Ny Fanisana

Toko faha-22

²⁸ Nosokafan'ny Tompo ny vavan'ity ampondra ka nilaza tamin'i Balaama hoe: Naninona anao aho no dia nokapohinao intelo izao? ²⁹ Dia hoy ny navalin'i Balaama tamin'ny ampondra: Satria namazivazy ahy hianao, ka raha nisy sabatra tety an-tànako dia matiko ankehitriny izao ihany hianao. ³⁰ Hoy ny ampondra tamin'i Balaama: Moa tsy ampondranao va aho, ka efa notaingenanao mandrakariva hatramin'izao? Moa mba fanaoko va ny manao toy izao aminao? Dia hoy ny navaliny: Tsia. ³¹ Nosokafan'ny Tompo ny mason'i Balaama, dia hitan'i Balaama ilay anjelin'ny Tompo izay teo an-dàlana teo sady nitana sabatra voatsoaka teny an-tànany, ka niondrika sy niankohoka tamin'ny tany izy.

³² Dia hoy ilay anjelin'ny Tompo taminy: Ahoana no nikapohanao ny ampondranao intelo izao? Indro nivoaka hisakana anao aho, satria araka ny hitako, làlana mamarina anao amin'ny loza no ombanao. ³³ Nahita ahy ny ampondra, ka nitanila teo anatrehako intelo izao; raha tsy nitanila teo anatrahako izy, dia hianao no nataoko maty, fa izy navelako ho velona aina. ³⁴ Ary hoy Balaama tamin'ny anjelin'ny Tompo: Efa nanota aho, fa tsy fantatro hoe teo anoloako hianao, ary ankehitriny raha tsy sitrakao izao, dia hody aho. ³⁵ Hoy ny anjelin'ny Tompo tamin'i Balaama: Mandehana ihany miaraka amin'ireo lehilahy ireo, nefa aza milaza zavatra hafa afa-tsy izay holazaiko aminao. Dia nandeha Balaama, niaraka tamin'ny andriandahin'i Balàka. ³⁶ Nony ren'i Balàka fa tamy Balaama, dia nivoaka izy hitsena azy hatrany amin'ny tanàna Moaba eo amin'ny faritr'i Arnòna, any amin'ny sisin-tany indrindra. Hoy Balàka tamin'i Balaama:

³⁷ Moa tsy efa naniraka tany aminao va aho, nampaka anao? Nahoana no dia tsy nankaty amiko hianao? Sa dia tsy hahay manome voninahitra anao marina tokoa aho? ³⁸ Hoy Balaama tamin'i Balàka: Indro aho mankaty aminao; fa ankehitriny moa ho afa-milaza na inona na inona va aho? Ny teny hataon'Andriamanitra ao am-bavako no holazaiko. ³⁹ Niainga niaraka tamin'i Balàka Balaama ka tonga tany Kiriata-Kotsota izy ireo.

⁴⁰ Namono omby aman'ondry hatao sorona Balàka, ka nampanateriny ho an'i Balaama sy ireo andriandahy teo aminy izany. ⁴¹ Nony maraina, nalain'i Balàka i Balaama, ka nentiny niakatra ho ao Bamota-Baala, izay nahatazanan'i Balaama ny vody làlan'ny vahoaka.

Toko faha-23

¹ Hoy Balaama tamin'i Balàka: Anangano otely fito eto aho, ary manomàna vantotr'ombalahy fito sy ondralahy fito eo koa.

² Nataon'i Balàka izay nolazain'i Balaama, ary samy nanateran'i Balàka sy Balaama vantotr'ombalahy iray sy ondralahy iray avy teo ambonin'ny otely. ³ Hoy Balaama tamin'i Balàka: Mitoera hianao eo anilan'ny sorona dorana, fa izaho kosa hihataka; angamba ho avy hihaona amiko Iaveh, ary na inona na inona hasehony amiko, dia holazaiko anao. Dia lasa izy nankany amin'ny havoana anankiray mangadihady. ⁴ Tonga nihaona tamin'i Balaama tokoa Andriamanitra, ka hoy Balaama taminy: Efa nanangana ny otely fito aho, ary efa nanatitra vantotr'ombalahy iray sy ondralahy iray avy isan'otely.

⁵ Dia nanisy teny tao am-bavan'i Balaama Iaveh sy nanao taminy hoe: Miverena any amin'i Balàka, ka izao sy izao no lazaina aminy. ⁶ Niverina nankany aminy izy, ka inty Balàka sy ireo andriandahin'i Moaba nitoetra teo anilan'ny sorona dorany; ⁷ ka nilaza ny lahateniny Balaama nanao hoe: Balàka nampaka ahy avy tany Arama; Ny mpanjakan'i Moaba nampaka ahy, avy tany an-tendrombohitry ny Atsinanana; Avia, ozony Jakoba!

⁸ Hataoko ahoana no fanozona raha tsy manozona Andriamanitra? Hataoko ahoana no fahatezitra raha tsy mitezitra Iaveh?

⁹ Fa eto am-tampon'ny vatolampy aho mahita azy, Ary eto ambony havoana aho mahatazana azy; Ka firenena manana fitoerana manokana izy, Fa tsy mba hampidirina amin'ny fanisana ny firenena.

