Ny Fanisana

Toko faha-24

⁷ Mitobaka ny rano amin'ny sininy roa, Ny taranany mitombo eo amoron'ny rano be dia be; Ny mpanjakany misandratra ambonin'i Agaga, Ary ny fanjakany mandroso voninahitra.

⁸ Nentin'Andriamanitra nivoaka avy tany Ejipta izy, Ary nomeny azy ny herin'ny ombimanga. Mandevona ny firenena miady aminy izy, Manapaka ny taolany Sy mandripaka azy amin'ny zana-tsipìkany.

⁹ Manongalika izy ary mandry toy ny liona, Toy ny liom-bavy, ka zovy no hampifoha azy? Hohasoavina anie izay hitso-drano anao! Hovoaozona anie izay hanozona anao!

¹⁰ Dia nirehitra tamin'i Balaama ny fahatezeran'i Balàka, ka niteha-tànana izy; ary hoy Balàka tamin'i Balaama hoe: Ny hanozona ny fahavaloko no niantsoako anao, kanjo ny mitso-drano azy ihany kosa no nataonao efa intelo izao.

¹¹ Koa ankehitriny mandosira any aminao. Efa nilaza hanome voninahitra anao be dia be aho, fa indro kosa ampanalavirin'ny Tompo anao ny voninahitra. ¹² Hoy ny navalin'i Balaama an'i Balàka: Tsy efa voalazako tamin'ny iraka nalefanao tany amiko va, fa hoe: ¹³ Na dia homen'i Balàka volafotsy sy volamena eran'ny tranony aza aho, dia tsy hahazo mandika ny tenin'ny Tompo, ka hanao na inona na inona, na soa na ratsy amin'ny nahim-poko, fa izay holazain'ny Tompo ihany no holazaiko. ¹⁴ Ary indro handeha ho any amin'ny fireneko aho izao; koa etsy hianao, hilazako rahateo izay hataon'ity vahoaka ity amin'ny vahoakanao, any aoriana any. ¹⁵ Dia nilaza ny lahateniny Balaama ka nanao hoe: Faminanian'i Balaama zanak'i Beora, Faminanian'ny lehilahy voakimpy ny masony, ¹⁶ Faminanian'ilay mandre ny tenin'Andriamanitra, Izay mahalala ny fahaizan'ny Avo indrindra, Izay mibanjina ny fahitan'ny Tsitoha, Izay lavo ka misokatra ny masony:

¹⁷ Hitako izy, fa tsy toy ny ankehitriny, Tazako izy fa tsy mba akaiky. Misy kintana iray miposaka avy amin'i Jakoba, Tehim-panjakana iray mitsangana avy amin'Israely. Mandrava an'i Moaba eo an-daniny roa izy, Ary mandringana ny zanaky ny fitabatabana rehetra.

¹⁸ Edoma dia lasan-ko fananany: Fa Israely manampatra ny herim-pony.

¹⁹ Misy mpanapaka avy amin'i Jakoba, Ka haringany eny an-tanàna ny sisa tavela.

²⁰ Dia nahita an'i Amaleka Balaama ka nilaza lahateniny nanao hoe: Amaleka no voalohany amin'ny firenena, Fa ho lany ringana no hiafarany.

²¹ Nahita ny Kineana Balaama, ka nilaza ny lahateniny nanao hoe: Mafy orina ny fonenanao, Voapetraka ambonin'ny vatolampy ny akaninao;

²² Nefa handroso hihalevona ny Kineana; Ambara-pahoviana? Hoentin'i Asora babo izy.

²³ Dia nilaza ny lahateniny Balaama nanao hoe: Indrisy! zovy no ho velona rahefa hanao izany Andriamanitra? Misy sambo avy any Sitima, ²⁴ Mampahory an'i Asora, mampahory an'i Hebera, Fa efa raikitra fa ho ringana koa izy. ²⁵ Dia niainga Balaama ary nandeha ka niverina ho any aminy. Ary Balàka koa dia mba lasa nandeha.

Toko faha-25

¹ Nandritra ny nipetrahan'Israely tao Setima, dia rafitra nijangajanga tamin'ny zanakavavin'i Moaba ny vahoaka,

² ary ireo nanasa ny vahoaka ho amin'ny fisoronana nataony tamin'ny andriamaniny, ka nihinana sy niankohoka tamin'ny andriamaniny ny vahoaka. ³ Niray tamin'i Beelfegora Israely, ka nirehitra tamin'Israely ny fahatezeran'ny Tompo. ⁴ Hoy Iaveh tamin'i Moizy: Vorio daholo ny filohan'ny vahoaka rehetra, ka ahantony tandrifin'ny masoandro, eo anatrehan'ny Tompo, ireo ratsy, mba hitsaharan'ny firehetan'ny fahatezeran'ny Tompo amin'Israely. ⁵ Dia hoy Moizy tamin'ny mpitsaran'Israely: Samia hianareo mamono ny olom-peheziny izay niray tamin'i Beelfegora. ⁶ Ary inty nisy lehilahy anankiray amin'ny zanak'Israely tamy mitari-behivavy Madianita anankiray nankeo amin'ny rahalahiny, teo imason'i Moizy sy ny fiangonana'ny zanak'Israely rehetra, izay nitomany teo amin'ny varavaran'ny trano lay fihaonana.

