Bokin'i Habakòka
Toko voalohany
8 Mailaka noho ny leoparda ny soavaliny, sady liana noho ny amboadia amin'ny hariva. Mampiriotra ny mpitaingin-tsoavaliny; avy lavitra ny mpitaingin-tsoavaliny, manidina toy ny voromahery lian-te-hihinana.9 Tonga mba hanao hasiahana avokoa izany firenena izany; ny masony feno halianana mijery any alohany any; manangona babo toy ny fasika izy.
10 Izay io dia mihomehy izay mpanjaka, mihanihany izay mpanapaka; ny trano mimanda rehetra ihomehezany, vovo-tany no asavovony dia afany ireny.
11 Dia mandroso ny tafio-drivotra ka mihoatra, ary izy mahazo heloka; ny herin'ny tenany dia izay no andriamaniny!
12 Moa tsy hatramin'ny fiandohana va hianao, ry Iaveh, Andriamanitro, ilay masiko? Tsy ho faty izahay. Iaveh ô, ny nanorenanao izany vahoaka izany dia hahatanteraka ny rariny, ny mba hamay no nanaovanao mafy orina azy, ry Vatolampiko.
13 Ny masonao madio loatra, tsy hahajery ny ratsy; ary hianao tsy mety mibanjina ny fahoriana. Ka nahoana no hojerenao fotsiny ireo mpamitaka ; ary hangina hianao, raha mihinana ny marina noho izy, ny ratsy fanahy ?
14 Hataonao toy ny hazan-dranomasina va ny olombelona, sy toy ny biby mandady tsy manan-dehibe?...
15 Fa alainy amin'ny fintana izany rehetra izany, sy sarihany amin'ny haratony, ary angoniny amin'ny harato tarihina, ka dia mifaly sy mientan-karavoana izy.
16 Ka noho izany, izy manao sorona ho an'ny haratony, sy manatitra emboka manitra ho an'ny harato tarihiny; satria ireo no ahazoany anjara hanina matavy sy sakafo matsiro.
17 Hitohy mandrakariva va ny fandoarany ny ao amin'ny haratony, sy ny famonoany, tsy ananany antra, ny firenena?
Toko faha-2
1 Tiako ny mitana ny anjara toerako, sy mipetraka eo amin'ny tilikambo fiambenana, dia hitandrina aho hahitako izay holazain'ny Tompo amiko, sy izay havaliko ny fananarana hatao amiko.2 Dia namaly ahy Iaveh, ka nanao hoe: Soraty ny fahitana ka sokiro amin'ny fafana, mba hamakian'ny olona azy moramora.
3 Fa mbola misy fahitana amin'ny fotoam-boafetra; efa mandroso ho amin'ny fotoana fanaperana azy izy, ka tsy hamitaka; raha miadam-pihavy izy, andraso ihany, satria ho avy tokoa, fa tsy ho diso.
4 Izay mibohibohy ny fanahy ao anatiny, dia tsy mba amin'ny làla-mahitsy, fa ny marina no ho velona amin'ny finoany.
5 Ary fanampin'izany koa mamitaka ny divay. Tsy haharitra ny olona miavonavona, izay mampitombo ny fahalianany ho lehibe toy ny seoly sy tsy mety voky, hoatra ny fahafatesana; mamory ny firenena rehetra ho ao aminy, ary manangona ny vahoaka rehetra ho azy.
6 Moa va izy ireo, dia izy rehetra, tsy hanonona oha-teny momba azy amam-panoharana sy ankamantatra mihatra aminy? Hanao hoe: Loza ho an'izay mandraoka ny tsy azy, - mandra-pahoviana? - sy ho an'izay mandray ho entana tataoviny ny zavatra natao tsatoka.
7 Tsy hitsangana tampoka va ireo tompon-trosa, tsy hifoha va ireo ho mpamono anao ka hianao kosa indray, moa tsy ho rembiny?
8 Noho hianao nambabo firenena maro, dia mba hobaboin'ny firenena sisa rehetra kosa, noho ny ran'olona nalatsaka, sy ny fandozàna natao tamin'ny tany, na tamin'ny tanàna, na tamin'ny mponina rehetra ao aminy.
9 Loza ho an'izay manangon-karena tsy an-drariny ho an'ny taranany, hanaovany amin'ny avo dia avo ny akaniny, mba handosirany tsy ho tratry ny loza!
10 Manao hevitra hanala baraka ny taranakao hianao; tamin'ny nandringananao firenena maro dia nanota tamin'ny tenanao hianao.
11 Fa ny vato amin'ny rindrina hitaraina, ary ny sakamandimby amin'ny rafi-trano no hamaly azy.
12 Loza ho an'izay manao tanàna amin'ny fandatsahan-dra; sy manorina renivohitra amin'ny tsy marina!
13 Tsy izao va no sitrapon'ny Tompon'ny tafika dia ny hiasan'ny olona ho an'ny afo, sy ny hisasaran'ny firenena ho an'ny zava-poana?
14 Fa ny tany ho feno ny fahalalana ny voninahitry ny Tompo, toy ny fandrakotry ny rano ny fanambanin'ny ranomasina.
15 Loza ho an'izay mampisotro ny namany, dia hianao izay mampidina ny hatezeranao, mandra-pahamamony, mba hijery ny fitanjahany!
16 Henatra no nivokisanao fa tsy voninahitra; misotroa koa hianao, ka asehoy ny tsy mahavoafora anao; hivadika hirotsaka aminao ny kapoaka ao an-tànana ankavanan'ny Tompo; ho sarona fahafaham-baraka ny voninahitrao.