¹⁰ Iza no mahisa ny vovok'i Jakoba, Na mahisa ny ampahefatr'Israely? Enga anie ka ho toy ny fahafatin'ny olo-marina ny fahafatiko, Ary hanahaka ny fiafaràny ny fiafaràko!

¹¹ Dia hoy Balàka tamin'i Balaama: Fa inona ity nataonao tamiko, no hanozona ny fahalavoko no nangalako anao, kanjo vao mainka mitso-drano ihany no ataonao?

¹² Fa hoy ny navaliny nanao hoe: Moa tsy tokony hotandremako va ny hilaza izay ataon'ny Tompo ato am-bavako? ¹³ Dia hoy Balàka taminy: Andeha hiaraka amiko hianao ho any amin'ny toeran-kafa izay hahitanao azy nefa ny sisiny ihany no ho hitanao, fa tsy ho izy manontolo, ary any dia ozòny izy. ¹⁴ Dia nentiny nankany an-tsahan'ny Tily, an-tampon'i Fasgà izy, ka nony efa nanangana otely fito, dia nanatitra vantotr'ombalahy iray sy ondrilahy iray avy isan'otely izy. ¹⁵ Ary hoy Balaama tamin'i Balàka: Mitoera hianao eto anilan'ny sorona doranao; fa izaho handeha ary hihaona amin'ny Tompo. ¹⁶ Dia tonga nihoana tamin'i Balaama Iaveh ka nanisy teny tao am-bavany, ary nilaza hoe: Miverena any amin'i Balàka, ka izao sy izao no holazainao. ¹⁷ Niverina tany amin'i Balàka izy, ary indro nitoetra teo anilan'ny sorona dorany izy mbamin'ny andriandahin'i Moaba. Dia hoy Balàka taminy: Inona no nolazain'ny Tompo?

¹⁸ Ary Balaama nilaza ny laha-teniny ka nanao hoe: Mitsangàna, ry Balàka, ka mihainoa, Mampandria sofina, ry zanak'i Sefora:

¹⁹ Tsy olombelona Andriamanitra ka handainga, Na zanak'olombelona ka hanenina. Moa mba milaza fotsiny va izy fa tsy manatanteraka, Na miteny ihany fa tsy manefa?

²⁰ Indro efa nahazo teny hitso-drano aho; Izy efa nitso-drano, ka tsy hanova izany aho.

²¹ Tsy mahita faharatsiana amin'i Jakoba izy, Tsy mahita tsy fahamarinana amin'Israely. Iaveh Andriamaniny no momba azy; Fihobiana mpanjaka no manakoako ao aminy;

²² Andriamanitra no mamoaka azy avy tany Ejipta, Ary manan-kery toy ny ombimanga izy.

²³ Noho ny tsy fisian'ny fanandroana eo amin'i Jakoba, Sy ny tsy fisian'ny sikidy eo amin'Israely, Dia holazaina amin'i Jakoba sy Israely amin'ny fotoana mety Izay tian'Andriamanitra hotanterahina.

²⁴ Indro firenena miarina toy ny liom-bavy, Sy mitsangana mova tsy ny liona! Tsy mandry izy raha tsy nihinana ny hazany, Sy efa nisotro ny ran'ny voaratra.

²⁵ Dia hoy Balàka tamin'i Balaama: Aza manozona azy, ary aza mitso-drano azy.

²⁶ Fa hoy ny navalin'i Balaama an'i Balàka nanao hoe: Moa tsy efa niteny taminao va aho nanao hoe: izay holazain'ny Tompo hataoko avokoa? ²⁷ Hoy Balàka tamin'i Balaama: Andeha àry hianao hoentiko any amin'ny toeran-kafa, fa angamba ho sitrak'Andriamanitra ny hanozonanao azy any. ²⁸ Dia nentin'i Balàka Balaama ho any an-tampon'i Fogora izay manerinerina amin'ny efitra. ²⁹ Ary hoy Balaama tamin'i Balàka: Anangano otely fito eto aho, ary manomàna eto ombalahy fito sy ondralahy fito koa. ³⁰ Nataon'i Balàka izay nolazain'i Balaama; ary nanatitra ombalahy sy ondralahy iray avy isan'otely izy.

Toko faha-24

¹ Hitan'i Balaama fa ny hitso-drano an'Israely no sitra'Iaveh ka tsy nandeha hizaha famantarana avy amin'ny fanandroana toy ny teo intsony izy, fa natodiny ny tavany hanatrika ny efitra.

² Ary nony natopiny ny masony, dia nahita an'Israely nitoby isam-pokony izy, ary notsindrian'ny Fanahin'Andriamanitra izy, ³ ka nilaza ny lahateniny nanao hoe: Faminanian'i Balaama zanak'i Beora; Faminanian'ny lehilahy voakimpy ny masony; ⁴ Faminanian'ilay mandre ny tenin'Andriamanitra, Izay mibanjina ny fahitana avy amin'ny Tsitoha, Izay lavo ka misokatra ny masony:

⁵ Endrey ity hatsaran'ny lainao, ry Jakoba! Ary izato fonenanao, ry Israely!

⁶ Midadasika toa lohasaha, Tahaka ny zaridaina amoron'ny ony, Tahaka ny aloesy nambolen'ny Tompo, Tahaka ny sedera amoron-drano!