijangajanga. Zava-mahamenatra no hany tadiavin'ireo mpanapany.
19 Namihina azy tamin'ny elany ny rivotra, ka ho latsaka an-kenatra izy ireo noho ny sorona nataony.
Toko faha-5
1 Mandrenesa izao, ry mpisorona; mihainoa tsara, ry taranak'Israely; manongilàna sofina, ry taranaky ny mpanjaka; fa hianareo no hamoahana ny teny fitsarana, satria hianareo no efa fandrika tao Masfà sy fandrika harato voavelatra ao ambonin'i Tabora.2 Nataon'izy ireo mihoa-pampana ny fahadisoany, tamin'ny sorona nataony; fa ho famaizana anareo rehetra kosa aho!
3 Mahalala an'i Efraima aho ary tsy takon'amiko Israely; ary hianao, ry Efraima, nijangajanga, ary Israely nandoto tena.
4 Tsy avelan'ny asa nataony hiverina amin'Andriamanitra izy ireo, fa saim-pijangajangana no eo afovoany, ka tsy mahalala an'ny Tompo izy.
5 Ny avonavon'Israely no vavolombelona manameloka azy; ho lavon'ny helony, Israely sy Efraima; hiara-davo amin'ireo koa Jodà.
6 Hitondra ny ombiny aman'ondriny izy ireo, handeha hitady an'ny Tompo, nefa tsy hahita azy, fa nisaraka tamin'ireo izy.
7 Namitaka an'ny Tompo izy ireo, fa niteraka zaza hafa firenena; ary ankehitriny ho levon'ny volana ambony izy mbamin'ny ananany.
8 Tsofy ao Gabaà ny anjomara; ary ao Ramà ny trompetra; miantsoa vonjy taitra ao Betavena! Mitandrema hianao, ry Benjamina!
9 Horavana Efraima amin'ny andro famaizana; ny amin'ny hanjo ny fokon'Israely zava-tsy maintsy to no ambarako.
10 Ireo mpanapaka an'i Jodà efa toy ny mpamindra faritany; hampidiniko amin'izy ireo ny fahatezerako toy ny rano.
11 Ampahorina sy torotoroin'ny fitsarana Efraima satria ninia nanaraka ny sampy tsinontsinona izy.
12 Koa tahaka ny kalalao aho amin'i Efraima, ary tahaka ny fahalovana amin'ny taranak'i Jodà.
13 Rahefa nahita ny aretiny Efraima, ary Jodà ny ratrany, dia nankany amin'i Asora Efraima ary naniraka ho any amin'ny mpanjaka anankiray izy, hamaly ny ratsy natao taminy; tsy ho afa-manasitrana anareo anefa izany mpanjaka izany ka tsy ho afaka aminareo ny ferinareo.
14 Fa ho tahaka ny liona aho, amin'i Efraima, ary ho tahaka ny liona tanora amin'ny taranak'i Jodà. Izaho dia izaho no hamiravira, dia lasa mandeha; hitondra ny rembiko, ka tsy hisy haharombaka izany amiko.
15 Handeha aho hody any amin'ny fonenako, mandra-pihaikiny ny maha-meloka azy, ka hitadiavany ny tavako. Fa hitady ahy izy ireo, rahefa azom-pahoriana.
Toko faha-6
1 Andeha isika hiverina amin'ny Tompo;2 fa izy no namiravira, izy no hahasitrana antsika; mikapoka izy, nefa hamehy ny ferintsika koa.
3 Rahefa afaka indroa andro dia hataony velona indray isika; amin'ny andro fahatelo dia hatsangany isika, ka ho velona eo anatrehany. Mahalalà isika, mikeleza aina hahalala an'ny Tompo isika. Mahatoky, toy ny an'ny maraina, ny fiposahany; ary ho avy amintsika toy ny tandrifin-drahona toy ny fara-orana manamando ny tany.
4 Inona no hataoko aminao, ry Efraima? Inona no hataoko aminao, ry Jodà? Fa ny fitiavam-bavakareo dia tahaka ny rahona maraina, tahaka ny ando amin'ny maraina ka levona vetivety.
5 Noho izany nataoko potika, tamin'ny tenin'ny mpaminany, novonoiko tamin'ny tenin'ny vavako izy ireo; toy ny mazava miposaka no ho fitsarana anao.
6 Fa ny fitiavam-bavaka no sitrako fa tsy ny sorona; ary ny fahalalana an'Andriamanitra mihoatra noho ny sorona dorana.
7 Nivadika ny fanekena, tahaka an'i Adama, anefa izy ireo; fa nivadika tamiko teo.
8 Galaada dia tanànan'ny mpanao ratsy, sady isehoan'ny mariky ny ra nalatsaka.
9 Mova tsy ny andian-jiolahy manao otrika, ny andiam-pisorona mamono olona, eo amin'ny làlana mankany Sikema; fa mahavita heloka be vava izy ireo.
10 Zava-mahatsiravina no hitako teo amin'ny taranak'Israely; fa ao no ijangajangan'i Efraima, sy andotoan'Israely tena.
11 Hianao koa, ry Jodà, misy fijinjana voatendry ho anao, raha avy izay hamoriako ny vahoakako avy amin'ny fahababoana.
Toko faha-7
1 Fony aho nitady hanasitrana an'Israely no nihariharin'ny haratsian'i Efraima sy ny haratsiam-panahin'i Samaria: fa ny lainga ataony fanao; ny mpangalatra miditra an-trano, ny jiolahy mikarenjy eny ivelany.2 Ary izy ireo tsy misaintsaina akory ao am-pony fa tsarovako avokoa ny faharatsiany. Ankehitriny manodidina azy ny heloka be vava nataony, dia indreo izy eo anatrehako.
3 Ny mpanjaka, falifaliny amin'ny haratsiany; ary ny mpanapaka amin'ny laingany.
4 Izy rehetra mpaka vadin'olona avokoa, hoatra ny fatana nampirehetan'ny mpanao mofo afo, izay mitsahatra tsy misoron'afo, hatramin'ny nametafetany ny koba ka mandra-pivontony.
5 Amin'ny andron'ny mpanjakantsika, ny mpanapaka mankarary tena amin'ny hafanan'ny divay; niara-naninji-tànana tamin'ny mpananihany izy io.
6 Fa tamin'ny firaisan-tetik'izy ireo, nataony toy ny ao anaty fatana ny fony; ka ny mpanao mofony natory mandritra ny alina, ary nony maraina nirehitra hoatra ny lelafo midedadeda.
7 Mahamay hoatra ny fatana avokoa izy rehetra, ka ny mpitsara azy nolevoniny. Ny mpanjakany lavo avokoa, tsy nisy niantso ahy anefa izy rehetra.
8 Mifangaro amin'ireo firenena Efraima, hoatra ny mofomamy tsy voavadika Efraima.
9 Levon'ny hafa firenena ny heriny, nefa tsy fantany akory izany; efa mipi-bolo ny lohany, nefa tsy fantany akory izany.