Ny Asan'ny Apostoly

Toko faha-9

²⁶ Dia nankany Jerosalema i Saoly, ka nitady hikambana tamin'ny mpianatra, nefa natahotra azy izy rehetra satria tsy ninoany fa mpianatr'i Jesoa koa izy. ²⁷ Tamin'izay nalain'i Barnabe izy ka nentiny tao amin'ny Apostoly, dia notantarainy tamin'izy ireo ny nahitany ny Tompo teny an-dàlana, sy ny nitenenany taminy, ary ny hasahiana nasehony tamin'ny nitoriany ny anaran'i Jesoa tao Damasa. ²⁸ Izay vao niara-niditra sy nivoaka tamin-dry zareo tao Jerosalema izy, sady nitory tamin-kasahiana tamin'ny anaran'ny Tompo. ²⁹ Niresaka tamin'ny jentily koa izy, ary niady hevitra tamin'ny Helenista; kanjo notadiavin'ireo hovonoina. ³⁰ Ka nony fantatry ny rahalahy izany, dia nateriny tany Sezarea izy, vao nalefany ho any Tarsy. ³¹ Niadana ny Eglizy eran'i Jodea sy Galilea ary Samaria manontolo fahizany, sady nandroso tsara sy nandeha tamin'ny fahatahorana ny Tompo izy, no nihamaro tamin'ny famporisihan'ny Fanahy Masina koa.

³² Tamin'izay, raha namangy ny mpianatra rehetra isan-tanàna i Piera, dia nankao amin'ny olona masina izay nonina tao Lidà koa, ³³ ka nahita lehilahy anankiray atao hoe Enea, izay nandry teo am-pandriana hatramin'ny valo taona, fa malemy, ³⁴ ary nanao taminy hoe: Ry Enea, hanasitrana anao Jesoa-Kristy; mitsangàna ka amboary ny fandrianao. Dia nitsangana niaraka tamin'izay izy. ³⁵ Nony nahita azy izay rehetra nonina tao Lidà sy Saròna, dia nibebaka nanatona ny Tompo avokoa. ³⁶ Ary tany Jope nisy vehivavy anankiray mpianatra atao hoe Tabità, na hoe Dorkasy raha adika, izay nahavita asa soa amam-piantrana betsaka.

³⁷ Narary izy tamin'izany andro izany, dia maty; ka nony avy nampandroiny ny fatiny, dia napetrany tao amin'ny efi-trano ambony. ³⁸ Ary Lidà moa dia akaikin'i Jope ihany; ka ren'ny mpianatra fa hoe ao Piera, dia naniraka roa lahy ho any aminy izy ireo hangataka azy hoe: Aza miatoato hankaty aminay. ³⁹ Dia nitsangana Piera ka niara-nandeha tamin'ireo. Nony tonga izy, dia nentiny tany amin'ny efitra ambony, ka nohodidinin'ny mpitondratena rehetra, izay sady nitomany no nampiseho taminy ny lamba aman'akanjo nataon'i Dorkasy fony fahavelony. ⁴⁰ Navoakan'i Piera avokoa ny olona rehetra, dia nandohalika izy ka nivavaka, vao nanatrika ny faty nanao hoe: Ry Tabità, mitsangàna. Dia nahirany ny masony, ka nony nahita an'i Piera izy, dia niarina. ⁴¹ Ary Piera kosa nanolo-tànana azy, sy nampitsangana azy; dia niantso ny olona masina sy ny mpitondratena, ka nanolotra azy velona tamin'izy ireo. ⁴² Niely eran'i Jope manontolo izany, ka betsaka no nino ny Tompo. ⁴³ Ary Piera nitoetra andro maromaro tany Jope, tao amin'ny mpandon-koditra anankiray atao hoe Simona.

Toko faha-10

¹ Ary tany Sezarea nisy lehilahy anankiray atao hoe Kornely, kapiteny tamin'ny antoko miaramila atao hoe Italiana.

² Olona tia vavaka sy natahotra an'Andriamanitra izy mbamin'ny ankohonany rehetra, ary nanao fiantrana be tamin'ny olona sy nivavaka tamin'Andriamanitra mandrakariva. ³ Indray antoandro tokony ho tamin'ny ora fahasivy, dia nisy anjelin'Andriamanitra anankiray hitany miharihary tamin'ny tsindrimandry, niditra tao aminy, sy nilaza taminy hoe: Ry Kornely! ⁴ Dia nijery azy izy, ka raiki-tahotra, sy nanao hoe: Ahoana, Tompoko? Ary hoy ny anjely taminy: Tafakatra eo anatrehan'Andriamanitra ho fahatsiarovana anao ny vavakao sy ny fiantranao. ⁵ Koa ankehitriny, maniraha olona ho any Jope haka an'i Simona anankiray, izay atao hoe Piera. ⁶ Mitoetra ao an-tranon'i Simona mpandon-koditra eo amoron-dranomasina izy, ary izy no hilaza aminao ny tsy maintsy hataonao. ⁷ Nony lasa ilay anjely niteny taminy, dia niantso roa lahy tamin'ny mpanompony Kornely sy miaramila anankiray tia vavaka, anisan'izay nanao raharaha taminy, ⁸ ka rahefa nitantarany ny zavatra rehetra izy ireo, dia nirahiny ho any Jope. ⁹ Nony ampitso, raha mbola teny an-dàlana ireo iraka ireo, ka efa mby akaikin'ny tanàna, Piera kosa niakatra teo ambonin'ny tampon-trano mba hivavaka, tokony ho tamin'ny ora fahenina.

