Ny Fanisana

Toko faha-21

¹³ Niala tao izy, dia nitoby tao an-dafin'i Arnòna, izay mivalana amin'ny efitra, rahefa mivoaka ny faritanin'ny Amoreana; fa Arnòna no faritr'i Moaba, eo anelanelan'i Moaba sy ny Amoreana. ¹⁴ Ka izany no ilazana ao amin'ny bokin'ny Adin'ny Tompo hoe: Lasan'ny Tompo Vaheba mirimorimo fandeha, sy ny ranon-driakan'i Arnòna, ¹⁵ ary ny kisolosolon'ny ranon-driaka izay mitsontsorika mankany amin'ny fitoerana Ara, sy mipaka amin'ny Amoreana. ¹⁶ Avy ao, dia nankany Beera izy. Io ilay fantsakana nilazan'ny Tompo tamin'i Moizy hoe: Angony ny vahoaka ka homeko rano izy ireo.

¹⁷ Tamin'izay no nihira izao tononkira izao Israely: ¹⁸ Misondrota, ry fantsakana! Hobionareo izy. Fantsakana nolavahin'ny andriandahy, nabanabanan'ny lehiben'ny vahoaka, tamin'ny tehina fanapahana, dia ny tehin'izy ireo.

¹⁹ Avy tany an'efitra izy ireo, dia nankany Matanà; avy any Matanà dia nankany Nahaliela; avy any Nahaliela, dia nankany Bamota;

²⁰ avy any Bamota, dia nankany amin'ny lohasaha izay ao amin'ny sahan'i Moaba, eo an-tampon'i Fasgà, izay manerinerina amin'ny efitra. ²¹ Ary Israely nandefa iraka ho any amin'i Sehona, mpanjakan'ny Amoreana, hanao aminy hoe:

²² Avelao aho mba handalo ny taninao: fa tsy hivily ho amin'ny saha izahay, na ho amin'ny tanim-boaloboka; ary tsy hisotro ny rano amin'ny fantsakana; fa hizotra amin'ny làlan'andriana izahay, mandra-pahafakay ny faritaninao. ²³ Tsy navelan'i Sehona handalo ny faritaniny Israely, fa nanangona ny vahoakany rehetra izy, ka nivoaka hitsena an'Israely, tany an'efitra; dia tonga tany Jasà ary rafitra ady tamin'Israely. ²⁴ Israely namely azy tamin'ny lelan-tsabatra, ka nahazo ny taniny hatrany Arnòna ka hatrany Jabaoka, hatreo amin'ny zanak'i Amona, fa mafy ny faritry ny tanin'ny zanak'i Amona. ²⁵ Nalain'Israely avokoa izany tanàna rehetra izany, ka nonenan'Israely ny tanànan'ny Amoreana rehetra, dia Hesebona sy ny zana-bohiny rehetra. ²⁶ Hesebona no tanànan'i Sehona, mpanjakan'ny Amoreana, izay efa nanafika ny mpanjakan'i Moaba taloha sy naka ny taniny rehetra hatrany Arnòna. ²⁷ Izany no nanaovan'ny mpanao tononkira hoe: Midira ao Hesebona hianareo. Aoreno indray ka hamafiso ny tanànan'i Sehona. ²⁸ Fa nisy afo nivoaka avy tao Hesebona, Ary lelafo avy tao an-tanànan'i Sehona, Ka nandevona an'i Ara-Moaba, Dia ny tompon'ny havoan'i Arnòna.

²⁹ Loza ho anao, ry Moaba! Levona hianao, ry vahoakan'i Kamosy; Nafoiny ny zanany lahy nandositra, Ary ny zanany vavy lasan-ko babo Ho an'i Sehona, mpanjakan'ny Amoreana.

³⁰ Nolefasantsika zana-tsipìka izy ireo; Rava Hesebona hatrany Dibona, Ary nofoanantsika hatrany Nofe, Sy norehetantsika hatrany Medabà.

³¹ Dia nitoetra teo amin'ny tanin'ny Amoreana Israely. ³² Naniraka olona hisafo an'i Jazera Moizy; dia afak'izy ireo ny zana-bohiny, ka noroahiny ny Amoreana tamin'ireny. ³³ Izay izy, dia niova làlana ka niakatra ny làlana mankany Basàna; Nivoaka Oga, mpanjakan'i Basàna, mbamin'ny vahoakany rehetra nitsena azy ireo, mba hiady aminy ao Edraìa.

³⁴ Ary hoy Iaveh tamin'i Moizy: Aza matahotra azy, fa atolotro eo an-tànanao izy mbamin'ny vahoakany rehetra, ary ny taniny, ka ataovy toy ny nanaovanao an'i Sehona, mpanjakan'ny Amoreana izay nonina tao Hesebona. ³⁵ Dia nandresy azy mbamin'ny zanany lahy sy ny vahoakany rehetra izy ireo; tsy nasiany niangana na dia iray aza, ka azony ny taniny.

Toko faha-22

¹ Dia nandroso ny zanak'Israely ka nitoby teo amin'ny lohasahan'i Moaba, tandrifin'i Jerikao.

