Bokin'i Mikea

Toko faha-5

⁵ Hiandry ny tanin'i Asora amin'ny sabatra ireo, sy ny tanin'i Nemroda eo ambavahadiny; ary izy hanafaka antsika amin'ny Asiriana, rahefa tonga amin'ny tanintsika ireny, sy hanitsaka ny faritanintsika ny tongony.

⁶ Ary ny sisa amin'i Jakoba, any amin'ny firenena maro, ho toy ny ando avy amin'ny Tompo, toy ny orana mipitipitika milatsaka amin'ny ahi-maitso; izy tsy miandry izay olona akory, na matoky ny zanak'olombelona.

⁷ Ary ny sisa amin'i Jakoba, any amin'ny firenena, eo afovoan'ny vahoaka maro, dia ho toy ny liona eo amin'ny biby any an'ala, ho toy ny liona tanora eo amin'ny andian'ondry; ka raha mandalo sy manosihosy ary mamiravira izy, tsy misy mahavonjy.

⁸ Aoka hiainga ny tànanareo hamely izay manohitra anareo, ary aoka ho ringana ny fahavalonareo!

⁹ Amin'izany andro izany, - teny marin'ny Tompo, ny soavalinao haringako eo aminao, ny kalesinao hofongorako.

¹⁰ Ny tanàna eo amin'ny taninao horavako; ny tranonao mimanda harodako avokoa.

¹¹ Ny famosavianao, hesoriko eny an-tànanao, ka tsy hisy mpimasy intsony eo aminao.

¹² Ny sampy aman-tsangam-batonao ho foanako eo aminao, ka tsy hivavaka amin'ny asan-tànanao intsony hianao.

¹³ Hongotako ny aserah eo afovoanao, ary harodako ny tanànanao.

¹⁴ Ary amin'ny hatezerako amam-pahavinirako aho hamaly faty an'ireo firenena izay tsy nihaino.

Toko faha-6

¹ Mihainoa ary izay lazain'ny Tompo hianareo: - Mitsangàna hianao ary ataovy vita ny adinao eo anoloan'ny tendrombohitra, ary aoka ny havoana handre ny feonao!

² Mihainoa ny adin'ny Tompo hianareo, ry tendrombohitra, mbaminareo fanorenan'ny tany tsy azo ovana! Fa manan'ady amin'ny vahoakany Iaveh; ka handahatra manohitra an'Israely izy. -

³ Inona no nataoko taminao, ry vahoakako, inona no nampalahelovako anao? Valio ny teniko.

⁴ Fa nitondra anao niakatra avy any amin'ny tany Ejipta aho, ary nanavotra anao tamin'ny andro nahandevozana; ary naniraka teo anoloanao, an'i Moizy sy Aarona ary Maria.

⁵ Tsarovy ary, ry vahoakako, ny hevitra nomen'i Balaka, mpanjakan'i Moaba, sy ny navalin'i Balaama, zanak'i Beora, azy. Tsarovy ny hatrany Setima ka hatrany Galgala, hahafantaranao ny fahamarinan'ny Tompo.

⁶ Inona no hoentiko hanoloana an'ny Tompo sy hiankohoka eo anatrehan'ny Andriamanitry ny any ambony? Hanoloana azy mitondra sorona dorana va aho dia zanak'omby efa iray taona?

⁷ Hankasitrahan'ny Tompo va ny ondry arivoarivo, ny renirano diloilo alinalina? Hanolotra ny lahimatoako va aho, noho ny heloko, dia ny naloaky ny kiboko, noho ny fahotan'ny fanahiko?

⁸ Efa nampahalalaina anao, ry olombelona, izay tsara, sy izay ilain'ny Tompo aminao, dia ny hanao ny fahamarinana, ny ho tia famindram-po, ary ny hanaraka an'Andriamanitra amim-panetren-tena.

⁹ Miantso mafy miteny amin'ny tanàna ny feon'ny Tompo - ary fahendrena kosa ny manaja ny anaranao: - Mihainoa hianareo, ny tsorakazo, mbamin'izay nandidy azy!

¹⁰ Mbola misy, ao an-tranon'ny ratsy fanahy ihany va ny harena tsy marina, sy ny efah tsy ampy, maharikoriko?

¹¹ Moa hadio va aho, raha mana-mizàna mandainga, sy vato tsy marina ao anatin'ny kitapo?

¹² Feno fahasiahana ny mpanankarena amin'ity tanàna ity; milaza lainga ny mponina ao aminy, ary fitaka eo am-bavany fotsiny, ny lelany.

¹³ Koa izao kosa no ahy, ka hasiako kapoka mahafaty hianao, haringako noho ny fahotanao hianao.

¹⁴ Hihinana hianao, nefa tsy ho voky, ary ho ao anatinao ny hanoanana; hahatakao lavitra ihany nefa tsy hisy hovonjenao na inona na inona, ary na izay voavonjinao aza, hatolotro ny sabatra.

¹⁵ Hamafy hianao, fa tsy hijinja; hamia oliva hianao, fa tsy hihosotra diloilo; hamia ranom-boaloboka, fa tsy hisotro divay.

¹⁶ Mitandrina ny fitsipik'i Amrì ny olona, mbamin'ny fanaon'ny taranak'i Akaba rehetra, ary mandeha araka ny toroheviny hianareo, mba hanolorako anareo ho amin'ny fandringanana, ary ny mponina amin'ny tany, ho amin'ny fisitrisirana, ka hivesaranareo ny latsan'ny vahoakako.

