Ny Asan'ny Apostoly

Toko faha-23

¹⁰ Vao mainka nitombo anefa ny fifandirana. Efa nataon'ny komandy hotetehin'ny olona teo mihitsy Paoly, ka nasainy nidina ny miaramila haka azy an-kery teo afovoan'ny vahoaka, sy hitondra azy ho any anaty rova. ¹¹ Nony alina dia niseho tamin'i Paoly ny Tompo ka nanao taminy hoe: Matokia, fa tahaka ny nanambaranao ahy tatý Jerosalema no tsy maintsy hanambaranao ahy any Roma koa.

¹² Vao naraina ny andro, dia nisy Jody niray tetika, niozona sy nianiana fa tsy hihinana na hisotro, raha tsy efa nahafaty an'i Paoly.

¹³ Tsy omby efa-polo izy no niray tetika hanao izany. ¹⁴ Dia lasa nanatona ny lehiben'ny mpisorona sy ny loholona izy, ka nanao hoe: Efa nianiana mafy izahay fa tsy hanendry hanina raha tsy efa nahafaty an'i Paoly. ¹⁵ Koa ankehitriny, aoka hianareo sy ny Sanedrina hilaza amin'ny komandy mba hampidina azy hankaty aminareo, mody te-hamototra ny aminy lalindalina kokoa; ary izahay kosa amin'izany dia efa vonon-kamono azy alohan'ny hahatongavany atý. ¹⁶ Ren'ny zanak'anabavin'i Paoly izany teti-dratsy izany, ka nidodododo nankany anaty rova faingana izy, nampandre an'i Paoly.

¹⁷ Dia niantso anankiray tamin'ny kapiteny i Paoly ka nanao taminy hoe: Ento kely ity tovolahy ity ho any amin'ny komandy, fa misy zavatra holazainy aminy. ¹⁸ Dia noraisin'ny kapiteny razazalahy, nentiny tany amin'ny komandy, ka hoy izy: Niangavian'i Paoly mpifatotra hitondra an-drazazalahy ity ho atý aminao aho, fa misy zavatra holazainy aminao, hono. ¹⁹ Noraisin'ny komandy tamin'ny tànany ilay zazalahy, nentiny nitanila kely, dia nanontaniany hoe: Inona no holazainao amiko? ²⁰ Ary hoy ny navaliny: Nifanaiky ny Jody, fa hangataka aminao hampidina an'i Paoly ho eny amin'ny Sanedrina rahampitso, mody hoe hamototra lalindalina kokoa ny aminy; ²¹ nefa aza manaiky izany, fa misy efa-polo mahery izy no niray tetika hamely azy, sady efa nanozon-tena sy nianiana fa tsy hihinana na hisotro ambara-pamonony azy. Ary izao dia efa vonona izy ireo, fa ny teny avy atý aminao sisa andrasany. ²² Dia nalefan'ny komandy razazalahy ka tsy navelany hiteniteny na amin'iza na amin'iza fa hoe nilaza izany taminy izy. ²³ Dia niantso kapiteny roa lahy izy ka nanao tamin'ireo hoe: Manomàna miaramila roan-jato, sy an-tsoavaly fito-polo, ary an-defona roan-jato, hankany Sezarea anio alina amin'ny ora fahatelo.

²⁴ Ary manomàna soavaly hitaingenan'i Paoly koa, hitondranareo azy soa aman-tsara ho any amin'i Félix governora. (Fa natahotra izy sao tsoahan'ny Jody eny Paoly, dia hovonoiny, ka ny tenany indray no ho voahoso-dratsy hoe nandray vola any aoriana any). ²⁵ Dia nanoratra taratasy nisy izao teny izao izy: ²⁶ Avy miarahaba an'i Félix tsara indrindra aho Klaody Lisiasy. ²⁷ Nosamborin'ny Jody ity lehilahy ity, ary efa ndeha hovonoiny; nefa nony fantatro fa hoe Romana izy, dia nitondra miaramila aho ka nanafaka azy. ²⁸ Te-hahalala ny heloka niampangany azy aho, ka nitondra azy nankeo amin'ny Sanedrina. ²⁹ Dia hitako fa ady hevitra momba ny Lalàny no nitoriana azy, fa tsy nanao ratsy tokony hanamelohana azy ho faty na hanaovana azy an-tranomaizina akory izy. ³⁰ Ary izao vao reko indray fa hoe misy Jody miray tetika hamono azy, ka izy moa nampanateriko faingana hankaty aminao; ry zareo mpiampanga azy koa nasaiko hilaza izay itoriany azy atý aminao. Veloma. ³¹ Dia noraisin'ny miaramila i Paoly, ka nentiny nankany Antipatrisy iny alina iny ihany, araka ny didy azony.

