Evanjely Masin'i Jesoa-kristy Nosoratan'i Md. Joany

Toko faha-18

⁶ Vao nilazan'i Jesoa hoe: Izaho no izy, dia nianotra izy ireo, ka niankarapoka tamin'ny tany. ⁷ Fa nanontany azy indray Jesoa nanao hoe: Iza no tadiavinareo? Dia hoy izy ireo: Jesoa avy any Nazareta. ⁸ Ka novalian'i Jesoa hoe: Efa voalazako taminareo fa izaho no izy; koa raha izaho no tadiavianareo, dia avelao handeha ireto. ⁹ Izy no nilaza izany dia mba hahatanteraka ny teny voalazany hoe: Tsy nisy very izay nomenao ahy, na dia iray aza. ¹⁰ Ary nanan-tsabatra Simona Piera ka notsoahany dia nasiany ny mpanompon'ny lehiben'ny mpisorona, ka afaka tery ny sofiny an-kavanana: Malkosy no anaran'ilay mpanompo.

¹¹ Fa hoy Jesoa tamin'i Piera. Ampidiro amin'ny tranony ny sabatrao; tsy hosotroiko va ny kapoaka nomen'ny Ray ahy? ¹² Tamin'izay ny antoko-miaramila sy ny tompon'arivo ary ny mpiandry raharaha nirahin'ny Jody, dia nisambotra an'i Jesoa, ka namatotra azy. ¹³ Tany amin'i Ana aloha no nitondrany azy, fa io no rafozan'i Kaifa izay lehiben'ny mpisorona tamin'izany taona izany;

¹⁴ ary Kaifa kosa no ilay nanome saina ny Jody hoe mahasoa raha maty ho an'ny vahoaka ny lehilahy anankiray. ¹⁵ Nanaraka an'i Jesoa tamin'izany i Piera sy ny mpianatra anankiray hafa; ary fantatry ny lehiben'ny mpisorona ilay mpianatra anankiray, ka niara-niditra tamin'i Jesoa tao amin'ny tokotanin'ny lehiben'ny mpisorona. ¹⁶ Fa Piera kosa nijanona tany ivelany tao akaikin'ny vavahady. Dia nivoaka ilay mpianatra izay fantatry ny lehiben'ny mpisorona, ka niteny tamin'ny vehivavy mpiandry vavahady, ary nampiditra an'i Piera. ¹⁷ Fa hoy ity ankizivavy mpiandry vavahady tamin'i Piera: Moa tsy isan'ny mpianatr'io Lehilahy io koa va hianao? Ary hoy izy: Tsia. ¹⁸ Nangatsiaka ny andro, ka nipetraka namindro teo amin'ny afo ny mpanompo sy ny mpiandry raharaha, ary dia mba niara-namindro taminy teo koa Piera. ¹⁹ Ary ny lehiben'ny mpisorona nanadina an'i Jesoa ny amin'ny mpianany sy ny fampianarany;

²⁰ ka hoy Jesoa namaly azy: Niteny am-pahibemaso tamin'ny olona rehetra aho, ary nampianatra mandrakariva tao amin'ny sinagoga sy ny tempoly, izay ivorian'ny Jody rehetra, fa tsy nilaza na inona na inona an-takona; ²¹ ka ahoana no anontanianao ahy? Ireo nihaino ahy no anontanio izay voalazako taminy, fa ireo no mahalala izay nampianariko. ²² Nony nilaza izany Jesoa, dia nasian'ny mpiandry raharaha anankiray tehamaina sy nataony hoe: Izany ve no famalinao ny lehiben'ny mpisorona? ²³ Jesoa namaly azy hoe: Raha ratsy ny teniko, lazao izay ratsy; fa raha tsara ihany kosa, nahoana no dia mamely ahy hianao? ²⁴ Dia nasain'i Ana nentina am-patorana ho any amin'i Kaifa lehiben'ny mpisorona izy. ²⁵ Ary Simona Piera nijanona namindro teo koa, ka nisy nanao taminy hoe: Moa tsy isan'ny mpianany koa va hianao? Fa nandà izy nanao hoe: Tsia.

²⁶ Dia hoy koa ny anankiray tamin'ny mpanompon'ny lehiben'ny mpisorona, izay havan'ilay notapahin'i Piera sofina: Tsy hianao va ilay hitako niaraka taminy tao anaty saha? ²⁷ Fa nandà indray Piera, ary niaraka tamin'izay dia nisy akoho naneno. ²⁸ Dia nentiny niala tao amin'i Kaifa Jesoa, ho any an-tranon'ny governora. Efa maraina ny andro tamin'izay. Tsy niditra tao an-trano anefa izy ireo, fandrao voaloto ka tsy afa-mihinana ny Paka.