17 Fa hitsingerina aminao ny fahasiahana namelezana an'i Libàna mbamin'ny fandringanana ny biby raiki-tahotra mahatsiravina, noho ny ran'olona nalatsaka, sy ny loza natao tamin'ny tany, na tamin'ny tanàna na tamin'ny mponina rehetra ao aminy.
18 Inona no asan'izay sarin-javatra voapaika, no mipaika azy ny mpamorona azy, na ny sampy anidina sy ny mpanambara lainga, no matoky izay asan-tànany ny mpamorona azy, amin'ny fanamboarana andriamanitra moana?
19 Loza ho an'izay manao amin'ny hazo hoe: Mitsangàna! sy amin'ny vato moana hoe: Mifohaza! Hampianatra va izy? Indro fa voapetaka volamena sy volafotsy izy, nefa tsy mba misy fofon'aina akory ao anatiny.
20 Iaveh kosa, ao amin'ny tempoliny masina; aoka hangina eo anatrehany hianao, ry tany rehetra.
Toko faha-3
1 Vavaka nataon'i Habakòka, mpaminany. Araka ny fomban-dahateny ditirambika.2 Iaveh ô, nandre izay nampandrenesinao aho, dia raiki-tahotra aho, Iaveh ô! Velomy ny asanao amin'ny taona mifandimby; ataovy fantatra amin'ny taona mifandimby izy. Na eo amin'ny hatezeranao aza, mahatsiarova ny hamindra fo.
3 Tamy avy any Temàna Andriamanitra, ary avy any an-tendrombohitra Faràna ilay Masina (Selà). Nanarona ny lanitra ny fiandrianany; ary nameno ny tany ny voninahiny.
4 Toy ny fahazavan'ny masoandro miposaka ny famirapiratany; misy tana-masoandro avy eo amin'ny tànanay; ao no ieren'ny heriny.
5 Mandeha eo anoloany ny fandripahana; ary manaraka ny diany ny tazo mahamay.
6 Nijanona izy, ka nampihorohoro ny tany; nijery izy ka nampihozongozona ny firenena; torotoro ny tendrombohitra mandrakizay, nietry ny havoana fahagola; ny làlany taloha no narahany.
7 Hitako latsaka am-pahoriana, ny lain'i Kosana, ary mihorohoro ny lay amin'ny tanin'i Moaba.
8 Amin'ny ony va no mahatezitra an'ny Tompo? sa amin'ny ony no irehetran'ny fahatezeranao? amin'ny ranomasina no mampisafoaka anao, raha ilay mitaingina ny soavalinao iny hianao, raha mitaingina ny kalesim-pamonjenao?
9 Ny tsipìkanao miseho miharihary; ny zana-tsipìkanao dia ireo fianianana voatononao (Selà). Ataonao mivava ny tany ho ranon-driaka.
10 Nahita anao ny tendrombohitra ka mangovitra, nisy rambon-dranitra nandalo, niloa-peo ny hantsana sady nananga-tànana mankany ambony.
11 Tafajanona eo amin'ny fitoerany ny masoandro amam-bolana; ka ny fanjelanjelatry ny zana-tsipìkanao no andehanan'ny olona, sy ny fahazavan'ny lefonao mamirapiratra.
12 Mitetitety ny tany amim-pahatezerana hianao, hitsahanao amim-pahavinirana ny firenena.
13 Nivoaka hamonjy ny olonao hianao, hanafaka an'ilay Voahosotrao; notapahanao ny vovonan'ny tranon'ny ratsy fanahy, nahariharinao hatrany ambany ny fiorenany (Selà).
14 Notrobaranao tamin'ny zana-tsipìkany ihany, ny lohan'ireo antokon'olony, izay nibosesika hamely ahy, tamim-panaovana hobin-kafaliana toy ny efa handevona ny ory ao amin'ny fieren'izy ireo.
15 Hitsahanao amin'ny tongo-tsoavalinao ny ranomasina, ny fitambaran'ny rano be.
16 Vao nandre aho dia nivadika ny tsinaiko; mipararetra amin'izany feo izany ny molotro, idiran'ny fahalovana ny taolako, mangovitra ny lohaliko eo ambaniko, noho ny tsy maintsy hiandrasako amim-piadanana ny andro mahory, izay hiakaran'ny fahavalo hampahory ny vahoaka anankiray.
17 Satria amin'izany ny aviavy tsy hamontsina, ny voaloboka tsy hisy hotoazana; ny oliva tsy hisy voany; ary ny saha tsy hahavoka-kanina; tsy hisy hita intsony ao amin'ny vala ny ondry ary ny fahitra tsy hisy omby intsony.
18 Fa izaho dia te-hiravoravo amin'ny Tompo, te-hientan-kafaliana amin'ny Andriamanitry ny famonjena ahy.
19 Iaveh Tompo no heriko; ataony toy ny an'ny serfavavy ny tongotro, ary ampandehaniny eny amin'ny fitoerako avo aho. Ho an'ny filohan'ny mpihira, amin'ny zava-manenoko tendrena.
Bokin'i Sofonia
Toko voalohany
1 Ny tenin'ny Tompo izay natao tamin'i Sofonia, zanak'i Kosì, zanak'i Godoliasa, zanak'i Amariasa, zanak'i Ezekiasa, tamin'ny andron'i Josiasa, zanak'i Amona, mpanjakan'i Jodà.