⁷ Vao nahita izany Finea, zanak'i Eleazara, zanak'i Aarona mpisorona, dia nitsangana avy teo afovoan'ny fiangonana; nitondra lefona teny an-tànany, ⁸ nanaraka ilay lehilahy Israelita tao anatin'ny lay ka nandefona azy roroa, dia ralehilahy Israelita sy ilay vehivavy, tamin'ny kibony. Nitsahatra tamin'izay ny loza teo amin'ny zanak'Israely. ⁹ Nisy efatra arivo sy roa alina no matin'ny loza. ¹⁰ Niteny tamin'i Moizy Iaveh ka nanao hoe:

¹¹ Finea, zanak'i Eleazara, zanak'i Aarona, mpisorona, no nampiala ny hatezerako tamin'ny zanak'Israely, satria noho izy nazoto nitandro ny voninahitro teo afovoan'izy ireo, dia tsy nandringana ny zanak'Israely aho tamin'ny fahazotoako hitandro ny voninahitro. ¹² Koa noho izany dia ilazao izy fa omeko ny fanekem-pihavanako; ¹³ dia ho faneken'ny fisoronana mandrakizay, ho azy sy ny taranany mandimby azy, noho izy saro-piaro ho an'Andriamaniny, sy nanao ny fanonerana ho an'ny zanak'Israely. ¹⁴ Zamarì no anaran'ilay lehilahy Israelita, niara-novonoina tamin-dravehivavy Madianita; zanak'i Salò izy, sady filoham-pianakaviana tamin'ny Simeonita.

¹⁵ Ary Kozbì no anaran'ilay vehivavy Madianita novonoina, zanak'i Sora, filoham-poko, amin'ny fokom-pianakaviana, any Madiana izy. ¹⁶ Niteny tamin'i Moizy Iaveh nanao hoe:

¹⁷ Ataovy fahavalonareo ny Madianita, ka vonoy ireny, ¹⁸ fa niseho ho fahavalonareo tamin'ny nataony anareo, raha nanangoly anareo tamin'ny hafetseny izy; ary Fogora no nentiny hanao izany, sy Kozbì koa, zanakavavin'ny lehibe anankiray any Madiana anabaviny, izay novonoina tamin'ny andron'ny loza nitranga noho ny amin'ny Fogora.

Toko faha-26

¹ Taorian'izany loza izany, dia niteny tamin'i Moizy sy Eleazara zanak'i Aarona mpisorona Iaveh nanao hoe:

² Alao isa ny fiangonan'ny zanak'Israely rehetra, hatramin'ny roapolo taona no ho miakatra, araka ny fokom-pianakaviany avy, dia ny lehilahy rehetra mahatam-piadiana amin'Israely. ³ Dia nilaza tamin'ny olona Moizy sy Eleazara mpisorona, tao amin'ny tany lemak'i Moaba, akaikin'i Jordany, tandrifin'i Jerikao, ka nanao hoe: ⁴ Hisaina ny hatramin'ny roapolo taona no ho miakatra, araka ny nandidian'ny Tompo an'i Moizy sy ny zanak'Israely, raha nivoaka avy tany amin'ny tany Ejipta izy ireo. ⁵ Robena lahimatoan'Israely, zana-dRobena: ny fokon'ny Henokita avy tamin'i Henoka; ny fokon'ny Faloita avy tamin'i Falò;

⁶ ny fokon'ny Hesronita avy tamin'i Hesrona; ny fokon'ny Karmita avy tamin'i Karmì. ⁷ Ireo no fokon'ny Robenita, telopolo amby fiton-jato sy telo arivo sy efatra alina izy no voaisa. ⁸ Zanak'i Falò, dia Eliaba. ⁹ Zanak'i Eliaba dia Namoela sy Datàna ary Abirona. Ireo ilay Datàna sy Abirona, isan'ny mpanolo-tsaina, nikomy tamin'i Moizy sy Aarona tanatin'ny tarik'i Kore, fony izy nikomy tamin'ny Tompo, ¹⁰ ary nivava ny tany nitelina azy ireo mbamin'i Kore, raha levona izany anotokony izany, ka voadoron'ny afo ny lehilahy dimampolo sy roan-jato, ka tonga fananarana izy ireo. ¹¹ Fa tsy maty ny zanak'i Kore. ¹² Zanak'i Simeona araka ny fokony avy, ny fokon'ny Namoelita avy tamin'i Namoela; ny fokon'ny Jaminita, avy tamin'i Jamina,

¹³ ny fokon'ny Jakinita avy tamin'i Jakina, ny fokon'ny Zareita avy tamin'i Zare, ny fokon'ny Saolita avy tamin'i Saoly.