²⁹ Koa Pilaty no nivoaka nanatona azy ireo teo ala-trano, nanao hoe: Inona no iampanganareo io Lehilahy io? ³⁰ Dia hoy ny navalin'izy ireo azy: Raha tsy mpanao ratsy izy, dia tsy ho natolotray anao. ³¹ Ka hoy Pilaty taminy: Ento izy, ka tsarao araka ny lalànareo. Fa hoy ny Jody namaly azy: Tsy manam-pahefana hanamelo-ko faty izahay. ³² Izany no tonga dia mba hahatanteraka ny teny nambaran'i Jesoa momba ny fahafatesana hanjo azy. ³³ Dia niditra tao an-trano Pilaty, ka niantso an'i Jesoa sy nanao taminy hoe: Moa mpanjakan'ny Jody va hianao? ³⁴ Jesoa namaly hoe: anao samy irery izany teny izany, sa an'olon-kafa nilaza ahy taminao? ³⁵ Dia namaly Pilaty nanao hoe: F'izaho angaha Jody? Ny firenenao sy ny mpisoronao no nanolotra anao tamiko, ka inona no nataonao? ³⁶ Jesoa namaly hoe: Tsy anisan'izao tontolo izao ny fanjakako: fa raha anisan'izao tontolo izao ny fanjakako, dia ho niady ny oloko, ka tsy ho voarain'ny Jody aho; fa tsy anisan'izao tontolo izao ny fanjakako.

³⁷ Dia hoy Pilaty taminy: Koa mpanjaka izany hianao? Ary novalian'i Jesoa hoe: Efa voalazanao. Mpanjaka aho. Teraka aho, sy tonga taty an-tany mba hanambara ny marina, ka izay rehetra mpanaraka ny marina, dia mihaino ny feoko. ³⁸ Inona no marina? hoy Pilaty taminy. Fa nony voalazany izany, dia nivoaka nankeo amin'ny Jody indray izy ka nanao tamin'ireo hoe: Raha izaho, dia tsy mahita izay helony na dia iray aza; ³⁹ fa araky ny fanao amin'ny Paka dia mandefa olo-meloka izay tianareo aho; koa tianareo ve ny handefasako ny mpanjakan'ny Jody? ⁴⁰ Fa nihorakoraka indray izy rehetra ka nanao hoe: Tsy izy, fa Barabasy. Kanefa jiolahy Barabasy.

Toko faha-19

¹ Tamin'izany, nalain'i Pilaty Jesoa ka nasainy nokapohina.

² Dia nandrandrana fehiloha tsilo ny miaramila ka nasatrony ny lohany, ary nampitafiny kapaoty jaky izy. ³ Rahefa izany, dia nanatona azy izy ireo, ka sady namely tehamaina azy no nanao hoe: Arahaba, ry Mpanjakan'ny Jody. ⁴ Dia nivoaka indray Pilaty ka nanao tamin'ny Jody hoe: Indro izy entiko manketo aminareo, mba ho fantatrareo fa tsy hitako mihitsy izay helony na dia iray aza. ⁵ Tamin'izay nivoaka Jesoa misatroka fehiloha tsilo sy mitafy kapaoty jaky, ka hoy Pilaty tamin'ny Jody: Indro ny Lehilahy. ⁶ Nony nahita azy ny lohan'ny mpisorona sy ny mpiandry raharaha, dia niantso nanao hoe: Fantsiho, fantsiho amin'ny hazo fijaliana izy. Fa hoy Pilaty tamin'izy ireo: Ento àry izy ka fantsihonareo, fa izaho tsy mba mahita izay helony. ⁷ Dia hoy ny Jody namaly azy: Manana lalàna izahay, ary araka ny lalànay dia tsy maintsy hovonoina izy, satria nanao ny tenany ho Zanak'Andriamanitra. ⁸ Nandre izany Pilaty vao mainka natahotra. ⁹ Ary niditra tao an-trano indray izy ka nanao tamin'i Jesoa hoe: Avy aiza moa hianao? Fa tsy namaly azy Jesoa.

¹⁰ Ka hoy Pilaty taminy: Izaho indray ve no tsy itenenanao? Tsy fantatrao angaha fa sady manam-pahefana handefa anao aho, no manam-pahefana hamantsika anao amin'ny hazo fijaliana koa? ¹¹ Dia hoy Jesoa hoe: Tsy hanam-pahefana amiko hianao raha tsy nomena anao avy any ambony izany; koa izay nanolotra ahy taminao no meloka kokoa noho hianao. ¹² Hatramin'izay dia nitady handefa azy Pilaty. Fa nantsointsoin'ny Jody hoe: Raha mandefa io hianao, dia tsy mba sakaizan'i Sezara, satria izay manao ny tenany ho mpanjaka dia mitsanga-kanohitra an'i Sezara.

¹³ Nony nandre izany teny izany Pilaty dia nitondra an'i Jesoa nivoaka, ka nipetraka teo amin'ny fitsarana, amin'ny fitoerana atao hoe Litostrotos, na Gabata amin'ny teny hebrio. ¹⁴ Andro fiomanana amin'ny Paka tamin'izay, ary tokony ho tamin'ny ora fahenina; dia izao no nolazain'i Pilaty tamin'ny Jody: Indro ny Mpanjakanareo. ¹⁵ Fa niantsoantso izy ireo nanao hoe: Esory, esory, fantsiho amin'ny hazo fijaliana izy. Ka hoy Pilaty taminy: Dia hofantsihako amin'ny hazo fijaliana ve ny Mpanjakanareo? Fa hoy ny lohan'ny mpisorona hoe: Izahay tsy mana-mpanjaka afa-tsy Sezara.