Bokin'i Osea
Toko faha-10
13 Fa hianareo niasa ny faharatsiana, nijinja ny faharatsiana, nihinana ny vokatry ny lainga. Nitoky tamin'ny làlanao hianao, sy tamin'ny hamaroan'ny lehilahy maherinao.14 Indro velona ny tabataba ao amin'ny vahoakanao, ary horavana avokoa ny tanàna mimandanao, tahaka ny nandravan'i Salmana an'i Beta-Arbela, tamin'ny andron'ny ady izay nahatorotoro ny reniny teo ambonin'ny zanany.
15 Izany no nataon'i Betela taminareo, noho ny haratsianareo loza loatra. Vao tonga ny maraina dia levona teo ny mpanjakan'Israely.
Toko faha-11
1 Tia an'Israely aho fony mbola zaza izy; ka hatrany Ejipta nisy fiantsoana nataoko ny zanako.2 Nisy fiantsoana nataoko tamin'izy ireo; nefa izy niamboho. Nanolotra sorona amin'ny Baala izy, sy emboka ho an'ny sampy.
3 Ary izaho nampiana-mandeha an'i Efraima, sy nitantana azy tamin'ny sandriny, nefa tsy fantany fa nanolikoly azy aho.
4 Nentiko tamin'ny kofehy fitondrana olona izy ireo, dia tamin'ny fatoran'ny fitiavana; mova aho tsy ilay nanainga ny jioga ho azy, eo ambonin'ny valanoranony, ary niondrika taminy sy nampihinana azy.
5 Tsy hiverina ho any amin'ny tany Ejipta izy; ary Asora no ho mpanjakany, noho izy tsy nety nibebaka.
6 Hampandihizana sabatra ao an-tanànany ka handrava ny hidiny ary handevona izany, noho ny fisainan'izy ireo.
7 Efa tapakevitra ny hisaraka amiko ny vahoakako; nisy niantso azy any ambony, nefa tsy misy miandrandra maso akory izy ireo.
8 Hataoko ahoana no famoy anao, ry Efraima, na fanolotra anao, ry Israely? Hataoko ahoana no famela anao ho tahaka an'i Adama, na fampanjary anao ho tahaka an'i Seboima? Onena ny foko ato anatiko, ary indray miontana ny fangorahako rehetra.
9 Tsy hanarana ny firehetan'ny hatezerako aho, tsy horavako fanindroany Efraima. Fa Andriamanitra aho, fa tsy olombelona; eo afovoanao ilay Masina, ka tsy ho tonga aho mitondra ny fisafoahako.
10 Hanaraka an'ny Tompo izy ireo; hierona toy ny liona izy, ka rahefa mierona izy dia hidodododo avy any Andrefana amin-kovitra ireo zanany.
11 Hidodododo avy any Ejipta izy ireo, mangovitra toy ny voronkely ary avy any amin'ny tany Asora toy ny domohina; ka hamponeniko ao an-tranony, - teny marin'ny Tompo.
Toko faha-12
1 Efraima nanodidina ahy tamin'ny lainga, ary ny taranak'Israely tamin'ny tafika, Joda koa efa tapa-kofehy ny amin'ny momba an'Andriamanitra, ny amin'ny momba an'Ilay Masina izay mahatoky.2 Efraima, mihinan-drivotra, sy manenjika ny rivotra avy atsinanana. Mampiavosa lainga amam-pandozana mandritra ny andro izy; manao fanekena amin'i Asora izy ireo, ka entina ho any Ejipta ny diloilo.
3 Manana ady amin'i Jodà koa Iaveh; efa hamay an'i Jakoba, araka ny làlany izy, sady hamaly azy araka ny asa nataony.
4 Mbola tao am-bohoka Jakoba nanongona ny rahalahiny, ary tamin'ny fahavitrihany dia nitolona tamin'Andriamanitra.
5 Niady tamin'ilay anjely ka nandresy azy; nitomany sy nifona taminy; dia nahita azy tao Betela indray, ary tao no niresahan'Andriamanitra tamintsika.
6 Ary Iaveh no Andriamanitry ny tafika; Iaveh no anarany.
7 Ary hianao kosa dia mba hiverina amin'Andriamanitrao; tandremo ny famindram-po sy ny rariny; ary miandrasa an'Andriamanitrao mandrakariva.
8 Kanaana mitana mizàna mandainga; ny miharaka no tiany.
9 Efraima nanao hoe; Mba nihary harena ihany aho anefa, ka nahazo fananana be aho; ary amin'izay azoko rehetra, dia tsy ho hita amiko izay famonoana antoka azo atao ho fahotana.
10 Ary izaho no Iaveh Andriamanitrao hatrany amin'ny tany Ejipta; mbola hampitoetra an-day anao aho toy ny amin'ny andro fety.
11 Niteny tamin'ny mpaminany aho, ary izaho koa no nahamaro ny fahitana, ary niteny tamin'ny fanoharana aho tamin'ny alalan'ny mpaminany.
