Bokin'i Amosy

Toko faha-5

¹⁵ Ankahalao ny ratsy, fa ny tsara no tiavo, ary ampanjakao eo am-bavahady indray ny rariny; angamba Iaveh Andriamanitry ny tafika, dia hamindra fo amin'izay sisa amin'i Josefa!

¹⁶ Koa izao no lazain'ny Tompo, ny Andriamanitry ny tafika, ny Tompo: Hisy hidradradradra eny amin'ny kianja rehetra eny: hisy hanao hoe: Indrisy! indrisy! eny an-dalambe rehetra eny; hisy hiantso ny mpiasa hisaona, sy higogogogo, miaraka amin'izay mahay midridridridry.

¹⁷ Hitomany ny olona eo amin'ny tanim-boaloboka rehetra: fa handalo eo afovoanao aho, hoy Iaveh.

¹⁸ Loza ho an'izay maniry ny andron'ny Tompo! Ho inona ho anareo moa, ny andron'ny Tompo? Ho haizina izy, fa tsy fahazavana.

¹⁹ Toy ny olona mandositra ny liona, nefa tonga mitsena azy kosa ny orsa; miditra ao an-tranony izy, mitehin-tànana amin'ny rindrina dia kakerin'ny menarana!...

²⁰ Moa tsy aizina va ny andron'ny Tompo fa tsy fahazavana, haizina tsy misy mangirana?

²¹ Halako sy tsy ahoako akory izay fetinareo, tsy hankamamiko akory ny fiangonanareo.

²² Raha manolotra sorona dorana amam-panatitra hianareo tsy mankatelina izany aho; ary izay fisoronanareo zanak'omby matavy tsy jereko velively.

²³ Halaviro ahy ny finaonaonan'ny hiranareo; aoka tsy ho reko akory izay feon-dokanganareo!

²⁴ Fa aoka hisononoka hoatra ny rano kosa ny fitsarana; ary toy ny ranondriaka tsy mety ritra ny fahamarinana!

²⁵ Moa nanatitra sorona amam-panatitra ho ahy va hianareo, ry taranak'Israely, nandritra ny efapolo taona tany an'efitra?

²⁶ Ny lain'ny mpanjakanareo no nolanjainareo, mbamin'i Kijoma, ny sampinareo, amam-kintan'andriamanitrareo, izay nataonareo ho anareo;

²⁷ koa hoentiko hatao sesitany ambadik'i Damasa hianareo, hoy Iaveh: Andriamanitry ny tafika no anarany.

Toko faha-6

¹ Loza ho an'ireo mandry fahizay ao Siona, sy mitoetra matoky ao an-tendrombohitr'i Samaria; dia ireo malaza indrindra amin'ilay firenena, lohan'ny firenena, ireo izay hatonin'ny taranak'Israely!

² Miampità ho any Kalne hianareo ka zahao; avy ao dia mankanesa any Hamata ilay lehibe: midìna koa ho any Geta ao amin'ny Filistina: moa miadana noho ireto fanjakana ireto va ireo tanàna ireo, ary lehibe noho ny anareo va ny tanin'izy ireo?

³ Hianareo manao ny andro mahory ho mbola lavitra ary mampanatona ho akaiky ny fanjakan'ny fahasiahana!

⁴ Mandrimandry eo ambony farafara ivoara izy ireo; sy mivalandotra eo, amin'ny sofà-ny; mihinana ny zanak'ondry avy amin'ny andian'ondry izy ireo, sy ny zanak'omby voafahy ao an-tranon'omby.

⁵ Mandihindihy manaraka ny feon-dokanga izy; namorona zava-maneno, toa an'i Davida.

⁶ Kaopy lehibe no isotroany divay; diloilo manitra faran'izay tsara no ihosorany; ary tsy mankararirary azy akory ny loza manjo an'i Josefa.

⁷ Koa ho lasa izy ireo hatao sesin-tany ho lohan'ny lasan-ko babo; ary tsy hisy intsony ny hobim-pifalian'ireo mpanaram-batana ireo.

⁸ Efa nianiana tamin'ny tenany, ny Tompo Iaveh, - teny marin'ny Tompo Andriamanitry ny tafika. Tsy tiako mainty ny avonavon'i Jakoba, ary halako ny lapany; ka hatolotro mbamin'izay rehetra ao aminy ny tanàna.

⁹ Ary raha misy folo lahy no sisa ao amin'ny trano iray, dia ho faty ireo.

¹⁰ Ho tonga ny havany anankiray mbamin'izay mandoro ny faty, ka hitondra ny faty, dia hoesoriny ny taolam-paty, hiala ao an-trano; ary ny anankiray hilaza amin'izay ao amin'ny faran'ny trano: Mbola misy ihany va ato miaraka aminao? ka hovaliany hoe: Tsy misy olona intsony! Dia hataon'ilay voalohany hoe: Mangina! Fa tsy tokony hotononina ny anaran'ny Tompo.

¹¹ Satria, indro Iaveh fa efa mandidy, ka nampianjerany trano lehibe ho rava foana, ary ny madinika ho montsana.

¹² Moa ny vatolampy ihazakazahan'ny soavaly, na ampiasaina ny omby va izany? no dia navadikareo ho poizina ny hitsiny, ary ho abisinta, ny vokatry ny rariny.

