Evanjely Masin'i Jesoa-kristy Nosoratan'i Md. Matio

Toko faha-27

¹¹ Dia tonga teo anatrehan'ny governora Jesoa ka nanontanin'ny governora hoe: Hianao va no mpanjakan'ny Jody? Voalazanao, hoy Jesoa taminy;

¹² fa ny fiampangana nataon'ny lohandohan'ny mpisorona sy ny loholona azy no tsy novaliany kely akory, ¹³ ka hoy Pitaly taminy: Tsy renao va izany zavatra maro iampangana anao izany? ¹⁴ Fa tsy namaly izy na dia indraim-bava aza, ka gaga dia gaga ny governora. ¹⁵ Ary isaky ny fetin'ny Paka dia fanaon'ny governora ny mandefa mpifatotra anankiray tian'ny vahoaka. ¹⁶ Ary tamin'izay dia nisy mpifatotra anankiray malaza atao hoe Barabasy, ¹⁷ ka rahefa nivory ny vahoaka, dia hoy Pilaty taminy: Iza no tianareo halefako ho anareo, Barabasy sa Jesoa izay atao hoe Kristy? ¹⁸ satria fantany fa fialonana no nanoloran'izy ireo an'i Jesoa. ¹⁹ Ary raha nipetraka teo amin'ny fitsarana izy, dia nampaniraka taminy ny vadiny hilaza hoe: Aza manao na inona na inona amin'io Lehilahy marina io hianao, fa nampahory ahy be ihany izay nanofisako azy halina izay. ²⁰ Tamin'izay ny lohandohan'ny mpisorona sy ny loholona nahatarika ny vahoaka hangataka an'i Barabasy sy hampamono an'i Jesoa. ²¹ Dia niteny indray ny governora nanao hoe: Iza no tianareo halefako ho anareo amin'izy roa lahy? Barabasy, hoy izy ireo. ²² Ary hoy Pilaty taminy: Ahoana kosa àry no hataoko amin'i Jesoa, izay atao hoe Kristy? ²³ Aoka hofantsihana amin'ny hazo fijaliana izy, hoy izy rehetra. Fa inona àry no ratsy nataony e? hoy ny governora. Dia vao mainka nihorakoraka izy nanao hoe: Fantsiho amin'ny hazo fijaliana izy. ²⁴ Nony hitan'i Pilaty, fa tsy nahomby izy fa vao mainka nitombo aza ny tabataba, dia nampaka rano izy ka nanasa tànana teo anatrehan'ny vahoaka ary nanao hoe: Afa-tsiny amin'ny ran'io Lehilahy marina io aho; fa raharahanareo.

²⁵ Dia namaly ny vahoaka rehetra nanao hoe: Aoka ho aminay sy amin'ny zanakay ny rany. ²⁶ Tamin'izay dia nalefany Barabasy, ary Jesoa nony efa nasainy nokapohina dia natolony azy hofantsihana amin'ny hazo fijaliana. ²⁷ Tamin'izay dia nentin'ny miaramilan'ny governora ho any amin'ny toerana fitsarana Jesoa, sady novoriny hanodidina azy ny miaramila namany. ²⁸ Dia nendahany ny fitafiany ka nampitafiny kapaoty jaky izy; ²⁹ ary nandrandrana fehiloha tsilo izy ireo, dia nasatrony ny lohany, sady nampitaniny volotara ny tànany an-kavanana; rahefa izany dia nandohalika an-kila teo anatrehany izy ary naneso azy hoe: Arahaba, ry mpanjakan'ny Jody. ³⁰ Dia nororany izy, ary nalainy ny volotara ka nikapohany ny lohany. ³¹ Nony efa nolalaoviny toy izany izy, dia nesoriny ilay kapaoty ka nampitafiny azy indray ny fitafiany, ary nentiny hofantsihana amin'ny hazo fijaliana izy. ³² Rahefa tafavoaka ny tanàna, dia nifanena tamin'ny lehilahy Sireneana anankiray atao hoe Simona izy ireo, ka notereny io hilanja ny hazo fijalian'i Jesoa. ³³ Ary nony tonga teo amin'ny tany atao hoe Golgotà izany hoe tanin'ny karan-doha, ³⁴ dia nomeny divay miharo afero izy hosotroiny; fa nony nandramany dia tsy nety nisotro izy. ³⁵ Ary rahefa voafantsika tamin'ny hazo fijaliana izy, dia nanaovany loka no fizara ny fitafiany, mba ho tanteraka ny teny nolazain'ny mpaminany hoe: Nozarainy ny fitafiako, ary nilokàny ny akanjoko;