12 Raha zava-poana Galaada, dia ho tsinontsinona koa izy ireo; nanao sorona omby tany Galgalà izy; noho izany ny oteliny ho toy ny antontam-bato eny amin'ny saha voasoritsoritra.
13 Nandositra ho any amin'ny tany Arama Jakoba; nanompo mba hahazoany vady Israely; dia niandry ondry izy hahazoany vady.
14 Ary mpaminany no nentin'Andriamanitra nampiakatra an'Israely avy tany Ejipta, mpaminany no nentiny niahy azy.
15 Nanantsy mafy ny fahatezeran'Andriamanitra Efraima, ka havelany hitsingerina aminy ny rany, ary hovalian'ny Tompo izy noho ny fanalam-baraka nataony.
Toko faha-13
1 Raha vao niteny Efraima, dia nihorohoro ny olona; nisandratra izy teo amin'Israley. Fa tonga meloka izy noho ny amin'i Baala, ka maty.2 Ary ankehitriny izy ireo mandroso manota ihany; nanao sarin-javatra anidina tamin'ny volany, dia sampy araka izay hevitra foroniny: asan'ny mpanao tao-zavatra foana izany! Izao no filazan'ny olona azy ireo! Mpanao sorona olona, manoroka zanak'omby.
3 Noho izany izy ireo dia ho tahaka ny rahona maraina, ho toy ny ando amin'ny maraina malaky levona, ho tahaka ny akofa paohin'ny rivotra avy eo am-pamoloana, ary ho tahaka ny setroka mivoaka avy eo am-baravarankely.
4 Ary izaho no Iaveh, Andriamanitrao, hat'rany amin'ny tany Ejipta; tsy hahalala Andriamanitra hafa-tsy izaho hianao; ary eo ivelan'ny tenako tsy misy mpamonjy.
5 Nahalala anao tany an'efitra aho tany amin'ny tany fahamainana.
6 Nony nahazo hanina izy ireo, dia nivoky; nivoky izy ka nisondrotra ny fony; ka izany no nanadinoany ahy.
7 Izaho kosa amin'izy ireo, dia ho toy ny liona, ho tahaka ny pantera, hamitsahako eny amoron-dàlana izy.
8 Hiantoraka aminy toy ny orsa very anaka aho, handriatra ny sarom-pony aho ary handrapaka azy eo, toy ny liom-bavy; ny biby any an-tsaha hamotipotika azy.
9 Izao no mahavery anao, ry Israely, dia hianao manohitra ahy, manohitra an'izay vonjinao.
10 Aiza ary izay mpanjakanao, hamonjy anao ao an-tanànanao rehetra? Ary aiza ireo mpitsaranao, izay nilazanao hoe: Omeo mpanjaka amam-panapaka aho?
11 Omeko mpanjaka hianao amin'ny hatezerako; ary esoriko ireny amin'ny fahavinirako.
12 voafehy ny helok'i Efraima, atao tsara tahiry ny fahotany.
13 Voan'ny fanaintainan'ny vehivavy, raha miteraka, izy; zaza tsy manam-pahendrena, fa nony tonga ny fotoana, tsy mandroso izy ho teraka.
14 Hanafaka azy amin'ny herin'ny seoly aho, hanavotra azy amin'ny fahafatesana. Ry fahafatesana ô aiza ny aretina fandripahanao? Ry seoly ô, aiza ny fandringananao? Miafina amin'ny masoko ny nenina.
15 Fa hahavokatra eo amin'ny rahalahiny Efraima; nefa ho tonga ny rivotra avy atsinanana; hiakatra avy any an'efitra ny fofon'ain'ny Tompo; ka ho maina ny loharanony; ho ankina ny fantsakany; hobaboiny ny firaketan'ny zava-tsarobidy rehetra.
Toko faha-14
1 Hofaizina Samaria, fa niodina tamin'Andriamaniny; ho lavon-tsabatra izy ireo! hotorotoroina ny zanany madinika; ary hotatahana ny kibon'ireo vadiny bevohoka.2 Miverena amin'ny Tompo, ry Israely, fa ny helokao no nahalavo anao.
3 Mitondrà teny hianareo, miaraka aminareo, ka miverena amin'ny Tompo; lazao aminy hoe: Esory ny heloka rehetra ary raiso izay tsara. Aoka hatolotray anao ho solon'ny vantotr'ombalahy ny teny avy amin'ny molotray.
4 Asora tsy hamonjy anay, izahay tsy hitaingin-tsoavaly; na hiteny hoe: Ry Andriamanitray ô! amin'ny asan'ny tànanay. Hianao, izay ahitan'ny kamboty fiantrana!
5 Hositraniko ny fiodinany; ho tiako amin'ny foko tokoa izy, fa efa niala taminy ny fahatezerako.
6 Ho toy ny ando aho amin'Israely; ka haniry toy ny lisy izy, ary handatsaka ny fakany tahaka an'i Libàna.