Toko faha-7

¹ Indrisy! ity izaho toy ny rahefa vita ny fihotazam-boankazo fahavaratra, toy ny rahefa vita ny fitsimponam-boaloboka efa voaoty: tsy misy salohy iray akory hohanina! Ny voaloham-boan'aviavy, izay tsiriritan'ny fanahiko, tsy misy na iray aza.

² Efa niala tsy hita eto an-tany intsony ny olona tia vavaka, ary tsy misy marina intsony amin'ny olombelona. Fa izy rehetra samy manotrika handatsa-dra; samy mihaza ny rahalahiny sy mamela-pandrika aminy avokoa.

³ Ny ratsy dia efa eo ny tànana hahatontosa azy; ny mpanapaka mamoritra; ny mpitsara mametra izay kolikoly ho azy, ary ny lehibe mampiharihary ny fitsiriritany; dia indray mifoko hanao ny ratsy izy.

⁴ Ny tsara indrindra aminy, no toy ny tsilo; ny mahitsy indrindra, ratsy noho ny fefy roy. - Tonga ny andro voalazan'ny tilinao, tonga ny andro famaizana anao; amin'izao ka dia efa safo-kenatra izy ireo! -

⁵ Aza mino izay sakaiza hianareo, na matoky izay ifankazarana indrindra: na eo anatrehan'ilay mandry eo am-pofoanao aza dia tano ny teny ao am-bavanao!

⁶ Fa ny zanakalahy manao amin-drainy hoe adala; ny zanakavavy mitsangan-kanohitra ny reniny; ny vinantovavy hanohitra ny rafozam-bavy; samy manana ho fahavalony ny olona amin'ny ankohonany ihany.

⁷ Fa izaho kosa hitodi-maso amin'ny Tompo, hanantena an'Andriamanitry ny famonjeko; hihaino ahy ny Andriamanitro.

⁸ Aza mifaly noho ny amiko, ry kala fahavaloko, fa na lavo aza aho, mbola hiarina; na mitoetra amin'ny maizina aza aho, Iaveh no fahazavako.

⁹ Hivesatra ny fahatezeran'ny Tompo aho, satria nanota taminy, mandra-pihaikiny ny hiaro ahy amin'ny adiko, sy hampiharihariako ny rariny momba ahy; havoakany aho ho amin'ny mazava, dia hibanjina ny fahamarinany.

¹⁰ Hahita izany anie ikala fahavaloko, ka ho safo-kenatra anie izy, dia izy ilay nanao tamiko hoe: Aiza izay Iaveh Andriamanitrao? Hibanjina azy ny masoko: amin'izao dia hohitsakitsahina izy, toy ny fotaka eny amin'ny arabe.

¹¹ Ho avy ny andro hananganana ny mandanao indray; amin'izany andro izany hofoanana ny didy.

¹² Amin'izany andro izany, ho tonga hatr'aty aminao ny olona, avy any Asiria sy avy any amin'ireo tanànan'i Ejipta avy any Ejipta, ka hatr'any amin'ny ony, hatramin'ny ranomasina iray ka hatramin'ny ranomasina hafa, ary hatramin'ny tendrombohitra iray, ka hatramin'ny tendrombohitra hafa.

¹³ Hanjary efitra ny tany, noho ny amin'ny mponina ao aminy: izany no vokatry ny asany.

¹⁴ Andraso amin'ny tehinao ny vahoakanao dia ny ondry lovanao, izay monina mitokana any an'ala, eo afovoan'i Karmela; aoka hiraoka any Basàna sy any Galaada izy, toy ny tamin'ny andro taloha.

¹⁵ Toy ny tamin'ny andro nivoahanao avy any amin'ny tany Ejipta, haneho zava-mahagaga aminy aho.

¹⁶ Hahita izany ireo firenena, ka hahamenatra azy avokoa ny heriny rehetra; hitampim-bava izy ireo, hangintsigintsina ny sofiny.

¹⁷ Hilela-bovoka, toy ny menarana izy; ary toy ny bibilavan'ny tany, dia hivoaka amin-tahotra miala amin'ny fiereny; hanatona an'ny Tompo Andriamanitsika, amin-kovitra izy, ary hatahotra anareo.

¹⁸ Iza no Andriamanitra tahaka anao, izay manesotra ny fahotana, ary mamela fahadisoana, an'izay sisa amin'ny lovanao? Tsy mba ataony mahery mandrakizay ny fahatezerany fa ny mamindra fo no sitrany.

¹⁹ Hamindra fo amintsika indray izy ka hanitsakitsaka ny faharatsiantsika. Harianao any ambany ranomasina, ny fahotany rehetra;

²⁰ hampiseho amin'i Jakoba ny fahamarinanao hianao, sy amin'i Abrahama ny famindram-ponao; izay efa nianiananao tamin'ny razanay hatramin'ny andro fahataloha.

Bokin'i Nahoma

Toko voalohany

¹ Teny momba an'i Niniva. Bokin'ny fahitan'i Nahoma avy any Elkosy.

² Andriamanitra saro-piaro sy mpamaly heloka Iaveh, mpamaly heloka sady mahalala fahatezerana; mamaly izay manohitra azy Iaveh, sady mitahiry fahatezerana amin'ny fahavalony.

³ Mahari-po ela Iaveh sady be hery ary tsy misy meloka avelany fotsiny. Tadio aman-tafio-drivotra no handehanan'ny Tompo, ary rahona no vovoka diaviny.

⁴ Mandrahona ny ranomasina izy dia ataony maina; ary ataony ritra ny ony rehetra. Malazo Basàna sy Karmely, malazo koa ny zava-manirin'i Libàna.