¹³ Dia mifaly hianareo amin'izay zava-poana; hianareo manao hoe: Tsy tamin'ny herinay va, no nahazoanay fahefana?

¹⁴ Fa indro hanangana hamely anareo aho, ry taranak'Israely, - teny marin'ny Tompo, Andriamanitry ny tafika - hanangana firenena anankiray hampahory anareo, hatrany amin'ny hadilalan'i Hamata ka hatrany amin'ny lohasan-driaky ny efitra.

Toko faha-7

¹ Izao no nasehon'ny Tompo Iaveh tamiko, dia indro izy fa namorona valala, tamin'ny fotoana vao itsimohan'ny kolokolo, dia ny kolokolo avy nijinjana ho an'ny mpanjaka.

² Nony tapitra lanin'ireny avokoa ny ahitra amin'ny tany, dia hoy aho: Ry Tompo Iaveh ô, mba mamelà heloka! Ahoana no haharetan'i Jakoba? fa kely izy.

³ Ary nanenina amin'izay Iaveh. Tsy hisy izany, hoy Iaveh.

⁴ Izao no nasehon'ny Tompo Iaveh tamiko: dia indro tonga Iaveh hanasazy amn'ny afo, dia nandevona ny hantsana lehibe ny afo, sy nandevona ny anjara-lovan'ny Tompo.

⁵ Ka hoy aho: Mba mitsahara, ry Tompo Iaveh ô! Ahoana no haharetan'i Jakoba? fa kely izy.

⁶ Nanenina Iaveh. Tsy hisy izany koa, hoy ny Tompo Iaveh.

⁷ Izao no nasehon'ny Tompo tamiko: dia indro fa nitsangana teo ambonin'ny rindrina mijoro ny Tompo ary nisy kofehy pilao teny an-tanany.

⁸ Hoy Iaveh tamiko: Inona no hitanao ry Amosy? Ka namaly aho hoe: Kofehy pilao. Dia hoy ny Tompo: Indro aho manisy ny kofehy pilao, eo amin'Israely vahoakako; fa tsy hamela ny helony intsony.

⁹ Ny fitoerana avon'Isaaka ho foanana; ny fitoera-masin'Israely horavana; ary hitsangana hamely ny taranak'i Jeroboama amin'ny sabatra aho.

¹⁰ Ary Amasiasa, mpisorona ao Betela, naniraka hilaza amin'i Jeroboama, mpanjakan'Israely hoe: Mitetika ny hikomy aminao eo amin'ny taranak'Israely Amosy; tsy zakan'ny tany intsony ny teniny rehetra.

¹¹ Satria izao no tenin'i Amosy: Jeroboama ho fatin'ny sabatra; ary Israely hoentin-ko babo hiala amin'ny taniny. ¹² Dia hoy Amasiasa tamin'i Amosy: Ry mpahita ô, mandehana mandositra any amin'ny tanin'i Jodà, ka any hianao no mihinàna hanina; any hianao no maminania.

¹³ Fa aza maminany atý Betela intsony, satria fitoera-masin'ny mpanjaka ny atý, ary tranom-panjakana. ¹⁴ Izao no navalin'i Amosy an'i Amasiasa: Tsy mba mpaminany aho na zanaky ny mpaminany; fa mpiandry omby sy mpamboly aviavy. ¹⁵ Ary nalain'ny Tompo tany aorian'ny biby fiompy aho, dia nataon'ny Tompo tamiko hoe: Mandehana hianao, maminany any amin'Israely vahoakako. ¹⁶ Koa ankehitriny, mihainoa ny tenin'ny Tompo hianao: Hoy hianao hoe; Aza maminany ny hamelezana an'Israely; ary aza miteny ny hamelezana ny taranak'Isaaka!... ¹⁷ Koa izao no lazain'ny Tompo: Ny vadinao hovetavetaina ao an-tanàna; ny zanakao lahy aman-janakao vavy, ho lavon-tsabatra; ny taninao, hozaraina amin'ny famolaina, ary hianao ho faty eo amin'ny tany maloto; ary Israely hoentin-ko babo hiala amin'ny taniny.

Toko faha-8

¹ Izao no nasehon'ny Tompo Iaveh tamiko: dia indreto voankazo masaka iray sobika.

² Ary hoy izy: Inona no hitanao, ry Amosy? Dia hoy ny navaliko: Voankazo masaka iray sobika. Ka hoy Iaveh tamiko: Tonga ny farany ho an'Israely vahoakako: Tsy hamela azy intsony aho, izao sisa izao.

³ Amin'izany andro izany, ny hira ao an-dapa ho zary finaonaonana - teny marin'ny Tompo Iaveh. Ny faty ho betsaka, ary hazera hatraiza hatraiza amim-pahanginana ireny.

⁴ Mihainoa izao, hianareo mihinana ny mahantra, sy mitady hamongotra ny mavomavo amin'ny tany,

⁵ manao hoe: Rahoviana no ho tapitra ny voaloham-bolana; mba hahazoantsika mivarotra vary; ary ny sabata mba hamohantsika ny tranom-bary, ka ny efah hakelezina; ny sikla hampitomboina; ny mizàna, hatao mandainga, hamitahana.

⁶ Dia novidintsika vola ny fadiranovana, ary ny mahantra, noho ny amin'ny kapa iray lomisy, sady hivarotantsika ny vary loha-kororoka?