³⁶ dia nipetraka niambina azy izy ireo. ³⁷ Teo ambonin'ny lohany dia nasiany soratra milaza ny nanamelohana azy manao hoe: ITY NO JESO MPANJAKAN'NY JODY. ³⁸ Nisy jiolahy roa niara-nofantsihana taminy tamin'ny hazo fijaliana, ny anankiray teo an-kavanany, ary ny anankiray teo an-kaviany. ³⁹ Ary izay nandalo dia nihifikifi-doha nanevateva azy ⁴⁰ nanao hoe: Ialahy, ilay mandrava ny tempolin'Andriamanitra sy manangana azy anatin'ny hateloana ity, vonjeo ilay ity ny tenan'ialahy; raha Zanak'Andriamanitra ialahy, mialà amin'ny hazo fijaliana. ⁴¹ Ny lohandohan'ny mpisorona sy ny mpanora-dalàna ary ny loholona dia naneso azy koa nanao hoe: ⁴² Ny sasany novonjeny, fa ny tenany kosa tsy hainy vonjena; raha mpanjakan'Israely izy, aoka hidina hiala amin'ny hazo fijaliana ankehitriny, dia hino azy isika. ⁴³ Natoky an'Andriamanitra izy, ka raha tia azy Andriamanitra dia aoka hanafaka azy ankehitriny, satria Zanak'Andriamanitra aho, hoy ny filazany. ⁴⁴ Dia nandatsa azy toy izany iretsy jiolahy roa izay niaraka nofantsihana taminy tamin'ny hazo fijaliana. ⁴⁵ Ary hatramin'ny ora fahenina ka hatramin'ny ora fahasivy dia rakotry ny aizina ny tany rehetra.

⁴⁶ Nony tokony ho tamin'ny ora fahasivy, dia niantso mafy Jesoa hoe: Elia, Elia, lamma sabaktany! izany hoe: Ry Andriamanitro! ry Andriamanitro, nahoana no dia nilaozanao aho? ⁴⁷ Raha nandre izany ny sasany tamin'izay teo dia nanao hoe: Miantso an'i Elia ilay ity. ⁴⁸ Dia nihazakazaka niaraka tamin'izay ny anankiray tamin'izy ireo ka nandray sponjy; nony novontosany vinaingitra dia notohiziny volotara ka natohony azy hotsentsefiny. ⁴⁹ Fa ny sasany nanao hoe: Aoka hoe hozahantsika raha ho avy hanafaka azy Elia. ⁵⁰ Ary niantso tamin'ny feo mahery indray Jesoa, dia niala aina. ⁵¹ Ary indro fa nisasaka roa hatrany ambony ka hatrany ambany ny efitra lamba teo amin'ny tempoly; nihorohoro ny tany, nitresaka ny vatolampy, ⁵² nisokatra ny fasana, ary betsaka ny fatin'ny olona masina efa nody mandry no nitsangana; ⁵³ ka nony efa nitsangana tamin'ny maty Jesoa dia nivoaka tamin'ny fasana izy ireo, ka niakatra tany an-tanàna masina ary niseho tamin'ny maro. ⁵⁴ Ilay kapiteny sy ny fehiny niambina an'i Jesoa kosa nony nahita ny horohoron-tany mbamin'ny zavatra rehetra tonga teo, dia raiki-tahotra mafy ka nanao hoe: Tena Zanak'Andriamanitra tokoa io Lehilahy io. ⁵⁵ Nisy vehivavy maromaro koa nitazana teny lavidavitra teny, dia ireo izay nanaraka an'i Jesoa sy nanompo azy hatrany Galilea: ⁵⁶ anisan'ireo Maria Madelena, sy Maria renin'i Jakoba sy Josefa, ary ny renin'ny zanak'i Zebede. ⁵⁷ Nony hariva ny andro, dia nisy lehilahy manan-karena anankiray avy any Arimatia atao hoe Josefa, izay mpianatr'i Jesoa koa,

⁵⁸ nanatona an'i Pilaty ka nangataka ny fatin'i Jesoa. Dia nasain'i Pilaty homena azy. ⁵⁹ Noraisin'i Josefa ny faty, dia nofonosiny lamba fotsy madio, ⁶⁰ ary naleviny tao amin'ny fasana vaovao nolavahana tamin'ny vatolampy, izay nampanaoviny ho an'ny tenany. Nony nakodiany ny vato makadiry tamin'ny varavaram-pasana, dia lasa izy.