² Hitan'i Balàka zanak'i Sefora, izay rehetra nataon'Israely tamin'ny Amoreana,

³ ary tsiravina indrindra Moaba teo anatrehan'ity vahoaka ity, fa maro be; nangorohoro fatratra izy teo anatrehan'ny zanak'Israely. ⁴ Hoy Moaba tamin'ny loholon'i Madiana: Holevonin'ity vahoaka be ity, toy ny fandevon'ny omby ny zava-maitso any an-tsaha izay rehetra manodidina antsika. Balàka, zanak'i Sefora no mpanjakan'i Moaba tamin'izay. ⁵ Ka naniraka olona izy ho any amin'i Balaama, zanak'i Beora, any Petora, izay eo amoron'ny ony, eo amin'ny tanin'ny zanaky ny vahoakany, mba hiantso azy sy hanao aminy hoe: Indro misy vahoaka nivoaka avy any Ejipta, rakotra azy ny tany, ary tandrify ahy no itobiany. ⁶ Koa mihanta aminao aho, tongàva aty amiko hianao, hanozona io vahoaka io fa mahery noho izaho izy; angamba izany no hahazoako mandresy azy sy mandroaka azy hiala amin'ny tany; satria fantatro fa izay tsofinao rano dia voatso-drano ary izay ozoninao dia voaozona. ⁷ Niainga ny loholon'i Moaba sy ny loholon'i Madiana, nataony an-tànana ny tambin'ilay mpanandro. Nony tonga tany amin'i Balaama izy ireo, dia nambarany azy ny tenin'i Balàka,

⁸ ary hoy Balaama taminy: Mandria aty anio alina, fa homeko valiny, araka izay hambaran'ny Tompo amiko hianareo. Dia tafajanona tao amin'i Balaama ireo andriandahin'i Moaba. ⁹ Ary tonga tamin'i Balaama Andriamanitra ka nanao hoe: Iza moa ireo olona ato aminao ireto?

¹⁰ Dia hoy ny navalin'i Balaama an'Andriamanitra: Balàka, zanak'i Sefora mpanjakan'i Moaba no naniraka an'ireo hilaza amiko hoe: ¹¹ Indro ilay firenena nivoaka avy tany Ejipta fa mandrakotra ny tany, tongàva aty amiko àry ka hanozona azy hianao; izany angamba no hahazoako mandresy azy sy mandroaka azy. ¹² Fa hoy Andriamanitra tamin'i Balaama: Aza mandeha miaraka amin'ireo, ary aza manozona izany vahoaka izany, fa nohasoavina izy. ¹³ Nony nifoha Balaama, ny maraina, dia nilaza tamin'ireo andriandahin'i Balàka hoe: Mandehana any amin'ny taninareo, fa lavin'ny Tompo ka tsy avelany handeha miaraka aminareo aho. ¹⁴ Dia nitsangana tamin'izay ireto andriandahin'i Moaba, ka lasa niverina tany amin'i Balàka, sy nilaza taminy hoe: Nandà Balaama ka tsy nety nandeha niaraka taminay. ¹⁵ Fa naniraka andriandhy sady maro no ambony noho ny teo indray Balàka.

¹⁶ Ka nony tonga tany amin'i Balaama ireo, dia nanao taminy hoe: Izao no tenin'i Balàka zanak'i Sefora: Mihanta aminao re aho, mba tsy hisy hahasakana anao tsy hankaty amiko, ¹⁷ fa homeko voninahitra lehibe indrindra hianao, ary hotanterahiko avokoa izay rehetra holazainao amiko. Koa mihanta aminao re aho, tongàva aty amiko, ozony io vahoaka io. ¹⁸ Dia namaly Balaama, ka nanao tamin'ny mpanompon'i Balàka hoe: Na homen'i Balàka volafotsy sy volamena eran'ny tranony aza aho, dia tsy mahazo mandika ny tenin'ny Tompo Andriamanitro aho, ka hanao zavatra na kely na lehibe. ¹⁹ Ary ankehitriny, mihanta aminareo aho mba hijanona aty indray koa hianareo anio alina, hahafantarako izay holazain'ny Tompo amiko indray. ²⁰ Nony alina dia tonga tamin'i Balaama Andriamanitra ka nanao taminy hoe: Raha tonga hiantso anao ireo olona ireo, dia mitsangàna, ka mandehana miaraka aminy, nefa izay holazaiko aminao ihany no hataonao. ²¹ Dia nifoha Balaama nony maraina, nanisy lasely ny ampondravaviny ka nandeha niaraka tamin'ny andriandahin'i Moaba. ²² Nirehitra anefa ny fahatezeran'Andriamanitra raha nandeha izy ka nankeo amin'ny làlana ny anjelin'ny Tompo hisakana azy. Nitaingina ny ampondrany Balaama ary narahin'ny mpanompony roa lahy. ²³ Hitan'ity ampondra ilay anjelin'ny Tompo nijanona teo an-dàlana sy nitana sabatra voatsoaka teny an-tànany, ka nivily làlana nankany anaty saha izy. Nokapohin'i Balaama ny ampondrany, hampiverenany azy amin'ny làlany indray. ²⁴ Tamin'izay ilay anjelin'ny Tompo, dia nibahana teo an-dàlana an-kandemponana anankiray, tanelanelan'ny tanim-boaloboka, voafefy eo an-daniny roa. ²⁵ Nony nahita ilay anjelin'ny Tompo ilay ampondra dia nitampisaka manaraka ny rindrina, ka voatery tamin'ny rindrina ny tongotr'i Balaama, dia nikapoka azy indray izy. ²⁶ Nandroso lavidavitra kokoa ny anjelin'ny Tompo nijanona tamin'ny toerana ety anankiray, izay tsy misy hidifiana akory, na ho amin'ny an-kavanana na ho amin'ny an-kavia. ²⁷ Nony nahita ilay anjelin'ny Tompo ity ampondra, dia nandry teo ambanin'i Balaama; ary nirehitra ny fahatezeran'i Balaama, ka nokapohiny tamin'ny tehina ny ampondra.