³² Nony ampitso, dia ry zareo an-tsoavaly no nasainy nanohy ny dia niaraka taminy, fa izy ireo kosa niverina nankany anaty rova. ³³ Rahefa tonga tany Sezarea izy ireo, dia natolony ny governora ny taratasy, ary narosony teo anatrehany koa i Paoly. ³⁴ Nony voavakin'ny governora ny taratasy, dia nanontany izay faritany nihavian'i Paoly izy, ka nony fantany fa avy any Silisia izy, ³⁵ dia hoy izy hoe: Hihaino anao aho rahefa tonga ny mpiampanga anao. Dia nasainy nambenana tao an-dapan'i Heroda izy.

Toko faha-24

¹ Nony afaka hadimiana, dia tonga i Anania lehiben'ny mpisorona sy ny loholona sasany, ary mpandaha-teny anankiray atao hoe Tertolosa, hiampanga an'i Paoly amin'ny governora.

² Nony nantsoina i Paoly, dia niampanga azy araka izao Tertolosa: Ry Félix tsara indrindra ô, ny fiadanana lehibe azonay taminao, sy ny fitondrana nanasoavanao ity firenena ity tamin'ny zavatra maro, ³ dia raisinay amim-pankasitrahana mandrakariva sy hatraiza hatraiza. ⁴ Fa mba tsy hanahiranako anao ela laotra, dia mihanta amin'ny hamoram-ponao izahay, mba henoy kely izao: ⁵ Io lehilahy io dia hitanay fa mpanimba vahoaka, mpampitabataba ny Jody rehetra amin'izao tontolo izao, filohan'ny antokon'ny Nazareana, ⁶ ary efa nitady hametaveta ny tempoly aza, ka dia io izy nosamborinay: Ny hitsara azy araka ny lalànay no nokasainay. ⁷ Kanjo tonga Lisiasy komandy naka azy an-keriny teo am-pelatànanay, ⁸ sy nandidy ny mpiampanga azy hankaty aminao. Ho hitanao amin'ny fanadinana azy fa marina ny zavatra rehetra iampangana azy. ⁹ Dia nanampy izany koa ny Jody, nilaza fa izany no izy. ¹⁰ Ary rahefa notondroin'ny governora hiteny Paoly, dia namaly ka nanao hoe: Fantatro fa taona maro no efa nitondranao ity firenena ity, ka amin-toky no hitenenako hanala tsiny ny tenako.

¹¹ Tsy mihoatra ny roa ambin'ny folo andro izao no niakarako hivavaka tany Jerosalema, sady azonao fantarina mora foana izany. ¹² Ary tsy nisy nahita ahy niady hevitra tamin'olona tao an-tempoly, na nampitabataba vahoaka tao amin'ny sinagoga, ¹³ na tao an-tanàna. Tsy azony hamarinina velively izao zavatra iampangany ahy izao. ¹⁴ Fa izao no ekeko eto anatrehanao: Izaho dia manompo ny Andriamanitry ny razanay, araka ny làlana lazain'izy ireo hoe antokom-pivavahana; mino ny zavatra rehetra voasoratra ao amin'ny Lalàna sy ny mpaminany aho, ¹⁵ ary manantena amin'Andriamanitra tahaka azy ireo koa, fa samy hitsangana amin'ny maty, na ny olo-marina na ny olo-meloka, ¹⁶ ka noho izany dia nikely aina mandrakariva koa aho mba tsy hotsinin'ny fieritreretako, na eo anatrehan'Andriamanitra, na eo anatrehan'ny olombelona. ¹⁷ Nony afaka taona maro, dia tonga nitondra fiantrana ho an'ny fireneko aho, sy nanolotra fanatitra. ¹⁸ Tamin izay no nahitan'izy ireo ahy tao an-tempoly avy nandio tena, tsy nisy famoriam-bahoaka, na tabataba velively, ¹⁹ fa Jody sasany avy any Asia no teo, ka ireo aza no tokony hiseho eto anatrehanao hiampanga ahy, raha misy izay hiampangany ahy. ²⁰ Na aoka ry zareo ireto ihany no hilaza izay ratsy hitany nataoko, raha niseho teo anatrehan'ny Sanedrina aho; ²¹ afa-tsy raha hoe, heveriny ho heloka angaha ilay teny indraim-bava voalazako teo afovoan'izy ireo hoe: Ny amin'ny fitsanganana ny maty no hitsarana ahy eto anatrehanareo anio. ²² Fantatr'i Félix tsara ny amin'io làlana io, ka noravany ny olona nilazany hoe: Rahefa tonga Lisiasy komandy, dia hofotorako tsara ny raharahanareo.

²³ Dia nasainy nambenan'ny kapiteny i Paoly, nefa avela hiadanadana ihany, ary tsy rarana tsy hanampy azy ny momba azy na iray aza. ²⁴ Nony afaka andro vitsivitsy, dia tonga Félix sy Crosila vadiny, izay vehivavy Jody, ka nampaka an'i Paoly, dia nihaino azy nitory ny finoana an'i Kristy Jesoa.