¹⁰ Rahefa izany, dia noana izy ka te-hihinana; kanjo, ny olona nanao nahandro ho azy, izy azon-tsindrimandry. ¹¹ Nahita ny lanitra nisokatra izy sy zavatra anankiray toa lamba lehibe nifatotra tamin'ny zorony efatra, nidina avy any an-danitra ho ety an-tany. ¹² Ary tao anatiny nisy ny biby rehetra manan-tongotra efatra, sy ny biby mandady etý an-tany, ary ny voro-manidina. ¹³ Dia nisy feo nanao taminy hoe: Mitsangàna, ry Piera; mamonoa ka mihinàna. ¹⁴ Fa namaly Piera ka nanao hoe: Sanatria, Tompoko, tsy mbola nihinan-javatra fady sy maloto aho. ¹⁵ Fa hoy indray ilay feo taminy: Aza ataonao ho maloto izay efa nodiovin'Andriamanitra. ¹⁶ Intelo no naverina natao izany; dia nakarina tany an-danitra niaraka tamin'izay ilay zavatra. ¹⁷ Mbola mieritreritra ny hevitry ny zavatra hitany tamin'ny tsindrimandry eo Piera no izay tonga ao am-bavahady ny irak'i Kornely nanontany ny tranon'i Simona.

¹⁸ Dia niantso izy ireo, ka nanontany raha mitoetra ao Simona, izay atao hoe Piera. ¹⁹ Amin'izany Piera dia mbola nieritreritra ny fahitana eo ihany, ka hoy ny Fanahy taminy: Indreo misy olona telo lahy mitady anao; ²⁰ koa mitsangàna, dia midina, ary mandehàna miaraka aminy, fa aza misalasala, satria izaho no naniraka azy. ²¹ Dia nidina niaraka tamin'izay Piera, nanatona ireo lehilahy ireo, ka nanao taminy hoe: Inty aho izay tadiavinareo; inona no anton'ny nahatongavanareo atý? ²² Ary hoy ny navalin'ireo: Kornely kapiteny, lehilahy marina sy matahotra an'Andriamanitra ary ankasitrahan'ny Jody rehetra, no nahazo teny tamin'ny anjely masina anankiray mba hampaka anao ho any an-tranony, sy hihaino ny teninao. ²³ Dia nampiantrano azy mba handry ao i Piera. Nony ampitso, dia niainga niaraka tamin'izy ireo izy mbamin'ny rahalahy sasany tao Jope. ²⁴ Ny ampitson'izay indray, dia niditra tao Sezarea izy. Efa niandry azy izany ry Kornely mbamin'ny havany sy ny sakaiza malalany izay nangoniny. ²⁵ Vao niditra Piera, dia notsenain'i Kornely, ka sady niankohoka teo an-tongony izy no nitsaoka azy. ²⁶ Fa nasain'i Piera nitsangana izy, nataony hoe: Mitsangàna, fa olona ihany aho. ²⁷ Sady niresaka taminy izy no niditra tao an-trano, ary namantana olona betsaka tafavory tao. ²⁸ Dia hoy izy tamin'izy ireo: Fantatrareo fa fady amin'ny Jody ny mikambana amin'ny jentily na ny miantrano ao aminy; nefa nasehon'Andriamanitra ahy, fa tsy misy olona azoko atao hoe maloto na tsy madio. ²⁹ Koa tsy nisalasala aho, fa nandeha raha vao nampanalainareo, ka inona àry izato anton'ny nampangalanareo ahy? ³⁰ Dia hoy Kornely: Hefarana androany izay, raha nivavaka sy nifady hanina tao an-tranoko aho, dia indro nisy lehilahy niakanjo fotsy nitsangana teo anatrehako tamin'ny ora fahasivy, ka nanao hoe: ³¹ Ry Kornely, nekena ny vavakao, ary notsarovana eo anatrehan'Andriamanitra ny fiantranao. ³² Koa maniraha ho any Jope, ampanalao Simona izay atao hoe Piera, mitoetra ao an-tranon'i Simona mpandon-koditra eo amoron-dranomasina, fa izy no hilaza aminao.